L2ma.com | لقمة طيبة | L2ma.com | لقمة طيبة | الكواج | الخضار, على, · , اللحمة, تفرم | L2ma.com

القائمة الرئيسية

الأكثر تصفحاً

الكواج

الكاتب/ منى

14/06/2008

الكواج أو صينية اللحمة بالفرن من المطبخ السوري طبق لذيذ جداً لا يقااوم . و الكواج بالأساس طبق خضار مشكلة بيختلف تحضيره بين كل مدينة سورية و أخرى , أو حتى في نفس المدينة بيتحضر بطرق مختلفة , و بيبقى اله مبدأ واحد : خضار مشكلة تفرم ناعماً مع اللحمة المفرومة الاختلاف بنوع الخضار المضافة أو بطريقة الطبخ على النار أو في الفرن و هي طريقتي التي تعلمتها من ستي الله يخليها و هي أم الطبخ الأصيل و النفس الطيب .

بعد تحضير الخضار و ترتيبهم بالصينية تقطع قطع صغيرة من الدهنة أو السمنة و توضع على الوجه , أما أنا استعملت زيت الزيتون ( سامحيني يا ستي ) , كنت حابة أأقدم لعيلتي طبق خفيف و صحي , الحمد لله طلعت طيبة كتير , الصراحة بالدهنة أطيب بس مع الصحة أطيب و أطيب .

الكمية المذكورة في الوصفة كمية كبيرة لأنها طبق مفضل للعائلة كلها , يمكن أن تحضري نصف الكمية و مع نصف الكمية رح يقل الوقت الازم في الفرن .

بالصحة و الهنا

كيلو باذنجان من النوع الكبير المدعبل
2 كيلو كوسا
4 كيلو بندورة
3 - 4 حبة كبيرة بصل
3 – 4 حبة كبيرة فليلفة حمراء ( يمكن استعمال الفليفلة الخضراء و لكن الفليلفة الحمراء ستعطينا لون أشهى )
ملعقة صغيرة بهار مشكل أو أكثر حسب الرغبة
ملح
القليل من الفليلفة الحمراء الناعمة
كيلو و نصف لحمة مفرومة ناعماً
دهنة أو سمنة ( أو زيت زيتون ! )
direction

· يقشر الباذنجان و يفرم لمكعبات , يقشر البصل و يفرم ناعماً , , تقشر البندورة و تفرم ناعماً .

· تفرم الكوسا لمكعبات متوسطة كتلك الظاهرة بالصورة ( لا أرق و لا أسمك ) , تزال بذور الفليلفة و تفرم لمكعبات متوسطة .

· توضع الخضار في صينية ألمنيوم كبيرة و توضع اللحمة و البهارات على الوجه ثم تقلب مع الخضار بلطف باستخدام اليد حتى تمتزج الخضار و اللحمة جيداً .

الصينية جاهزة و بدها تفوت للفرن , لااازم تشموا الريحة الي شامتها انا

·         ترتب قطع الدهنة أو السمنة على وجه الصينية ثم توضع في الطبقة السفلى للفرن على الصاج بشكل مباشر و تخبز على أعلى حرارة لمدة ساعتين تقريباً أو حتى تجف المرق و يتحمر وجه الخضار نوعاً ما , لا تحرك اللحمة بالفرن في الساعة الأولى و بعدها تقلب بلطف كل ربع ساعة كي تبقى الخضار محافظة على شكلها .

·         قبل النضج بربع ساعة تقريباً يرش الملح فوق الخضار و ترجع للفرن حتى تجف مرق الخضار تماماً , لا يضاف الملح قبل هذه المرحلة لأنه سيدع الخضار تخرج مرقها فتفقد شكلها و تأخذ وقت أطول في النضج .

·         يقدم الكواج مع الخبز العربي أو الخبز العربي المحمص و مع الفجل و الفليلفة , و يمكن أن تقدم مع الأرز و لكن مع الخبز أطيب و ألذ .

أضافة إلى المفضلة (4) |

أقتباس | مشاهدات : 5010

تعليقات (20)

1 الكاتب غيث, on 14-06-2008 14:18
الله شو منظرها حلو وبيفتح النفس الله يعطيك العافيةوالله ذكرتيني فيها وهلا موسم الخضار الطازجة رح اجربها بطريقتك بالزيت الزيتون لاني انا ما بطبخ بالدهنة ابدا وقليل بالسمنة بس بالمازولا لذلك طريقتك مفيدة كمان شكرا لك بتعرفي هون بالسعودية سألوني عن الكواج فقلت لهم ما بعرفه مالي خبر هو نفسه اللحمة بفرن شكرا لك على هالمعلومات الحلوة اللي نجهلها احياناوهي من اسرار نجاح موقعكم اضافة للصدق بالوصفات المجربة فعلابدون اي تعفيس بالمقادير او الطريقةالله يجزيك الخير يا رب

2 الكاتب غيث, on 14-06-2008 14:23
عفوا صحيح نسيت اقلك اخت منى بأنه احيانا بيحطو فيها تفاح قصيري وهو تفاح صغير وله طعمة حامضة لذيذة وفي ناس كمان بتحط لها كرز بس انا ما جربتها هيك بصراحة لذلك ما بعرف كيف بتطلع بس بالتفاح لذيذة كمان وشكرا لكم مرة تانية

3 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-06-2008 17:09
يا سلام عا هلاطبخه الحلوه و الانيقه الوانها كتير حلوه خرج طبق جانبي عالسفره يسلموا ايديكي و ايدين ستك يا رب

4 الكاتب WAFAA, on 15-06-2008 09:21
شكلها كثير طيبة

بدي اسال انو الخضروات مابتحترق لمدة ساعتين بالفرن ؟؟ وانو اكيد مابنضيف مي للخضروات لحتى تستوى ؟؟

كم هي كمية زيت الزيتون ؟؟

5 الكاتب منى, on 15-06-2008 10:35
هلا غيث

الكواج بيضيفوله بطاطا كمان كتير بيعملوه بهل الطريقة , بس انا لما جربتها ما كتير حبيتها , يمكن لان متعودة على هل الطعمة

من اسرار نجاح الموقع هو وجود أعضاء متلك و متل بقية الخوات , يلي لما بيجربوا شي بيحكوا , أو لما بيمروا و عندهم اضافة بيحكوا , مو بيقروا و بيمشوا :zzz

, الشكر الك غيث على هل الثقة الغالية , و كمان على الاضافة اللذيذة

6 الكاتب منى, on 15-06-2008 11:23
هلا امونة

لا حبيبتي هي مو طبق جاانبي , هي طبق رئيسي و و محرز كتير

الله يخليك و يخليلك حبابك , نورتي

7 الكاتب منى, on 15-06-2008 17:48
هلا وفاء

ما بتحترق و على ضمانتي , اوعى تضيفي الها مي , لان الخضار فيها مي كتير كتير رح تطالعا و تعطي نكهتها للطبق :zzz

طبعا لو عاملة كمية ااقل رح تاخد معك وقت ااقل , المهم تنتبهي عليها و ما تحركيها كتير باول الطبخ

الزيت حسب ما بتفضلي كمية الدهون بالأكل , يعني متل طبخك المعتاد :grin

هلا وفا نورتي و الله

8 الكاتب ام نور, on 16-06-2008 21:54
يم يم

على هالكواج شو طيب اليوم جربتو ولا اطيب اخد معي ساعة بالفرن يمكن لان عملت نصف الكمية وشو لقيتا صحية وخفيفة سلم دياتك يا قمر

9 الكاتب منى, on 17-06-2008 11:44
هنا و عوافي يا رب ام نور , و هنا كمان على قلوب الصغانين الحلويين .. كتير انبسطت انها عجبتك :zzz

10 الكاتب أحمد الله, on 21-06-2008 02:04
الله يعطيك العافيةاخت منى على الطبخات الشهية و الله شي بيرفع الراس

خاصة نحن المغتربين كتير استفدنا من وصفاتك الشهية

لاحظت انك كتير بتهتمي بكيمة و نوعية الدهون بالطبخ يا ريت لو تختاريلنا وصفات صحية بتناسب الحمية و الريجيم من مطبخا الشامي العريق

تقبلي تقديري و احترامي

11 الكاتب منى, on 21-06-2008 11:17
هلا فيك أخي أحمد , نور الموقع فيك و يتواجدك أخي الكريم و الله يردكم لسوريا سالمين و غانمين ان شاء الله ..

مطبخنا نوعا ما يقدر الدهن و الدسم بالاكل بس بنفس الوقت فيه كتير وصفات صحية , و هل الشي بينطبق على اغلب وصفات زيت الزيتون و و ان شاء الله رح نزل وصفات متنوعةخفيفة و صحية بهل الصيفية إذا الله راد..

مشكور اخي للتواجد , مية أهلا و سهلا

12 الكاتب نهال صبري, on 24-06-2008 12:15
أستطيع تصور طعمها اللذيذ لأننا بنعمل أكلة مشابهة اسمها رغيف حواوشي :grin

..بيكون فيهارغيف الخبز محشي باللحم المفروم مع البصل و الطماطم و أضيف له الفلفل الأخضر و يسوى بالفرن في ورق قصدير ثم ينزع الورق و يترك الرغيف ليحمر وجهه، لكن هالوصفة باين عليها أفيد لوجود كثير من الخضار ، بجربها في أقرب فرصة إن شاء الله .

13 الكاتب linda, on 24-06-2008 15:07
انا هاد النوع من الاكل المفضل عندي
بحب الخضرا كتير
صرلي اسبوع خربانة الكي بورد تبعي بس عم فوت و شوف الوصفات
ان شالله رح اعملها يا بكرة يا بعد بكرة لاني اشتريت الخضرا اللازمة و حطيتا بالبراد

يعطيكي الف عافية منى

14 الكاتب منى, on 24-06-2008 17:29
هلا نهولة

شو هل الاكلة شي بيشهي كتير , يا ترى الخبز عربي عادي ؟

ان شاء الله تجربيها و تكون على زووءك و لا تنسي تبوسيلي البيبي

15 الكاتب منى, on 24-06-2008 18:31
هلا لنوشة

ان شاء الله تجربيها و تكون على زووءك و سلامتها لكيبوردك , هيك بتخرب و بتبعدك عنا :roll

الله يعافي يا قمر انت و لا تنسي تخبريني شو بيصير معك , و اذا عاملة نص الكمية رح تاخد معك وقت أأقل

16 الكاتب آرام, on 28-06-2009 11:06
مرحبا أخت منى .. اللحمة بالفرن من الأكلات المفضلة عندي منذ الطفولة، لا أمل منها أبداً .. بس لما شفت وصفتها بالموقع كأني تعلمتها من جديد، وكانت ثاني وصفة أجربها من الموقع بعد المكسيكانو .. وصرت عاملها كذا مرة آخرها أول البارحة الجمعة .. صرت أعملها على طريقتك وبنفس المكونات والنسب (بس ربع الكمية، والصراحة حتى الآن ما جربتها بزيت الزيتون بدل الدهنة بس ناوي أجربها شي مرة) .. صارت تطلع معي أطيب وأحلى بكتير بفضل ملاحظاتك الثمينة .. الملاحظة الأولى عدم تحريكها في الساعة الأولى .. والملاحظة الذهبية الثانية إضافة الملح بآخر ربع ساعة .. يعني ملاحظات بسيطة بس بتعطي فرق واضح بالنتيجة .. ويمكن هل الوصفة تحديداً خلتني أتعلق بالموقع منذ البداية وصار عندي ثقة كبيرة فيك وبفنك وذوقك وأمانتك في شرح الوصفات .. ألف شكر إلك أختي.

17 الكاتب منى, on 28-06-2009 18:21
هلا اخي ارام , ريتو ربي صحة و عافية و هنا , اكيد لازم تقلل الكمية , لان الكمية الي بعملها كبيرة ما شاء الله لا قوة الا بالله لحتى تكفي العيلة .
الشكر الك اخي و لردك و لثقتك في , و اتمنى ان تجرب كمان وصفات و يطلعوا متل ما بتحب , و كمان بحب شجعك تجرب اللحمة بالفرن بزيت الزيتون لأن رح تعجبك .. تقريباً أنا متأكدة

18 الكاتب إسراء, on 10-01-2011 02:32
مرحبا للجميع وتحياتي الحارة لست منى يخليلنا ياكي انتي وموقعك وطبخاتك
سؤال عن الكواج فينا نحط حبيتين بطاطا بس يكونوا الفرم ناعمة ؟؟؟؟؟؟ لانو هي طريقة امي ... ومقدار البندورة فيها كتير بدي خفف شوي منها شو رايك ؟

19 الكاتب منى, on 10-01-2011 08:17
اي فينا نحط بطاطا , مرة جربتها و كانت طيبة , بس انا حبيتها من دونها اكتر يمكن لان معودة هيك عليها

كمية البندورة مناسبة للوصفة , بس اكيد فيك تقلليها اذا جابة , جربي و شوفي

20 الكاتب شفاء, on 15-09-2011 09:59
فعلاا يامنى طريقتك بالكواج فظيعة
ما اتوقعت انه هالشغلات البسيطة ممكن تفرق
يعني انك تأخري الملح
وانه ما انغطيها
با اختصاااار أكلاتك لا يُعلى عليها
وقد مالواحد اتشكرك مابوفيك حقك
فمالنا غير الدعاء
وتأكدي تمامااني بدعيلك بكل لقمة باكلها
الله يفرجها على بلادنا ويبعد عنها كل مكروه
ويحفظكم ويعينكم

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 28/06/2009 )

< السابق		التالى >

[ عودة ]