من وصفات ابو الشباب المفضلة , الي على اد ما بيحبها و بيتنغم فيها , صرت حبها و اكلها مع انو انا بالاساس مو كتير صحبة مع البتنجان .
بحلب منسمي الوصفة مسقعة الباذنجان و في الشام بيسموها منسفة الباذنجان . الطريقة المذكورة في الوصفة هي طريقة حماتي و هيك صرت اطبخها , اما امي بتحضرها بطريقة شوي مختلفة , تقشر البانجان و تقليه بالزيت حتى يشقر بعدها تطبخه مع اللحمة من دون بصل و الطريقتان لطيبات و الطعم مختلف كتير مع انو المقادير نفسها تقريباً .
هلا أكيد الطبخة اصولها بالسمنة و هي رح تعطيها طعمة طيبة كتير , بس على اعتبار اني دوما بحاول خفف من استعمال السمنة لاقل شي ممكن , صرت حضرها بزيت الزيتون و عم تطلع بتاخد العقل , جربيها و ان شاء الله ما بتندمي .
منحضر أطباق كثيرة بنفس المبدأ باستعمال نوع واحد من الخضرة مع لحمة و بصل و بس , و رح نزل بكرة إذا الله راد مسقعة القرع و هي بتنطبخ بنفس الطريقة بس بتقديم مختلف ..
بالصحة و الهنا
2 كيلو باذنجان من النوع الكبير 1 – 2 ملعقة كبيرة سمنة بلدية او ثلث كوب زيت زيتون حبة كبيرة بصل , مفروم ناعماً نصف كيلو لحمة مفرومة ملعقة صغيرة بهار مشكل ملح
للتزيين :
لوز أو صنوبر محمص
·يغسل البانجان و لا يقشر ثم يقطع لمكعبات متوسطة الحجم .
·تقلى البصلة بالسمنة او الزيت في قدر غير لاصق حتى تطرى و تصفر , ثم تضاف اللحمة و البهار و تقلب على نار متوسطة حتى تنضج اللحمة و تمتص مرقها .
·يضاف الباذنجان المقطع و يقلب حتى تمتزج المقادير جيداً , تهدى النار و يغطى الوعاء و لا يضاف أي مقدار من الماء .
·تقلب المنسفة بلطف كل عشر دقائق و ذلك بهز القدر كي لا يتغير شكل حبات الباذنجان و تترك حتى تنضج و يجف مرقها حوالي 45 - 60 دقيقة .
·تقدم مع الرز المفلفل و اللبن الزبادي وأ مخلل الخيار أو المقتي و يمكن أن تقدم مع الخبز العربي عوضاً عن الرز .
تعليقات (6)
