L2ma.com | لقمة طيبة | L2ma.com | لقمة طيبة | مخلل اللفت | التخليل, · , المرطبان, بشكل, المخلل | L2ma.com

القائمة الرئيسية

الأكثر تصفحاً

مخلل اللفت

الكاتب/ منى

07/11/2007

من أطيب المخللات الشتوية و أكترها فتح للشهية , لونه الحلو المنعنش بيجب النعنشة لاكتر ايام الشتي كابة , لهيك دايما بيكون على مائدتي الشتوية .

يحضر هذا النوع من المخلل بالمي و الملح و شوية ملح الليمون ,بعد ما نجهز المخلل و نغمره بمزيج التخليل , نتركه في مكان دافي و لا نفتح المرطبان و نغير اله مكانه أو نحركه نهائياً قبل عشرة أيام من اعداده و إلا فرح يتأخر المخلل كتير ليستوي و يصير لونه مو حلو أو متل ما منقول بالعامية رح يحرد المخلل .!!

في من ستات البيوت تمن بيحط حبة أو حبتين من الشوندر لحتى يصير اللون أحمر , أنا ما بحب هل الاضافة و لا أستعملها أبداً أما الأخوات خارج سوريا فاللفت المتوفر عندكم بيكون لونه أبيض , لهيك لازم تضيفوا هل الشوندرة .

واحدة من رفقاتي التركيات خبرتني انه بتركيا بيحطوا مع مزيج التخليل كم فص من الثوم مع حبات فليلفة حرّة و كم حبة فلفل أسود , جربته بطريقتهم و كان الطعم مختلف بس طيب .

بالصحة و الهنا

2 كيلو من حبات اللفت الصغير نوعاً ما
6 - 7 كوب ماء
نصف كوب ملح صخري خشن
ملعقة كبيرة ملح ليمون
حبة كبيرة شوندر ( اختياري )
direction

·          يغسل اللفت جيداً من دون أن يقشر ثم يقطع بشكل طولي لأربع أرباع إذا كانت الحبة صغيرة أو يقطع لشرحات إذا كانت الحبة كبيرة قليلاً و يصف في المرطبان .

·          يذوب الملح بالماء حتى يذوب بشكل كامل ثم يضاف ملح الليمون , أصبح مزيج التخليل جاهزاً .

·          تغمر حبات اللفت بمزيج التخليل بحيث تغمر بشكل كامل و لا يبقى أي جزء ظاهر و إذا لم يكفي المرق تجهز كمية أخرى منه ثم تغطى بكيس نايلون صغير منعاً لظهور الحبات فوق المرق و يغطى المرطبان بشكل محكم و توضع في مكان دافئ في المطبخ .

·          يترك المرطبان في مكانه و لا يحرك و بعد مرور 10 – 15 يوم يصبح المخلل جاهزاً .

أضافة إلى المفضلة (1) |

أقتباس | مشاهدات : 6689

تعليقات (26)

1 الكاتب ام نور, on 07-11-2007 10:28
الله يبارك فيكي اخت منى هالمخلل هو اكتر نوع مفضل عندي ودائما بعملو بس انا بستبدل الملح الليمون بالخل هاك علمتني حماتي قال ميشان الحبة تقرط وكمان قالتلي بعبي جط ماء واضع بيضة فيه واضيف فوقهم ملح واحرك حتى تفوش البيضة على سطح الماء وهكذا دليل على ان كمية الملح مناسبة للمخلل وعندها اضيف الماء فوق المخلل وصرت هاك اعمل بس ماني مجربة الا اللفت ولا مرة جربت غيره

شو رأيك سامعة بهل طريقة شي قبل

2 الكاتب ام نور, on 07-11-2007 10:31
اخت منى بدي تشرحيلي عن مربى الجوز الاخت نداء قالتلي انو اهل حلب مشهورين في كتير وشهتني اعرف

اذا ما في ازعاج

3 الكاتب منى, on 07-11-2007 11:29
هلا ام نور الغالية

مممم , أنا بحب المخلالات كتير , و دايما البراد الرف الأخير منه نصفه مراطبين مخلل :grin

سمعانة بهل الطريقة و كنت أعملها دايما , بس مرة جربت قيس الملح و طلع معي هل المقدار و صرت استعمله دايما

هل الطريقة حكيت عنها على على هل الرابط

مربى الجوز ,مممممم يا عيني على مربى الجوز شو طيب ..

كنت حابة نزل طريقته بالتفصيل بالصيفية , نزلت للسوق لأشتري حبات جوز أخضر , بس كان خلص وقته :sigh

الطريقة باختصار بتقشريه الجوز الأخضر و بتثقبه و بتنقعيه بالمي لمدة اسبوع أو عشر ايام
بعدها بينغط بمية مغلية و بيرفع بسرعة
منعقد قطر و منحط فيهم الحبات و منتكرهم يغلوا كم دقيقة و بعدها منرفعه , و منكرر العملية على تلات أيام و بالمرة الاخيرة منحط قرنفل ليعطي نكهة ..

عن جد ما في أطيب منه , و إذا الله خلانا من الطيبين لوقته رح نزل طريقته بالخطوات المصورة

4 الكاتب ام نور, on 07-11-2007 13:42
تسلمي الله يخليكي ما شالله شو بتعملو اشيا مميزة وفي مربى الباطنجان والقرع والورد معناها شي طيب بيطلع

انا كتير بحب المربى يعني ما لازم ينقطع البيت من المربى غدا رايحة عسوء الخضرا وبدي اشتري سفرجل ورح اعملو مربى وبخبرك شو بيصير معي

5 الكاتب منى, on 09-11-2007 11:33
مممم , و في مربى النارنج و الليمون و الكباد الرائع و هو نوعي المفضل

رح انتظر رايك , و ان شاء الله يكون على زووءك

6 الكاتب ام نور, on 09-11-2007 22:19
شي كتير حلو . مربى الليمون البرتقال قصدك اذا البرتقال بيعملوا بفرنسا بس ولا مرة خطرلي دوقو هون كل شي فواكه بيعملوها مربى حتى الكستنا ما بعرف شو بتسموها انتو بيعملوها مربى حتى الخوخ الدراق الكرز الاجاص ... انا بالبداية استغربت هالانواع لان ما متعودي الا عاكم نوع معين من الفواكه كنا نعملون

بس
منك اخت منى ومن فرنسا عرفت كتير انواع حتى اليقطين قال بيعملوا مربى حابة بس دوق

لا شوف شو بيطلع طعمتو بس سمحيلي النارنج والكباد ما عرفت شو هني ممكن منسميون نحن غير

7 الكاتب منى, on 10-11-2007 22:55
هلا ام نور

لا قصدي مربى الليمون , و هو مو كتير معروف هون , انا اتعلمته من صديقة تركية

و كمان الكستنا بتعملها صديقتي مربى و كتير كتير مشهور بتركيا , بس و لا مرة جربته ..

و انا متلك بحب دوق و جرب اشيا جديدة ,

النارنج بيشبه البرتقال و منعمل من قشوره مربى ..

والكباد كمان بيشبه الغريفون بس على اكبر و قشرته سميكة كتير و منعملها مربى ,, و هدا المربى اذا كان على أصوله ما في اطيب منه

و الله ما بعرف شو ممكن يكون اسمه التاني بس رح اسال و خبرك

8 الكاتب منى, on 14-11-2007 22:01
هلا أختي ام نور

الظاهر ان ردك راح مع الهاكر :sigh

المهم أختي اني قرأته و كنت سألتك يا ترى انت قشرت اللفت قبل ما تكبسيه ؟

احنا اللفت عندنا لونه متل الفجل و هو الي رح يعطي اللون الزهري للمخلل..

بس انا شفت صور للفت في النت و بتكون قشرته كاشفة , إذا هدا اللفت الي عندك ممكن تضيفي الملفوف الاحمر أو كم حبة شوندر

نورتي أختي

9 الكاتب ام نور, on 15-11-2007 22:44
شو قصة هالهاكر هيدا

ليش كان يسيطر عالموقع

الصراحة في كتير انواع من اللفت في فرنسا الاصفر والطويل النوع الذي استعملت هو لفت ابيض قلبه والقشرة بيضا مع لون بنفسجي ميشان هاك اضطررت حط ملفوف احمر لا يتغير لونو

10 الكاتب منى, on 15-11-2007 23:32
و الله أختي ام نور ما بعرف شو قصة هل الناس

معقول ان يكون الإذى هيك , مزاج بس

حسبي الله و نعم الوكيل ..

نرجع للمخلل

إذا هادا اللفت الموجود فأكيد لازم تستعملي شي تاني مع الكبيس لحتى يعطيه لون حلو

11 الكاتب kuwaiti_girl, on 01-02-2008 11:31
الحمدالله على سلامه الرجوع .. صج استانست

ومشكوووره عزيزتي الغاليه على هالةصفه . وهالمخلل اعتبره من المخللات المفضله عندي وان شاء الله بسويه خاثه ان موسمه الحين بالاسواق

12 الكاتب kuwaiti_girl, on 03-02-2008 12:49
اعتذر عن الاخطاء الاملائية

كنت كاتبه مشكوره غاليتي على الوصفه لات مخلل اللفت من المخلالات المفضله لدي وهنا بالكويت يطلقون عليه شلغم

وفعلا اشتريته وطبقته وان شاء الله بعد سواه اصوره لكم

13 الكاتب منى, on 03-02-2008 13:04
و لا يهمك أختي , بتصير معانا كلنا

إن شاء الله استنى رايك و الصورة كمان و كتير انبسطت انك جربتيه ..
أظن كمان بالعراق يسمونه شلغم :roll

14 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-02-2008 05:58
عدل كلامج غاليتي... اغلب دول الخليج يسمونه شلغم

وبالنسبه للكبيس طلع طييييييييييب واحلى من الجاهز
لدرجه ان صديقتي اخذت معها نصف البرطمان وهي مغادرة :cry

الله يوفقك ان شاء الله و ينولك كل اللي ببالك

واحب ان اشكرك على اللبنه.. كنت فخوره فيها جدا .. لاني اول مره اعمل فيها اللبنه ..

15 الكاتب منى, on 11-02-2008 07:19
صحتين و هنا على قلبك و قلب رفيقتك , شو انبسطت انك جربتيه و عجبك

مممم جربت اللبنة , يا عيني عليك و ما بعتيلي منها مرطبان صغير

هنا يا رب و عوافي

16 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-02-2008 13:13
:grin

يا بعد قلبي والغلا كله
ومثل ما وعدت

هذي صور المخلل :grin

هنافي اول المرحله اول ما سويته

وهنا بعد النضج

وهنا عند التقديم

17 الكاتب منى, on 13-02-2008 17:26
ممممم , شي مرتب و منفنف تسلم دياتك كويتية يا عسل , لون المخلل بيجنن

أختي لو سمحت حولت الصور للأخت مس انجل لحتى تصغرها و تحط ختم الموقع عليها و أعادت تحميلها على الموقع من بعد اذنك

18 الكاتب kuwaiti_girl, on 14-02-2008 05:48
مشكووووره يا قلبي

وحبيبتي انا كلي تحت تصرفك مو بس الصور... تصرفي فيهم مثل ما بدك

وان شاء الله بحط صوره اللبنه .. جد لذيذه>>>> شو رايج فيني وانا تلميذه مثابره :grin

19 الكاتب منى, on 14-02-2008 06:53
الله يجبر بخاطرك يا رب يا كوكو يا عسل , خليلي عيني شو مبسوطة فيك

أنتظر صورة اللبنة و ان شاء الله من ديات ما نعدمها

20 الكاتب ام نور, on 27-05-2009 11:31
منى عفكرة ممكن وضع قطعة من الملفوف الاحمر مع اللفت بدل الشوندر بيعطي لون رهيب وكمان الملفوف المخلل كتير طيب انا ما بستعمل الا الملفوف الاحمر مع اللفت

21 الكاتب منى, on 31-05-2009 20:02
مممم , يا عيني فكرة حلوة و اكيد رح يصير الملفوف كمان طيب كتير

خليلي ياكي ام نور , دايما افكارك حلوة و غنية , سلم دياتك

22 الكاتب Eman, on 09-02-2010 00:49
السلام عليكم
عزيزتي منى أنا جبت اللفت والشوندر وما عندي ملح صغري ،بمشي الحال ملح عادي؟؟ حبابة بدي أعرف مشان جهزه قبل ما تخرب المواد

23 الكاتب منى, on 09-02-2010 14:11
لا ما بيمشي الحال , بدك ملح ما فيه يود و الا ما رح يطلع معك المخلل تمام :roll

24 الكاتب Eman, on 12-02-2010 22:39
آسفة كمان سؤال تاني .. ما عندي ملح الليمون شو أستخدم؟؟

25 الكاتب منى, on 12-02-2010 23:38
خلص لا تحطي شي , هو رح يخلي لونه مشقرق :roll

26 الكاتب الدمشقية, on 18-01-2011 09:23
يمممممممممممممم شو طيب المخلل
ربي يسعدك يا منمونة ويبارك فيكي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 18/01/2011 )

< السابق		التالى >

[ عودة ]