L2ma.com | لقمة طيبة | L2ma.com | لقمة طيبة | إمام بايلدي ( باذنجان بالزيت على الطريقة التركية ) | · , الحشوة, لمدة, حتى, نصف | L2ma.com

القائمة الرئيسية

الأكثر تصفحاً

إمام بايلدي ( باذنجان بالزيت على الطريقة التركية )

الكاتب/ منى

03/07/2008

إمام بايلدي Imam Bayildi

من أشهر أطباق زيت الزيتون التركية , طبق لذيذ جداً و خفيف يناسب هذه الأيام الحارّة .بس يا ترى شو معنى امام بايلدي ؟

معناها أن الإمام أغمي عليه أو الإمام أحبها كثير , فإذا ما كفى الاسم لتشجيعك على تجربتها, أتمنى أن تشجعك الصور .. بالمناسبة الصور من تصوير ابنتي جودي

الطبق يشبه بطريقة التحضير و المقادير وصفة الكارنيارك و هي كمان من وصفاتي المفضلة .

بالصحة و الهنا

نصف كيلو باذنجان من الحجم الصغير و المدعبل ( ما يقارب 5 حبات )
زيت ذرة أو زيت زيتون

الحشوة :

3 ملعقة كبيرة زيت زيتون
حبة كبيرة بصل
4 – 5 فص ثوم
2 حبة كبيرة بندورة ناضجة مقشرة و مفرومة
نصف حبة صغيرة فليلفة حمراء أو خضراء مفروم
2 – 3 ملعقة كبيرة بقدونس مفروم
ملح و بهار
رشة صغيرة قرفة

الصلصة :

نصف كوب ماء
عصير نصف حبة ليمون
رشة سكر
ملح
direction

· يقشر الباذنجان بشكل مقلم ثم يرش بالملح و يترك جانباً لمدة نصف ساعة ثم يغسل و يجفف .

·          يقلى الباذنجان بالزيت حتى تشقر الحبات قليلاً ثم ترفع على ورق ماص .

·          تقشر البندورة ثم تفرم ناعماً , يفرم البصل فرماً ناعماً , يهرس الثوم و تفرم الفليفلة ناعماً .

·          تحمى ملعقتان من الزيت ثم يقلى فيها البصل حتى يطرى , يضاف الثوم و يقلب لمدة دقيقتين .

·          تضاف البندورة و البهارات و تترك لمدة خمس دقائق , يضاف البقدونس و تترك الحشوة لمدة 5 دقائق أخرى .

·          ترفع الحشوة عن النار ثم تضاف أخر ملعقة من الزيت , أصبحت الحشوة جاهزة .

·          يوضع الماء و عصير الليمون و السكر و الملح في صينية صغيرة .

·          تفتح حبات الباذنجان بطرف الإصبع بحيث يعمل فيها جيب مع ضرورة الانتباه أن لا تشق الحبة .

·          تحشى الحبات بالحشوة المحضرة ثم ترتب في الصينية , إذا زاد القليل من الحشوة يرتب فوق الحبات .

·          تغطى الصينية بورق ألمنيوم ثم تخبز في الفرن لمدة 40 – 50 دقيقة أو حتى ينضج و إذا نقص الماء أثناء الخبز يضاف القليل من اماء المغلي .

·          يترك الطبق حتى يفتر ثم يقدم مع الخبز العربي .

فكرة خفيفة :

في بعض المناطق في تركيا يطبخ الإمام بايلدي من دون أن يقلي الباذنجان , يقشر الباذنجان بشكل مقلم ثم يشق بالسكين , تخلط مقادير الحشوة ببعضها البعض ثم تحشى و ترتب في صينية , تمزج كل مقادير الصلصة مع ربع كوب زيت زيتون و توضع في الصينية ثم توضع في الفرن حتى تنضج لمدة 60 دقيقة .

أضافة إلى المفضلة (3) |

أقتباس | مشاهدات : 4547

تعليقات (10)

1 الكاتب غيث, on 03-07-2008 18:49
يا ستي تسلم هالديات المرتبة على هالاكلات المنفنفة كأنها متل ما قلتي بتشبه الكارنيارك وانا جربت الكارنيارك على طريقتك وكان رائع واكيد رح اجرب هالاكلة قريبا ان شاء الله و بخبرك لاني بحب هيك اكلات الله يعطيك العافية ويخليلك جودي والقطط التانية اللي عندك

2 الكاتب منى, on 03-07-2008 22:20
هنا غيوثة , يا ريت تجربيها و تعجبك , نحنا عنا كتير منحبها

ألف شكر ليك على التواجد الدائم و لا تنسي تخبريني إذا جربتيها, و كمان الله يخليلك قططك يا حق

3 الكاتب linda, on 06-07-2008 19:42
امممممممممممممم
شو هل التحفة منى
معو حق الامام يغمى عليه و يغوطن
انا من القراية شطت ريالتي

بكرة الاثنين بتوصل امي
و كل يوم بدي دوقها اكلة شكل من تحت اناملك الحلوين
انا كير بحب الطبخ التركي
خفيف و طيب و نكهة من اروع ما يكون

ضلي حطيلنا وصفات تركية الله يعطيكي الجنة

يالله سلام

4 الكاتب منى, on 07-07-2008 09:29
لنوشة و الله دماتك سكر و عسل بشهده :grin

شو متت من الضحك على كلمة يغوطن , على راسي اهل الشام و الله

ان شاء الله بتوصل بالسلامة يا حق , ما حدا قدك هلا , ان شاء الله بتتهنوا ببعض

من عيوني و الله , رح نزل وصفات تركية كمان لان فاقس كيفي هلا حضر اشيا من المطبخ التركي

5 الكاتب Eman, on 08-07-2008 12:57
يسلمو إيديك على هالاكلة الطيبة .
كأن المكونات متل أكلة بانجان مكمور ،بس بطريقة أحلى.
ما شاء الله غبت كم يوم لقيت صفحة مليئة بالوصغات اللذيذة .

6 الكاتب منى, on 08-07-2008 19:06
هلا امولة

اشتقت الك كتير , ان شاء الله دايما بخير , يعني نوعا ما , بس النكهة مختلفة كتير

ممكن تجربيها و ان شاء الله بتعجبك

لا بقى تغيبي :grin

لحتى تبقي دايما على الطاولة معنا

7 الكاتب Eman, on 10-07-2008 01:33
تسلميلي يا رب شو حنونة وقلبك على إخواتك الانترنتيات :grin

والله انت في البال على طول بس جود آخدتلي وقتي كله ، وإن شاء الله رح جربها ، لأني كتير بحب أكلات البانجان

منيح مختلفة عن المكمور لأن زوجي ما بيحبه ولا بريد أعمله.

8 الكاتب منى, on 10-07-2008 09:26
شايفة ما احلاني :grin

, و الله معاك حق , يالله ان شاء الله بتربى بعزكم و دلالكم و تكون من الصالحين في الدنيا و الاخرة ..

ان شاء الله تجربيها و تعجبك

9 الكاتب Mays, on 08-12-2009 05:41
الله يعطيكي العافية يا رب يا ست منى على هالموقع الحلو و الأكلات الرائعة.
أنا اتعرفت على الموقع بالصدفة و حسيت حالي لقيت كنز لما لقيتو.
كل شي على أصوله و متعوب عليه ، الله يعطيكي على قد تعبك.
و أكتر شي شدني الأكلات الحلبية المنفنفة و اللي ريحتها اللي بتشهي رح تطلع من الشاشة.
على فكرة ، أنا حلبية بس عايشة بالإمارات من شي عشرين سنة و كمان تزوجت واحد حلبي هون ( ما منستغني) و بعتبر حالي شاطرة بالطبخ ( بشهادة اللي حوالي) و مع هيك لقيت كتير شغلات جديدة و نصايح بالطبخ ما كنت بعرفها.

و هاي الطبخة بالذات كتير طيبة و أنا تعلمتها من حماتي ( هي تركية) بس الفرق إنو هي ما بتطبخ الحشوة ، يعني بعد ما يبرد الباتنجان شوي بتحشي فيه باقي المقادير نية بس باقي الطريقة متلك بالضبط و وقت الأكل منحط عليه لبن مثوم و مناكلها بالخبز مع فليفلة خضرا.

أنا كل شوي رح أنط بشي أكلة و علق لإني جربت شي عشرين أكلة من اسبوعين لهلق فبدكن تتحملوني شوي و يا ريت تفبلوني معكن إخت جديدة بهالعيلة الحلوة. :grin

10 الكاتب منى, on 08-12-2009 11:18
يا مية السلامة بهل القامة , نور الموقع و وصلتي لبيتك الانترنتي و يا رب تبقي معنا على طول

اتشرفنا بهل الاخت الحلوة و انا كتير ممنونة هل الرد الحلو و الكلام الي فيه , كلك زووء

مممم , فكرة خفيفة , ان شاء الله رح جربها بالصيفية لما احضره مرة تانية و رح حضر الحشوة من دون قلي , اتوقعها رح تطلع اطيب

سلم دياتك على الفكرة و نورتي الموقع مرة تانية

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 22/01/2009 )

< السابق		التالى >

[ عودة ]