L2ma.com | لقمة طيبة | L2ma.com | لقمة طيبة | بطاطا كوينز | البطاطا, · , اللحمة, نصف, بالشوكة | L2ma.com

القائمة الرئيسية

الأكثر تصفحاً

بطاطا كوينز

الكاتب/ linda

24/03/2008

كرات البطاطا بحشوة اللحمة و الجبنة من تحت ديات ليندا

كرات البطاطا بحشوة اللحمة و الجبنة و هي الاكلة رائعة بكل معنى الكلمة و خاصة انو فيها جبنة لما تقصيها بالشوكة بتسيح الجبنة منها يعني فعلا شي بيشهي
مين ما اكلها عنا حبها كتير و طلبو الطريقة

نصف كيلو بطاطا مسلوقة و مهروسة بالشوكة
3 ملعقة صغيرة نشاء
ملح
نصف كوب ماء أو حليب حسب الموجود

الحشوة :

200 غرام لحمة مفرومة ناعم
نصف بصلة
بصل اخضر (حوالي عرقين مفروم ناعم )
2 معلقة كبيرة كزبرة خضراء
4 ملاعق زيت زيتون
بهارات مشكلة
خمس حبات جبن كيري مقطعة أرباع

للقلي :

زيت قلي غزير بيضة مخفوقة بقسماط bread crump
direction

·          تهرس البطاطا مع النشاء و الملح و الحليب .

·          تحمس اللحمة بالزيت و البصل و تتبل بالملح و الفلفل و البهارات .

·          بعد أن تستوي اللحمة تضاف الكزبرة الخضراء و تطفى النار .

·          تشكل البطاطا على شكل كرة صغيرة و تعمل حفرة بالوسط و تحشى بحشوة اللحمة و يوضع فوقها ربع قطعة جبنة كيري ثم يغلق قرص البطاطا .

·          تكرر العملية حتى تنتهي الحشوة و البطاطا ثم تغمس الأقراص بالبيض ثم البقسماط ثم تقلى و تقدم ساخنة و صحتين .

أضافة إلى المفضلة (3) |

أقتباس | مشاهدات : 7031

تعليقات (84)

1 الكاتب منى, on 24-03-2008 14:22
ليندا شو هل الوصفة , كتير كتير بتشهي و انا هل الترتيبة كتير بحبها , لو عندي كزبرة خضراء كنت جربتها فوراً ..

تسلم دياتك يا رب و رح جرب الوصفة هل اليوميين إن شاء الله و ببقى بقلك ..

يا ترى النشاء بقدر استبدله بالكورن فلاور ؟ و الا ما بيمشي الحال ؟

2 الكاتب نورا, on 24-03-2008 19:37
يسلموا إيديكي يا رب .. شكلها سهلة وطيبة بس سؤالي: قبل حوالي سنة مرة جوزي بالغلط جاب لي كزبرة بدل البقدونس وما نتبهت وجربتها بالغلط بشي اكلة وطلعت الطعمة مأساوية كأنه عباكل صابون ومن وقتها ما رجعت جربت الكزبرة الخضراء ولا بطيق سيرتها فسؤالي: شو طعمتها فعلاً؟؟؟ لانه بشوف منى بتحطيها في كتير اماكن وكتير وصفات كمان بدها كزبرة خضراء بلغيها مشان طعمتها؟؟؟ وإذا طعمتها مو زيادة بقدر استبدلها بالبقدونس مثلاً؟؟؟

3 الكاتب أم عباده, on 24-03-2008 21:25
تسلم دياتك ليندا كتير بحب هالاكله وبجيبا جاهزه احيانابس ما بتكون محشيه لحمه جبنه موزاريلا بس وبعدماشفت طريقتك خلص بدي اجربها شكلها رائع وشهي يعطيك الف عافيه

4 الكاتب منى, on 25-03-2008 07:39
هلا نورا

بعد زمان القمر ما بان

الكزبرة الخضراء كتير طيبة , بس الي صار معك طبيعي , أهل حلب على الأغلب ما بيطيقوها , لان مو متعوديين عليها ..
بس هي طيبة , أول مرة بتاكليها بتقرفي عمرك و المرة التانية بتقرفي حياتك , بس المرة التالتة رح تتعودي على هل الطعمة و يمكن المرة الرابعة تحبيها

أنا أول مرة جربتها , كانت شوربة البندورة و فيها كزبرة , أكلت من الشوربة أنا لقمة و جوزي لقمة و بعد ما اتطلعا ببعض قمت و كبيت الشوربة , و جربتها مرة تانية و نفس النتيجة فما بقى عدت دخلتها لبيتي ..
بس مرة كنا بالغراند و طلبنا الاكييف و كانت الكزبرة في الحشوة بس بصورة خفيفة و كتير حبيناها , لهيك عدت و رجعت استعملتها ..
نصيحة ممكن تجربيها بالاول بكمية صغيرة كتير لحتى تتعودا عليها و رح تحبيها أكيد ..

هلا في بعض الوصفات ممكن تستبدلي الكزبرة بالبقدونس , و في منهم لأ , أظن هل الوصفة فيك تستبدليها

و كمان نستنى راي ليندا

5 الكاتب omtasneem, on 25-03-2008 08:23
السلام عليكم ورحمة الله وبركاته. صحيح متل ماقالوا اخواتي منى ام عبادة نورا شكلامنفنف وكتير سهلة رح جربها وخبرك يعطيك الف عافيةlinda

6 الكاتب linda, on 25-03-2008 08:51
السلام عليكم ورحمة الله وبركاته
منى حبيبتي جربيها و انشالله تعجبكن انا كتير بحبا

بالنسبة للنشا هو مشان يمسك عجينة البطاطا لما نشكلها اقراص
و بيمشي حال الكورن فلاور ان شاء الله

null

7 الكاتب linda, on 25-03-2008 10:10
اختي نورا نحنا الكزبرة الخضرا بالشام منستعملها عادة و ببيت اهلي و بيت جدي
كنا ناكلها خضرا مع الزيتون الاسود

هلاء متل ما قالت منى ممكن تجربي بالبداية بكم ورقة يعني شي معلقة وحدة و فرميها ناعم كتير او دقيها مع التوم كتير طيبة بالاكل انا بضيفها لكل شي تقريبا

و ازا كان لابد و خايفة استبدليها بالبقدونس :grin

و الف صحة سلف

8 الكاتب linda, on 25-03-2008 12:17
هلا أخت ام عبادة
انا حسيتا باللحمة اطيب
شكرا الك على الرد و الكلام الطيب
ان شالله تجربيها و تحبيها

9 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-03-2008 09:34
تسلم إيديكي أختي ليندا على وصفتك بتشهي أنا بعملها كمان بس بشوية إختلاف و دايما بحشيها جبنة بحب أخلط الجبنة القشقوان مع جبنة مغلية (مسنرة ) و بحشيها كمان بتطلع بتعقد مزج أكتر من نوع من الجبن بيعطي نتايج رائعة
بانتظار المزيد منك حبيبتي

10 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-03-2008 13:09
سلامي للكل

انا صايمة ورح اعملها عالفطار واخبركن :zzz

بس في شغلة منى الغاليةالموقع ما عم ينتسخ منه على الword,ولا عم ينحط على المفضلةمتل قبل :sigh

يا ترى شو السبب

11 الكاتب منى, on 25-03-2008 18:53
هلا ريم

الله يتقبل صيامك يا رب و يزيد و يعلي مراتبك

حبيبتي النسخ حالياً ممنوع في الموقع بسبب السرقات الهائلة من الموقع لمواقع أخرى بدون ذكر المصدر :sigh

أما هي قصة المفضلة فرح أسأل عليها المهندس المختص ..

نورتي يا قمر , من كم يوم مريت بدير عطية و اتذكرتك

12 الكاتب نورا, on 25-03-2008 18:59
بتعرفي يا منى ويا ليندا رح تشجعوني انه أرجع اجرب الكزبرة وخصوصاً انه في اغلب برامج الطبخ الغربية كمان بشوفهم كتير بيستعملوها وبعرف انها مفضلة عند اهل الشام فخطرلي لما جربتها انه انا غاسلتها زيادة أو هيك شي :grin

على كل رح جرب نصيحتكم وأستعمل كمية قليلة لانه عن جد شكل الاكلة بيشهي ويسلموا إيديكي يا ليندا...

13 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-03-2008 19:58
مسا الورد...عملت الوصفة وطلعت طيبة كتير

يسلمو دياتك ليندا بس تلبكت بتشكيلها لانوالمزيج صار دبئ شوي واضطريت ازيدها طحين واحطها بالفريزر شوي

منى الحبيبة.. يا ريت عندي خبر لما مريتي كنت كسبتك، دير عطية حلوة وهواها نضيف (فيها اكتر من مليونين شجرة)

على فكرة مبارح تاني مرة بعمل مربى البرتقال وطلع كتير كتير طيب لك مودتي وامتناني .

14 الكاتب linda, on 26-03-2008 12:33
يا جماعة مشان الله لا تواخزوني اتاخرت بالرد عليكون

الاخت ام تسنيم
مرحبا فيكي والله يعافي قلبك يا رب

هلا رينو
رح جرب طريقتك ان شاء الله باين عليها طيبة وهو بيصير نوع من التغيير
شكرا الك عل التشجيع والمرور الطيب

ريم
صياما مقبولا ان شالله
حبيبتي ازا طلعت دبقة شوي زيدي النشا و غطي ايدك بالمي بين الفترة والفترة
انا كمان بتلزق شوي بايدي بس بضل اقدر اتحكم بتشكيلها
الف صحة وهنا و الحمدلله انو حبيتيها

نورا
اي جربي الكزبرة و لا تغسليها بالصابون
الانسان بس يجرب اكلة جديدة او حتى بهار جديد ممكن ما يحبها او يحس انو غريبة
بس حلو التغيير بالاكل و حلو انو نجرب شغلات جديدة

والسلام عليكم

15 الكاتب منى, on 26-03-2008 14:28
هلا نورا

أكيد لو بس تتعودي على الطعمة رح تحبيها كتير , ابقي خبريني شو بيصير معك

16 الكاتب منى, on 26-03-2008 14:30
هلا رمرومة

ان شاء الله المرة التانية بمرء لعندك و بشم هل الهوايات الحلوة مع فنجان قهوة سادة , غير شكل

ريتو هنا و عوافي على المربى , لو تعرفي قديه بنبسط لما بعرف ان واحدة من الاخوات جربت وصفة و عجبتها

17 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 26-03-2008 15:06
على فكرة انا بعمل هالاكلة بنفس المكونات بس بطريقة الكبة بصينية والجبنة قشقوان مبشورة عالوش وبتحط بالفرن بدون البيض والكعك :zzz

المرة التانية رح اعمل بنصيحتك بس رح احشيها على طريقة رينو :grin

18 الكاتب منى, on 19-04-2008 11:12
جربتها ليندا و كانت تحفة و الله

تسلم هل الديات يا رب

ملاحظة صغيرة , لم أظف الحليب للبطاطا و استعملت الكورن فلاور

19 الكاتب نوارة, on 10-06-2008 15:11
هلا ليندا الله يسلم دياتك على ههي الوصفة من وقت ما نزلتيها وانا بدي اجربها بس جربتها ببقدونس بدال الكزبرة لأنو ما كان عندي كزبرة كتير طلعت طيبة مع العلم انو ان عادة مابحب حشوة اللحمة والبصل مع ذلك حبيتهامممممم

20 الكاتب roroo51, on 22-04-2010 16:25
عفوا بس شو هو البقسماط
يعني متل السميد ؟
و هل من الممكن عوضا عن غمس الكرات بالبيض غمسهم بالحليب
شكرا

21 الكاتب محبةالمصطفى ملك, on 14-08-2010 03:16
منوش وينك ما عبتردي علي ولا بشي صفحة؟؟؟؟

بدي أسأل شو معنى كوينز و هي بالكسرة ولا ياء قصدي باللفظ لأني نويت أعملها هالأسبوع

22 الكاتب منى, on 14-08-2010 13:39
و الله مشغولة كتير و ما عم ااقدر فوت للنت بالايام :roll

معناها ليرات , و الاسم مو ضروري سميها الي بيناسبك , بس جربيها لان يممم , انتبهي لكمية الحليب مع البطاطا ممكن ما يلزمك ابدا

23 الكاتب محبةالمصطفى ملك, on 15-08-2010 03:27
:zzz

يسلمو يا أحلى ست بيت
طيب بدي أسألك كمان كم سؤال لأن في كتير أسئلة متبعثرة في الموقع و هي تبكي بدون أجوبة لها :cry

أولا كرات الدجاج المقرمشة بدي أعملها هاليومين و آخدها معي لبيت خالتي عالافطار و بدي يبيض وجهي بقى في كم سؤال....المايونيز أساسي في الوصفة ؟؟ و ما بنقدر نحضره بالبيت؟؟؟ و آخر سؤال اذا في اي ملاحظات تقوليلي ياهن مشان ما تفرط و تطلع متل صورتك الحلوة اللي بتشهي

24 الكاتب منى, on 15-08-2010 10:36
المايونيز بيعطيها طعمة طيبة كتير , بس اذا مو جاي على بالك ضيفيها بيمشي الحال و لهل الوصفة ما بينفع المايونيز المحضر في البيت لان رح تنقلى و وصفة الماينيز موجودة بقسم اساسيات

ما في نصائح غير انك ما تحضريها قبل بيوم و تحطيها بالفريزر لان رح يتشتش قلبها و تصير طعمتها مو طيبة ابدا :zzz

25 الكاتب محبةالمصطفى ملك, on 15-08-2010 13:42
شكرا أختي
طيب و بدي أسألك على البقسماط أو الكعك المطحون هلأ اذا حضرنا نحن متل مالك كاتبة بتكون النتيجة متل الجاهز؟؟
يعني بقدر استعمله بالمرتديلا؟؟؟؟؟؟
و بدي أسألك أنا جربت عجينة العشر دقائق و فعلا رائعة بس شو الفرق بينها و بين العجينة اللي استعملتيها للصمن طبق للشوربة؟؟؟
و آخر سؤال أنا مشتهية أعمل معروك الرقيق و المعروك التاني اللي حاطتي بالموقع بس نجاحه أكيد؟؟؟
و ما لاقيت طريقة للمعروك الرقيق :cry

و آسفة كتير عالتطويل بس ما بقدر أمنع نفسي من سؤالك عن كل شاردة و واردة :zzz

26 الكاتب محبةالمصطفى ملك, on 16-08-2010 03:44
منمونة بدي أسألك عن بطاطا كوينز ..انت جربتيها؟؟
و شو رأيك فيها لأني كمان رح آخد منها لعند بيت خالتي و ما بدي أصير هيك :sigh

27 الكاتب منى, on 16-08-2010 10:40
ايه متل الجاهز و فيك تستعمليه للمرتديلا اكيد

ما الي حفظانة شو الفروقات , بس في فروق

المعروك الرقيق ما عندي وصفته و البريوش الي في الموقع بتطلع وصفته قريبة للمعروك , مو هو نفسه

اناجربت هل الوصفة و طلعت شغلى , بتجنن

28 الكاتب محبةالمصطفى ملك, on 17-08-2010 02:15
ما أحلاك يا منوشة

أنا فرحانة كتير بردودك من فترة كنت أحس باكتئاب وقت أدخل عالموقع لأن ما كنتي عبتردي....
طيب هلأ عن العجينة قصدي بدي يطلع الصمن هيك لذيذ كتير ..أما عجينة العشر دقائق فرائعة للفطاير أمس عملت صينية فطاير سواريه و طلعت بتشهي

هلأ الأسئلة هي:
المايونيز من وين بتشتريه و أديه كميته و سعره

و بدي سؤال تاني عن شراب التمرهندي أنا بحبه كتير و بعمله برمضان بس بدي أعرف اذا بتعملي الطريقة :roll

29 الكاتب محبةالمصطفى ملك, on 17-08-2010 02:21
منوشة أنات آسفة لأني شفت طريقة التمر هندي في قسم المشروبات مع أني عملت بحث أمس عن شراب التمر هندي و ما عطاني نتيجة
المهم هلأأنا بجيب نصف كيلو ما بعير بالكاسة و بحط لكل ربع كيلو لترين ونصف ماء و كوب و نصف سكر..
بس المشكلة في تصفيته صعبة كتير ما عندك طريقة جديدة لتصفيته

30 الكاتب محبةالمصطفى ملك, on 18-08-2010 14:20
منى وين الردود أنا ملكوعة جبت الفروج و عبستنى :roll

و سؤال تالت أو رابع يضاف للي قبله كمان..الكورن الفلاور شأد حطيتي؟؟
و هو نفس النشا؟ يعني بقدر أستعمله بجميع الوصفات بدل النشا؟؟؟ و شو اللي بتشتريه؟؟؟
و آسفة كتير لأني هلكتك بالأشئلة

31 الكاتب محبةالمصطفى ملك, on 18-08-2010 14:23
آه يا ملم هلكتيني بالأشئلة حلي عني!!!!
أكيد هيك عبتقولي يا منوشة بقلبك بس شو بدي أعمل أنا بحب استفسر عن كل صغيرة و كبيرة :roll

منوش بدي أسألك اذا ما حطيت كورن فلكس بالكعك المطحون اللي رح أعمله بالبيت مو كمان بتطلع وصفة كرات الدجاج مقرمشة و لا الكورن فلكس ضروري؟

32 الكاتب منى, on 19-08-2010 13:05
هلا فيك و اااااسفة للتاخر

نجي للاسئلة

ما بتفرق من وين بشتري المايونيز , احيانا اشتريه من عند البنان بس مو دوما , النوعية الي احبها هي مازولا او النورس حسب ما يكون متوفر , و ما عندي فكرة عن السعر . في تلات احجام و انا دوما اخد اكبر حجم لان استعمله كتير و بيقعد في البراد اكتر من شهر من دون ما ينتزع

التمر هندي بصفيه بمصفاية او بشاشة , هي هي الطريقة و ما عندي غيرها :roll

حطيت من الكورن فلور متل ما مذكور بالوصفة , بس انا ما ضفت الحليب و لا حسيت ان العجينة بدها ايا سائل لحتى ما تفرط .و الصراحة انا كنت دوما استعمل الكورن فلور عوض النشا في كل الوصفات , بس هلا صرت عم استعمل النشا الحقيقي و شفت ان نتيجته احسن.

استخدم كورن فلور من ماركة رويال , يلي علبته صفرا . و النشا بشتريه فرط من عند الجبضون بالكيلو , ممتاز و سعره ارخص و اوفر بكتير من الكورن فلاور

اخر سؤال بتطلع الكرات مقرمشة , بس اذا صحلك شي مرة جربيهم بالكورن فليكس و ادعيلي .

انتبهي وقت رح تقليهم , خلي يكون الزيت حامي و حطي كم قطعة كل مرة و لا تنسي الساعة استراحة بالفريزر للفخدات لافضل نتيجة

ملك حبيبتي خدي راحتك و اسالي على كيفك و ان شاء الله كون جاوبت على كل الي ببالك و ايا شي تاني من عيوني

33 الكاتب محبةالمصطفى ملك, on 19-08-2010 00:54
والله من فرحتي فيك عبكتبلك هلأ قبل ما أقرأ الرد
رح أقرأو و أشوف اذا في أي سؤال تاني

34 الكاتب محبةالمصطفى ملك, on 19-08-2010 00:59
يسلمووووووووووووووووووووووووووووووووووو
على أحلى رد من أحلى منى...
هلأ بدي أسئلك بهالوصفة نشا كاتبة ليندا مو كورن فلاول ما؟؟ طيب و بصير أحط النشا بهالوصفة بدون ما أدوبه بسائل..هلأ مو النشا قصدك اللي صلاحيته بتكون شهر بس؟؟؟؟؟؟؟؟؟؟؟؟؟
رح أجرب بكرا كرات الدجاج ادعيلي :upset

35 الكاتب منى, on 19-08-2010 12:56
لاا ملك , النشا المقصود مو النشا الاخضر , النشا المطلوب يمكن معروف باسم عرعروط , هادا بيجي بالكيلو و بيقغد كتير بشرط ما يجيه رطوبة
الشاء رح نضيفه من دون تدويب , قوي قلبك و على مسؤوليتي :grin

رح استنى رايك بعد التجربة و ميسرة ان شاء الله

36 الكاتب محبةالمصطفى ملك, on 20-08-2010 03:41
أنا اليوم رح أجرب كرات الدجاج(الله يستر)هههههههههههه
بس بدي أعرف وقت بتسلقي الدجاج شو بتحطي مع المي (نحنا بنحط بصلة).

و بعدها بيجي دور البطاطا كوينز..
بس كمان بدي أعرف كوينز بالانكليزي؟؟ لأني دورت عليها و ما شفتها بالقاموس

و بدي أستفسر عن النشا هلأ نحن منعرف جبضون شو يقلو جوزي و قت ليشتري ....نشا وبس؟؟
و هلأأ النشا هاد بيصير بدل الكورن فلور و بدل النشا الأخضر بكل الوصفات و لا حسب الوصفة يعني مثلا رز بحليب و الحلويات اللي بدها كورن فلور بصير بداله؟؟؟؟؟؟؟؟؟؟؟؟؟؟؟؟؟؟؟؟؟
الله يعينك يا منوش

ادعيلي تنجح أكلتي اليوم :zzz

37 الكاتب منى, on 20-08-2010 12:00
طريقتي بسلق الدجاج و اللحمة موجودة بقسم اساسيات

الكوينز = coins = مصرات :grin

بتقوليلو لابو الشباب نشا و بس , لانه عم يسالك هل السؤال لحتى يميزه عن النشا الاخضر
و هل النشا ما بتستعمليه في حلويات الحليب , لان المهلبية بالنشا الاخضر اطيب بكتير و بهل النشا رح تطلع متل اكل الاولاد الصغار :roll

لك شو بك , و الله اكلت همك على اد مو اكلة هم , الله بيسر و رح تنبسطي ان شاء الله

38 الكاتب محبةالمصطفى ملك, on 20-08-2010 15:02
هههههههههههههههههههههههههههههههههههههههههههههه :grin

39 الكاتب محبةالمصطفى ملك, on 20-08-2010 15:43
هلأ عبستنى يبرد الخليط و بعدها رح أشكله بس أنا ما رح أحط مايونيز لأن أبو الشباب ما بحبه بس بدي أعرف عجب ما بأثر على تماسك الكرات....
واااااااااء يمكن راحت علي

40 الكاتب محبةالمصطفى ملك, on 20-08-2010 23:24
أنا هوووووووووووووووووووون
بعد طول أسئلة و استفسارات و أخيرا جربت كرات الدجاج ...
أولا ما فرطوا الحمد لله و طلع منظرهن بيشهي بس الصورة لونهن أشقر أكتر ليش برأيك

و أكلوهن كلهن ما ضل غير كم واحدة بس حسيت انو وقت القلي طلعوا مقرمشين كتير بس بعد ساعة بس خفت القرمشة0...شو برأيك أعمل غير مرة حتى يضلوا مقرمشين؟؟؟؟
و آخر شغلة يا منووووووووووشة بس بدون ما تضربنيني :grin

أنا ما حبيتهن كتير :cry

برأيك لأن ما فيهن مايونيز فطلعت طعمتهم ما كتير طيبة بالنسبة لإلي؟؟؟؟؟؟؟؟؟؟؟؟؟؟؟ و أنا حطيت حبة كاملة بطاطا لأن خفت يفرطوا لأنو ما في مايونيز

بتعرفي مشتهية آخد حبة من الصورة و أدوقها امممممممممممممممم رح تطلع بعين الولدهههههههههههههههههههههههههه
و أخيرا و ليس آخرا يسلموووووووووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووووووووووووو ووووووووووووووووووووووووووووووو كتير

صحيح نسيت أسئلك في عندي بالفريزر صدر فروج و بدي أقليه بروستد عندك الطريقة؟؟؟؟؟؟؟؟؟؟؟؟؟؟؟؟؟

41 الكاتب محبةالمصطفى ملك, on 02-09-2010 22:50
وينك منى؟؟
و ليش ما كان الموقع عبيشتغل؟؟
والله انشغل بالي

42 الكاتب منى, on 05-09-2010 13:49
هلا ملك

ممم , لونهم اشقر يمكن قليتهم ااقل منك .
ما دامهم راحت القرشة منهم معناها ما نشفتي الدجاج منيح , او انك سالقة البطاطا مو بقشرها , شو ؟

يمكن لان غيرتي بالوصفة كذا شغلة فما طلعوا تمام , على كل هنن حتى من دون المايونيز بيطلعوا شغلة طيبة , بقى اتوقع انه اختلاف الاذواق

ما عندي وصفة ممتازة للبروستد , خيرها بغيرها

43 الكاتب محبةالمصطفى ملك, on 05-09-2010 16:10
و أخيرا يا منووش..وجهك ولا القمر؟
والله يا منوشة سلقت البطاطا بقشرتها..و كمان نشفت الدجاج منيح بس ما بعرف..يمكن لأني وقت أخدتهم عند بيت خالة حطيت السفط بكيس مع أني حاولت انو ما يتغطوا

بس أنا حطيت بقسماط منزلي اله علاقة شي؟؟
و هلأ صح كل شخص اله ذوقه بس بعتقد انو نقص المايونيز هو سبب طعمتها اللي ما حبيتها...

على كل رح أعيدها مرة تانية بس مو هلأ..
منى رح أقلبلك راسك :zzz

النشا بوصفة النشا أنا سألتك عليه من قبل بس فهمت منك انو النشا الأخضر
بس بعد ما أمس اكتشفت انو في نشا غعير الأخضر بعتقد انو التاني هو ما؟؟؟

44 الكاتب منى, on 05-09-2010 21:39
ايه هل , لان اتغطوا بقى البخار روح القرشة :roll

البقسماط ما اله علاقة , شو انا بحطه شغل القمر , انا كمان منزلي :grin

ايه التاني مو الاخضر , الاخضر بس للمهلبية و النشاء العادي , العرعروط , هادا نستعمله لباقي القصص

45 الكاتب محبةالمصطفى ملك, on 06-09-2010 02:06
اممممممم يسلمو يا قمر..
بتعرفي أنا حطيتهم بالكيس بعد القلي بفترة بس الظاهر انو كانو دافيين شوي وااااااااااء
يلا خيرها بغيرها..
حباااااابة يا منووش مع أن رمضان قرب يخلص(الله يعيده علينا و عليكم) بس بدي منك امت ما صار عندك طريقة للمعروك الرقيق انك تقوليلي عليها..لأني كتير مشتهية أتعلم طريقته..بتعرفي عمنجيبه من عند فطاير هاواي عبيجي كتيييييييييييير طيب بس بتعرفي بعد رمضان ما بعودو بيعملوه.....
و الشغلة التانية أمس عملت فطاير سوارييه و طلعوا كتير لذيذين بعجينة العشر دقايق بس اذا عملت العجينة بالحليب بدل المي مو بتطلع بعد الخبز أطيب و أطرى؟؟
و ما بأثر على التخميرة الأولية؟؟

46 الكاتب منى, on 06-09-2010 16:19
تكرمي , اتمنى لاقي طريقة منيحة للمعروك و الله كنت ا قصرت :roll

عجينة العشر دقايق بتصير بالحليب و انا مجربتها , ما حسيت ان في فرق لهيك صرت دوما حضرها بالمي

47 الكاتب محبةالمصطفى ملك, on 07-09-2010 05:37
يسلمو يا منوشة
معناها رح أعمل العجينة بالمي
بس أنا كان بدي ما تبس بسرعة عرفتي علي بدي بعد الخبز تبقى طرية...
يعني اذا ما غطيتها بالبراد بعد شوي بتبس..
امممم اشتهيت على كم فطيرة سواريه يلا يومين و بعملهن تفضلي كلي معنا

هلأ منوشة بدي أسألك ما عندك ايميل؟؟؟

48 الكاتب منى, on 08-09-2010 00:04
مستحيل ايا عجينة تبقى طرية ن دون غطى :eek

اكيد عندي فيك تبعتيلي عن طريق اتصل بنا , الف صحة و عافية على البك كاني اكلت :zzz

49 الكاتب محبةالمصطفى ملك, on 08-09-2010 02:25
لا ما هالايميل قصدي
قصدي بدي ندردش عالمسنجر :zzz

50 الكاتب منى, on 16-09-2010 12:26
لا ما عندي مسنجر من شي سنة :roll

و يمكن اكتر

51 الكاتب محبةالمصطفى ملك, on 26-09-2010 01:34
منووووشة
أنا ناوية اذا الله يسرلي ان و أعمل حلو عربي..
و أنا عندي طريقة و بتنجح دائما بس بدي أعرف شو الفرق بين طريقة الكرابيج الموجودة في الموقع و طريقة الأقراص بعجوة...قصدي المفروض يكونوا نفس الطريقة ما؟؟
و أي طريقة من بينهم برأيك أفضل؟

52 الكاتب منى, on 28-09-2010 11:08
ما في فرق غير الحليب البودرة و التنتين نفس النكهة بس الحليب بالاقراص بعجوة رح يعطيها لون حلو

53 الكاتب محبةالمصطفى ملك, on 30-09-2010 06:12
يسلمو منوووشة...
طيب منوشة ليش ما بتعملي ايميل عالياهو و بتنزلي الماسنجر عندك
و الله مشتهية أحكي معك شوي....

54 الكاتب منى, on 30-09-2010 07:57
بتعرفي ملك مع كل هل المشاغل الي عندي ما في وقت ابدا لحتى ااقدر ااقعد على المسنجر :roll

عماستنى رايك بعد التجربة

55 الكاتب محبةالمصطفى ملك, on 05-10-2010 02:37
منى هلأ بدي أسألك على موقع الفيس بوك انت عاملة جروب عليه بس ما عبيشتغل معي ليش؟؟

سمعت من فترة انو محظور بسوريا...صحيح هالحكي؟

56 الكاتب منى, on 05-10-2010 06:00
ايه صحيح , بس في الف طريقة و طريقة لحتى نفوت عليه :grin

57 الكاتب محبةالمصطفى ملك, on 14-10-2010 03:04
طيب متل شو ممكن تساعديني..
لأني أنا في كتييير شغلات بعرف أعملها بالكمبيوتر و بالنت :zzz

بس كمان في شغلات أكتر و أكتر ما بعرفها :grin

يعني بدنا برنامج لمنع الحجب؟؟؟

58 الكاتب منى, on 14-10-2010 09:37
في برامج , في بروكسيات بتحطيها , بس اسهل طريقة هيا s
الي بتضيفيها بعد حرف p في العنوان الي ظاهر عندك فوق , يعني هون
https://www.facebook.com

59 الكاتب محبةالمصطفى ملك, on 17-10-2010 21:44
شكرا كتييير منووووش
ما في أسهل من هالطريقة :grin

بس بدي أسألك هي لكل المواقع المحجوبة؟؟؟؟؟

60 الكاتب محبةالمصطفى ملك, on 17-10-2010 21:46
منوووشة في سؤال تاني بس في مجال تخصصك :zzz

بدي أعمل مكدوس الفاصوليا بس بدل الفليفة بدي أحط محمرة بصير ما؟

لأني ماما عملتها من شي 8 سنين بس ما عبتذكرها بس حطيت محمرة يعني متل مكدوس البانجان

61 الكاتب منى, on 18-10-2010 12:33
شو محمرة :roll

قصدك دبس فليفلة خيت , لان المحمرة رح تدخل المكدوس بسبعميت حيط :grin

اذا قصدك دبس فليلفة فاكيد بيصير

62 الكاتب محبةالمصطفى ملك, on 24-10-2010 03:27
منى
هلأ أنا بعرف ان المحرة نفسها الدبس فليفلة..
شو الفرق بينهم؟؟
و أنا قصدي اللي بنحطها بقلب مكدوس البانجان و بتطلع يمي يمي..

63 الكاتب منى, on 24-10-2010 12:18
ايه هي بتصير
المحمرة هي الي مناكلها مع الكبة و هي عبارة عن كعك و دبس فليفلة و دبس رمان

64 الكاتب محبةالمصطفى ملك, on 02-11-2010 13:14
منووووووشة أنا جربت المكدوس و طلع كتييييييييير طيب يسلمو ايديك...
و رح هلأ أدور على أكلة تانية بموقعك مشان أجربها

65 الكاتب محبةالمصطفى ملك, on 02-11-2010 22:27
نسيت أسأك منووووووشة
بصير نحفظ المكدوس بالبراد؟؟؟؟

66 الكاتب منى, on 09-11-2010 07:21
صحتين و هنا على البك :zzz

انا بحفظه بالفريزر

67 الكاتب محبةالمصطفى ملك, on 10-12-2010 10:17
منووووشة بدي أسألك عن موقع تويتر عندك فكرة عنه؟؟؟
رح أطالعك شوي من جو الطبخ لجو المواقع :grin

68 الكاتب منى, on 12-12-2010 08:00
لا و الله ملك ما عندي فكرة عنه و لا حتى فايتة عليه قبل هلا

69 الكاتب محبةالمصطفى ملك, on 19-12-2010 00:39
منوووشة أنا بدي أسألك عن مربى الجزر لأني رح أعمله هاليومين...
بتعرفي انا كتبتلك السؤال بس ما عبتذكر بأي صفحة و يمكن السؤال طااااااااااار عالطريق ههه :grin

المهم أنا بحب المربيات(القرعة و البانجان و الكباد)
هلأ سؤالي هالمرة مختلف
فالسؤال مو عن الطريقة لان طريقته سهلة كتير
بس السؤال عن الطعم :eek

طولي بالك علي شوي

قصدي بيشبه المربيات هدول و لا من غير كوكب

بانتظار رد أحلى منى :zzz

70 الكاتب منى, on 19-12-2010 10:46
مممم لا كل شي طعمة , حتى الكباد و البانجان و القرعة كل واحد طعمة , ممكن تجربي كمية صغيرة لحتى تحكمي بنفسك , بس بصورة عامة هل المربى عجب أغلب الناس

71 الكاتب محبةالمصطفى ملك, on 20-12-2010 15:11

72 الكاتب محبةالمصطفى ملك, on 31-12-2010 02:12
منووووووووووووشة أنا جربت مربى الجزر..
هو الحقيقة طيب وتغيير شكل
بس صار معي مشكلة
نشف القطر قبل ما يخلص الوقت اللي مكتوب بالطريقة و كمان بعد ما برد المربى صار قاسي..
ممكن أعرف هو هيك و لا لازم يبقى طري؟؟؟؟
لأني بدي أجربه مرة تانيييييييييية :zzz

73 الكاتب محبةالمصطفى ملك, on 31-12-2010 02:20
منوشة نسيت أسألك عن نشا الذرة :roll

أنا خجلانة منك قد ما سألتك بس شي بدوخ :upset

نشا ذرة كورن فلور نشا أخضر و كل شي لحال

هلأ المهم شو هو نشا الذرة؟؟
هو اللي بيجي بعلبة ؟

74 الكاتب منى, on 31-12-2010 10:56
صحة على المربى

ما بقى اذكر تفاصيل الوصفة بس بذكر انها زبطت معي تمام متل مو مكتوبة :roll

نشاء الذرة هو الي بيجي بعلبة صفراء

75 الكاتب محبةالمصطفى ملك, on 08-01-2011 01:34
منى و هو نفسه اللي بيجي فرط و بيقولوله عرعروط؟؟؟
لأن السوبر ماركت قال هاد نفسه

76 الكاتب منى, on 08-01-2011 11:02
هو نفسه

77 الكاتب محبةالمصطفى ملك, on 09-01-2011 19:31
شكرا

78 الكاتب محبةالمصطفى ملك, on 22-02-2011 04:06
و أخيرا.

لك دخت السبع دوخات و فتلت الموقع كله طبخة طبخة و أنا عبدور على الصفحة اللي كانت المرسال بيني و بينك يا منى :grin

بس ما تقولي لحالك هلأ وقتها ليش رجعت؟؟؟

أنا من فترة ما دخلت الموقع لأني كنت مشغولة و لما فكرت أرجع أدخل و أدور على طبخات جدد نسيت بأي صفحة كنت أحطلك الأسئلة بس و أخيرا لاقتها..
على كل حال أنا رح أسألك بنفس صفحة الطبخة اللي بدي ياها بس هالصفحة احتياط :roll

بعرف اني طولت عليك...
يلا اجا دورك احكي و طمنيني عنك...

79 الكاتب منى, on 22-02-2011 13:55
ما في شي انا على حطة ايدك :grin

و الي بيضيعني بيلاقيني هون

صحي انت ليش ما بتحطي الاسئلة الا هون , مين قال انه بدي مرسال بيني و بيك , انا كنت استغرب ليش تحطي كل اسئلتك هون :roll

80 الكاتب محبةالمصطفى ملك, on 22-02-2011 20:10

يعني محسبتيني مجنونة مثلا؟؟ :upset

ههههههه
والله يمكن أنا بحط أسئلتي هون لأن لما سألتك مرة عن البطاطا كوينز جاوبتييني..فلما إجا على بالي غير أسئلة و بغير صفحة خفت تطولي علي بالرد لوقت ما تشوفي ..فصرت أكتب هوون :grin

و بعدين شفتي كيف رديتي بسرعة علي لاني كتبت بهالصفحة ههههه
هي صفحة حبنا...

81 الكاتب منى, on 22-02-2011 20:42
هههههههههههههههه

لا خلص الله يديم الصغحة علينا

82 الكاتب محبةالمصطفى ملك, on 05-03-2011 23:52
هههههه.

شكرا على ردك مشان الكاسترد

83 الكاتب منى, on 06-03-2011 07:44
هلا

84 الكاتب محبةالمصطفى ملك, on 08-03-2011 19:30
منى اليوم أول مرة بدخل على صفحتكم عالفيس بوك و شفت صورة كب كيك الخمس دقايق بس ما شفت الطريقة؟

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 08/09/2008 )

< السابق		التالى >

[ عودة ]