L2ma.com | لقمة طيبة | L2ma.com | لقمة طيبة | صينية معكرونة بالبيشاميل ( معكرونة غراتان ) | · , حتى, البيشاميل, على, كوب | L2ma.com

القائمة الرئيسية

الأكثر تصفحاً

صينية معكرونة بالبيشاميل ( معكرونة غراتان )

الكاتب/ منى

27/09/2007

من وصفات عائلتي المفضلة , وصفة و لا ألذ و مناسبة للبوفيهات و العزائم . بيحبوها الصغار قبل الكبار .

بالصحة و الهنا

عبوة معكرونة بوزن 250 غرام ( أنا أفضل المعكرونة الشرايط )
جبنة صفراء مبشورة
زبدة لدهن الطبق

الحشوة :

ملعقة كبيرة زبدة أو ملعقتين زيت
نصف كيلو دجاج مشفى من الجلد و العظم
حبة صغيرة بصل
حبة صغيرة فليلفة حمراء
كوب فطر مقطع
ثلث كوب بازلاء مسلوقة
ثلث كوب ذرة

صلصة البيشاميل :

6 كوب حليب
6 ملعقة كبيرة طحين أبيض
رشة فلفل أبيض
ربع حبة جوزة الطيب
3 ملعقة كبيرة زبدة
3 ملعقة كبيرة جبنة كريما
direction

تحضير الحشوة :

·          يسلق الدجاج حتى ينضج ثم يقطع لمكعبات و يحتفظ بالقليل من مرق السلق جانباً .

·          يفرم البصل ناعماً و تفرم الفليلفة الحمراء لمكعبات صغيرة .

·          يقلب البصل بالزبدة حتى يطرى ثم تضاف باقي الخضار و يقلب الكل لمدة 5 دقائق .

·          يضاف الدجاج للحشوة مع القليل من مرق سلق الدجاج و تترك الحشوة على نار هادئة حتى تنشف كل المرقة .

تحضير صلصة البيشاميل :

·          تحضر صلصة البشاميل يخفق كوبان من الحليب مع الطحين حتى تختفي الكتل .

·          تبشر ربع حبة جوزة الطيب أو أقل حسب الذوق , المهم استعمال بشر طازج .

·          يوضع باقي الحليب على النار و عندما يغلي يضاف مزيج الطحين للحليب الغالي بشكل تدريجي مع التحريك المستمر و السريع حتى يغلي الصوص و يبدأ المزيج بالسمك ثم يترك على نار هادئة مدة خمس دقائق .

·          تضاف الزبدة و الجبنة و يحرك حتى تختفي و بعدها أصبح البيشاميل جاهزاَ .

·          يمكن أن يحضر صوص البيشاميل بالطريقة الفرنسية الأصلية و ذلك حسب الرغبة .

تطبيق الوصفة :

·          تدهن صينية بايركس كبيرة بالزبدة , يرفع مقدار كوب من صلصة البيشاميل للوجه جانباً , يحمى الفرن على درجة حرارة 180 مئوية .

·          تسلق المعكرونة حتى تنضج ثم تصفى من مرقها و من دون أن تغسل تمزج مع صلصة البيشاميل المحضرة .

·          تصب نصف كمية المعكرونة في الصينية ثم تغطى بالحشوة ثم تغطى بباقي المعكرونة .

·          يصب البيشاميل الذي رفع جانباً على وجه المعكرونة ثم ترش الجبنة المبشورة و يمكن وضع بضع مكعبات صغيرة من الزبدة فوق الجبنة لإضفاء لون جميل و نكهة غنية للوصفة .

·          يخبز الغراتان في الفرن لمدة 45 دقيقة أو حتى يحمر قاعها ثم يشعل الشواية من فوق لبضع دقائق حتى يحمر الوجه .

·          يترك الغراتان ليهدأ لمدة 10 -15 دقيقة ثم يقدم .

أفكار و تنويعات :

يمكن أن تحضر المعكرونة بحشوات أخرى حسب الرغبة كحشوة الدجاج و الفطر أو حشوة اللحمة و لتحضيرها تقلى حبة بصل بالقليل من الزبدة حتى تصفر ثم يضاف نصف كيلو لحمة مفرومة و تقلب حتى تنضج و يجف مرقها ثم تتبل بالملح و البهار و الفليلفة الحمراء الناعمة و تضاف ملعقتان أو ثلاثة من رب البندورة و نصف كوب ماء و تترك الصلصة على النار حتى تتسبك ثم تستعمل .

أضافة إلى المفضلة (4) |

أقتباس | مشاهدات : 9359

تعليقات (35)

1 الكاتب linda, on 01-10-2007 16:54
السلام عليكم ورحمة الله وبركاته
رمضان كريم منى و لو انها متاخرة بس والله ما في وقت
الله يسلم ايديكي على هل الاكلة اكيد بدي اعملها جوزي من عشاق المعكرونة
على فكرة صرت عاملة كتير من وصفاتك والحمدلله كلو عم ينال الرضا والاستحسان
يعطيكي العافية

2 الكاتب منى, on 01-10-2007 21:07
هلا ليندا

رمضان كريم عليك و على عيلتك كلها يا رب

الله بيعرف قديه مشتاقتلك و بالي عندك ليندا ..

الله يسلمك يا رب و ان شاء الله عوافي و هنا على قلبك و قلب جوزك و جبريل و شام

شو جربتي ؟

3 الكاتب linda, on 01-10-2007 21:49
و انا مشتاقتلك كتيرالله يعلم
يا ستي جربت المحمرة و سندويش الفلادلفيا و السمبوسة يا امي شو حبيتا
و دجاج كباب و ساندويش التوشكا والكارنيارك و انا يلي كنت مفكرتها اكلة شامية طلعت تركية
بتعرفي بالمطاعم التركية بيعملو متل هي الاكلة و بعتقد نفس المقادير بس بتكون البيتنجانة مقطعة مكعبات مو متل ما هيي و بيكون عليها فليفلة خضرا حرة كتير يمييي شو طيبة
بتعرفي اليوم جربت نفس الطريقة بس بدال ما يكون الصوص بندورة حطيت بشاميل و كنت حاطة ايدي على قلبي ما تطلع طيبة بس طلعت بتجنن

و كتير شغلات جربتها مو حاضرة ببالي هلاء
الله يوفقك و يجزيكي الخير.
سبحان الله رح يخلص رمضان و بهل الغربة العيد مالو طعم والله ما بحس انو في شي تغير
يالله بعين الله

يا ويلي شو حكيت
سلام :grin

4 الكاتب منى, on 01-10-2007 22:34
بالعكس ليندا

انا مشتاقة لحكياتك الحلوة , و لما غبت حسي في شي ناقص و الله

الله بيعين و ان شاء الله ترجعي لبلدك يا رب بخير و سلام

بتعرفي انك جربتي وصفاتي المفضلة و الا عملتها لضيوفي لما اجو فطروا و اتسحرو عندي

المحمرة بموت عليها و ما بقدر قاومها ,, و الا الفيلادلفيا ممم

و الا التشكن كباب مع الرز , غير شكل :eek

ريتو عوافي يا رب

فكرة حلوة هي انك تحطي البيشاميل بدل الصوص الاحمر

رح جربها اذا الله راد

تصبحي على خير يا عسل

5 الله يعطيك العافيه
الكاتب هوايتي الطبخ, on 09-04-2008 05:01
شكرا علي الموقع الاكثر من رائع
الله يعطيك العافيه يا اخت مني شكلك طباخه ميه ميه انا احب اطبخ بس ما كنت اعرف وصفات كتير الان صار عندي مليون وصفه حلوه من موقعك انشاءالله اطبقهم

6 الكاتب منى, on 09-04-2008 13:38
هلا فيك أختي نور الموقع و ان شاء الله تستفيدي و تجربي و تكون الطبخااات على كيفك

7 الكاتب هيلين, on 09-07-2008 10:48
قايمة فورا جربها بس انا بعرف انو الغراتان ما بينحطلو غير جاج ؟فالوصفة جديدة علييى تماما

8 الكاتب منى, on 09-07-2008 11:35
و انا كنت حضرها بس بالدجاج , و مرة خطرت الي هل الفكرة و طلعت بتجنن و تغييير, ان شاء الله تجربيها و تكون على زووءك

9 الكاتب تورتاية بالكريز, on 13-07-2008 11:11
تسلم ايدكي احلى منمون والله ست بيت سورية أصيلة والله من حبي لكم بحلم يوم ازور بلدكم الحلوة وازورك ياقمر
كتييييييير طيبة الوصفة تسلم ايدكي على الروائع المتقنة والمضبوطة من كل قلبي الله يعطكي العافية ويرزقك مانتتمني ياقمرويحفظلك القطاقيط الحلوين ويبارك فيهميارب

10 الكاتب منى, on 23-07-2008 15:03
هلا ام ياسمين

الله يسلمك و يحفظك و يخليكي , بتنور سوريا باطيب و احلى ناس يا عمي , بس لا تنسي تعمليلي زيارة :zzz

ان شاء الله ليك متبل هل الدعوات الحلوة و اكتر يا حق

و اذا جربتي الغراتان , يا ريت يعجبك

11 الكاتب سارونات, on 03-09-2008 12:47
السلام عليكم و رحمة الله و بركاته
اناراح استعمل السباغيتي متل ما نصحتي لان كمان بعتقد راح تطلع احسن من المكرونةالتانية
بدي اسال السباغيتي منقطعهازغيرة او بالطول العادي يعني عود السباغيتي
منقسمو على 2 لان بدي جربا قريبا ان شاء الله بس اول مرة راح ساوي كمية زغيرة
بالتوفيق
سلام

12 الكاتب منى, on 03-09-2008 14:31
ما بتفرق أختي , قطعيه بالطريقة الي بتناسبك , انا ممكن ااقطعه لقسمين أو ثلاثة بشكل عشوائي

13 الكاتب سارونات, on 20-10-2008 14:41
السلام عليكم و رحمة الله و بركاته
جازاك الله خيرا اختي منى
انت قلتي انك بتفضلي المعكرونة شرايط بدي اعرف هل هالشي يتعلق بالذوق و الرغبة ام انها بالمكرونة التانية بتطلع معجنة او شي بس كان بدي اتأكد و سؤالي هل بتنفع بالمكرونة اكواع
بالتوفيق
سلام

14 الكاتب منى, on 21-10-2008 06:27
بينفع اي نوع معكرونة , بس اصولها بالشرايط

15 الكاتب سارونات, on 16-01-2009 15:22
السلام عليكم و رحمة الله و بركاته
اختي منى بدي ان شاء الله بهاليومين ساوي هالوصفة بحشوة اللحمة و بدي اسالك اذا فيني حضرها بالليل و وقف عند خطوة ادخالها في الفرن يعني ساويها كلها و بس ما دخلها الفرن و غلفها بورق المنيوم و حطها بالبراد لبكرا هل بينفع هالشي او لا لان ما بدي الوصفة تنتزع
ربي يوفقك و يسهل دربك
سلام

16 الكاتب منى, on 17-01-2009 18:30
معلش أختي سامحيني للتاخر و منيح انك رجعتي ذكرتيني

اكيد بينفع تحضريها قبل بيوم و تحطيها في البراد و لما يجي وقت الغدا بطالعيها و على الفرن و ممكن كمان انك ما ترشي وجهها فورا بالجبنة و بعد ما تقرب تستوي ترشي وجهها بالجبنة و تخلييه يحمر شوي

17 الكاتب سارونات, on 21-01-2009 12:20
السلام عليكم و رحمة الله و بركاته
اختي منى ساويتها اليوم و طلعت طتير طيبة :zzz

انا خفت شوي لان حسيت حشوة اللحمة كتير بسيطة و خفت ما تطلع الطعمة طيبة بس ضفتلها رشة زعتر يابس بعد ما جهزت الحشوة لان بحسو بيعطي طعمة و ريحة طيبة
و ان شاء الله المرة الجاية راح جربها بحشوة الدجاج انا هالمرة ساويتها بحشوة اللحمة لان اسرع
جازاك الله خيرا اختي منى
بالتوفيق
سلام
اختي منى اذا فيكي جاوبيني على سؤال الموساكا
:zzz

18 الكاتب منى, on 21-01-2009 12:28
هنا و عافية اختي و الحمد لله انها عجبتك , صحة يا حق

بلا لاحقتك على الموساكا

19 الكاتب سارونات, on 21-01-2009 20:42
السلام عليكم و رحمة الله و بركاته
ما بعرف شو بدي قول اختي منى الله يوفقك و يسهل دربك و يجازيك و يجازي احبائك الجنة ان شاء الله
المكرونة بالبيشاميل اليوم انقذتني من موقف محرج صار المساء الحمد و الشكر لله
ما راح انسى معروفك طول عمري
سلام

20 الكاتب منى, on 22-01-2009 07:11
الحمد لله اختي

21 الكاتب سارونات, on 28-01-2009 12:49
السلام عليكم و رحمة الله و بركاته
اختي منى كتبت رد قبل ما يتعطل الموقع بس مبينتو ما وصل
انا كتبت اسالك اذا فينانحضر المكرونة بالبيشاميل و نحطها بالفريزر متل اللازانيا و عن صواني البايركس ما بيصرلهن شي اذا حطيناهم بالفريزر يعني ما راح يتكسر
بالتوفيق
سلام

22 الكاتب منى, on 28-01-2009 13:19
هلا أختي

فيك تحضريها وتحفظيها بالفريزر , بس انا ببقى من أنصارالفريش و التازة

الصواني ما بيصير الهم شياذا كانوا من نوعية منيح , اما اذا نص نص لا تغامري

23 الكاتب سارونات, on 04-02-2009 21:32
السلام عليكم و رحمة الله و بركاته
ساويتها قبل بيوم و حطيتها بالبراد و اليوم الثاني ذخلتها الفرن و طلعت كتير طيبة كمان هالمرة ساويتها بمعكرونة بيني و ضفت للحشوة شوية بقدونس
بس بوافقك الراي انها بالسباغيتي احسن حتى لو ان الطعمة بتظلها نفسها اذا بدلتي المعكرونة بس السباغيتي بتطلع شي كتير مختلف لانها رفيعة
بالتوفيق
سلام

24 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 13-03-2009 02:41
مرحبا اختي منى .يعني الله يبيض وجهك متل مابيضتي وجهي .هي اول مره بساويها وكان عندي ضيوف وطلعت كتير طييييبه وكمان شكرا من قلبي على البسمشكات .الله يقويكي يا فنانه الاكل

25 الكاتب منى, on 13-03-2009 07:37
هلا سارونات

الف عافية و هنا و صحة على قلبك اختي , كتير انبسطت انها عجبتك عوافي

26 الكاتب منى, on 13-03-2009 07:40
هلا اختي ام عمر

الله يبل قلبك على هيك دعوة حلوة و غالية , ربي الك متلها و احلى
ريتو الف عافية على كل لقمة أكلتوها انت و كل عيلتك و ضيوفك :zzz

27 الكاتب شفاء, on 28-05-2009 11:48
السلام عليكم

كيفك ياست منى ان شاء الله تمام

انا جربتها باللحمة والدجاج بس عيلتي حبوها باللحمة اكتر مابعرف ليش بس حسيت حشوة الدجاج ناقصها شي يعني طعمتا ماكانت قويةالله اعلم شو السبب رح ارجع اساويها واحاول اتلافا الاخطاء قدر الامكان

بس عكل حال يسلمو كتير انا عمبصور كل اكلاتي اللي عم بعملن من موقعك بس ما عمبعرف انزلن

مشان اورجيك ابداعاتي

28 الكاتب منى, on 31-05-2009 19:57
هلا شفاء

سبحان الله بتبقى شغلة زوء , انا بالبيت بيحبوها بالدجاج اكتر

ممكن تكتري البهارات اكتر أو تزيدي شي بتحبه العيلة عندك بالعادة

اتمنى اشوف الصور و ممكن تبعتيهم عن طريق الايميل اذا ما في مشكلة

29 الكاتب آرام, on 16-08-2009 16:18
مرحبا أخت منى
اشتقت كتير للموقع .. صار لي شهر مشغول للآخر وما عندي وقت للطبخ والنفخ ولا حتى للنت .. بس والله كل ما أكلت لقمة طيبة بأي مكان بتذكرك وبدعيلك بالخير.
هالوصفة من أوائل الوصفات الي جربتها من الموقع .. وجربتها كمان مرة من يومين .. من زمان كنت آكلها بس بالمطاعم وما كنت أتخيل في يوم من الأيام أني ممكن أعملها بالبيت.
يسلموا إيديك أختي ولا يحرمنا منك يا رب

30 الكاتب منى, on 20-08-2009 14:34
هلا ارام , ان شاء الله مشغول بالخير اخي

الف صحة و هنا يا حق على الغراتان هل المرة و المرة الماضية كمان و ربي الك متل هل الدعوات الكريمة من اخ كريم و اكتر باذن الله

31 الكاتب violet, on 12-06-2010 18:46
مرحبا
جربتا وطلعت كتييييييير طيبة بس ماتفاجأت كنت متوقعة هالنتيجة
بس عملتها بمعكرونة مو شرايط
لأنو ماعرفت في ناس بيعملوها متل عجينة هيك شرايح بتشبه عجينة البرك بجبنة انو شرايط تخينة
بس أنا طلعت بنيو تاون شفت معكرونة شرايط مو تخينة رفيعة ياترى هي اللي بتقصديها
بس مافي منها أنواع كتيرة

بدي أسأل سؤال تاني مالو علاقة كريما اللي بتستعملوها بالطبخ هي من وين بدي جيبها يعني شو أقول عمو عطيني كريمة تبع الطبخ ؟؟؟؟؟

صرلي زمن عبحاول ابعت ردود بس ماعبنبعتو مابعرف اذا العذر من عندي أو من الموقع :sigh

32 الكاتب منى, on 12-06-2010 21:19
هلا اختي

صحتين و الف عافية يا رب .

ما كتير فهمت عليك , المطلوب هو عجينة شرايط مو سميكة , متل عجينة الازانيا بس مقطعة لشرائح طويلة

بتقوليلو للعمو بدي كريما سائلة و هو رح يعطيكي علبة بيضا و النوع المتوفر هل كم يوم في المولات هو نوع فرنسي

ما بعرف شو المشكلة , اتوقع من عندك ما دامها انحلت لحالها , بكل الاحوال ممكن مرة تانية تراسليني و انا بحللك المشكلة فورا اذا ربنا راج

33 الكاتب violet, on 13-06-2010 17:39
ليش انا بعرف شو هي عجينة اللازانيا

عكل ماشي لما بدي حطها بالزورق بحطها كيف ماكان وبصب فوقها الصلصة ولا بطبقها بشكل مستقيم انو فوق بعضا
مابعرف كمان اذا فهمتي علي ماكتير عبعرف أعبر
عكل يسلمو عزبتك معي

34 الكاتب violet, on 13-06-2010 17:46
ليش انا بعرف شو هي عجينة اللازانيا

35 الكاتب منى, on 14-06-2010 08:43
عجينة الازانيا عينة شكلها متل الورقة بس اسمك شوي :

اكيد ما منحطهن شلونما منكان , اول الش طبقة مرتبة من المعكرونة و بعدا الحشوة و بعدها معكرونة و اخر الشي طبقة البيشاميل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 13/03/2009 )

< السابق		التالى >

[ عودة ]