L2ma.com | لقمة طيبة | L2ma.com | لقمة طيبة | كوسا شيخ المحشي | الكوسا, · , اللبن, حتى, ملعقة | L2ma.com

القائمة الرئيسية

الأكثر تصفحاً

كوسا شيخ المحشي

الكاتب/ منى

06/07/2008

من المطبخ السوري , وصفة صيفية كتير طيبة , بتحضرها امي تقريبا لكل عزايمها , و اسمها بيدل عليها , محشي بس مو حي الله , متربع على عرش المحاشي لأنه من أكثر الأنواع دعم باللحمة و الصنوبر

في حلب نطبخ شيخ المحشي غير عن الشام , عندنا منطبح الكوسا بالمرق حتى يستوي و بعدها نقدمه مع الرز و اللبن المثوم أما في الشام بينطبخ بالاول بالمرق بعدها باللبن باللبن و يقدم مع الرز , الطريقتان لذيذتان , و كل واحدة فيهن نغم شكل.

لوصفتنا نستعمل الحبات الصغيرة كتير الي يا دوب طولها بطول الاصبع , بيطلع شكلهن حلو كتير

بالصحة و الهنا

2 كيلو كوسا من الحجم الصغير
2 ملعقة كبيرة سمنة لقلي الكوسا

الحشوة :

ملعقة كبيرة زيت أو سمنة
3 – 4 ملعقة كبيرة صنوبر
نصف كيلو لحمة مفرومة
باقة صغيرة بقدونس مفروم
نصف ملعقة صغيرة بهار
رشة صغيرة قرفة

صلصة اللبن :

ماء أو مرق يكفي لغمر الكوسا
2 فص كبير ثوم مهرووس
2 ملعقة كبيرة كورن فلاور
بيضة
كيلو لبن
رشة ملح و بهار
direction

تحضير الحشوة :

·          يحمر الصنوبر بالزيت ثم يرفع قبل الوصول للون المطلوب لأنه سيغمق قليلاً بعد رفعه عن النار .

·          تقلى اللحمة بنفس الزيت و تفكك بملعقة خشبية و تقلب حتى يجف المرق و تنضج اللحمة ثم تتبل بالملح و البهار .

·          يضاف الصنوبر و البقدونس المفروم للحمة , أصبحت الحشوة جاهزة .

تحضير الكوسا :

·          تغسل حبات الكوسا ثم تقطع رؤوسها و تغمس بالقليل من الملح و تترك لمدة عشر دقائق , هذه المرحلة هدفها تطرية رؤوس الكوسا كي لا تتشقق أثناء الحفر .

·          تحفر حبات الكوسا بانتباه و يحتفظ باللب لتحضير المثومة ( الكوسا بزيت الزيتون ) .

·          تحشى حبات الكوسا بالحشوة المحضرة ثم تقلى بالسمنة حتى تشقر من جميع أطرافها .

·          ترتب حبات الكوسا في طنجرة ثم تغمر بالمرق و تتبل بالملح و البهار و تترك حتى تغلي ثم تهدى النار و تترك حتى تنضج لمدة نصف ساعة تقريباً ثم تقدم ساخنة مع الأرز المفلفل و اللبن المثوم و النعناع الطازج و الفليلفة الحرّة.

·          إذا أردت طبخ الكوسا بصلصة اللبن , يترك الكوسا بعد أن تهدى النار لمدة ربع أو ثلث ساعة .

·          في هذه الأثناء يحضر اللبن , يذوب الكورن فلاور بالقليل من الماء ثم يخفق مع البيضة و اللبن حتى يصبح المزيج ناعماً .

·          بعد مضي الثلث ساعة يضاف اللبن للمحشي كوسا مع الثوم و يترك لمدة ربع ساعة أخرى أو حتى يكمل نضج المحشي و تتكثف الصلصة قليلاً .

·          يقدم شيخ المحشي ساخناً مع صلصة اللبن و الأرز المفلفل و النعناع الطازج و الفليلفة الحرّة .

أضافة إلى المفضلة (1) |

أقتباس | مشاهدات : 3567

تعليقات (16)

1 الكاتب هيلين, on 06-07-2008 19:57
يا عينى هالاكلة انا بسميها اكلة الملوك جوزى كتير بيحبها يسلموا دياتك
حبيبتى عندى سؤال لو انه مو بمكانه انا من شوى جربت يلى قلتلى عليه منشان عجينة البيتزا وطلبت من الخباز يلى تحت بيتى عجيبنة خبز مبينة ظريفة بس المشكلة انو باعتلى ياها مرقوقة يعنى اكثر من قطعة فكانت كتير رقيقة واجيت لارجع اعجنها ما عادت فردت معى كبتلت ببعض يعنى ما عاد سهل فردها شو الحل بليز جاوبينى هلق

2 الكاتب غيث, on 06-07-2008 21:38
دخيل عينك على هالاكلة شو بنحبها كلنا وبعملها بنفس طريقتك وبتنجح معي بس حبيت اشكرك على نصيحة نقع الكوسا بالملح كي لا يتشقق لاني انا مستحيل ما تطير نصف كمية الكوسا اللي شارينها بالشقوق ووو كمان انا كنت اقلي الكوسا فبيصير حشوه صعب اما على طريقتك فالامر اسهل شايفة اشقد كنت احسب حالي بعرف بطبخ بس معلومات وفن منى غير شكل بيظل ناقصنا كتير اشياء لنعرفها منك جد شكرا لنصائحك وملاحظاتك القيمةبيجوز بقلب الوصفة تذكري كلمة صغيرة بس كتير الها قيمة بنجاح الطبحة شكرا لعدم اهمالك لاي ملاحظة تتعلق باي طبخة مهما كانت بسيطة لانها بالفعل بتكون مهمة

3 الكاتب منى, on 07-07-2008 09:32
هلا هيلين

الله يسلمك حبيبتي , عجينة البيتزا لما بتصير بتمط و كل ما مديتيها بترجع الحل انك تعجنيها مرة تانية و تغطيها و تخليها ترتاح شي ربع ساعة و بعدها بيصير الشغل عليها سهل مرة تانية ان شاء الله , ان شاء الله ما كون اتاخرت عليك :roll

4 الكاتب منى, on 07-07-2008 09:33
هلا غيوثة

بتعرفي غيوثة هل الاشيا الصغيرة متعلمتها من الستات الكبارية , لان بس ما سمعت واحدة شاطرة بشي وصفة لازم اسالها و هنن البركة و الله و بيعلموا بضمير و خصوصا هل الاشيا الفتفوتة الي ممكن ماما مثلا ما تخطر ببالها

الف شكر ليك على الردود الي بتنعنش القلب بهل الصيفية الحراقة , و لازم تعرفي ان اخوات متلك هنن الي بيشجعوني جرب اشيا جديدة و نزلها

5 الكاتب تورتاية بالكريز, on 13-07-2008 12:44
يسلموا ايدكي ياسكرررررررة بصراحة روعة وصفات الكوسة اللي منزلتيها فيه مهرجان للكوسا بالموقع وكل وصفة احلى من التانية
الوصفة دي دي رائعة وبعملهاباللبن تعلمتها من جارتنا السورية الله يعطيها العافية يارب بس حقيقة ماجربتها من قبل بالصنوبر وكمان بضيف رز قليل جدا مش بيبان كتير بالطعم وان شاء الله بجربها مرة بطريقتك الحلوة هنا بمصر انبهروا فيها لانها طيبة وحلوة وخفيفة على المعدة وغير معروفة غير بالمطاعم اللي بتقدم الاكل الشامي الف شكر ياعسل

6 الكاتب منى, on 24-07-2008 09:45
هلا احلى ام ياسمين

كلك زووء حبيبتي , و ان شاء الله تجربي شي وصفة و تكون على زووءك

الصنوبر بيعطيها طعم جميل و أكيد إذا مو متوفر فيك ما تستعمله

هلا صار فيك تعملي اشيا من الموقع و تصير سفرتك أطيب من أحسن مطعم :zzz

نورتي ام ياسمين حبيبتي يا أطيب قلب

7 الكاتب بدور, on 28-08-2008 22:26
يا سلاااااام على هالأفكار و هالأكلة اللذيذة كتير كتير
و فعلا هي سيدة المحاشي بنظري..

منيح ما كان الواحد بيسمن بس من شوفة الأكلة لإنو أنا عندي العصارات الهاضمة بتبدا شغلا بس من الصورة :grin

8 الكاتب منى, on 29-08-2008 07:38
هلا بدورة

حبيبتي ريتو عوافي على قلوبك , و اكيدة هي ست كل المحاشي , انا بموت عليها

9 الكاتب نور الأسلام, on 11-04-2009 17:09
السلام عليكم كيف حالك اختي منى

ناويه ان شاء الله سوي هاالاكله بكرا انا ساويتا اكتر من مره بدي اسالك انا بعد مااقليها واحشيها بطبخها بالبن يعني ما بسلقها بالمرق وكمان بقليها قبل الحشي بعتقد انو اذا نقلت بعد الحشي بتتشرب زيت اكتر شو رايك

10 الكاتب منى, on 11-04-2009 20:52
هلا نور

هادا عايد الك , انا بحس اذا انقلت بعد الحشي بتنحشى اسهل و بتاكل حشوة اكتر لهيك بتطلع اطيب بعد الطبخ , و القلي ما رح يكون قلي غميق , يعني الزيت او السمنة رح يكون اخد حوالي سم في الطواية

11 الكاتب نور الأسلام, on 11-04-2009 21:25
شكرا الك منى شو بالنسبه لسلقها بالمرق قبل ما تنطبخ بالبن واسفه اذا ثقلت عليك بالسؤال
ويسلم دياتك يارب

12 الكاتب منى, on 11-04-2009 21:32
انا بطبخها بالمرق لحتى ما يتغير لون اللبن أو يفرط الله لا يقدر لان شفتي اللبن طبخه بده انتباه , بس كمان ممكن تطبخيه اذا متاكدة ان اللبن عندك منيح

لا تقلتي و لا شي انا هون تحت امرك يا عسل

13 الكاتب laraye, on 10-02-2010 02:47
مرحبا منى
ممكن ما اقلي الكوسا او اشويه بالفرن؟
بدي يكون طبق خفيف الا رح ينتزع؟
حابة اجربا هاليومين
يسلموا ايديك

14 الكاتب منى, on 10-02-2010 11:22
ممم , مو مجربة انا حضره من دون قلي , بقى ما بعرف كيف رح يطلع .
هلا هو اكيد بيطلع طيب , لان نفس المحشي بس محشي باللحمة عوض عن الرز

بس يمكن تطلع طعمته مو متل الشيخ محشي الي معوديين عليه

15 الكاتب سلطـــانه, on 25-12-2010 20:27
تسلمين ياقلبي على هالوصفه

انا من السعوديه وابي اعرف نوع اللبن اللي تستخدميه يعني مثل لبن المراعي
ولا لبن غنم

16 الكاتب منى, on 25-12-2010 20:48
مية هلا فيك اختي , نورتي و شرفتي الموقع

انا استعمل لبن غنم لانه متوفر بشكل عادي و نكهته كتير طيبة و بتناسب هل الوصفة
اما بالنسبة ليك على اعتبارك من السعودية فافضل لبن هو الصافي او ميلكو او نادك
و لحتى يطلع اللبن شوي حامض فممكن تخليه كم يوم في البراد قبل استعماله

ايا سؤال تاني من عيوني

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 10/02/2010 )

< السابق		التالى >

[ عودة ]