الكيك ما نجح معي !! هي مشكلة ممكن تواجه كتير مننا , بعد العزاب و الشغل و المصاريف يفشل الكيك لسبب أو لأخر , بس ست البيت لازم تفكر بطريقة لحتى ما ترمي شي و هي فكرة لذيذة كتير , حتى أن أولادي بيستنوا فشل الكيك بفااارغ الصبر و كل واحد إله دور في انتقاء الجيلي الي رح نستخدمه , اليوم كان دور بنتي الكبيرة جودي و اختارت جيلي الدراق ..

ما كتير ارتحت و أنا عم زيين الكيك و صوره بعدها  لأن الكل كان بانتظاري , اتمنيت يكون الشكل أحسن بس معلش , انتو من أهل البيت و ما رح اخجل منكم .

فيك تتحكمي بمقدار الكريما تزيديه أو تنقصيه على حسب رغبة عيلتك , المهم بهل الوصفة الفكرة و بعدها انت و أفكارك و خيالك

أكيد ممكن تحضري الوصفة بأي شرائح كيك متوفرة عندك و ممكن كمان أن يحضر بالبسكويت السادة , يغمس البسكويت بالحليب أو بعصير الأناناس ثم يرتب بثلاث طبقات و يتابع إعداد الوصفة ..

بالصحة و الهنا

)

طبقة الجيلو :

علبة جيلو على أناناس أو فريز ( حسب اختيارك للفواكة )
كوب ماء مغلي
كوب ماء مثلج

تعليقات (26)

1  الكاتب omtasneem, on 13-04-2008 12:25 السلام عليكم ورحمة الله وبركاته. شي بيشهي والله تسلم دياتك عزيزتي منى بس الجيله عنا مابنقدر ناكلها بشو فيني استبدلا او فيني اعملا بالبيت مشكورة

2  الكاتب منى, on 13-04-2008 13:46 هلا فيك أم تسنيم    حبيبتي ما بعرف كيف ممكن نعمل الجيلو بالبيت , بس فيك تستبدلي الجيلو بطبقة رقيقة من المربى

4  الكاتب منى, on 13-04-2008 20:08 من عيوني التنتين , حضر الصحون و ما بتلاقيني الا على بابكم

6  الكاتب منى, on 15-04-2008 10:21 هلا رندوشة الشكر ليك على التواجد الطيب بالموقع     ان شاء الله تجربيها و تكون سهلة و منعشة

7  الكاتب أم مــــالــــك, on 16-04-2008 16:36 تسلم ايدك اخت منى واحنا داخلين على الصيف طبق متل هاد روعه بطلع بارد وخفيف

8  الكاتب منى, on 16-04-2008 20:28 الله يسلمك ام مالك , كلك زووء يا عسل

9  الكاتب بدور, on 16-04-2008 23:07 يمي يمي والله مبينتا كتير كتير طيبة و مشجعة الواحد يجربها بسرعة و مشجعة عالسمن كمان     الله يسلم ايديكي الحلوين يا رب..

10  جربتها الكاتب رنا, on 20-04-2008 17:32 يسلمو ايديكي مدام منى وبصراحة انا جربتها بس صارت معي شغلة غريبة الكريما طلعت لفوق والجيليه صار تحت ياترى شو السبب ؟؟ مع اني طبقتها بالحذافير .....ماتواخذيني طولت عليكي بس محسوبتك كتير جدبة بالمطبخ وشكرا الك مرة تانية

11  الكاتب منى, on 21-04-2008 09:57 هلا فيك اختي رنا   بالعكس أختي لا طولتي و لا شي والي صار معكم سببه انك ما غطيتي الكاتو منيح بالكريما لهيك اتسرب الجيلو و راح للكاتو هل المرة ازرعيها بدقني و إذا جربتيها مرة تانية اكيدة رح تعجبك

12  ايوووووووه الكاتب رنا, on 21-04-2008 17:35 ياستي عرفت السبب بس والله طلعت طيبة وطارت بسرعة بس المشكلة انه انا عملتها ببسكوت دايجستيف قام ماتشربت العصير منيح يعني ضل البسكوت قاسي بس الطعمة طيبة .....هاليومين رح جرب الشاورما وشوف شو رح يطلع معي شكرا الك

13  الكاتب منى, on 21-04-2008 20:01   رنا استعمالك للبسكويت الدايجستف مو هو المشكلة لان فيك تستعمليه عاادي   البسكويت لازم يطرى بعد ما تبليه بالحليب أو بالعصير , المهم ان الطعم عجبكم         ممممم , اكيد رح اسمع اخبار طيبة منك هنا و عوافي على هل الحلى و هنا و صحة مقدما على الشاورما

15  الكاتب منى, on 22-04-2008 18:01 هلا نهولة ضحكت كتيررر لما قلتي زوجي بيدعي على الكيكة     اضافات لذيذة تسلم دياتك , و الترايفل هو شرحات كاتو مع الكماسترد و الفواكة , يعني ابن عم هل الوصفة

17  الكاتب منى, on 17-09-2008 05:52 هلا منونة   هادا بس من زووءك , ان شاء الله تجربيها شي مرة و تعجبك , بس بالبسكويت مش بالكيك الفاشل

18  الكاتب ام دانية, on 17-09-2008 10:16 والله انت فنانة وبصراحة شكلها مغري كتير بس للاسف اكيد مارح اعرف اعملها لانو بنوب مالي شاطرة بالحلويات وخصوصا الكاتو والمعجنات

19  الكاتب منى, on 18-09-2008 06:41 هلا ام داانية , و الله مو صعبة ابداً و لا بدها اي شي , بالعكس هي بقى نجاحها مضمون ان شاء الله , اشتري كيك جاهز سادة و حضري فيه الوصفة و رح تعجبك أكيد

20  الكاتب DOUHA, on 18-09-2008 16:09 بتشهي تسلم ايديك جاري التجربة

21  الكاتب منى, on 18-09-2008 18:56 هلا ضحى يلا خبريني شو بيصير معك بس انتبهي لازم الكريما تبرد منيح و ما يكون فيها فراغات و إلا بينزل الجيلي للكيك و كمان الجيلي يكون برد كتير و قبل ما يجمد بشوي بتحطييه على الكريما

23  الكاتب منى, on 15-11-2008 11:09 هلا ام الهدى   علبة القشطة بتجي بقياس واحد و كميتها تقريباً ثلاث ارباع كوب   و اذا زاد أكيد ممكن تحتفظي فيه في البراد , اولادي بيحبو كتير يغمسو فيه البسكويت و ياكلوه   الجيلي و الجيلو و الجيلاتين نفس الشي و ما في فرق بيناتهم     أي سؤال تاني انا تحت أمرك أختي

25  الكاتب منى, on 07-03-2009 13:09 هلا نوارة   الف الف علفية و صحة على قلبك و قلب النونو الصغير الحلو    خليلي عينك نوارة , ديريلي بالك على حالك

26  ممكن سؤال ؟! الكاتب حمودي, on 20-01-2011 15:43 انا فهمت انها تكون طبقه كيك وطبقه فواكه وطبقه كريمه وبعدين الجيلي صح ؟  ..............  ياريت تردي بسرعه عشان لو فشل الكيك ههههه  مع خالص تحياتي   Ahmed

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved