L2ma.com | لقمة طيبة | L2ma.com | لقمة طيبة | حراء اصبعو | · , العدس, العجين, على, اصبعو | L2ma.com

القائمة الرئيسية

حراء اصبعو

الكاتب/ منى

27/10/2007

يممممي ما في أطيب منها حراق اصبعوه من الاكلات الشامية القديمة الي لازم تكون موجودة بكل صبحية او جمعة للنساء , و هي الوصفة الرائعة مو معروفة برة دمشق .

تعتبر من المقبلات الفاتحة للشهية بس بالنسبة الي أقدمها كوجبة غذاء مغذية و متكاملة ..

بيتحضر العجين باستخدام طحين و ماء و شوية ملح و من هل العجينة نحضر المربعات التي تطبخ مع العدس و القسم التاني نحضر فيه القراميش المقلية الي نزيين فيها وجه الحراء اصبعو .

للحمض فينا نضيف دبس الرمان و فينا نضيف حمض التمر هندي و الاتنين طيبيين كتير و بياخدوا العقل .

الطريقة الي ذاكرتها بوصفتي هي الطريقة القديمة و الأصلية و هلا الصبايا ما بقى يحضروها فيها , بيستخدموا معكرونة مع خبز محمص للوج و الطريقتين طيبات بس بلقمة طيبة كل شي لازم يكون على اصوله

بالصحة و الهنا

كوب عدس بني
6 - 8 كوب ماء
ملح و رشة بهار و رشة شطة
مقدار من التمر هندي حسب الرغبة أو ثلاث أربع ملاعق كبيرة من دبس الرمان

العجينة :

ثلاث أرباع كوب طحين
رشة ملح
رشة خميرة ( اختياري )
ما يكفي من الماء لعجن الطحين

التقلية :

حزمتان من الكزبرة الخضراء
5 – 6 فص ثوم
4 حبة كبيرة بصل
نصف كوب زيت زيتون تقريباً
direction

تحضير العجينة :

·          يمزج الطحين و الملح و الخميرة و ما يكفي من الماء لتحضير عجينة لينة و متماسكة .

·          يرش طحين على طاولة العمل ثم تفرد العجينة لمستطيل كبير و يرش المزيد من الطحين كي لا تلتصق العجينة بطاولة العمل أو بالشوبك .

·          تقطع ثلاث أرباع العجينة إلى شرائح طولية بعرض اصبع ثم تقطع كل شريحة إلى مستطيلات أو مربعات صغيرة .

تقطع ثلاث أرباع العجينة إلى شرائح طولية بعرض اصبع ثم تقطع كل شريحة إلى مستطيلات أو مربعات

· يستخدم كشتبان خياطة نظيف أو غطاء علبة الكولا لتقطيع باقي العجين , يغمس الكشتبان بالطحين ثم تقطع به العجين لدوائر صغيرة لتحضير القراميش التي يزين بها وجه الحراق اصبعو .

باستخدام كشتبان خياطة نظيف أو غطاء علبة الكولا لتقطيع باقي العجين

·          توضع المستطيلات المقطعة قي مصفاة و تهز للتخلص من الطحين الزائد , و تكرر العملية مع الدوائر .

تحضير الحراق اصبعو :

·          ينظف العدس و يغسل عدة مرات ثم يوضع على نار متوسطة مع ستة أكواب من الماء و يترك حتى يغلي ثم تهدى النار و يغطى القدر و تترك حتى يقارب العدس من النضج .

·          تضاف مستطيلات العجين للعدس و تفرد كي لا تلتصق بعضها ببعض و يضاف المزيد من الماء المغلي إذا دعت الحاجة .

·          تغسل الكزبرة و تفرم ناعماً , يفرم البصل لجوانح رقيقة أو ما يسمى في دمشق : قروش قروش , يهرس الثوم .

·          بقلى البصل بالزيت حتى يطرى ثم يضاف الثوم و يقلب لبضع دقائق و أخيراً تضاف الكزبرة و تقلب تقليبة واحدة ثم يبعد الوعاء عن النار .

·          تضاف ثلاث أرباع التقلية لمزيج العدس على النار مع البهارات و الملح و الحمض و يترك حتى ينضج العدس و العجين و يترك الباقي من التقلية لتزيين الوجه .

·          تقلى دوائر العجين بالزيت الغميق حتى تشقر ثم ترفع و توضع على ورق ماص .

تقلى دوائر العجين بالزيت الغميق حتى تشقر

تطبيق الحراق اصبعو :

· يوضع مزيج العدس في طبق بايركس ثم يرش ببقية تقلية الكزبرة و البصل و الثوم .

· تنثر القراميش على وجه الحراق اصبعو ثم يقدم ساخناً أو فاتراً أو بارداً .

فكرة سريعة :

بعد ستات البيوت أصبحت تحضر الحراق اصبعو بطريقة أسهل , تستعمل معكرونة الفتوتشيني عوضاً عن مكعبات العجين التي تطبخ مع العدس , تكسر و يستعمل مقدار كوب من المعكرونة لكل كوب من العدس , و لتحضير القراميش بقطع رغيف خبز عربي إلى مكعبات أو معينات و ثم يقلى و ينثر على الوجه .

أضافة إلى المفضلة (3) |

أقتباس | مشاهدات : 12624

تعليقات (22)

1 الكاتب ام نور, on 28-10-2007 13:56
واخيرا عرفت الحراء باصبعو اد ما سمعت عنو بالمسلسلات الشامية فعلا اكلة معروفة بالشام بس وشكلا كتير مفيدة ومغذية كلك زوء اخت منى

2 الكاتب arwen, on 29-10-2007 04:28
الله يسلم هالايدين
كمان هالصنف بدي اعمله بعزيمتي يوم الجمعه
لك منين الله بعتلي ياكي والله صرت اعزم خخخخخخخ
وكل الاكل عم بختاره من هون وبطبقه :zzz

3 الكاتب منى, on 29-10-2007 09:46
هلا ام نور

ما عدا انها مفيدة كتير كتير طيبة

إذا جربتيها ما رح تندمي ابدا و على مسؤوليتي ان شاء الله

4 الكاتب منى, on 29-10-2007 09:05
هلا arwen

ان شاء الله عوافي و هنا على قلبك و فلب ضيوفك

الله يجبر بخاطرك يا رب , كلك زووء و كتير مبسوطة فيك و بردودك الحلوة

5 الكاتب ladama, on 11-04-2008 20:15
بلفعل لذيذة جربتها تسلم يداك

6 الكاتب منى, on 12-04-2008 20:07
صحتين و هنا أختي

مية اهلا و سهلا

7 الكاتب هنون, on 18-10-2008 12:17
انا اليوم عملتها وطلعت طيبة كتير وزوجي اول مرة بياكلها و عجبته كتير طبعا انا عملتها متل ما كاتبة بس بنصف الكمية انشاالله بيسلموا ايديك والله يعطيك الصحة و العافية
السلام :grin

8 الكاتب منى, on 18-10-2008 13:54
هلا هنونة

مية الف صحة و هنا على قلبك و قلب زوجك , كمان عندنا بالبيت كتير بيحبوها :zzz

نورتي و الف شكر ليك لتجربتك وصفاتي و كمان انك عم تقوليلي شو جربتي

9 الكاتب dado, on 24-03-2009 04:14
مرحبا منوش.. عملتها ع مرحلتين وطلعت كتير طيبة وما اثر تحضيرها على يومين ابدا على الطعم. وخلط التقلية مع العدس خلى كل النكهات تمتزج مع بعض.
حضرتها مع مجموعة وصفات لعزيمة مبارح وكلهن من مطبخك، عملت: حراق اصبعو، يالنجي، شوربة بصل، باستا سالاد، سلطة بطاطا بالزبادي، وفروج بالبطاطا، وكاتو شوكولا وكاسترد طبقات بالبسكويت وشراب قمر الدين.
كلن طلعوا طيبين ومنظرهن بياخد العقل وطاروا فورا
شكرا منى على كل مساعدك

10 الكاتب منى, on 24-03-2009 08:51
هنا و الف الف الف عافية على قلبك وقلب كل ضيوفك بكل لقمة اكلوها عندك ..

يا ستي منقية وصفات كلها ما في اطيب منها , الحمد لله انها عجبتك و عجبتهن و ما كات ناقص هل العزيمة الا انك تعزميني :grin

11 الكاتب DOUHA, on 07-05-2009 21:49
يا منى عيني

هيك رح سميكي دائماً
ياستي رح جربا يوم السبت ان الله راد
مفيدة وطيب

ة ا

كيد وشكلا شيك يسلموا
وحبيت فكرة الدوائر المقلية بتجنن
برافووو

12 الكاتب منى, on 08-05-2009 09:41
هلا ضحى حبيبتي

يا عسل اي صحلي انا لمن تسميني ضحى هل الاسم الحلو :zzz

ان شاء الله تجربيها و تعجبك و الفكرة علمتني ياها مرت عمو لشريف و هي شاامية اصلية عنها اخدت الوصفة :zzz

13 استفسار
الكاتب ملتم حلب, on 15-09-2009 16:22
مرحبا أخت منى
الآن حراء اصبعوا ماعنا ياه بحلب
أنا بعرف انو موجود بس بدون عدس (بلحمة مفرومة وعجينة ومية لحمة وبصل)
وهاي الوصفة ياللي كاتبتيا انت بعرف انو اسما (رشتاية عدس)؟؟
صح كلامي ويلا

14 الكاتب violet, on 10-08-2010 19:40
بصير بدل الكزبرة بقدونس ؟؟

15 شكراً كلك ذوق
الكاتب بنت دير عطية, on 02-04-2011 00:31
السلام عليكم :كيفك اخت منى ان شاءالله بخير .
انا اليوم عملت حراء اصبعو وطلعت كتير طيبة يسلمو ايديكي والله يجزيكي الخير .انا بعرفها هالطبخة بس وقت امي تساويها منساويها ع جمعة "العائلة وعيلة العائلة بتكون مجتمعة "وبيعملو شي 3 او 4 كيلو عدس ما شاء الله وانا بحب اعملها بس المشكلة بدي مقادير لشخصين ومن خلال هالاكل تعرفت ع موقعك الحلو لان وقت دورت عليها ع النت شفت كتير بس مقاديرك والمحتويات كانت متل مامنعملها وبالنسبة للعجينة هلأ في كياس عجين جاهزة بالسوق خصوصي لهلأكلةوالله طيبين وظراف .
لا تأخذينا حكيت كتير يمكن

16 الكاتب nesrin, on 27-10-2011 03:17
مرحبا أخت منى أنا أول مرة بشارك هون حبيت قلك الله يعطيكي العافية شو طبخك على الأصول من زمان حابة أعمل هل الأكلة بس ما عم لاقي مقادير ظابطة واذ بالصدفة بفوت على موقعك وصار موقعي المفضل الله يجزيكي كل خير ....

17 الكاتب منى, on 29-10-2011 14:21
هلا نسرين

منور الموقع بهل الاخت الجديدة و الغالية و انا اتمنى انو تجربيها و تكون نممم و متل ما بتحبيها و متعودة عليه

ممنوتك لردك و تواجدك و ان شاء الله تبقي معنا على طول

18 الكاتب منى, on 29-10-2011 15:21
هلا اختي بنت دير عطية

اي و الله هي المشكلة الي دايما بتصير معي وقت حدى بيعلمني شي طبخة ..
كنت اسالها لماما اول ما اتجوزت انو اديه تقريبًاَ؟ تقلي على النظر , قلها و الله ما في نظر :grin

بالعكس ما كترتي و لا شي , انا بحب الردود الطويلة لان بتبل القلب
هلا

19 الكاتب منى, on 29-10-2011 19:02
هلا فيوليت

لا ما بيصير ,الكزبرة جزء من النكهة

20 الكاتب منى, on 29-10-2011 20:55
هلا اخي ملتم حلب ,
صح وصفة الحراق اصبعو الي بيعملوها الحلبية غير هل الوصفة , و الرشتاية غير هي كمان
ان شاء الله بحط كل الوصفات الي زكرتها لتشوف الفرق بنفسك

21 جربت وصفات ثانية
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 11-04-2012 11:09
منى، صار لي ثلاث أيام بس أشوف الوصفات وأقرأ التعليقات، الى أن استنتجت ان هذا وبسايت مختلف عن كل الباقيين، أولا لأنه عربي، على عكس كل الوبسايتس اللي كنت أروحلهم قبل عشان آخذ وصفات، وثانيا إنه كل الأكلات مجربة. لذا قررت أشترك معكم مع انني لا أحب أن أشترك مع أي وبسايت. وقررت إني أجرب حراء أصبعه، لأني جربتها من ثلاث وصفات مختلفة، وكل مرة تطلع مو حلوة. قلت بجرب من عند منى والحقيقة مثل ما قالوا غيري من الأخوات، الوصفة ممتازة. أنا الحقيقة عملتها بالطريقة القديمة، العجينة عجنتها، وقطعتها. أكثر من رائعة، يسلموا ايديكي. أنا زوجي نباتي، لا يأكل أي لحوم، وكمان لا يأكل الكثير من الخضار (ملوخية، بامية ...). عشان هيك دايما بدور على وصفات بقوليات، بطاطا، باستا، أكل هندي. يعني بحاول أنوع. أنا عمري ما كنت تبع طبخ، لأني بشتغل، بس هلأ لما أولادي كبروا، صار عندي فراغ وقررت أدخل المطبخ بجد. راح أبدأ أعمل كل وصفاتك وحدة واحدة، وبعد حراق أصبعه، راح أعمل الاساسيات اللي هي دبس الفليفلة وصلصة البندورة والبستو عشان أكون ماشية معك على نفس الخط.

22 الكاتب منى, on 11-04-2012 21:06
هلا هدهد

ردك بيعنيلي كتير , انبسطت فيه و انبسطت انو شفتي بالموقع شي مختلف و انبسطت انك جربتي الوصفة و كانت على زووءك و انبسطت كتيررر لانك سجلتي معنا و صرتي جزء من العيلة , مية هلا فيك نورتينا

ان شاء الله تكون بقية الوصفات على زووءك و انا بانتظار رايك ة اخبار تجاربك اللذيذة , ان شاء الله

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 06/05/2009 )

< السابق		التالى >

[ عودة ]