L2ma.com | لقمة طيبة | L2ma.com | لقمة طيبة | كعك العيد | وصفة, صغيرة, · , حتى, ملعقة | L2ma.com

القائمة الرئيسية

الأكثر تصفحاً

كعك العيد

الكاتب/ منى

23/07/2008

فطورنا , كعك و جبنة و كاسة شاي .. اتفضلي

كعك العيد

لكل منّا دفترها الخاص الذي تودعه وصفاتها أو وصفات أمها و حماتها أو وصفات المعارف و الأصدقاء , و دفتري من كثر ما امتلئ بالوصفات , أصبح ثلاث دفاتر من الكنوز المخبوءة التي تنتظر الوقت و المناسبة الملائمة للظهور علنا بعد أن ملت البقاء حبيسة رهن ورقات و بضع سطور ..

و لكل وصفة اسم و إشارة لصاحبتها , ما يعطيني تلميحاً عن نفس صاحبة الوصفة أولا و صدقها ثانياً , لأننا اليوم وصلنا لزمن أصبح فيه مجرد إعطاء وصفة صحيحة يحتاج لصدق كبير و كرم أخلاق عظيم !!

لا شك أن لكل واحدة مننا قصة أو تجربة لوصفة أخذتها من إحدى "الصديقات" لم تلبث أن تحولت لفشل فظيع , ااااايه , فتقتولي جروحاتي ..

المهم , كنت في زيارة لصديقتي هبة يوم الثلاثاء الماضي و هي من الصديقات التي لا أستطيع أن أقاوم أي طبق أعدته , لنفسها اللذيذ و لجمال تقديمها للوصفات ..

تذوقت عندها العديد من الأطايب التي أخذت وصفاتها و سأجربها واحدة واحدة إن شاء الله لأنزلها في الموقع مصورة و جاهزة , المهم تذوقت عندها موالح لذيذة جداً , لجمال منظرها و للذتها اعتقدت أنها جاهزة من السوق لكنها فاجأتني بأنها من إعداد أمها التي تكرمت بإعطائي الوصفة و هي الوصفة التي كنت أبحث عنها منذ زمن , وصفة كعك العيد المالح ..

بعد أن عدت للبيت , أحضرت دفتري و سجلت الوصفة ثم بدأت أقلب فيه , و لمفاجأتي وجدت وصفة أخذتها من إحدى الأقارب منذ أكثر من سبع سنين , وصفة لها نفس المقادير تقريباً !!

دمجت وصفة نهلة و وصفة أم هبة مع تشكيلة البهارات التي أعطتني إياها عمتي و حضرت الوصفة , و النتيجة لذيذة جداً .

بالصحة و الهنا

4 كوب طحين كاتو
باكيت زبدة من نوعية ممتازة
كوب صغير زيت
ملعقة صغيرة ملح
ملعقة صغيرة سكر
2 ملعقة صغيرة بيكنغ بودر ( باكيت )
نصف إلى كوب ماء بارد
ملعقة كبيرة حبة بركة ( أو أقل )
ملعقة صغيرة سمسم أبيض

دقة الكعك :

ملعقة كبيرة محلب
نصف ملعقة صغيرة كمون
نصف ملعقة صغيرة شمرة
نصف ملعقة صغيرة يانسون
direction

· توضع البهارات الصحيحة في هاون و تدق حتى تصبح ناعمة .

· يخلط الطحين مع الملح و السكر و البيكنغ بودر و باقي البهارات ثم يدعك بالزيت و الزبد حتى يتشكل لدينا مزيج يشبه الرمل .

تدعك الزبدة و الزيت بالطحين أولا , هذه الخطوة ستجهل الكعك مقرمش

· يضاف الماء بالتدريج حتى الحصول على عجينة ناعمة و يراعى عدم العجن الزائد , تعجن المقادير فقط حتى تصبح لدينا عجينة متجانسة و قابلة للتشكيل .

تدعك المقادير بلطف لحتى يصير عندتا عجينة , من دون عجن زيادة

· تترك العجينة ترتاح لمدة نصف ساعة ثم تقطع و تبرم بين الأصابع لتشكيل أصابع طويلة , تقطع الأصابع و تلف بهيئة كعكات , و الحجم حسب الرغبة .

تشكل العجينة بشكل كعكات بحسب الحجم المرغوب , لأطفالي أحضر الحجم الصغير

· يصف الكعك على صينية مغطاة بورق الزبدة و تخبز في الفرن المحمى مسبقاً على درجة 180 مئوية لمدة ربع ساعة على الرف الأوسط ثم تشعل لبضع ثواني من فوق حتى تحمّر .

· يرفع الكعك عن الصينية و يترك حتى يبرد ثم يحفظ في وعاء محكم الإغلاق .

· يقدم الكعك مع كوب من الشاي الساخن و الجبنة البيضاء .

أضافة إلى المفضلة (2) |

أقتباس | مشاهدات : 8360

تعليقات (50)

1 الكاتب تورتاية بالكريز, on 24-07-2008 17:32
الله يعطيكي العافية اخت منى وذكرك بما ينفعك يارب والله حديثك ذو شجون ذكرتيني باخت ياما اهديتها وصفاتي المجربة بادق تفاصيلها وتفاجئت بيها مرة تحضر طبق اعجبني وترفض منا اصدقائها عدم متابعتها لانهوصفتها التي تتميز بها ولاتعطي اسرارها لاحد عدا عن ذلك فانها تحضر وصفاتي ولاتشير لي بحرف جبر خاطر الانسان طيب يرتجي رضا المولى عز وجل لكن ايضا تاسره الكلمة الطيبة والتقدير ولو بحرف
المهم كعكاتك بياخدوا العقل ياقمر ومدونة وصفاتك وسردك اليوم غير شكل حقيقي من زمان شفت وصفة مشابهة لاناهيد سمتها كعك بحليب بس كعكاتك فيهم نسبة دسم وبهار منوع اكتر شوي وشكلهم اكتر من رائع ياقمر كل الشكر لك غاليتي وتقديري القلبي والشخصي لمجهودك الكبير

2 الكاتب منى, on 26-07-2008 14:49
هلا ام ياسمين

أنا كتير بعرف ناس هيك , و سبحان الله بنفس الوقت بتلاقي ناس بتحب تعلمك من جوى قلبها ..

المهم و لا يهمك , إذا ضاعت مع هل الرفيقة ما بيضيع مع غيرها , انا واحدة من قريباتي بنفس الطبع , كل ما حدا بيسألها عن وصفة بتغير الموضوع أو بتعمل حالها مشغولة أو جاها ضيووف أو أو ..

ان شاء الله تجربي هل الكعك و يعجبك , احنا منضيفه في العيد مع الكرابيج و المعمول ..

و انا كمان حابة أشكرك للمحبة الي بحسها بين كلماتك و الله يشهد انك الك بقلبي متل هل المعزة

3 كعك العيد
الكاتب Iman, on 27-07-2008 14:23
يسلموا منى وصفه كشلا طيب كتير عندي سوءال حبيبتي باكيت الزبده اللي في الوصفه كام كوب بيطلع لانو عنا يوجد باكيت فيه كوب و باكيت فيه كوبان و ثاني سوءال كيف بيطلعوا الكعكات هل بيفتو فت والا بيقرشوا مثل القرشله? و مره ثانيه يسلموا ايديكي على هالوصفات الرائعه

4 الكاتب منى, on 27-07-2008 19:59
هلا أمونة

حبيبتي الزبدة 200 غ تقريبا كوب كامل و الكعكات بيطلعوا مقرمشيين

ان شاء الله تجربيهم و يعجبوك

5 الكاتب ام نور, on 30-07-2008 14:00
بتعرفي منى هالكعك اكلتو عند كتير ناس وسبحان الله ولا مرة لفتلي نظري وحبيت جربو لان ولا مرة اكلتو وعجبني شي مالح كتير
شي بلا نكهة وهيك
لما شغت هالصورة الي منزلتيا ما فيني قاومت وبالفعل جربت طريقتك شو طلعوا طيبين يا هيك الكعك يا بلا

6 الكاتب منى, on 31-07-2008 16:44
هنا و عوافي ام نور

ريتو ألف صحة ربي , كتير انبسطت انهم عجبوك

بوسيلي القطط الحلوة و خصوصا القطة الكبيرة الشقرا

7 الكاتب بدور, on 29-08-2008 14:05
لك تسلميلي الهي على هالمقدمة البتجنن و على هالطريئة بشرح الوصفة

والله انت مافي متلك و انت نعمة من الله لكل شخص بيتعرف عليكي والله مو مجاملة عبحكي من كل كل ألبي..

الله يحميكي و يباركلك يا رب..

وئت شفت وصفة الأقراص بعجوة كتير حبيتها بس ئلت لحالي لسا بكير علي جربها هلأ لإنو مبينتا صعبة وبدها خبرة :roll

بس هي نشالله رح جربها بأسرع وئت و يارب تظبط معي.. :zzz

عنجد الله يسلم دياتك النواعم يا رب.

8 الكاتب أم جودي, on 11-11-2008 15:49
روعة ان شاء الله هالعيد رح طيق طريقتك وتسلم ايدك وأيد نهلة وأيد أم هبة

9 الكاتب منى, on 11-11-2008 17:05
مية هلا ام جودي

ان شاء الله تجربيهن و يكونوا على زووءك , و لا تنسي تخبريني شو بيصير معك

10 الكاتب adfd2006, on 13-11-2008 15:58
انا أسمي رنا من الأسكندرية, وأنا مش بس معجبة بموقعك لأة دة أنا أدمنتة, بجد الف شكر علية, و أنا جربت الوصفة دي (كعك العيد) و طلعت تحفة ,أحسن كمان من المحلات و اللة العظيم, ألف ألف شكر, بس لية طلب صغير, لو بس تذودي في الطبخات المصرية,لأني متزوجة لمدة سنتين و لسة مابعرفش أطبخ,وانا بحب المطبخ أوي بس ماليت من الأكلات التقليدية

11 الكاتب منى, on 14-11-2008 07:17
مية هلا رنا

نور الموقع فيك أختي و انبسطت كتير ان الموقع عاجبك و كمان انك جربت هل الوصفة و حبيتيها ..

الوصفات المصرية انا أعرف منها قليل بس ان شاء الله أضيف كل الوصفات الي أعرفها , نورتي مرة تانية

12 الكاتب منامينو, on 17-11-2008 04:44
فعلا يا منى، كلامك كله حكم والله. بالفعل فيه ناس بتعطيكي الوصفة بصدق وممكن تعرض عليكي إنها تعملها قدامك زيادة بالحرص. وفيه منهن بدون ما تطلبي بيتبرعو بإعطائك وصفة أكلوها وعجبتهن ومرات ما بتلاقي ولاّ هن باعتينلك موقع كامل للطبخ عالإنترنت. بس الحقيقة بالمقابل فيه ناس خبراء بالتهرب من الإجابة على أي سؤال عن شي وصفة عملوها، أو بيعطوكي الوصفة رايح نصّها أو غلط. والأنكى إنه لما يعرفو إنك عمبتطالعي وصفات من الإنترنت صار حتى (اسم) الوصفة اللي عملوها سرّ خطير عشان ما تقدري توخديها من الإنترنت. لا والأحلى كمان هي حماية بنت بعرفها واللي ما بتقبل تعطي وصفة بيحبهاابنها لكنّتها، بدها تحتكرها لنفسها وتخص حالها بشرف تقديم هالوصفة لإبنها، قال خليه ييجي لعندنا كل ما إجا عباله يوكلها..

أيييييييه.. شو بدك؟ هذا موضوع إله قصص وحكايات أشكال وألوان مارة مع كل اللي بعرفهن :sigh

المهم حبيبتي وصفتك حلوة كتير، ومن زمان عمبدوّر على هيك وصفة لكعك مالح ومش عمبلاقي.. يالله، هاي دخلت جدولي للتجربة وان شاء الله تزبط. ويعيشو هالديات يا رب

13 الكاتب منى, on 17-11-2008 07:20

حسبي الله و نعم الوكيل , كله كوووم و هل الحماية كوم , هي اول مرة اسمع هيك قصة , انا حماتي الله يخليلي ياها بتعلمني بقلب و رب متل ما بيقولوا و مرات بسالها عن شي بتكون ما بتعرفه بقول لي استنى اسال و ارجع خبرك :zzz

و كمان جديدة هي قصة النت , بتعرفي يمكن لان عندنا لسا مو كتيبر منتشرة قصة النت بس مع هيك في ناااس ما بتبل القلبو ما بتحكي , يلا معلش الله بيعوض .

اذا جربتيها اتمنى تعجبك و لا تنسي تخبريني

14 الكاتب منامينو, on 17-11-2008 11:16
تسلميلي حبيبتي. إنت طيوبة وأكيد حماتك طيوبة مثلك. يا هيك الحموات يا بلا. ما شاء الله عليكو، الله يهنّيكو ويبارك لكو ببعض يا رب.

وان شاء الله هاليومين بجرب هالوصفة وبخبرك بالنتيجة

15 الكاتب منى, on 17-11-2008 12:10
ااامين

يلا عم استنى النتيجة منك

16 الكاتب قهوه مُره, on 25-11-2008 13:55
السلام عليكم ورحمة الله..إذا بدي إحشي الكعك بالتمر إشلون إعمل الحشوه..مشكوره

17 الكاتب منى, on 25-11-2008 14:04
حشوة التمر موجودة بالتفصيل في وصفة الاقراص بعحوة في قسم الحلويات العربية و هي عبارة عن تمر معجون مع السمنة و رشة محلب و قرفة و تفرميه على ماكينة فرم اللحمة

اي سؤال تاني انا تحت امرك

18 نصيحة
الكاتب dado, on 26-11-2008 11:55
السلام عليكم منى
بدي منك نصيحة.. انشالله رح روح عالمغرب على عيد الأضحى - ينعاد عليكي وعلى كل الأخوات بالصحة والسلامة - ورح تكون هي أول زيارة لبيت حمايي بعد العرس، وناوية آخد معي شي.. بتعرفي لازم يكون ما بيخرب بسرعة وبيضل طيب لمدة شي أسبوع.
فكرت أعمل معمول وأعمل كعك العيد.
السؤال: 1- بتعتقدي إنو الوصفات مناسبين؟
2- هل بقدر استخدم عجينة قراص العجوة وإحشيها بجوز أو فستق حلبي؟ (مشان التنويع)
وشكرا... جداً... جزيلاً

19 الكاتب قهوه مُره, on 26-11-2008 12:04
شكرا عزيزتي ..الله لايأمر عليكي ظالم

20 الكاتب منى, on 26-11-2008 17:12
هلا دالو

كل سنة و انت بخير و انت سالمة مقدماً و تروحي و ترجعي بالسلامة ان شاء الله
الوصفات مناسبات كتير كتير , اصلاً لو طلبتي رأيي ما كان رح يطلع معي أحسن من هيك
عجينة الأقراص بعجوة هي نفسها عجينة الكرابيج و المعمول يعني ممكن تحشيها بالتمر أو الجوز أو الفستق و حتلا القشطة بس القشطة ما بتنفع مشان السفر ..

في طريقة حشوة الفستق موجودة في وصفة الكرابيج , بنفس الطريقة بتعملي حشوة من الجوز

ان شاء الله بتروحي و بترجعي بالسلامة و لا تنسي تخبريني شو بيصير معك

21 الكاتب منى, on 26-11-2008 17:12
هلا قهوة

نسيت شي , انك اذا حابة تحشيه بالتمر لازم تستغني عن الكمون و الشمرة في العجينة , ان شاء الله تقرأي ردي قبل ما تجربي الوصفة , سبحان الله راح عن بالي تماماً :roll

22 الكاتب dado, on 01-12-2008 20:37
مرحبا مرة تانية
شكرا على ردك السريع منى
خلص قررت إني رح ساوي قراص بعجوة وكعك العيد.. بس ناطرة جيب شمرة.. انشالله بكرة وأنا راجعة من الشغل رح مر على محل بيبيع غراض عربية.. وانشالله لاقيها.
أنا جربت قراص العجوة برمضان وطلعوا كتير ظراف.. ادعيلي يزبط كعك العيد كمان هي المرة وما انخجل فيهن :zzz

23 الكاتب منى, on 01-12-2008 21:15
هدولة اسهل كتير و ان شاء اله بينجحوا معك على الغميضة

الف هنا و عافية على الاقراص بعجوة و لا تنسي تخبريني شو بيصير معك على الكعكات

24 تحفة
الكاتب dado, on 05-12-2008 11:24
السلام عليكم منى
مبارح بالليل عملت كعك العيد.. وشو بدي قلك.. طلعوا تحفة.. طعمتن وريحتن ولونن.. عنجد غير شكل
ما بعرف كيف بدي اشكرك.. أكيدة إنو رح يبيضوا وجهي (هي إذا ضل منهن شي ليوم الأحد :grin

)
وصفة مرتبة ومتقّنة وواضحة. يسلّم إيديكي

اليوم المسا انشالله رح حضر قراص العجوة... بس عملت غلطة ما بعرف إذا رح تنزع الوصفة.. لما جهزت العجينة الصبح حطيت حبة البركة والمحلب والمي من الأول مع كل المكونات.. نسيت إنو المي بعدين وحبة البركة بعد ما حط العجينة بماكينة اللحمة.. انشالله ما تأثر كتير .. لأنو ما ضل عندي وقت إرجع عيدها :cry

25 الكاتب منى, on 05-12-2008 11:36
هنا و الف الف عافية على الكعكات دالو

عن جد الف شكر الك لثقتك في و تجربتك وصفاتي و كمان ان عم تخبريني :zzz

اما الاقراص بعجوة المحلب مو مشكلة بس المشكلة المي , ما بعرف كيف رح يطلعوا , يمكن ما يقرشوا :roll

هلا ما دام ما بقى عندك وقت اتوكلي على الله و كملي و لنشوف شو بيصير

26 الكاتب ام عمر, on 22-01-2009 13:03
رائعة تسلم ايدك
ممكن اعرف كم مقدار الزبدة بالغرام لاني ببلد غربي ولا اعرف مقدار الباكيت
دمتي سالمة :zzz

27 الكاتب منى, on 23-01-2009 06:56
الباكيت حوالي 200 غ

اي سؤال تاني من عيوني التنتين ام عمر :zzz

28 الكاتب أم الهدى, on 01-04-2009 16:58
حبيبتي منون يااااااااااي أديش بحب هالكعك وأنا مدمنتو وكتير بحبو تسلم دياتك شكلو بيفتح النفس
بس عندي سؤال بينفع أستبدل الزبدة بالزيت ولا لأ
وشكرا كتير إلك

29 الكاتب منى, on 02-04-2009 06:45
هلا ام هدى

ان شاء الله بتعمليه و يطلع متل الي بتحبيه , اما عن استبدال الزبدة بالزيت فنو ! ما رح يطلع بنفس الطعم و النكهة

30 الكاتب JoJo, on 10-06-2009 01:14
ما شاء لله شكله بيشهي كثير
عندي سؤال
هل من الممكن ان نحشي هاي الكعك بالتمر مثل المعتاد عنا بفلسطين؟؟؟

31 الكاتب منى, on 10-06-2009 11:32
هلا جوجو

و الله اختي ما عندي فكرة , هادا الكعك بيطلع مالح و مقرمش , بقى ما بعرف اذا بينفع او نو :roll

32 الكاتب أم الهدى, on 29-06-2009 23:39
حبيبة قلبي بدي أسألك بوكرا حابة جربو بإذن الله بس دقة الكعك عندي ياها مطحونة وانت ذاكرتيها حب
في حال استعملت مطحونة أحط نفس المقدار المذكور ولا أعدل فيه
وألف شكر

33 الكاتب منى, on 30-06-2009 07:17
هلا ام هدى

المطحونة رح تكون ااقل بشوي يعني يمكن كل ملعقة حب بتقابل تلات ارباع مطحونة , تقريباً :roll

34 الكاتب سموره, on 01-07-2009 18:01
السلام عليكم ورحمه الله وبركاته
ازيك اخت منى
بجد تسلم ايديكى على الاكلات الحلوه دى
الكعك اول حاجه عملتها بطريقتك
كان كتير حلو
وعجبهم هنا اوى
ومن ساعتها كل ما اعمله ادعيلك
ما شاء الله عليكى
ربنا يحفظك ويوفقك
وسامحينى طولت عليكى

35 الكاتب منى, on 01-07-2009 20:28
هنا و الف الف صحة بكل لقمة و كل كعكة اكلتيها و عجبتك
و ربي الك متل هل الدعوات الغالية و اكتر و يا رب يجمعنا بالفردوس الاعلى , ااامين اختي

36 الكاتب أم الهدى, on 02-07-2009 15:01
حبيبتي منوش تسلم دياتك اليوم عملتو طلع روعة وكتير ناهي مقرمش وهش مفخر تفخير
الله يعطيك ألف عافية

طلعو متل يلي بحبهم بابا كان يجبلنا منهم من عند واحد في باب النسرين والله طلعو كعكاتي لا يقلو عن كعكاتو أبدا
طبعا هاد بفضلك
بس بقى إذا زاد وزني بدك ادبريني بطريقة أنزلو
ههههههههه

الله يجزيك كل خير

37 الكاتب منى, on 08-07-2009 18:38
هلا ام هدى

يمم , الف صحة و هنا و عافية يا حق على كل كعكة
يا ستي تبقى بس نزلتي على حلب منعمل تمشاية كل يوم ساعة لتخفيف الوزن و منشلي بهل الساعة على كل البلد :grin

38 الكاتب أم الهدى, on 09-07-2009 12:37
والله إذا هيك ما عندي مانع شو بدي أحلى من هيك صحبة
لك أبوس روحك شو لذيذة الله يحيمك ويخليك لأهلك وأهل بيتك

39 الكاتب شفاء, on 17-09-2009 11:26
يسلمو دياتك يامنى على هالاكلات اللي بتجنن

بتعرفي جوزي بعد اول لقمة شو قلي؟ اعملي كمان

مع اني عاملة مقدارين مو واحد

بس طلع كتيير كتيير طيب = ) ^ * ^

يعني هالوصفة من الوصفات اللي رح ينعاد تجربتها كتير
الله يتقبل منك صيامك ويباركلك باولادك وينولك مرادك
نفسي اقدملك شي(بس لو انك قريبة) لكن حاليا لا املك الا الدعاء
وكل عام وانت بالف خير

40 الكاتب منى, on 17-09-2009 11:52
هلا ام هدى

انتي الي لذيذة و بتجنني , الله لا يحرمني هل الطلة الحلوة و الغالية

41 الكاتب منى, on 17-09-2009 12:04
ريتو الف عافية و الف صحة شفا علىالبك و الب الباشا و انا كتير مبسوطة لانك جربتي الوصفة , و لما قرات انك عملتي مقداريين حسيت انا الي لازم اشكرك لثقتك في

انا بالعادة لما بجرب وصفة اول مرة بعمل نص المقدار و ممكن ربعه احيانا :roll

الله يخليلي ياكي كفيتي و وفتي و ان شاء الله الك متل الدعوات الي دعيتيها و اغلى يا حق

بوسات كتيرة للقطط الحلوة

42 الكاتب ميساء, on 01-12-2009 09:30
عزيزتي منى انشا الله كل عام وأنت بألف خير وكل أحبابك وأهل بيتك بخير وصحة وعافية أنا عملت يوم الوقفة هالكعك وما بقدر قللك غير الله يسلم أناملك السحرية على هالوصفة اللي أكتر من رائعة متل كل وصفاتك بدون مجاملة الله يجزيكي كل الخير وألف شكر حبيبتي

43 الكاتب Mays, on 08-12-2009 06:28
هاي هي الوصفة اللي عرفتني على الموقع.
كنت عم دور على طريقة كعك العيد بالنت و طلعلي لينك لموقع لقمة طيبة و طبعا علقت فيه شي 3 ساعات و أنا عم دور من أكلة لأكلة.
أنا بالعادة بجيب الكعك معي من حلب جاهز بس إجازتنا هالسنة كانت قصيرة و مقطوشة قطش ، مشان هيك حبيت إعمله بالبيت.
العجينة عذبتني شوي باللف لإنها كانت تتشقق لما بدي إتنيها و بالآخر بعد عدة محاولات فاشلة إنو يكون شكلها كعك رقيتها بالشوبك و قطعتها بقطاعات البسكويت الضغار و خبزتها.
النتيجة كانت رائعة ريحة و طعمة بتجنن حتى ضيوفي بالعيد جنوا عليها و كلهن بدهن الطريقة و لولا إنو شكلهن ما بيشبه الكعك كان ما صدقوا إنوا أنا عاملتهن.

الله يعطيكي العافية و يحميكي و يخليلك أولادك و عيلتك كلها.

44 الكاتب منى, on 08-12-2009 11:22
هلا ميسا

كل سنة و انت بالف الف خير و ان شاء الله صحة و هنا على البك و الب كل مين داقهم , كتير انبسطت انك جربتيهن و عجبوكي و ان شاء الله ما تكوني نسيتي تاكلي حصتي :grin

45 الكاتب منى, on 08-12-2009 11:56
هلا ميوسة

انا كنت حب هل الوصفة و هلا صرت حبها اكتر ..

بس استغربت انها اتشقشقت معك , ممكن تكون كمية المي كبيرة أو الزبدة كانت طرية زيادة عن اللزوم لان هي لازم تتشكل معك متل مو طالع بالصور

اسفة لان اتعزبت بتشكيلها و منيح ان الطعمة طلعت طيب

الله يخليلي ياكي للدعوات الغالية و الكريمة و ربي يحفظك لاهل بيتك كلهن

46 الكاتب hend kurabi, on 12-02-2010 06:26
hi madam mona,can I use salted butter instead of the regular one?I got salted one by mistake

btw I love u fi allah, ur so sweet and kind hearted.I 'm hend 23 ,syrian but married and live in canada for the last 5 years ,and I have tow cute kids 8
heheheh I told u my life story oh I'm from ariha close to halab so the food almost the same)

but I born and lived in sham

47 شكر
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-12-2010 07:03
الست العزيزة منى
الأخوة الأعضاء العزيزات
بصراحة الموقع بجنن والاكلات الموجودة بتخليكي دايماً تتذكري طعم أكل الأم والجدة اللذيذين . وبصراحة كل ما بفتح عالموقع بحس اني بصبحية حلوة وعم دردش مع أصحاب غاليين على قلبي ، وخصوصاً الواحد بالغربة بيفتقد لهيك لمة وجمعة. وكتير بمبسط لما بشوف وصفة مكتوب إنها وصفة أمي أو جدتي ...الخ .
شكراً يا أخت منى
أنا جربت الوصفة ( كعك العيد ) وطبعاً طيبة كتير وأخذتها لصاحباتي بالشغل ،ودايماً بيسألوني عن المصدر بقلهم في موقع لقمة طيبة ( منى ) كتي حلو جربوه ومارح تندمو .
كمان لما عملت وصفة كريم الثوم صاحباتي انبسطوا كتير وقالواي من زمان كان بدنا هالوصفة وبالفعل أخذوها وما عم يعملوا غيرها .
بالإضافة إلى وصفات أخرى ، شكراً كتير كتير لجهود الجميع والله يحفظكم .

48 الكاتب نجمة, on 02-02-2011 21:17
السلام عليكم كيفك اخت منى الرسول صلى الله عليه وسلم قال اذا احب احدكم اخاه فليخبره انه يحبه -بمعنى الحديث -فحبيت اخبرك اني احبك في الله من غير ان اراك سبحن الله بهالزمان قليلين الناس ياللي متلك يعني ماشاء الله كرم وذوق وحسن خلق وست بيت ماشاء الله -الله يحميك ويخليكي لزوجك واولادك -اليوم جربت هالكعكات وعملت مقدارين لانو اذا شي من عندك بعمل عشر مقادير وانا مأمنة انو ان شاالله بينجحو وبيطلعو تمام-وهالكعكات طلعو فررررررررررررررجة يسلمو ايديك ويعطيك الف عافية :zzz

49 الكاتب om nabeel, on 22-05-2011 00:21
حبيبتي منون
معلش بدي اتثاقل عليكي
انا عملت الكعك اكتر من مرة
الطعمة طلعت جنان
بس ديما وشوه عم يتششقق بعد الخبز
يعني الطعمة واو بس الشكل مو كتير ياريت تفيدني جزاك الله خيرا

50 الكاتب مسك الايمان1, on 25-07-2011 18:32
السلام عليكم يا منى لو سمحت انا بدي اسألك بس قديش عيار الكوب وشو قصدك بالنسبة للزيت ربع كوب صغير قديش يعني صغير بالنسبة للكوب للكبير
انا جربت الوصفة يسلمو ايديك بس حسيت انه الطحين كتير ولما خبزتها طلعت مقرمشه مش طرية يا ترى هي هك بطلع حسيت انه الي بالصورة الذ عيار الكوب الي انا استعملته تقريبا 250 مل صح ولا لاء ازا ما فيها غلبه تردي علي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 30/06/2009 )

< السابق		التالى >

[ عودة ]