L2ma.com | لقمة طيبة | L2ma.com | لقمة طيبة | مربى بشر البرتقال | البرتقال, · , حتى, عصير, الماء | L2ma.com

القائمة الرئيسية

الأكثر تصفحاً

مربى بشر البرتقال

الكاتب/ منى

08/12/2007

مربى بشر البرتقال مربى مليء بالنكهات التي تخبئها تلك القشرة الذهبية لحبة البرتقال ..

و هو سهل جداً و لا يتطلب أي مهارة لذا فنجاحه مضمون ان شاء الله ..

يحضر هذا المربى بالعادة بعد تحضير شراب البرتقال للمونة حيث يبشر البرتقال و يدعك بالشراب ثم يرمى , و لكن طبعاً ستات البيوت الحلبيات المنفنفات وجدن له وصفة جديدة عوضاً عن رميه .

سر وصفتي عصير البرتقال الذي أضيفه عوضاً عن الماء فيعطي المربى تلك النكهة التي لا تنسى .

حين حضرت عمتي تلك الوصفة و أرسلتها كهدية لابنة جارتها المسافرة للمغرب , اتصلت البنت بالأم و طلبت منها أن لا يرمي أحد بعد الأن أي قشرة من قشور البرتقال و أن يرسلوا لها أكبر مرطبان من هذا المربى اللذيذ .

بالصحة و الهنا

بشر برتقال
عصير برتقال
سكر
عصرة صغيرة من الليمون
direction

·          تغسل حبات البرتقال و تفرك جيداً ثم تبشر على الطرف الخشن أو المتوسط من المبشرة .

·          ينقع بشر البرتقال في الماء و يدعك قليلاً للتخلص من المرارة التي فيه , يغير الماء عدة مرات حتى تزول المرارة تماماً ثم يصفى على مصفاة ناعمة .

·          تقاس كمية البشر المصفى , كل مقدار من البشر يحتاج لمقدار من السكر مع مقدار و نصف من عصير البرتقال .

·          يغلى ماء في قدر متوسط ثم يضاف البشر و يسلق لبضع دقائق فقط حتى يطرى ثم يصفى من الماء .

·          يوضع عصير البرتقال و السكر على النار و يترك ليغلي لبضع دقائق حتى يذوب السكر تماماَ و يسمك القطر قليلاً .

·          يضاف بشر البرتقال و يغلى مع قطر البرتقال حتى يسمك القطر تقريباً لعشر دقائق أو أقل .

·          تضاف عصرة صغيرة من الليمون للمربى ثم يبعد عن النار و يسكب في مرطبانات زجاجية صغيرة , يحفظ في البراد حتى وقت الاستعمال و يقدم مع الخبز أو التوست و الزبدة و هذه صورة قريبة للمربى .

أضافة إلى المفضلة (0) |

أقتباس | مشاهدات : 1753

تعليقات (18)

1 الكاتب Rino, on 10-12-2007 10:21
الله الله يا منى ذكرتيني بالذي مضى ايام اللي كنت آكل و ما أخاف من شي اسمو سمن كانت أمي الله يمدها بالعافية تعمل هالمربى و أحب كتير آكلو مع الجبنة الخضرا يا سلالالالالالالالالالالام ما أطيبو ما كنا أيامها نخاف من شي أسمو مالطية هلق ما منسترجي ناكلها بدون غلي
روحي الله يسعدك و يبارك بزوجك و أولادك و ما ننحرم من أكلاتك

2 الكاتب منى, on 10-12-2007 10:40
خليلي عينك رينو على هل الدعوة ما أحلاها ..

عن جد بعد ما قريتها قلت و ان شاء الله انت كمان و أحسن يا رب

انا بحياتي ما استرجيت اكل جبنة خضرا :roll

, يمكن على أد ما كانت امي تخوفنا منها :grin

بتعرفي رينو و انا عم حضر الوصفة قلت لحالي أكيد انت أول واحدة رح تردي , سبحان الله بحسك بتحبي كتير الاشياء القديمة و الي علبى أصولها و الي هلا ما يقي كتير ناس تحضرها

ما انحرم من هل الطلة الحلوة يا عسل

3 السلام عليكم
الكاتب تورتاية بالكريز, on 10-12-2007 18:21
الغالية منى كيف حالك اختي يارب تكوني بخير وحشتيني انت وغاليات موقعك الحلوين
انا كنت فقدت كلمة مروري وكان عندي مشكلة بتسجيل الدخول بس انحلت الحمد لله مكنتش عارفة اسجل دخول....
وصفة المربى روووووعة والصور تحفة وحتنطق بسيم الله ماشاء الله
مشعارفة ليه عمري ماجربت اعمل مربات مع اني كل يوم بجرب وصفة جديدة اما طبق رئيسي او سلطة او حلو
بس شكل طريقتك واضحة ومبينة رائعة خاصة انني ممن يضايقهم سكر المربات الجاهزة المرتفع بشكل يضايق وانا بحب البرتقال كتير وبدخله في الكثير من الوصفات هو ومبشوره سواء الحلو واللا اللحوم والاطباق الرئيسيه والشوربات احيانا
انا كل يوم تقريبا ادخل الموقع واتابع جديدك الطيب والانيق وحواراتك الممتعة الجميلة وطريقة سردك اللي فيها طيبة وحميمية حلوة
وانا على وعدي لك بارسال وصفات خاصة لموقعك انا بس منتظرة قريبا اشتري كاميرا لتكون الصور واضحة لاني جوالي كاميرته انتهت صلاحيتها ..
اتكلمت كتير جداااا سامحيني
اكيد تعبتوا

:upset

اتركك في حفظ الله ورعايته وان شاء الله موفقة ومتالقة وحبايبك الحلوين بالف خير وبصحة وسعادة يارب
اختك في الله ام ياسمين

4 الكاتب ام نور, on 10-12-2007 22:15
عنجد شي روعةشي بيشهي كتير يسلم دياتك يا اخت منى على هالافكار الحلوة
اشتهيت دوء هالنوع من المربى ,خصوصي انا كتير بحب المربى وعفكرة اكلت مربى الجوز عند نداء ويا الله شو طيب عنجد رهيب اما مربى الورد كمان شي غير شكل

بس لفت نظري انو بيصير عصير البرتقال لا المونة وكتير حبيت اتعلم الطريقة خصوصي انو موسم البرتقال الان يا ريت اذاممكن تنزلي الطريقة لو سمحتي والف شكر

5 السلام عليكم
الكاتب تورتاية بالكريز, on 11-12-2007 04:11
أختي الحبيبة منى ياريت اللهي رضى عليكي تقوليلي ولو بشكلتقريبي النسب اللي استخدمتيهايعني كل ملعقة بشر برتقال كم تحتا من عصير برتقال وسكرلاني خايفة ماتضبط معي لانها اول مرة وتسلمي يارب شكرا لك

6 الكاتب منى, on 11-12-2007 07:01
مية أهلا و سهلا فيك أختي ام ياسمين

بعد ما قرأت ردك ما بقى أعرف بأي كلمات جميلة ممكن رد عليك , و هادا كله بس من طيبة قلبك و اخلاقك و زووءك

يا ريت لو كنت راسلتيني في لك كنت حليت لك المشكلة فوراً

أختي هدا المربى كتير سهل و إذا جربتيه رح ينجح أكيد إن شاء الله و ما دامك بتحبي البرتقال , فرح تحبي هل المربى كتير

أختي كل مقدار من بشر البرتقال بتحطي له مقدار و نصف من السكر مع مقدار و نصف من العصير , أنا عملت 5 برتقالات و طلع المقدار معي تقريباً صحن زبادي صغير

أنا بانتظار وصفاتك ام ياسمين , و كلامك و ردك أسعدني جداً

7 الكاتب منى, on 11-12-2007 17:18
هلا ام نور

صحتين و هنا يا رب , لسا كمان لو تدوقي مربى البانجان ,, يممي

خلص لازم تعمليلي زيارة مع ندا و دوقك كل هل المربيات الطيبة

هو مو عصير هو شراب , و من عيوني التنتين وصفته و لا أسهل و لا أطيب

8 الكاتب ام نور, on 13-12-2007 20:41
نعم اخت منى قصدي شراب البرتقال حابي جربو وكمان شراب الورد اكيد بتعملو ما دام بتعملو مربى الورد

9 الكاتب منى, on 13-12-2007 23:09
هلا ام نور

أختي نحنا ما منعمل شراب الورد و لا حتى بيعرفوه بحلب :roll

رح ضيف وصفة شراب البرتقال الاسبوع القادم اذا الله راد

10 الكاتب linda, on 10-02-2008 19:37
منى جربت الوصفة وما زبطت و اكيد الغلط مني
اول شي القشرة ضل فيها مرارة
مع اني نقعتها بالمي و غيرت المي شي خمس مرات وفركتها منيح مشان تروح المرارة

و انا ما برشتها انا قطعتها قطع رفيعة مشان هيك ما كانت تستوي نشف القطر وهي بعدها عم تعلك و مو منيحة
و القطر توقعتو يسمك ضل تقريبا متل العصير بس اسمك بشي بسيط
خايفة جرب كمنا مرة افشل و انا ما بحب كب اكل
لانو هي ما بتتاكل
اسعفيني
:cry

11 الكاتب منى, on 11-02-2008 07:19
هلا ليندا و الله شو زعلت , لان هل المربى بالذات سهل كتير :roll

القشرة بقي فيها مرار معناها ما نقعتيها لفترة منيحة و عم نحكي هون عن يوميين أو تلاتة مو كم ساعة ..

إذا قطعتيها قطع رفيعة أو بشرتيها مو مشكلة المهم أنك تكوني سلقتيها منيح , البشر بده سلق شوي لحتى يطرى أم متل ما عملتي فرح ياخد سلق أكتر شوي

..

أما قصة القطر هي ما عرفت لها سبب لأن هو رح يسمك متل القطر العادي و على كل فيك تزودي كمية السكر لحتى يصير بالسمك المطلوب

12 الكاتب linda, on 11-02-2008 11:07
شفتي
طلع كل الحئ عل البرش انا ما دخلني شاطرة وعين الله عليي :roll

عاد لو تشوفي يومها كنت عم حضر لاعمل كوسا بلبن و كنت برا عم جيب غراض و عملت هاد المربى كتير تعبت لا و كنت فاتحة عيني قدام جوزي اني رح اعمل مربى و خاصة انو قلي انو كان ياكل منو كتير لما كان بالسويد
شو انخزيت بس هيك صار :sigh

خلص هل المرة رح اعملها و ان شالله تزبط معي
عزبتك معي منى
الله يخليلنا ياك يا حئ

13 الكاتب منى, on 11-02-2008 12:05
:roll

يلا زرعيها بدقني هل المرة و جربي حضريه مرة تانية و الله بيستاهل ..

شو عزبتيني و ما عزبتيني , دا انت تؤمر ياا جميل

14 الكاتب سارونات, on 18-07-2008 00:18
السلام عليكم و رحمة الله و بركاته

جازاك الله خيرا اختي منى على هالوصفة و كل الوصفات عنجد فكرة غريبة و شكل المربى كتير حلو ان شاء الله بالشتا الجايي بجربو
بدي اسالك عن عصير البرتقال هل منعصر برتقال و منستعمل العصير او منضيفله مي و ازا منقدر نستعمل عصير جاهز

اختي منى بدي مساعدتك ازا بتقدري بدي وصفة لتحضير مربى الاجاص دورت بالنت بس لهلا ما لقيت شي و كمان وصفات للاجاص لان عندي اجاص اخضر كتير و ما عرفت شو ساوي فيه

بالتوفيق

سلام

15 الكاتب منى, on 13-08-2008 06:07
و عليكم أفضل السلام و اتم التسليم

انا بستعمل عصير فريش , اطيب بكتير , ما بستعمل الجاهز ما دامه الطبيعي موجود..

مربى الاجاص سويته من شي ثلاث أو اربع سنين ,. ان شاء الله بحضره هل السنة كمان و ببقى بنزل الك وصفته

16 الكاتب لموسي, on 24-05-2009 12:39
عن جد الذ من المربيات الفرنسيه والله عملته مرتين ومع العلم بكون عندي انواع كتيره من المربيات بتحضرها لي اختي الله يحفظها لي كل سنه بس هل مربى مابعرف عشقته خاصه مع التوست المحمص والزبده تسلم ايديك يااستاذه بدون مبالغه اشوف هل موقع احلى موقع بقدم الماكولات السوريه خاصه عاصولها

17 الكاتب منى, on 25-05-2009 13:21
هلا لموسة

الف هنا و الف صحة و عافية على كل لقمة من هل المربى , و انا متلك الصراحة بس ما انوجد هل المربى بتلاقيني بروح و بجي لحتى خلصه :zzz

ألف شكر الك للكلام الجميل و لما يجي من واحدة الها نفسك الطيب فهادا كلام اعتز فيه جداً

18 مربى البرتقال
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-03-2010 01:00
أول مرة أنفذ وصفه بشكل متسرع بدون قراءة التعليقات، لأن قراءة التعليقات تغنيني عن بعض الأخطاء وخاصة في المره الأولى، لذلك لم أنتبه أنه علي أن أنقع القشر لعدة أيام وقمت بنقعه لنص ساعه وغسلته ثلاث مرات، وقمت بالبشر بسرعه وبشكل عشوائي فبشرت أصبعي أيضا، المهم أنني غليت البشر والقطر ولم أحصل على قطر سميك فاستمريت بالغلي حتى اختفى العصير تقريبا، النتيجه بشر طري ولذيذ لكن حد أكثر من اللازم ولكن بدون قطر تقريبا ، فما السبب؟

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 07/08/2008 )

< السابق		التالى >

[ عودة ]