L2ma.com | لقمة طيبة | L2ma.com | لقمة طيبة | خضرة مشكلة | حبة, · , صغيرة, كبيرة, ملعقة | L2ma.com

القائمة الرئيسية

الأكثر تصفحاً

خضرة مشكلة

الكاتب/ منى

16/10/2007

خضرة مشكلة

وصفة طيبة كتير اتعلمتها من أخت زوجي هلا و الي هي كمان اتعلمتها من حماتها الله يرحمها و كانت هلا تحضرها النا بكل عزيمة بناء على طلب الجمهور ..

تقشير الخضار و تقطيعهم يأخذ شوية وقت لهيك فيك تحضري الخضار قبل بيوم و تحطيها بكيس بلاستيكي لتوفير الوقت . و كمان ممكن اضافة أي نوع من الخضار التي تفضليها متل االكوسا أو الباذنجان أو البامياء أو الفاصولياء أو الذرة , و هي الفكرة شفتها بالخضرة المشكلة الي دقتهامرة بمطعم الكمال بالشام , كانت طيبة بس أنا بحبها اكتر الشي بالخضار التي ذكرتها في الوصفة

بالصحة و الهنا .

كيلو لحمة غنم هبرة مدقوقة
2 – 3 ملعقة كبيرة صنوبر
نصف ملعقة صغيرة بهار
2 حبة فليلفة حمراء
2 حبة فليلفة خضراء
بصلة كبيرة
3 حبة بطاطا
4 – 5 حبة جزر
نصف كوب بازلاء مجمدة
2 فص ثوم
عصير نصف ليمونة صغيرة
2 حبة بندورة
1 – 2 ملعقة كبيرة معجون طماطم
2 ملعقة كبيرة سمنة
direction

·          تفرم الفليلفة الحمراء و الخضراء إلى عيدان صغيرة , يهرس الثوم و بفرم البصل جوانح , تقشر البطاطا و البندورة ثم تفرم إلى عيدان أو مكعبات .

·          تدعك اللحمة مع الصنوبر و البهار ثم تشكل بهيئة أسياخ صغيرة .

·          تذوب السمنة على نار متوسطة ثم تضاف قطع الهبرة و تقلب بلطف حتى تنضج اللحمة و يجف مرقها .

·          يضاف البصل ثم الجزر ثم الفليلفة ثم البطاطا ثم البازلاء و الثوم مع التقليب بعد إضافة كل نوع .

·          أخيراً تضاف البندورة المفرومة مع معجون الطماطم و عصرة الليمونة و ما يكفي من الماء أو المرق لغمر المكونات .

·          بعد أن تغلي المرقة تهدى النار و تغطى الطنجرة و تترك لمدة نصف ساعة حتى تتسبك المرقة ثم تقدم فوراً مع الأرز المفلفل أو الأرز بالشعيرية .

أضافة إلى المفضلة (1) |

أقتباس | مشاهدات : 4109

تعليقات (12)

1 الكاتب nidaa84, on 18-10-2007 17:40
كل سنة وانت سالمه وانشالله بينعاد عليك وعلى الامة الاسلامية بالصحة والخير والسلامة والله اله يسلم ايديك انا هل اكله دائما بعملها فعلا كتير كتير طيبه بس انا عادة بستخدم الكبابة وليس الهبرة بس انشالله بدى اجربها بالهبرة اكيد طيب يسلمو وبانتظار المزيد

2 الكاتب منى, on 20-10-2007 06:11
هلا نداء

و انت بالف خير و ينعاد عليك و على عيلتك يا رب بالخير و البركات

و أنا كمان كنت متلك اعملها بالكباب لحتى دقتها عند أخت زوجي و عجبتني بهل الطريقة أكتر

إن شاء الله تجربيها و تعجبك

3 الكاتب linda, on 21-10-2007 20:35
و انا كمان بدي جرب ما حدا احسن من حدا
بس بلحمة شقف ,جوزي لازم كل يوم ياكول لحمة شقف يا اما قال بيحس انو ناقص شي عل الاكل

يعطيكي العافية يا منى و يسلم ايديكي

4 الكاتب منى, on 22-10-2007 10:01
هلا ليندا

بتطلع طيبة بلحمة شقف , بس عن جد اذا شي مرة صار عندك لحمة هبرة اتذركي الوصفة و جربيها و ان شاء الله رح تدخل للمنيو تبع العيلة

الله يعافي قلبك و بدنك يا رب

5 الكاتب seeramazen, on 31-10-2007 08:14
ماشاء الله الله يعطيكى العافية

6 الكاتب منى, on 31-10-2007 10:28
الله يعافيك أختي

مية اهلا و سهلا فيك

7 الكاتب larooo, on 24-04-2010 23:31
مساء الخير ..
معلش اسأل شو الفرق بين الهبرة والكبابة
انا فكرت كلو لحمة مفرومة

بحب الاكلات اللي بتتقلى فيها الخضرة بالاول شوي
ان شاء الله رح جربها انا كمان

8 الكاتب منى, on 25-04-2010 07:32
لارا جربيها و ان شاء الله ما بتندمي

الهبرة هي اللحمة المدقوقة الي ما فيها دهنة ابداو الي نستعملها للمرتديلا و الكبة و بيكون لونها احمر احمر ما فيه ايا بياض :roll

اللحمة المفرومة هي الي منستعملها لكل الطبخات البقية متل المحشي و اخواته و بيكون فيها نسبة دهن تختلف حسب الشخص الي عم يقطع اللحمة و كيف بيحب تكون

شرحت و الا فوتك بالحيط

9 الكاتب نور الأسلام, on 13-10-2010 21:11
السلام عليكم كيفك منى

هون باسعوديه بالسوق في زيتون اسود مكلس بدي اسئلك عن وصفتو اذا عندك فكره عنو

10 الكاتب منى, on 25-10-2010 09:39
هلا نور

ما عرفته حبيبتي , عنا الزيتون الاخضر بيجي مكلس و هادا كمان لسا مو مجربته , بس ناوية

11 الكاتب karamela, on 21-11-2010 04:15
اختي منى شو بتفرق هي الاكلة عن يخنة البازلاء باللحمة
انا لاني بعمل يخنة البازلاء على طريقتك
اختي منى عندي موضوع حابة نطرحه بلقمة طيبة
واللي هو كيف تعرفتوا على هالموقع
بتمنى يكون عجبك
انا عم حاول كون طالبة شاطرة حتى ماتنسينا

12 الكاتب منى, on 21-11-2010 10:34
بتفرق كتير كرميلا , هلا ما بتتخيلي استخدام الهبرة هون شو بيعمل للوصفة كلها , كمان في فليلفللات و عصرة ليمونة , هللا باختصار كل واحد نكهة مختلفة عن التانية حتى لو في تشابه بالمقادير :zzz

ممم فكرة حلوة كتير , انا كنت من زمان عملت استفتاء , هلا بموضوع بيصير الذ , يلا رايجحة عشبقوا على الصفحة الرئيسية :zzz

الله يخليلي هل الاخت الحلوة و ان شاء الله ربي يديم المعروف على طول

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 02/01/2009 )

< السابق		التالى >

[ عودة ]