من المربيات الرائعة و هي للأسف غير معروفة كثيراً في البلاد العربية ..

علمتني احدى صديقاتي التركيات طريقة تحضير مربى البرتقال , و لكن بعد عدة تجارب توصلت لطريقتي الخاصة و التي تختلف كلياً عن طريقتها , يعني هذه الطريقة براءة اختراع لي مية بالمية    

سر وصفتي شيئين , أولاً عدم بشر البرتقال مما يعطي المربى مزيداً من النكهة اللذيذة و السر الثاني هو استعمال عصير البرتقال لطبخ المربى عوضاً عن الماء .


يفضل تحضير المربى بالبرتقال المخصوص للعصير و الذي يعرف في سوريا ببرتقال العصير و هو برتقال صغير نوعاً ما , بعد عصره ينقع بالماء البراد و يجب التأكد من زوال المرار تماماً من قطع البرتقال و تغيير الماء عدة مرات , و هذه خطوة أساسية لنجاح المربى .


بعد تحضير المربى , يترك  في البراد لبضعة أيام قبل تقديمه كي تتمازج النكهات و للحصول على أفضل طعم .

بالصحة و الهنا

4 – 5 حبة برتقال
4 كوب سكر
4 كوب عصير برتقال
عصير حبة ليمون

تعليقات (20)

2  الكاتب منى, on 13-12-2007 11:26 هلا بيك ام ياسمين يا عسل انت     أختي ما بتقدري تخففي السكر لان السكر هو الي رح يخلي القطر يسمك , و إذا خففت السكر رح يكون القطر خفيف متل المي     بس فيك بعد ما تحضري المربى تاكلي قطع البرتقال بس من دون القطر و تتركي القطر و تضيفيه للكاتو مثلا بيعطيه طعمة كتير طيبة

3  الكاتب ام نور, on 13-12-2007 20:37 عنجد ما شالله وصفات مميزة الله يعزك يا رب اليوم كنت بالسوق فكان في رجال عامل بسطة وعم بيبيع عليا مربيات شي بيخطر عالبال وشي ما بيخطر سبحان الله جيتي ببالي يا منى وقلت وينك لو تجي تشوفي شي مربى البطيخ الاحمر شي الاصفر شي الكستنا شي الاناناس............واللفتلي نظري التين كل حبة بحالا ومصفوفين فوء بعض بمرطبان لا درجة بتحتاري شو تشتري وكل هالانواع مرتو الي عاملتون عا يدا

4  الكاتب منى, on 13-12-2007 23:28 ممممم , شي بيشهي ..    بحس المربيات فن لحاله , و على سيرة مربى التين , امي بتعمل أطيب مربى تين في حلب , و مين ما بيجي لعندها لازم تضيفه صحن صغير فيه ثلاث تينات أو أربعة مع فستق حلبي ..  و مين ما بيشوفه بيستغرب شو هاد , و بس ما دااقه     رح نزل وصفته بوقت التين إذا الله راد       المهم .. اشتريتي شي ؟؟    إذا اشتريتي , لا تنسي تاكلي عني كم لقمة

5  الكاتب ام نور, on 14-12-2007 11:29 الصراحة ما اشتريت لان شغل بيت كتير غالين نار السعر  والعالم بيقصدوا قصد عاساس صناعة مضمونة بلا مواد حافظة بس في صاحبتي فرنسية كتير شاطرة بالمربى وكل ما عملت لا الا بتعمل حسابي مبارح اتصلت فيني وقالتلي عم تعمل مربى البرتقال وعاملة حسابي فحكيتلا عن الانواع الي شفتا بالسوء قالتلي عادي وقالتلي اسا في مربى البصل تصوري البصل بيعملوا مربى قال عندون المربى فن بحد ذاتو واكتر شي بيتقنو ستات الكبار بالعمر فسبحان الله

6  الكاتب منى, on 14-12-2007 18:22 بصل      لا هي اول مرة بسمع فيه       بعرف شي اسمه مربى البصل وبيكون حلو بس هاد بيقدموه مع الروستو و غيره , أظن هادا هو الي قصدته ..    يا ترى كيف بتعمل المربى صاحبتك ؟

7  الكاتب ام نور, on 14-12-2007 22:15 حقك تستغربي انامتلك استغربت قالتلي انو طعمتو حلوة بس حد شو او كيف بيقدموا ما سالتا هيدي صاحبتي ماشالله عنا كتير بتعمل مربى ما بتخلي نوع يعتب عليا وكل هالانواع متعلمتا من جدتها بس سبحان الله ولا مرة خطرلي جرب اتعلم منا كيف او اسالا شو حاطا معو بس لفتتلي نظري انو في انواع بيحطوا معا خمر ما بتظبط بلاها بس هي لان مسلمة ما بتعمل هالانواع انا اتعلمت منا انواع من الاكل متل تارت او سومون اذا سامعة فيا ,   gateau moelleux,brioche  وغير شغلات كمان و هي تعلمت اكلات لبنانية   مني حكيتيلا عن موقعك كتير عجبا بس المشكلة ما بتعرف عربي

8  الكاتب منى, on 15-12-2007 07:20 هلا ام نور     ما شاء الله عليها صاحبتك , عن جد لو كنت محلك كنت اتعلمت منها كل شي     هيك فرصة ما كتير بتصح         سامعة بهل التارت و كمان بموس السومون , بس و لا مرة دقته     البريوش سبحان الله رح نزل وصفته هل الاسبوع اذا الله راد , بس الكاتو الي ذكرتيه ما فهمت شو معناه       ام نور صار في كتيررر وصفات لازم تعلميني ياها , متل هل التارت و البسبوسة الي طلعت متل الجاهزة و غير شغلات كمان

9  الكاتب ام نور, on 17-12-2007 10:04 انشالله بس لا يمضى العيد بخير بنزل وصفات عرواء ومع صور كمان لان كتير الان مشغولة بالبيتي فور والكعك والمعمول يا ريت اذا بتشاركينا بافكار لا الضيافة بكون الف شكر

10  الكاتب منى, on 17-12-2007 11:18 هلا ام نور     عم استناهم يا عسل , و الله يعطيك الف عافية مقدما     اختي ام نور أنا لهل العيد حضرت حلى الممبريلو , كتير ضيافة جديدة و مميزة , مع الكرابيج و المعمول و أكيد متل ما خبرتك المهلبية و الميني بيتزا بس هدول رح اعملهم بيوم الضيوف ..    بس     انا بحس الناس من كتر مابتاكل من حلو العيد طول الايام الاربعة , إذا قدمولها أشيا جديبدة بيكون أحسن    لهيك بحب بجهز صينية كبيرة بحط عليها أنواع مختلفة من الكاتو المقطع ميني , كتير تغيير شكل

11  الكاتب بدور, on 24-12-2007 14:02 يا سلاااام لك والله شي كتير كتير بشهي رح خلي ماما تعملي هالمربى شكلو كتير طيب وفعلا شي غريب وجديد     و أنا بانتظار مربى التين ميمو لإني كتير بحبو بس نحنا ما منعملو بالبيت أنا دئتو أول مرة من رفيئتي بالاردن وكتير حبيتو.  والله يسلم هالايدين ويعطيكي العافية يا رب انتي و ام نور وكل مين بعلمنا شي جديد

12  الكاتب منى, on 24-12-2007 18:02 هلا بدورة     كلك زووء بدور و ان شاء الله بتحبيه انت و كل اهلك     ان شاء الله من عيوني أطيب مربى تين , بس بشرط تبقي تدوقيني منه

13  الكاتب ام نور, on 31-12-2007 22:20 انشالله بينعاد عليكي وبتعملي حلويات وتكوني بصحة وعافية يا رب .حلى الممبريلو ما عرفت شو هيدا نازل بالموقع وما انتبهتلو انا عملت معمول بس على طريقة والدي فيا نتفة فرق او زيادي على طريقتك وحسب الاخت نداء طيبين وعملت نوع من انواع الكعك منسمي المرقد اذا سامعة في مشهور بي لبنان ونداء قالتلي عن اسمو بحلب بس نسيت كتير طيب وبيتي فور,وبسبوسة والكاتو بالتفاح مع الصوص الذهبي عنجد ما حدا داقو عندي وما حبو وتفاجىء بهل نكهة وسالني شو سر هالطعمة ومن وين جايبي هالوصفة .

16  الكاتب منى, on 01-01-2008 08:15 هلا حبيبتي ام نور     الممبرلو هو حلى السفرجل على الطريقة الاسبانية , أكيد عرفتيه..    صحتين و هنا و على طريقة باباتك معناها غيرر شكل , عوافي و هنا يا رب ..    هدا المرقد مو سامعة فيه ابدا,و لو تعرفي شو انبسطت ان عجبك كاتو التفاح ..    عم استنى وصفة الكاتو الي حكيتي عليها , أنا اكيدة انها بالشوكولا رح تطلع اطيب من الكاكاو     ام نور لازم الصورة تحمليها بالأول على شي موقع للتحميل و بعدها بتبعتي رابطها مع الرد     و هي موقع تحميل منيح http://www.lakii.com/vb/uploader/

18  الكاتب منى, on 15-01-2008 19:52 هلا نورا     بالأول صحتين و هنا على المربيات و متل ما قلتي هو قريب للكباد و النارنج و انا بحب أكله أكتر الشي لحاله من دون شي       زعلتيني على تارت التمر , يلا ازرعيها بدقني هل المرة , يمكن ما كانت الطعمة على زووءك , و الله مع ان كل عيلتي و رفقاتي كتير بيحبوه       سلم دياتك على الوصفة و هلا نزلتها , شي بيشهي

20  الكاتب منى, on 05-10-2008 08:12 ان شاء الله رح نزل كم وصفة بالرمان , بس مو مربى الرمان , ما سمعت فيه أبدا .. دبس الرمان عصير رمان لفان , يعني لا حامض و لا حلو , بينعصر و يصفى و يغلى على النار لحتى يسمك و يعقد و يصير دبس , و بجاول نزله كمان هل السنة اذا الله عطاني عمر

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved