L2ma.com | لقمة طيبة | L2ma.com | لقمة طيبة | اللوبيا بالسلق ( طنبورة ) | · , حتى, اللوبيا, السلق, على | L2ma.com

القائمة الرئيسية

الأكثر تصفحاً

اللوبيا بالسلق ( طنبورة )

الكاتب/ منى

22/11/2007

من المطبخ السوري , وصفة شتوية كتير كتير طيبة , فيها دفئ و طاقة و مناسبة لهل البردات الي برة .منقدمها مع عصير ليمون و خبز تازة .

بالصحة و الهنا

كوب من اللوبيا الحب الجافة
كيلو سلق ( ما يعادل 4 حزم صغيرة )
ملعقة كبيرة سمنة
ثلث كيلو لحمة مفرومة ناعم
3 – 4 فص ثوم
ملعقة كبيرة كزبرة ناشفة
نصف ملعقة صغيرة بهار
ملح
direction

·          تغسل اللوبيا المجففة و تنقع طول الليل بالماء البارد .

·          تقطع عيدان السلق و تترك جانباً ليحضر بها متبل أضلاع السلق , تنقى الأوراق و يتم التخلص من الأوراق الصفراء ثم تفرم ناعماً و تغسل عدة مرات حتى تنظف من التراب .

·          تغمر اللوبيا بالماء البارد المملح و توضع على نار متوسطة و تترك حتى تغلي ثم تهدى النار و يغطى القدر و تترك حتى تنضج .

·          يصفى السلق من الماء ثم يضاف للقدر فوق اللوبيا و يترك لمدة خمس دقائق تقريباً .

·          يرفع السلق و اللوبيا على مصفاة و يتركان جانباً لمدة ربع ساعة أو حتى تصفى من الماء .

·          في هذه الأثناء تحضر قلية اللحمة , تقلى اللحمة بالسمنة في قدر كبير على نار متوسطة و تفكك بالشوكة و تقلب حتى تنضج و يجف مرقها تماماً .

·          يضاف الثوم و يقلب لمدة دقيقة ثم تضاف البهارات و تقلب لدقيقة أخرى .

·          يضاف السلق و اللوبيا على اللحمة و يقلب الكل ثم تهدى النار و يضاف نصف كوب من الماء و يغطى القدر و تترك الطنبورة حتى تنضج و يجف مرقها لمدة نصف ساعة تقريباً و تقلب بين كل فترة و أخرى مع الانتباه كي لا تعلق بقاع القدر , يعدل الملح و البهار حسب الرغبة .

·          تسكب الطنبورة في طبق التقديم و تقدم ساخنة مع عصير الليمون و الخبز العربي .

أضافة إلى المفضلة (2) |

أقتباس | مشاهدات : 3024

تعليقات (15)

1 الكاتب nidaa84, on 22-11-2007 10:54
يييممممممممممم شو طيبه هل الاكلة الله يسلم ايديك بتشهى والله ذكرتينى فيها كنت نسيانتها الان صار وقتها على هل برد بدها طنبورة
والله الله يسلم هل الايدين على هل الاكلات انا باليوم بدخل شى اربع خمس مرات بخاف يكون نزلتى شى جديد وراح على الله يلبسك العافيه يارب سلامات

2 الكاتب منى, on 22-11-2007 11:58
هلا يا ندا

شو هل الرد الي بيبل القلب , كتير انبسطت بردك و الله لا يحرمني هل الطلة الحلوة

أنا بموت على الأكلة مع عصير ليمون كتير و خبز تاازة , يم يم يممممي

و يا ريت إذا جربتي شي وصفة تخبريني يا عسل

3 الكاتب ام نور, on 15-12-2007 15:52
ولك شو هالطنبورة هاي يا اخت منى غير شكل سلم دياتك اليوم عملت وهاي اول مرة بعمري بطبخا طيبة طيبة طلعت كتير حبيت انا وزوجي وقلي هالاكلة ذكرتو بالمرحومة نانتو كان ياكلا عندا :grin

ورح ضل اعملا من وقت لا التاني انشالله

مشكورة

4 الكاتب منى, on 15-12-2007 16:18
ان شاء الله صحة و عوافي يا رب على قلبك و قلب جوزك

كتير انبسطت لان جربتيها و عجبتك , هي كتير منحبا عندنا في البيت ..

5 الكاتب Eman, on 14-02-2008 17:53
بدي أسألك أختي منى ،بيصير أعملها بالسبانخ بدل السلق؟

لأنو هون ما عنا سلق ،فجبت سبانخ بداله ،بيصير ولا رح تتغير الطعمة؟ على العموم نحن ما بنعملها ببيتنا بس أنا حابة أعملها كصنف جديد،فإذا بيختلف شوي ،مارح تفرق معي .
شو رأيك؟

6 الكاتب منى, on 14-02-2008 19:00
مممممممم , أظن بيصير بس انا مو مجربتها بالسبانخ ..

إذا بتحبي اعملي بالسبانخ سبانخ بلحمة هي مجربتها و على المضمون

7 الكاتب Eman, on 14-02-2008 21:35
لااااا، أنا بدي طنبورة :roll

عملت سبانخ باللحمة من قبل ، والمشكلة إنو وعدت زوجي أعمل له طنبورة من زمان ودورت كتير على السلق مالقيته، وقلت لحالي يلا بركي بتضبط السبانخ كله أخضر زي بعضه

ما بتذكر جبنا سلق على البيت ،مشان هيك مابعرف شو بيفرق عن السبانخ

قولي لي بتصير مشان أعملها على كفالتك

8 الكاتب منى, on 16-02-2008 06:10
جربي أمولة و ليش لحتى ما يصير :zzz

السلق ورقه أكبر من السبانخ شوي , و بذكر انا مرة طبخته بنفس طريقة السبانخ باللحمة و طلع طيب , معناها إذا جربتي الطنبورة فيه لازم يطلع طيب

إذا جربتيه ابقي خبريني شو أخبارة طنبورة السبانخ , و بيصير حقوق الاختراع محفوظة الك

9 الكاتب عيون ريم, on 10-03-2009 21:49
تسلم الايادي الحلوة اول مرة بعرف بهاي الاكله بس باين عليها طيبه وانا بحب التنوع والتجديد بالاكل تم الحفظ للتطبيق وراح احكيلك شو ردة الفعل بالبيت ههههههههههه تسلميلي

10 الكاتب منى, on 11-03-2009 11:10
ان شاء الله تجربيها و تشوفي شو طيبة , بتجنن عن جد :zzz

11 الكاتب gsm, on 01-09-2009 23:38
يا الله شو بحب هي الاكلة كانت ماما تعملنا ياها وانا كنت كتيير احبها خصوصي مع عصرة ليمون يمي بس انا عندي سؤال كيف بدي اعرف السلق انا بصراحة ما عندي خبرة بشراء الورقيات يعني يا دوب بعرف البقدونس والكزبرة والخس يعني الشغلات الاساسية بقى يا ترى كيف بكون شكله وكيف ممكن اميزه عن السبانخ لأنو بصراحة انا بشتري السبانخ بكياس بتكون مقطفة وجاهزة واهم شي مكتوب عليها سبانخ :grin

لأنو غير هيك بفوت بالحيط :upset

بقى يا ريت تفيدينا ولك جزيل الشكر عم عزبك معي كتييير

12 الكاتب منى, on 02-09-2009 13:56
شوفي اختي الفرق بالحجم , يعني اذا مفروم تقريبا مستحيل تميزي بينهم و خصوصاً ان ما جربت دوقه ني لحتى شوف شو في فرق بالطعم .

هلا هو فريش و تازة ورق السبانخ بيكون صغير و عضه تقريبا بنفس حجم عض البقدونس او اعرض شي بسيط , اما السلق فورقه كبير و عضه تخين و كله غير حجم , اذا بتحبي حطي كلمة swiss chard بغوغل الصور لحتى تشوفيه على المزبوط

13 الكاتب آرام, on 03-01-2010 22:03
مرحبا أخت منى
يسلموا إيديك على الوصفة، الطنبورة ملكة الأكلات الشتوية بلا منازع. بس بدي أخبرك أن الطنبورة بالسبانخ ألذ بكتير من طنبورة السلق. أهلي ما كانوا يعملوها إلا بالسبانخ، ومن سنتين بس عرفت أنها بتصير بالسلق !! بس صدقيني بالسبانخ ألذ بكتير،جربيها وعلى مسؤوليتي .. وكتري عصرة الليمون فوقها .. ورح تدعيلي.

14 الكاتب منى, on 04-01-2010 11:00
معناها انخلت مشكلة كل الاخوات المغتربات الي ما عم يلاقوا سلق , الف شكر الك للاضافةالمهمة , هي اول مرة اسمع ان الطنبورة ممكن تصير بالسبانخ , رجربها اكيد الرة التانية على طريقتك اذا ربنا راد

15 الكاتب ام دانية, on 12-01-2010 16:35
:zzz

واووووووووووووووووووووووووووو بعد كل هل الغيبة عن الموقع ارجع والاقي طنبورة يمممممممممممممم انا بموت ع هل الاكلة بحبها كتير كتير والله منظرها بشهي وشهيتيني اعملها ان شاءالله رح اعملها يسلم دياتك يارب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 03/01/2010 )

< السابق		التالى >

[ عودة ]