L2ma.com | لقمة طيبة | L2ma.com | لقمة طيبة | بهارات مشكلة لذيذة ( خلطة حلبية ) | البهارات, غرام, كان, الي, · | L2ma.com

القائمة الرئيسية

بهارات مشكلة لذيذة ( خلطة حلبية )

الكاتب/ منى

14/11/2007

بهارات حلب ... أطيب بهار مشكل

امبارحة يوم السبت : العطلة الرسمية في سوريا بعد يوم الجمعة . أخذت أولادي لسوق المدينة و هو من واحد من أحلى الأسواق القديمة و المسقوفة في العالم . بالنسبة لي بس ما كون جنب قلعة حلب بيغمرني احساس عارم من العظمة و الجلال . مدينتي بعشقها و بشكل خاص الجزء القديم منها

درت في السوق و اشتريت شوية أغراض و بعدها وصلنا لسوق العطاريين و هو جزء من سوق المدينة و فيه محلات صغيرة كتيرة و متخصصة ببيع البهارات و التوابل . أول محل وقفت عنده كان محل اسماعيل ويس و طالعت اللليستة و بديت شوف اللازم و جرب دوق لحتى اذا عجبني أخد . و اتوفقت بأغلب الانواع الي كانت لازمتني . ترددت بس بعدها سألته إذا كان للبهارات الحلبية الي بيحضرها معيار و اوزان معينة قام قلي طبعا , رجعت سألته اذا بيقدر يعطيني المعايير أو أنه بيفضل الاحتفاظ بها لنفسه لأنها سر الصنعة . جاوبني لا أكيد رح اعطيكي المقادير و طالع كرتونة و جاب قلم كان ورا ادنه و بدي يكتب . الانسان السوري بطبعه كريم و هل البهارات الي عطاني عياراتها هي برأيي واحد من أسرار تمييز المطبخ الحلبي , و كتير من رفقاتي من محافظات تانية بتشتري مع الزعتر و صابون الغار الحلبي مقدار من دقة البهارات الحلبية .

جربت تحضير البهارات اليوم بكمية قليلة و كانت رائعة و على أصولها . مطبخي كله اتعطر بريحتها الدافئة .

هي صورة لجميع البهارات خصوصا للنوشة حبيبة قلبي

بالصحة و الهنا

500 غرام بهار حلو
200 غرام فلفل أسود
100 غرام قرنفل
50 غرام جوزة الطيب
50 غرام حب الهال
50 غرام أعواد قرفة
50 غرام زنجبيل
direction

·          توضع كل البهارات و هي صحيحة في مطحنة البهارات ثم تطحن حتى تصبح ناعمة .

·          توضع البهارات المطحونة في مصفاة ناعمة للتخلص من كل الشوائب ثم تحفظ في مرطبان محكم الاغلاق حتى وقت الاستعمال .

·          الكمية فوق كبيرة جداً و يفضل تحضير ربع الكمية لان البهار المطحون طازج دائما أفضل .

أضافة إلى المفضلة (1) |

أقتباس | مشاهدات : 12864

تعليقات (13)

1 الكاتب linda, on 15-11-2007 13:00
يا سلام يا منوش
حننتينا نرجع على سوريا واسواقها وعطارينها و حاراتها الدافية والمليانة حياة

شكرا عل الوصفة و اكيد رح اعملها
بس شو يعني بهار حلو
ازا الو غير اسم او صورة خبريني الله يرضى عليكي

2 الكاتب منى, on 15-11-2007 15:09
من عيوني التنتين

هو اسمه فلفل حلو و أنا رح حط صور كل البهارات المذكورة في الوصفة إذا الله راد

3 الكاتب سارونات, on 15-08-2008 05:47
السلام عليكم و رحمة الله و بركاته
يعني هادول السبع بهارات اللي بيحكو عنهم اختي منى

بدي اسألك لازم البهارات تكون صحيحة يعني لو الواحدة مستعجلة او شي فيها تخلط البهارات و هي مطحونة كمان بشو منبدلها ازا مو موجودة يعني مثلا بالوصفة في بهار مشكل بس ما عندي فشو بحط بدالو او ما بحط شي
ما تواخزيني على اسئلتي لكتيره
بالتوفيق
سلام

4 الكاتب سارونات, on 20-08-2008 03:30
السلام عليكم و رحمة الله و بركاته
اختي منى شو قلتي بسؤالي و كمان ازا قررت حط كل شي ما عدا الهيل تنفع و تصير مقبولة يعني

او بلاها
بالتوفيق
سلام

5 الكاتب منى, on 20-08-2008 06:42
هي هي اختي البهارات السبهة وهي خلطة مميزة و طيبة كتير

الوصفة هيك اصولها , لما تنقصي شي أو تحطي بهار مطحون رح تطلع طيبة بس مو متل هل الوصفة , يعني بتجربيها بس مو على ضمانتي :zzz

6 الكاتب سارونات, on 24-08-2008 19:15
السلام عليكم و رحمة الله وبركاته
طيب راح جرب و بشوف كيف بيطلعو
اخر سؤال هو ازا بالوصفة مكتوب بهار مشكل او البهارات السبعةو مانا متوفرة عندي شو ساوي
بالتوفيق
سلام

7 الكاتب منى, on 25-08-2008 06:58
بتستخدمي الفلفل الحلو , أو تشكيلة من بهارت مفضلة عندك

8 يا عيني على حلب وبنات حلب ..
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-11-2008 11:02
السلام عليكم ..
صرلي ساعة عم اتصفح الموقع وشوي قول سوري شوي تانية قول لاء .. بس لما شفت هالخلطة هي عرفت انك سورية حلبية أصيلة ..

تسلم ايديكي عهالخلطة .. وفعلاً اللي ما بيعرف هالخلطة من البهارات معناتا ما بيعرف البهار اشي هوه ..

سلام عليكم

9 الكاتب منى, on 30-11-2008 13:11
مية اهلا و سهلا بشرى

و عليكم افضل السلام و اتم التسليم
نور الموقع بأحلى عضوة حلبية ,هي كلمة "اشي" ما بتطلع غير من عنا :grin

ان شاء الله يعجبك الموقع و تبقي تزورينا دايما

10 الكاتب سارونات, on 24-12-2009 12:32
السلام عليكم و رحمة الله و بركاته

اختي منى حب الهال بيكون بقشوره او من غير قشور

بالتوفيق
سلام

11 يا سلام
الكاتب AYAH, on 25-06-2010 11:20
حبيبتي منى هالخلطة خلتني أشتاق لماما لأنو ماما لهلأ بتعمل البهار لحالا وما بتشتري مطحون أبدا متل ما كانت نانتي تعمل الزعتر الحلبي على ايدا ولكل العيلة
بس سؤالي انو هل الزنجبيل من مكونات البهار الأصلية؟ لأني بصراحة بمصفاية تجفيف البهارات اللي كل طفولتي بتزكرا ببلكون المطبخ ما كنت أشوف الزنجبيل بس بنفس الوقت بتزكر انو كانو 7 حزيرة بقاهههه
هلأ عم بجيب بهاراتي من عند امي وبدبر حالي فيون
يلا بلكي بصير بفضلك بعمل وببعتلا
الله يعطيكي الالعافية المقدمة بتطير العقل

12 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 08-09-2010 03:00
السلام عليكم ورحمة الله

سقى الله أيام حلب اللي مضت من سنيييييين، ريحة هالخلطة بحلب عن جد مميزة، وعكل حال فعلا بهارات كل منطقة بتختلف كتير عن منطقة تانية.
ماما ما كانت كتير تحب الخلطات، كانت تحط للأكل فلفل وفليفلة وهيك يعني عالخفيف. ولكن دااااايما كانت علبة البهارات هي موجودة ولما تروح عالمدينة تجيب منون، يعني ما بشوفها تستخدمها بئى وين كانت تروح ههههه ؟

بدي اسألك منى ... شو هو البهار الحلو يلي حاتطيه بأول المقادير ؟؟؟

وغير هيك ....... من شي سنتين تلاتة عرفت أن جوزة الطيب محرمة شرعاً بحسب المذاهب الأربعة ....... فخلصت الكمية يلي كانت عنا (ببيت أهلي) وبطلت جيبها :roll

.

بس ان شاء الله يبئى بحضر الخلطة بدونها ما مشكلة

. شكرا كتير لمنوش ولعمو اسماعيل.
صحي كان في واحد كنت اشتري من عندو بالمدينة، محلو كتير كتير حلو معلق عواجهة المحل نجوم بحر وشغلات مجففة .. كان كتير طيوب الله يذكرو بالخير. وعفكرة هالمحلات لا تستهينو فيون بنوب بنوب عندون شغلات غريبة عجيبة ما بتخطر عالبال لذلك ممكن أحيانا تسألوون: شو عندك كمان شي غريب ؟

لأن كل مرة كنت روح لعندو كنت اكتشف شي جديد تماما. هههه مرة بدي اشتري بخور، آم سألني البياع: لشو لازمك ؟ .. قلتلو: بدي بخور وبس

... قلي : يعني للريحة ولا للسحر ولا شو ؟ .... قلتلو :

هات من كل شي عندك. وطلعت مربعات خضرا ودوائر حمرا وبودرة وقطع سودا وما بعرف شو (مو بعيدة تكون لسانات ضفادع وعيون سحالي :grin

).

آخر مرة زرت فيها سوريا بالعيد الماضي ما نزلت عحلب، ضليت ببيت حماي بالشام فأخدتني بنت حماي عالبذورية ، وهي نفس سوق العطارين عنا ... وكمان طلع شغلات غريبة عندو، وشو ما قلو: في عندك ؟ .. يقلي: في ... ومدري من وين شي من تحت الأرض شي من عالسقف بيطالعلي. آخر الشي قلت بدي أعجزو

.... ووالله اخترعتها من عقلي قلتلو: عندك زيت كركم ؟؟؟؟؟؟
قلي: ايه أديش بدك ؟

طولت عليكون :zzz

يله ناطرة اعرف شو هو البهار الحلو وشكرا .....

والسلام عليكم

13 الكاتب منى, on 16-09-2010 13:06
البهار الحلو هو نفسه الفلفل الحلو و طالعة صورته بالصورة الجماعية للشباب فوق

بالنسبة لجوزة الطيب انا سالت المفتي و قال لي مو حرام , بقى ما بعرف مين المزبوط :roll

شوضحكت على زيت الكركم :grin

, الي بيعيش بيسمع , بس و لا مرة خطر ببالي اسال عن اشيا غريبة , في كذا نوع بهار رح جرب دور عليه , ما دام لاقيتي زيت للكركم فمن باب اولى لاقي زعتر فارسي , الزعتر الي ما لاقيت منه عند المحلات الي بتعامل معها

شكرا كتير jassy دوما ردودك مو بس ردود , فيها شي اكتر و انا انبسط كتير و انا عم اقرها

هلا فيك

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 29/09/2009 )

< السابق		التالى >

[ عودة ]