50 حبة جوز أخضر
كيلو و نصف سكر ( ما يقارب 6 كوب من السكر )
كوب ماء
رشة ملح ليمون
ملعقة صغيرة جوزة الطيب مطحون
نصف ملعقة صغيرة قرنفل مطحون
ربع ملعقة صغيرة فلفل أسود مطحون

·          يقشر الجوز باستخدام سكينة و يزال الجزء القاسي الصغير من أعلى الجوزة ( مكان التقاء حبة الجوزة بغصن الشجرة ) ثم يثقب باستخدام سيخ معدني رفيع .

·          يوضع الجوز في قدر أو مرطبان زجاجي و يغمر بالماء ثم يترك منقوعاً لمدة 15 يوم من دون تغيير الماء , هذا الماء يسمى ما دم الجوز , بعدها يذاق الجوز , اذا كان في الحبة مرار تنقع بالماء البارد مع التغيير عليها حتى يتم التخلص من المرار .

·          يغمر الجوز بالماء ثم يوضع على نار متوسطة و يترك حتى يقارب الغليان و قبل أن يغلي أول غلوة  يرفع من الماء على مصفاة .

·          يوضع الجوز تحت الماء البارد الجاري حتى يبرد .

·          يقسم السكر على ثلاثة أقسام , يغلى أول قسم مع الماء حتى يذوب السكر تماماً ثم يرفع عن النار و يترك حتى تستطيعين إدخال طرف إصبعك الصغير فيه و تتحملين الحرارة حينها يضاف الجوز و يترك لمدة 24 ساعة , مع التحريك بين فترة و أخرى .

·          بعد مرور يوم كامل ترفع حبات الجوز من القطر و يضاف القسم الثاني من السكر ثم يغلى مجدداً حتى يذوب السكر , يترك حتى يمكنك تحمل حرارة القطر بطرف اصبعك الصغير عندها يضاف الجوز و يترك لمدة 24 ساعة .

·          بعد مرور يوم كامل ترفع حبات الجوز من القطر و يضاف القسم الثالث من السكر مع البهارات و ملح الليمون ثم يغلى مجدداً حتى يذوب السكر , يضاف الجوز و يترك حتى يغلي أربع غلوات فقط .

·          أصبح مربى الجوز جاهزاً يعبأ في مرطبان زجاجي و يغمر بقطره و يوضع في البراد حتى وقت التقديم و يفضل تركه لبضعة أيام قبل تقديمه كي يتشرب النكهات اللذيذة للبهارات .

 

تعليقات (45)

1  الكاتب ام نور, on 05-06-2008 21:15 بدون مجاملة يا منى روعة وشي غير شكل ما شالله عنك شو هالشطارة الله يحمبكي ويبارك فيكي بتستاهلي كل خير   هالمريى اكلتو مرة عند نداء وطعمتو ما راحت من بالي وكتير اشتهيت اتعلم طريقتو لان بلبنان ما منعملو

2  الكاتب منى, on 05-06-2008 21:35 هلااا ام نور يا احلى قمر بلبنان كله و انا كنت عم استنى ينزل الجوز لحتى وفي بوعدي الك بطريقته من أول ما اتعرفت على الموقع ..    يا رب تجربيه و يطلع متل الي دقتيه و اطيب عن جد هل المررربى غيرر شكل , الله يذكرها بالخير ندوشة

3  الكاتب Eman, on 05-06-2008 23:04 ما شاء الله وصفات روعة     حبيبتي منى ، اختي الحبيبة ،مالي حدا يساعدني غيرك ، عازمة رفقاتي يوم الاثنين القادم بمناسبة ولادتي ،هيك جمعة خفيفة بدون طبخ ،بس محتارة شو بدي قدم أشياء سهلة علي ،خصوصا أني والدة من 3 أسابيع بس ،لذا ،شو برأيك في وصفات ممكن تنجح معي وتكون سهلة؟

5  الكاتب منى, on 07-06-2008 07:08 هلا أمولة الحمد لله على قيامك بالسلاامة و انا عم قول وين غاطة     في عندك هل التارت  كتير طيب و سهل        و هل الكاتو بيطير العقل وإذا عندك الليدي فنجرز بربع ساعة بيصير جاهز  كاتو جلاس    و الموالح انصحك تعملي فطاير     مشكلة بعجينة العشر دقايق  سهلة و مااا في اطيب منها      ما بعرف يا ترى حابة ساعدك بشي تاني ؟

6  الكاتب منى, on 07-06-2008 11:45 هلا ايمان الله يسلمك حبيبتي , و الله لو تدوقيه رح يعجبك كتيرر كتير , اذا زرتي سوريا أو حلب أنصحك تروحي لمحلات الحلويات و تشتري صحن فيه من هل المربيات المشكلة الغريبة الي ما بيعرفها غيرنا متل مربى الجوز و مربى الانجان و مربى الكباد و مربى النارنج و مربى القرعة ... يااا عيني , متعة و الله هل المربيات     الله يخليكي يا رب , و اتمنى لو تزوري سوريا أو حلب و ببقى بحكيلك عن كم محل بيستاهلوا الزيارة

8  الكاتب منى, on 08-06-2008 07:04 لك له يا امونة أنا غلطت بيناتكم , شوفيني شو كاتبتلك فوووق ..    في الموقع أربع أخوات اسمهم ايمان , بس كل واحدة فيهم مميزة بشخصية غير عن التانية و من هون و راايح رح ناديلك أمونة ..    على فكرة لما رديت علي بمنتدى لك على موضوع مربى الجوز عرفتك فورا

10  الكاتب منى, on 11-06-2008 10:09 هلا امونة   يلا مو مشكلة , صار خير ..    مم يتعرفي عن جد ردودك من الردود الي بتخليني ااقعد و فكر أو ااقراها اكتر من مرة , لان دايما عندك شي مخبى بين السطور     الف شكر ليك على الكلام و الرد المميز , كلك زووء و الله خجلتيني حبيبتي , و ان شاء الله ببقى هيك بعيونك دايما

12  الكاتب منى, on 12-06-2008 16:24 الله يخليلي ياكي يا احلى لولو     يبلا منحطهاعلى قائمة الضضيافة الي رح قدمها الك مع فنجان القهوة بفريز

13  الكاتب ام عمر, on 25-01-2009 22:20 تسلم ايدك يا اخت منى   بس في شغلة ما فهمتها ؟؟؟؟؟؟   هلا يعني نحنا منقيم القشرة الخضرا القسية وبنخلي البنية ؟؟؟؟ ولا بنقيم القشرتين !!!!!!!!!!   والله ما فهمت

14  الكاتب منى, on 26-01-2009 07:18 هلا ام كريم   هو ما فيه قشرة خضراء بس هو هيك اسمه لان الجوز لما بيكون طري و بيبي لسا على الشجرة بيسموه اخضر مع ان لونه أسود و بس ما صارت قشرته قاسيهو بتنفع الواحد يكسرها ليطالع الجوز من قلبها بيصير اسمه جوز سادة     نحنا منقشر القشرة البرانية الي لونها مايل على أسود , و لا يهمك اي سؤال انا بالخدمة

15  الكاتب ام عمر, on 26-01-2009 13:29 تسلمي اخت منى   بعدين انا ام عمر مو كريم   يعني بنقشر الجوز والقلب تبعو هو يلي بنعملو مربى هههههههههههههه عتبك على النظر بس بالصورة مو باين هالشي

16  الكاتب منى, on 26-01-2009 15:17 ولي على قامتي مشان الله لا تواخديني و الله حرارتي مرتفعة و مرضانة كتير و مكربة , يمكن أثر على لهيك ما قرات الاسم مظبوط , لا تزعلي ايه لان هيك طلع معي قلة ذوق كتير     أختي الجوز منقشره متل البطاطا , كيف منشيل منها بس قشرة رقيقة و كمان الجوز نفس الشي   ان شاء الله بموسم الجوز ببقى بنزل صور تفصيلية اكتر , هيك مو كتير واضح معك حق

17  الكاتب ام عمر, on 26-01-2009 22:55 يبعتلك الهنا ان شاء الله   بعيد الشر عنك والله ما زعلت ابدا   ان شاء الله الف سلامة عليكي والله يشفيكي يا رب ديري بالك على حالك   انت ام الذوق كلو ولو ما بعتبرك اخت ما بنبهك الله يبارك فيكي ويخليكي لعيلتك   ومستنية الوصفة بموسم الجوز ان شاء الله

18  الكاتب منى, on 27-01-2009 19:09 باذن الله أختي و اكيدة اذا جربتيها رح تعجبك

19  الكاتب farah, on 17-05-2010 21:57 حبيبتي منى حابة جرب هالمربى ونحنا هلأ متل ما بتعرفي بنصف شهر 5 والجوز الاخضر على الشجر ما أحلاه بس ما لي عرفانة اذا مناسب للقطف ولا لسا؟؟  يوم الجمعة قطعت حبة وقسمتها بالسكين كانت متل حبة العوجا يعني قلبها كان لسا الجوزة كتير صغيرة وكانها مليانة ماء  فيكي توصفيلي الحبة كيف لازم تكون يعني مو لازم الحق قبل ما تيبس قشرة الجوز؟؟ كتير حابة جربه يا ريت تردي بسرعة قبل ما ييبس الجوز

20  الكاتب منى, on 23-05-2010 11:14 بتكون القشرة من برة متل ما قلتي متل حبة العوجا تمام , بس و الله و لا مرة ما خطر ببالي افتحها لحتى شوف الي بقليها     هلا وقت هل المربى ,جربيه و يا رب يعجبك و ينجح معك لان ملوكي

21  الكاتب farah, on 23-05-2010 21:45 خلص الجمعة اذا الله راد رح اقطفهم وبلش فيهم انشاء الله يزبط ولو شكلي رح عزبك معي بالأسئلة لأن لما قرأت ردود الأخوات عملوا عندي تساؤلات غريبة   بعد ما كنت فهمانة الوصفة منك متل مثلا بالوصفة ما ذكرتي تقشير الحبة فقط نزيل الجزء القاسي من أعلى الجوزة  بس جاوبتي احدى الأخوات ان بتقشريه متل البطاطا فهلأ شو لازم اعمل

23  الكاتب منى, on 29-05-2010 09:57 لا فروحة منقشر الحبة كلها متل البطاطا     اتعودنا على هل المربى بالقرنفل , بس اكيد اذا ما بتحبي ممكن ما تستعمليه ,     فروحة انا اسفة كتير للتاخر بالرد , و الله حقك علي

25  الكاتب منى, on 29-05-2010 20:24 الله وكيلك يا فرح الحال من بعضه , يوم الخميس حسيت حالي عصفور و طالعوه من القفص     ما في داعي ان تغطيه بس المهم ان ما تخلي شي حبة طايفة على الوج    انا معك و محمسة كتير لتجربتك لان انتي واحدة رح تجربيه , ان شاء الله يكونوا الجوزات طرايا لان هنن الاساس لنجاح المربى     ممم , انا رايحة اشتري جوز , بس مقشر و خالص لان هل السنة ما الي خلق على تقشيره , يلا لنشوف شو بيصير معنا

26  الكاتب farah, on 30-05-2010 21:32 منون نبهتيني لقصة انهم عم يفوشوا يعني الطبقة كلها طايفة على الوجه مو كلهم برا الماء بس طرف صغير منهم بيأثر ؟؟؟ وشو الحل اذا بيأثر احط فوقهم غطا يكبسم داخل الماء؟؟  بعدين عندي سؤال بالنسبة للسكر انتي ذكرتي بنقسمه ثلاث اقسام فبهالحالة عيار الماء بيزيد ولا كل نصف كيلوا بنزيده فوق بعضه على كأس ماء واحد؟؟  ما خبرتك بدي اهلكك اسئلة   وكمان اكتشفت اني قطفت 62 حبة جوز بدل ال50 اخدني الحماس وخربطت بالعد   فشو أعمل زيد كمان دورة سكر يعني اعملهم 2 كيلو سكر ولا بيمشي الحال؟؟  حبيبتي انتي اتحمليني انتي طرتي من القفص انا لسا بنتي عندها كفاءة وباقيلي شي 20 يوم لطير

27  الكاتب منى, on 31-05-2010 10:14 يييي يا فرح , روحي الله يبيض وجها و لا يضعيلها و يضيعلك تعب و ان شاء الله موفقة بكل امورها , و الله يعطيكي العافية و الله الاهل عم يقدموا مع اولادهم       فروحة حطي طبق خفيف لحتى ينضغطوا و ما يفوش منهم شي .    المي كاسة لكل المربى , لان انت رح تشوفي كيف بعد ما تضيفي الجوز رح يطالع مي من قلبه لهيك ما بده شي    زيدي مقدار السكر كاسة و نص , يعني كله على بعضه 7 كاسات و نص    طمنينا عن بنتك و الله قلبي معك

28  الكاتب farah, on 01-06-2010 15:15 الله يطمنك على حبابك يا رب والله اليوم رجعت من الاجتماعيات وهي عم تسح وتبكي لأن كانت متوقعة علامات كاملة وطلعت مخربطة بالاجوبة وهالسبب بيفقع اكتر من لو ما عرفت الجواب الله يستر مع المواد الجاية     يا ستي مسلسل الجوز لا ينتهي اليوم السؤال: من اول امس لاحظت بلش يصير شويه رغوة على وجه ما ء الجوز وبيني وبينك توقعت من الشوب ممكن يخربو فدخلتهم البراد قولك مو احسن ولا لازم يكون الجو دافي عليهم والله خفت يروح كل هالتعب عالفاضي وخصوصاً ان اصابعي اللي اسودو من فوق الكفوف كل يوم ييذكروني فيه

29  الكاتب منى, on 05-06-2010 20:51 الله يوفقها و لا يضعيلها و يضيعلك تعب يا رب     فينا اكيد نحفظه بالبراد , اصلا هو ما بيحب الحرّ ابدا . متل حكايتي

30  الكاتب farah, on 06-06-2010 20:38 طيب حبيبتي انا صار عندي هوس كل يوم اتركلك سؤال هلأ اليوم حركتهم بالملعقة لأطمئن عليهم ولاحظت انهم لسا لونهم اخضر والصور اللي منزلتيها لونهم اسود هالصور يعني بعد الغلي؟؟ عادي يعني يبقوا خضر   وميرسي على دعواتك الحلوة ربي يخليلي ياكي

31  الكاتب منى, on 07-06-2010 07:32 لا فروحة , الصور الجوز من لما قشرته كان اسود , بس لان ما كان باول نزلته , هلا انتي قاطفتيه غض كتير و لهيك طول لونه اخضر و ان شاء الله هي علامة خير     بعد شوي رح يسود , الله يبيض ايامنا على طول ان شاء الله

33  الكاتب farah, on 09-06-2010 21:32 الله يبشرك بالخير وان شاء الله يوم الأحد رح بلش بالمرحلة التانية بيكون خلصت مدة النقع ورح تكوني معي خطوة بخطوة وخبرك كل التفاصيل   يا ستي بالنسبة لبنتي الحمد لله لحد اليوم عم تطلع منيحة وانشاء الله لما تنجح وتتفوق بدي حليكي من هالجوزات ادعيلي انتي بس يزبطو ويكونوا تمام التمام هنن والمنظومة بنتي

35  الكاتب farah, on 13-06-2010 23:10 نسيت خبرك كمان اني رجعتهم للبراد لأني خايفة عليهم من الحر يعني درجة الحرارة عندي بالمطبخ 31 وصباحا يمكن نصير اكتر لأن مطبخي شرقي يعني الشمس بتدخله حوالي 3 -4 ساعات الصبح فشو رأيك مو البراد اضمن ولا بالقطر ما بتفرق لازم يستووا والله احترت؟؟

36  الكاتب منى, on 14-06-2010 09:03 هلا فروحة     الله يوفقلك هل البنوتة و تكون النتائج ممتازة , و ان شاء الله نسمع منك اخبار حلوة كتير قريب ,ااامين يا رب       ان شاء الله شغلك مزبوط , انا بيسووا معي قبل , بس معلش ممكن يكون فرق بنوعية الجوز ,     اتوقع ما دام كل هل القد شو عندك احفظيهم بالبراد اضمن و احسن و اصلا هل المربى ما بيحب الحرارة ابدا     كتير تحمسة الك , ا رب يزيط معك و تعتمدي الوصفة

37  الكاتب farah, on 14-06-2010 17:09 منى النجدة   ما بعرف شو الغلط بس لما قررت اعمل دورة السكر التانية لقيت القطر اللي كانوا فيه كتير مخضر فقلت لذوقه والصدمة كان مرررر كتير فرميتهم وغليت قطر من اول وجديد ولبين ما برد شوي نقعت الجوزات بالماء البارد(( فضيت زجاجات البراد كلها)) وغيرت عليهم الماء شي 5 مرات وكل مرة صار تتلون الماء خضرا   شو القصة هو طبيعي يكون لسا فيه مرار وبهالحالة ارجع اعمل القطر 3 مراحل ولا خلص حط بكرة البهارات واغليه وكيف ما طلع يطلع   بدي هالوصفة تنجح وبلشت احبط انقذيني بسرعة

38  الكاتب منى, on 15-06-2010 09:51 ولي على البي يا فروحة     خرج تكوني ما مقشرتيهم منيح     المهم هلا ما في ادامك غير حل واحد بس نجاحه مو مضمون     لازم تروحي هل المرارة من الجوزات , م كن تجربي ترجعي تنقعيهم بالمي و تغيري المي كل شوي لحتى تدوقي واحدة و تكون رايحة مرارتها .    ممكن ياخد معك يوم و ممكن 6 ايام حسب جوزاتك , هادا اخر حل , ان شاء الله يزبط معك , و الله احترق دمي

39  الكاتب farah, on 15-06-2010 22:41 والله يا البي نقشرتهم بقشارة البطاطا متلها تمام  بس يبدو اني قاطفتهم بكير يعني لساتهم خضر كتير لأن ما شفت لون اسود على الشجرة لسا وكنت خايفة ييبسوا   المهم انا امس صرت انقعهم وغير المي شي 5 ل 6 مرات ورجعت حطيتهم بالقطر واليوم ذقت القطر لقيت نسبة مرار شي 5 بالمئة فما غيرته بس رجعت نقعتهم بالماء وذقت وحدة تخيلي شو طعمتها   بتشبه العوجا شوي يعني كأن فيها شوي حموضة   ما بعرف الله يستر بكرة رح اعمل قطر للمرة الرابعة وحطلهم بهاراتهم وان شاء الله بيصيروا مربى   ادعيلي حبيبتي

40  الكاتب منى, on 16-06-2010 11:23 ممم , بكرا رح نشوف , بس ممكن متل ما قلتي , انك قاطفتيهم بكير ..    هلا هنن مو مفروض يكون فيهم حموضةو لا مرارة     يا رب يزبطوا معك , و يطلعوا طيبين , عم استنى اخبارك

41  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-06-2010 23:34 مرحبا يا حلوة   حبيت طمنك على الجوزات الحمد لله اليوم عملت آخر مرحلة وهلأ من شوي لتجرأت وتذوقت وحدة يا ستي الله أعلم انا قاطفتهم لسا صغار ما بعرف كيف بدي اوصف طعمته المهم مرار ما في والحمد لله بس يبدو من كتر ما انتقعوا وشربو مي باردة مدري شو صار لهم   يعني طعمته مو مربى او بيجوز لسا ما شرب القطر منيح على كل الأحوال رح عبيهم بمطربان وخبيهم بالبراد لبعد كم يوم وذوق وحدة تانية  وبدي اطلب منك طلب ما تخجليني بدي تبعتيلي عنوانك على ايميلي لأبعتلك منهم كم حبة وانتي بتطمنيني اذا شغلي مزبوط وظريف أو لا   ممكن حبيبتي ناطرك ردك على نار وابعتيلي الرد اذا بدك لأميلي

42  الكاتب farah, on 16-06-2010 23:39 نسيت اسألك هو قلب الحبة لازم يبقى ابيض ولا كمان بيسود لأن القطعتين اللي ذقتهم من الأمس واليوم قلبهم ابيض لسا

43  الكاتب farah, on 20-06-2010 23:05 يا ستي حطيت كم حبة ورح اوصفلك ياهم بث مباشر:  اللي بين معي اني قاطفتهم صغار لأن النتيجة انهم كشوا وصغروا ونشف البهم يعني بالعامية بنقول عصمصوا ما بعرف ليش ؟ مع اني تقيدت بالتعليمات بحذافيرها هلأ الحبة الأكبر شوي ماشي حالها وبتتاكل كلها بس الصغار صار داخلهم متل شي مجلد يعني تجربة شبه فاشلة عم فكر شوف الجوزات اللي باقيين على الشجر الجمعة الجاية لأن من يومين انتبهت انهم لسا خضر وما شاء الله شو كبروا قولك لما بيسود على الشجر بيصير مناسب ولا ساعتها بيكون يبس بصراحة عم فكر عيد التجربة بنفس القطرات المبهرين شو رأيك وانا لسا عند عرضي ايعتلك كم حبة هنن صحيح ما بيبيضوا الوجه كتيير بس حبيت تكوني معي بالصورة وبالبث المباشر شو رأيك؟؟؟

44  الكاتب منى, on 21-06-2010 11:45 هلا فروحة   خلص المربى ما نجح معك , يمكن في اكتر من سبب , بس الاهم انهم مو مناسبين لما قطفتيهم , اذا صحلي سنة الجاية رح صور المربى بكل خطواته و من جوى و برى لحتى تكون الامور اوضح     قلب الجوزة بيبقى ابيض , و هلا ما عاد يسوا تقطفيهم , او فيك تجربي , اذا انقصت معك الحبة بكل سهولة جربي شوي , اذا فيهن قساوة ما بيصير , و اتوقع انهم يبسوا لان هل المربى وقته بايار     انا فكرتك عم تمزحي بعرضك , بس ما دامه جد رح ابعت الك ايميل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved