L2ma.com | لقمة طيبة | L2ma.com | لقمة طيبة | خلطة زعتر حلب | الزعتر, حتى, الوصفة, المقادير, إعداد | L2ma.com

القائمة الرئيسية

خلطة زعتر حلب

الكاتب/ منى

25/11/2007

خلطة زعتر حلب الزعتر من ألذ أطباق الفطور أو العشاء في بلاد الشام .و هو يعد بطرق تختلف من بلد إلى أخر أو حتى من مدينة لأخرى .

تتميز حلب بخلطتها التي تحتوي الكثير من البهارات و المطيبات مما يعطيها تلك النكهة التي يعشقها الكل .و كنت قد جربت سابقا العديد من الوصفات , و كانت فاشلة كلها .

استكمالا للزيارة التي قمت بها لسوق المدينة بعد أن اشترينا الكثير من البهارات من محل اسماعيل ويس , انتقلنا لمحل صغير أخر مقابله , حيث أخبرتني أختي سيما أنها اشترت مسبقا من عنده بهارات لذيذة جداً للبطاطا , محل أبو زياد الهلالي ..

توقفنا عنده لاستكمال بهاراتنا .سألته عن وصفة الزعتر و طريقة تحضيرها .فأجابني بأنها وصفة طويلة تحتاج للكثير من المقادير , و هي متوفرة بكثرة , فلما أعذب نفسي بالسؤال عنها أو تحضيرها .أجبته بأني سأجرب الوصفة و أنزلها في النت على موقعي الخاص .

اعتبر الأمر مزحة أول الأمر و ضحك كثيراً .و لكن عندما رأى أن القصة جد , تغيرت ملامح وجهه و سألني إن كنت أنزل الوصفات الحلبية و سألني عن زوار موقعي من أيا بلد و هل يدخله الكثير من عدة بلاد ؟

المهم

أخرج دفتر صفير و قديم من درج في مكتبه و أخبرني أنه دفتر الخلطات , و أراني فيه العديد من الخلطات كبهارات الكاري و السبايسي و غيرها .ثم أعطاني الوصفة ..

شكراً لك أبو زياد الهلالي و جزاك الله كل الخير

الوصفة تحتاج لما يسمى " بطم " , و هو المكون الذي فتلت عليه السبع لفات حتى وجدته .مع أن أبو زياد أخبرني أنه بإمكاني استبداله بالقضامة , إلا أنني أصررت إعداد الوصفة كما كتبها في دفتره . بعد أن وجدته بشق الأنفس , تذوقته و لم يكن له أي طعم أو نكهة , لذا أعتقد أني سأعد خلطة الزعتر بدونه في المرة القادمة ..

و هذه صورة للبطم , و بالصحة و الهنا .

2000 غ سماق
1000 غ قضامة
1000 غ زعتر أخضر ناشف
250 غ كزبرة
200 غ يانسون
200 غ كمون
200 غ بطم
2200 غ سمسم محمص
ملعقة كبيرة ملح
ملح ليمون ما يعادل واحد بالمية من الخلطة
direction

·          يخلط السماق و الزعتر و القضامة و الكزبرة و الكمون و اليانسون و البطم ثم تحمص كل المقادير على نار هادئة , الفكرة من التحميص أن تنشف المقادير و يسهل طحنها , لذا لا يجب تحميصها لوقت إضافي .

·          تطحن المقادير مع الملح و ملح الليمون حتى تنعم تماماً , ثم تخلط مع السمسم المحمص .

·          أصبح الزعتر الحلبي جاهزاً , يحفظ في مرطبانات محكمة الإغلاق حتى وقت الاستعمال .

فكرة سريعة :

·          الكمية المذكورة فوق كمية هائلة , و يفضل إعداد ربعها أو أقل حسب حجم عائلتك .

·          يمكن إعداد خلطة الزعتر بكمية كبيرة و حفظها في البراد من دون خلطها بالسمسم , ثم يخلط جزء منها مع ما يناسبه من السمسم حسب الحاجة الاسبوعية للعائلة مثلاً .

أضافة إلى المفضلة (1) |

أقتباس | مشاهدات : 6693

تعليقات (12)

1 الكاتب Rino, on 25-11-2007 17:41
الله الله يا منى ما شاء الله لا قوة إلا بالله رح قللك متل حلبي قديم مرة سمعتو من خالتي ( حلب الدست و أنت مغرفتها )
يا هيك الشغل يا ولا بلا
بس عندي كام إستفسار أولا لما دقتي الوصفة أكيد حسيتي بفرق كبير بالطعم بين الجاهز و اللي حضرتيه مظبوط
اتنين منوين جبتي البطم و كيف بيكون شكلو
تلاتة وين طحنتيهون عند العطار نفسو
بس ما كون تقلت عليكي حبيبتي بس حسيت أنو الوصفة ممكن ترجعنا للنكهة الأصيلة اللذيذة للزعتر و اللي صعب تلتقا بها الأيام و هاي مسألة كتيربتهمني فمثلا أنا ما بستعمل أبدا بهارات جاهزة لأنو والدي الله يحفظو بياخد البهارات صحيحة و بيعملها بنسب خاصة و بيروح بيطحنهم عندالعطار حتى أنو الزلمة بيقللو لما بتجي بتطحن البهارات عندي بتصير ريحة المحل غير شكل حتى الزباين بيقولولو بدنا من هالبهار اللي عم تطحنو

2 الكاتب منى, on 25-11-2007 21:02
هلا رينو

من زمان القمر ما بان ..

الله يجبر بخاطرك و يسلملي هل اللسان الي بينقط عسل

نجي على الأسئلة :

لما دقتي الوصفة أكيد حسيتي بفرق كبير بالطعم بين الجاهز و اللي حضرتيه مظبوط

فرق كبير

الزعتر حمصته على مرحلتين , أول وجبة الظاهر اني ما حمصتها منيح لهيك صار لونها على أخضر شوي ..

أما الوجبة التانية حمصتها أكتر و صار لونها تمام ..

و علبى كل مع الوجبتين ما احكيلك عن الريحة الي بتفتح النفس أو الطعم و النكهة الطيبة ..

بيكفي انك عارفة شو حاطة بالزعتر ..

اتنين منوين جبتي البطم و كيف بيكون شكلو

البطم دورت و سألت و هلك جوزي و هو عم يسأل لي عليه و ما كنا نلاقيه

بعدها بالصدفة كنت رايحة لميسلون لحتى أشتري كتب من مكتبة الكتب المدرسية , شفت عطار اسم محله شيخ العطاريين و عنده لقيت البطم و أخيراً

و هي أضفت صورة اله في الموضوع

تلاتة وين طحنتيهون عند العطار نفسو

حاولت أطحن الزعتر عندي بالبيت , بس ما انطحن منيح و بقي فيه اشياء مو ناعمة , لهيك أخذه أبو الشباب و طحنه عند شي عطار

و على فكرة أنا كمان ضد البهارات المطحونة , ما عدا الزنجبيل و الكركم , و الا الباقي كله بشتريه صحيح و بطحنه عندي

ممم شهيتني أعرف طريقة البابا الله يخليه

مية أهلا و سهلا فيك رينو

و لا بقى تغيبي كتير يا قمر

3 الكاتب Eman, on 28-11-2007 12:38
ماشاء الله صار نظام الردود أسئلة وأجوبة :eek

؟ والله حسيت حالي داخلة على قاعة الامتحان، حالياأنا آخدة إجازة من الامتحانات لسنة ادعولي أنجح بدراستي وخلص موادي .

يسلمو إيديك يا ست الستات على هالوصفة،بس أنا رأيي من رأي أبو زياد ليش عذب حالي وفي جاهز والحمد لله طيب وماشي حاله ،والصراحة صار عندي فضول جرب وصفتك الحلوة ،بس إنشاء الله لما أرجع على حلب.

4 الكاتب منى, on 29-11-2007 10:32
:grin

هلا ايمان

ان شاء الله من الناجحين يا رب , و ترجعي بخير و أمان

هلا انا على قولة ماما بحب عذب حالي , بس هي تجربة , و عن جد ايمان طلع مو صعب أبدا و كتير اطيب من الجاهز

يلا ان شاء الله بترجعي لحلب و بتجربيه

5 الكاتب أم عباده, on 08-01-2008 21:45
آآخ يا أخت منى لو بلاقي كل المكونات هون بألمانيا لنفذ الوصفة على الفور لانو الزعتر رح يخلص من عندي ولسه بدي شي سته شهور لأنزل على حلب
بس المشكلة بدا أبو الشباب على قولتك يفضى يترجم المكونات للالماني وإن شاء الله يكون في بطم بألمانياوبعدين بتبدأ عمليه البحث بين المحلات العربيه والتركيه وأخيرا الالمانيه وإن شاء الله أجمع المكونات وأطحنهم بشكل ناعم قبل مايصير وقت سفرتي لحلب

6 الكاتب منى, on 09-01-2008 19:22
يا ريت تجربيه أختي لأن عن جد مستاهل

و البطم مو ضروري و أنا ما بقى استخدمه لما رح حضر الوصفة مرة تانية

ان شاء الله ترجعي سالمة و غانمة يا رب

7 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-02-2008 06:43
مشكوووووره غاليتي

هنا الزعتر الحلبي من اغلى انواع الزعتر ويضاف لها فستق حلبي مطحون.. وحابه اني اجربة
بس ما هو القضامه؟؟ وهل اقدر استبدلها بشي اخر؟؟؟

اسفه ولكن لاختلاف اللهجات لم اعرفها

8 الكاتب منى, on 09-02-2008 18:57
لا و لا يهمك أختي , حبيبتي القضامة هي الحمص المحمص و المملح , ما بعررف شو ممكن يكون اسمها , أنا الصراحة مرة جربت أستبدلها بحمص عادي حمصته عندي في البيت بس ما طلع طيب :roll

متل ما قلتي ممكن اضافة الفستق الحلبي , بس انا الوصفة هون نزلتها متل ما اخدتها تمام من أبو زياد

9 الكاتب ام عمر, on 22-01-2009 11:26
طيب اختي الزعتر هو الزعتر الاخضر الورق يلي بنجيبو من السوق ولا شو
وتسلم ايدك مقدما

10 الكاتب منى, on 22-01-2009 11:32
هلا ام عمر

هو الزعتر الاخضر بس الناشف , و الله نبعتيني ان انا مو زاكرتها بالوصفة , الف شمر الك للتنبيه

11 الكاتب Noora, on 05-03-2011 21:40
تسلم أيديكي مدام منى على وصفة الزعتر جربتها وطلعت كتير طيبة وبدي أسألك على تتبيلة السوركة(شنكليش)نحنا طبعآ منشتري قريشة جاهزة وبعدين منتبلها بقى بدي منك المقادير المظبوطة لأني حابة ساويها بالبيت السنة بالعادة بشتريها جاهزة بعرف كترت أسألة عليكي عدم المؤاخذة

12 الكاتب منى, on 06-03-2011 07:43
و الله نورا الشنكليش من الوصفات الي ما زبطت معي بالبيت شو ما حاولت فيها :roll

بقى ما فيني فيدك

صحتين و الف هنا على الزعتر , عوافي يا رب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 22/01/2009 )

< السابق		التالى >

[ عودة ]