L2ma.com | لقمة طيبة | L2ma.com | لقمة طيبة | ايتش | كبيرة, دبس, ملعقة, البرغل, لمدة | L2ma.com

القائمة الرئيسية

ايتش

الكاتب/ منى

19/03/2007

ناس بتعتبرها سلطة , بس عندي وجبة كاملة و ما في اطيب منها

من المطبخ الأرمني و التركي و كمان السوري وصفة لذيذة و مغذية جداً تعرف باسم ايتش الي معناه في التركي الحشوة , الاتراك بينسبوها الهم و كمان الارمن و بحلب أمي بتسميها تبولة حلب ! بس شو ما كان الأصل و الفصل بتبقى سلطة كتير طيبة

بالصحة و الهنا

كوب برغل ناعم
ربع كوب زيت زيتون
بصلة متوسطة الحجم
ملعقة كبيرة رب البندورة
نصف ملعقة كبيرة دبس فليفلة
2 - 3 ملعقة كبيرة دبس رمان ( أو مزيج من دبس الرمان و عصير الليمون )
ملح
رشة كمون
3 حبة بندورة
2 حبة بصل أخضر
5 ملعقة كبيرة بقدونس
حفنة أو حفنتان نعناع طازج

طريقة التحضير

·          تفرم البندورة و البصل العادي و الأخضر و البقدونس و النعناع فرماً ناعماً جداً , ينقع البرغل بالماء الحار لمدة 5 دقائق ثم يصفى من الماء .

·          يقلى البصل بنصف كمية الزيت حتى يطرى , يضاف البرغل و يقلب لمدة دقيقة ثم يضاف دبس الرمان و رب البندورة و دبس الفليفلة و الملح و الكمون و نصف كوب من الماء المغلي و يقلب على نار هادئة حتى يمتص الماء , يبعد القدر عن النار و يغطى و يترك حتى يبرد تماماً .

·          بعد أن يبرد البرغل يدعك باليد لمدة 5 دقائق ثم تضاف البندورة و البقدونس و النعناع و البصل الأخضر و باقي الزيت و يقلب الإيتش ثم يسكب في طبق التقديم و يقدم بعد تزينه حسب الرغبة .

أضافة إلى المفضلة (1) |

أقتباس | مشاهدات : 8843

تعليقات (19)

1 الكاتب kuwaiti_girl, on 06-02-2008 10:29
مره تذوقته بمطعم عندنا مشهور بالاكلات التركيه والارمنيه والحلبية اسمه سراي

وكانت لذيذه وطعمها مميز... وصرت اسمها التبوله الحمرة لاني نسيته ههههه

مشكووره حبيبتي

بصراحه هالموقع جد جد رائع واشكرك من اعماق قلبي على هالاطايب الموجوده

2 الكاتب منى, on 06-02-2008 13:16
الله يخليك كوكو يا عسل و الله خجلتيني بهل الردود الحلوة , و صرت عم قول و عسى أن تكرهوا شيئا و هو خير لكم

بتعرفي و لا مرة خطر ببالي انها بتشبه التبولة مع انها بالفعل كتير بتشبهها :grin

3 الكاتب نوارة, on 25-06-2008 12:39
انا كتير بحب الايتش بس مالي خبر بصير بدون ماكينة كبة جربتو اليوم طلع بجنن ابوس روحك يامنى على هالموقع جدماعم بقدر بدونو
يعني ان شاء الله رح اصير طباخة اذا تميت على هالهوس بالموقع
طبعا مع تصميمي ونفسي على الطبخ :grin

4 الكاتب منى, on 25-06-2008 12:48
هلا يا نوارة

هنا و عوافي يا رب على قلبك , الحمد لله انه عجبك و على فكرة هي الطريقة الأصلية للأيتش اما طريقة ماكينة الكبة فهي اختراع حلبي

انت ما دام فيك عرق من الست غيثاء , فسنة تانية رح تحطيني بنص الطريق و ببقى بذكرك :zzz

5 الكاتب نوارة, on 25-06-2008 12:56
لا بقى انتي ست الكل

6 الكاتب منى, on 25-06-2008 13:04
ببقى بذكرك

7 الكاتب منامينو, on 16-11-2008 05:00
هلا حبيبتي منى، يعيشو هالديات يا رب. مزبوط يا عسل، طريقتك هي الطريقة الرسمية للكيسير وبتلاقيها بالمواقع التركية بنفس الطريقة. بس الستات هون بتركيا صايرين يستسهلو ويعملوها عالسريع بطريقة بتشبه شوي التبولة تبعتنا. يعني من غير طبيخ عالنار. :roll

بس بينقعو البرغل بماء سخنة لفترة كافية ليطرى ويبرد. وبعدين بيجبلوها زي الكبة بالإيد بالزيت والملح والبهارات ودبس الرمان وشوية رب بندورة. وبعدين بيضيفو الخضار وبيقلبوها كمان شوي وبيقدموها. هاي يا ستي هي الطريقة السريعة اللي عملتها قدامي بنت تركية. وعرفت كمان إنها وصفة بيعملوها مثلا الممرضات لما بيكونو مناوبين بشغلهن بالليل. لإنها وصفة مش محتاجة غاز وطبخ. :grin

ويفضل تقديمها مع شراب اللبن العيران

8 الكاتب منى, on 16-11-2008 07:10
ممممم , فكرة و الله سريعة كتير هيك ..

بتعرفي نحنا عندنا بحلب لسا بيديروا البرغل متل الكبة :upset

لهيك هي الطريقة بالنسبة الي متل الصاروخ جنب طريقة امي :grin

9 الكاتب ام عدنان, on 03-02-2009 06:05
اللة يصبحك بلخير شلونك اختي مني اللة يعطيك العافية علي الاتش كتييييييييييير طيب جارتي ارمنية كانت تحكيلي انو اما كنت تعملون اكلة بلبرغل كتير طيبة بس نسيان شلون واول مادخلت علي الموقع وشفتها عملتلها هي مفاجا ياللة شو انبسطت يسلمو وان لازم كل اسبوع اعملها مره : :grin

10 الكاتب منى, on 03-02-2009 09:04
الف هنا و عافية على قلبك و قلب جارتك , يا ستي اعمليها و اتهني فيها مفيدة كتير و خصوصا هل البرغلات الي فيها :zzz

11 الكاتب reema, on 06-12-2009 20:47
طيب سؤال.. معناها اذا عملنا كبة نية عادية بمقاديرها اللي تتضمن دبس بندورة ودبس فليفلة وبالاخير ضفنا دبس رمان وضفنا الخضار المطلوبة بيصير ايتش؟؟ هيك قصدكم بطريقة الماكينة؟؟

12 الكاتب مدام الصن, on 14-01-2011 11:17
سلام حبيبتي منى وشكرا علىالموقع الرائع بدون مبالغه نحن منا الايتش غمس بس بورق العنب المسلوق جربيه كتير طيب معها

13 الكاتب منى, on 15-01-2011 12:12
هلا ريما

لا مو هيك , هلا هنن بيشبهوا بعض , بس في اختلاف بالمقادير

هلا اختي مدام الصن

ممم , طيب كيف ما اكلاناه , وو حتى في من رفقاتي بياكلوه بالخس او الملفوف , و انا بحبه بكل الطرق لان البرغل من الاكلات المفضلة عندي

شكرا كتير للاضافة و منورة الموقع , شرفتينا

14 الكاتب lalosh, on 14-12-2011 20:05
يعطيك العافية مدام منى

بدي أسأل ازا ممكن نستغني عن دبس الرمان ودبس الفليفلة ونستخدم بس الليمون؟؟؟

15 الكاتب منى, on 15-12-2011 13:45
لا رح تصير غير شي , بتطلع طيبة بس مو ايتش

16 الكاتب nourm, on 11-02-2012 20:46
طيب فيني استغني عن دبس الفليفلة؟ . مو موجود عنا
شكرا

17 الكاتب منى, on 12-02-2012 07:45
هلا اصولها بدبس الفليفلة , اذا مو موجود ممكن تستعملي فليفلة حمرا ناعمة لحتى تعطيها طعم الحر , بتطلع طيبة كتير , بس مو نفس الايتش

18 الكاتب ام شهلا, on 05-04-2012 17:47
وجدتها..وجدتها وجدتها
الله حيووو منامينو لك الي اربعين سنة عم دور على هالاكلة ههه مع انو عمري 19
بس هي بابا الله يرحمو كان يعملا ونحن صغار ويسميا كفتة وكنت موت عليها وهلا عم حاول اتذكر كيف بتنعمل او اذا حدا بيعرفا وعبث تحاول
من فترة اكلتا عند رفيقتي تركية بس ولدانة ببلجيكا المشكلة انو لسا ماتعلمت احكي فرنسي حتى اسالا عليها
وهلا عم قول شو هاد ايتش والا المفاجأة بطلع اكلة الطفولة
الله حيو مرة تانية ونشالله الله بوفقك وبحميكي عقد ماعندك معجبات بهل الموقع

وهي بوسة مووواه

19 الكاتب منى, on 06-04-2012 00:16
حبيبتة قلبي , ما بتعرفي ردك اديه اثر فيني , بتعرفي انبسطت انو رح ساعدك لحتى تعملي شي بتتذكري فيه باباتك , الله يرحم روحه و يرحم روح ابي كمان ...

بوسات

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 02/08/2009 )

< السابق		التالى >

[ عودة ]