L2ma.com | لقمة طيبة | L2ma.com | لقمة طيبة | بسكويت أصابيع ( ليدي فنجرز ) | على, حتى, · , الوصفة, الصفار | L2ma.com

القائمة الرئيسية

بسكويت أصابيع ( ليدي فنجرز )

الكاتب/ منى

20/09/2007

وصفة تحت المجهر جديد موقعنا و فيه رح نحط وصفة و نفصفصها و رح تكون طريقة تحضيرها بالخطوات المفصلة و بالصور التوضيحية لحتى يكون كل شي على مية بيضا متل ما بيقولوا اخوتنا المصاروة .

الوصفات الي رح نحطها تحت المجهر هي وصفات أساسية و أي صبية حابة تكون مميزة بمطبخها لازم تكون تحضرها منيح و تكون متمكنة منها . الليدي فنجرز أول وصفة نحطها تحت المجهر لأن منه ممكن ننطلق لمية ألف وصفة و وصفة متل التيراميسو و حلويات السفرة و الشارلوت و تاني شي أن تحضيرها هو تدريب على تحضير الكيك الاسفنجي و الي هو وصفتنا التانية تحت المجهر بإذن الله .

أتمنى أن يكون في تفاعل و كل صبية تشمر عن اكمامها و تجرب الوصفة و هادا هو الواجب اذا اعتبرنا أن اليوم أول درس من دروس الحلويات و المعجنات في الموقع , بعد التجربة تعطي كل أخت رأيها , تحكي عن المشاكل الي صارت معها لا سمح الله و منحاول نحلها مع بعض لحتى تظبط الوصفة معها و تملكها .

لازم خبركم أن هل الوصفة واحدة من الوصفات الي أفتخر فيها و هي واحدة من كنوز الموقع . و كمان هي من أول الوصفات الي يتدربوا عليها الشيفات الحابين يختصوا بالحلويات .

الوصفة سهلة كتير و بس ما تحضريها أكتر من مرة بيصير تحضيرها سهل عليك و لا تخافي ان الوصفة طويلة , حبيت أذكر كل تفصولة ( مفرد تفاصيل

) حتى و لو كانت كتير صغيرة .

يلا صبايا على المطبخ و خلينا كلنا نحضر هل الأصابيع و بألف صحة و هنا

4 بيض
نصف كوب طحين حلويات
ربع كوب دقيق الذرة ( كورن فلاور )
نصف كوب سكر بودرة
رشة ملح
فانيليا

سكر بودرة للوجه

زبدة و حيبن لرش الصواني
direction

·          قبل البدء باعداد الوصفة يجب التأكد أن كل المواد و المقادير المستعملة بحرارة الغرفة .

·          يفصل بياض ثلاث بيضات عن الصفار بشرط أن لا تقع و لا نقطة من الصفار في البياض , ينخل الطحين و دقيق الذرة سويا مرتين , يحمى الفرن على درجة حرارة 180 درجة مئوية و تغطى صينيتا فرن كبيرتان بورق الزبدة ثم يدهن الورق بالزبدة و يرش بالطحين بشكل خفيف .

·          يخفق صفار الثلاث بيضات مع البيضة الباقية مع رشة فانيليا لمدة خمس دقائق , يضاف نصف السكر و يخفق لمدة 5 – 10 دقائق حتى يبدأ الشريط بالظهور عند رفع الخفاقة الكهربائية .

يخفق الصفار مع السكر لمدة عشر دقائق على الأقل

· يوضع بياض الثلاث بيضات مع رشة ملح و رشة فانيليا في محضرة الطعام النظيفة و يشغل على أعلى سرعة حتى يبدأ بالانتفاخ و تتشكل قمم فيه و أثناء الخفق يضاف باقي السكر بالتدريج حتى تنتهي كل كمية السكر و يجمد البياض , مدة الخفق حوالي 5 – 10 دقائق و عند الانتهاء من الخفق تطفأ الخفاقة بشكل تدريجي كي لا يتم التوقف عن الخفق بشكل فجائي .

يخفق البياض مع بقية السكر حتى تبدأ القمم بالظهور و يجمد المزيج

· يضاف الطحين المنخول على الصفار على مرحلتين مع التقليب بملعقة خشبية أو بملوق بلاستيكي كالظاهر بالصورة , يكون التقليب بلطف و باتجاه واحد و كأنك ترسمين دوائر في المزيج . المزيج يجب أن يكون سميك بعض الشي و هذا هو المطلوب .

يقلب المزيج بلطف و باتجاه دائري , كأنك ترسمين دوائر فيه

· يضاف البياض على مزيج الطحين و الصفار , هذه مرحلة دقيقة ومهمة . يجب أن يكون التقليب بكل لطف و باتجاه واحد و بنفس الطريقة أي كأنك ترسمين دوائر في المزيج و بهذه الطريقة يبقى الهواء داخل مزيج الليدي فنجرز , لا يخفق البياض قبل الصفار و يترك جانباً و الا خرج الهواء الذي دخل اليه أثناء الخفق و ظهر لدينا سائل شفاف في قاع الطبق , إذا نخفق الصفار أولاَ و نضعه جانباً ثم نخفق البياض حتى يصبح جاهزاً بعدها نبدأ باضافة الطحين على الصفار ثم اضافة البياض .

· يفرغ المزيج في كيس حلواني و يصب على شكل أصابع على ورق الزبدة مع ترك مسافة بين كل بسكوتة و الأخرى , ثبات البسكويت على الشكل الذي صب فيه هي أول دلالات نجاح الوصفة .

يصب البسكويت على شكل أصابع في الصينية المدهونة

· يرش السكر البودرة على البسكويت و يترك لمدة دقيقة حتى يتشرب البسكويت السكر ثم ترش مرة ثانية بالسكر و تخبز بالفرن على الرف المتوسط لمدة 8 – 15 دقيقة أو حتى يشقر أسفلها مع الانتباه لأن عقبها قد يحترق بسرعة .

يرش البسكويت بالسكر و يترك لمدة دقيقة حتى يتشربه

· يرفع البسكويت عن الصنية و يترك ليبرد على مشبك ثم يحفظ البسكويت في وعاء محكم الاغلاق حتى وقت الاستعمال .

· المقادير المذكورة تكفي لتحضير ما يقارب 40 حبة و هو ما يقابل علبة جاهزة .

أضافة إلى المفضلة (6) |

أقتباس | مشاهدات : 10387

تعليقات (42)

1 الكاتب Rino, on 22-09-2007 18:38
تسلم الأيادي اللي بتنلف بحرير ما شاء الله عليكي يا منى
على فكرة أنا متابعة دايما لكل أعمالك سواء على موقعك أو بمنتدى لك
ست بيت من الطراز الأول
بتمنى لك كل التوفيق و النجاح

2 الكاتب منى, on 22-09-2007 20:04
مية أهلا و سهلا فيك رينو

بنت بلدي ..

الله يخليك رينو و هي شهادة منك أعتز فيها

الله يسلمك على الدعوة الحلوة , و الله غمرتيني بزوءك و كلامك الحلو

نورتي يا عسل

3 الكاتب بدور, on 26-09-2007 10:09
ما شاء الله عليكي حتى البسكويت بتحضري انتي

لأ اللي بدو يعيش معك أكيد ّآخر شي لازم يفكر فيه هو المحافظة على جسمو من السمن :grin

بس عندي سؤال كالعادة :zzz

شو هو كيس الحلواني و من وين بئدر أجيبو أو أستبدلو بشي تاني؟

4 الكاتب منى, on 26-09-2007 11:56
هلا بدور

كيس الحلواني هو كيس توضع فيه الكريما للتزيين

وإذا مو متوفر عندك صبي مزيج البسكويت بكيس نايلون عادي و رصيه لحتى تتجمع الكريما على بعضها و بعدها قصي جزء صغير من طرفه و اسكبي من هل الجزر على الصينية بشكل أصابع

اخر مرة حضرته بهل الطريقة لان أنا مسكت كيس الحلواني و بنتي مسكت كيس عادي و ساعدتني

يعني مجربة و على المضمون ان شاء الله

5 ليدي فينجرز
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-10-2008 21:41
كيفك منى كل عام و انتي بخير
أنا جربت البسكوت بالعيد لكن الي صار معي إنو اسفل البسكويت صار أشقر بس من فوق طري و ما ستوى بعدين جربت أخفض الحرارة و حطيت الصينية على الرف الأوسط مشي الحال بس أخد معي وقت أطول بالشوي ممكن أسألك كم سؤال إذا مافيها إزعاج ,على أي رف بتخبزي البسكوت؟
لما بيستوي البسكوت بتكون طرية ولا قاسية إذالمسناها بالإيد؟
هل لازم تكون البسكوتات رقيقة و لا ثخينة؟
و مشكورة يا منى

6 الكاتب منى, on 04-10-2008 08:14
هلا سهى

انا بخبزهن على الرف الوسط و البسكويت بتركه لحتى يصير اشقر من تحت و بيكون مو ري و لا قاسي من فوق , وسط و البسكويت بيطلع معي متل الورة تمام , أقصد بالنسبة لسمكه

مية هلا و اي سؤال من عيوني

7 الكاتب رنا, on 28-02-2009 14:11
منوشة ...ماكتير عم يزبط الليدي فنجرز ...رح استعمل بالمرة القادمة كيس لنايلون العادي لان بالكيس حلواني احترت اي راس قالب احط ولما حطيت تبعع الكريما طلع شكلها متل القلم الرفيع وعذبوني بالشوي لانه اذال سمكوا عجنو واذا رقوا يحترقوا ...وقصدك بالسماكة متل الورقة كانه اللي عندك اسمك من الورقة

8 الكاتب منى, on 01-03-2009 10:13
هلا رنونة

حبيبتي و لا يهمك أنا رح صور الخطوات بالتفاااصيل ان شاء الله قريب لخاطرك و هو كتير سهل بس تاخد ايدك عليه

ما دام عجنوا معك معناها العجينة ما كانت ظابطة و في ان بالموضوع , ان شاء الله بتوضح الفكرة مع الصور

9 الكاتب رنا, on 12-05-2009 21:31
شو هاد عن جد فصفصتيها فصفصة بس كانه بالوصفة الاولى ماكنتي حاطة انه منخفق تلات بيضات بعدين الرابعة

مابعرف نسيت والله
بس الي اكتشفته انه هديك المرة البسكويت الي ساويته شي ماله علاقة بالي شايفته قدامي ...انشالله رح جربه هاليومين وبخبرك النتائج ...على فكرة قصة وصفة تحت المجهر اكتر من رائعة شكرررررررررا
واكتشفت شغلة كمان انه انتي متل الوردة مع الربيع والجو الحلو بتتنشطي وبتتألقي

10 الكاتب سارونات, on 12-05-2009 21:43
السلام عليكم و رحمة الله و بركاته

كتير حلوة هالفكرة راح صير عيطلك ام الافكار بدل منى :grin

عن جد فكرة تنم عن مدى حبك لنا و رغبتك في تقديم الافضل و انت عم تتقني العمل اللي عم تساويه

ربنا يوفقك و ان شاء الله راح ساوي هالوصفة بس بدي ضم صوتي لواحدة من الاخوات لما طلبت الشارلوت

كمان بدي اذا ممكن وصفة التيراميسو )) شو طماعة :grin

))

بالتوفيق
سلام

11 الكاتب ام دانية, on 12-05-2009 23:42
ممممم طيب انا بشتري جاهز مشان اعمل منو تيراميزو بس هلا رح جربو بس انا ما عرفت شو هاد كورن فلور يا ترى بتقصدي النشاء البودرة؟و اذا بدي اعمل نص الكمية يعني كيف بقسم البيض ؟ ويعطيكي العافية على هل الشرح المفصل

12 الكاتب omtasneem, on 13-05-2009 16:03
السلام عليكم ياستي وانا معك بزماني جربتها وماظبطت معي مابعرف ليش البسكوتات ماطلعو سماك بكيس نايلون واحترقو رح جربها اكيد ويعطيك الف عافية فكرة وصفة تحت المجهر بتجنن ورح قلك شو بيصيرمعي :cry

13 الكاتب رنا, on 13-05-2009 18:50
مزبوط وانا وقتخا صار معي متل ام تسنيم يعني طلع البسكوت كتير رقيق وانحرق ومدرس شو صار

14 الكاتب منى, on 13-05-2009 18:58
هلا رنونة

ان شاء الله هلا مع الصور و الطريقة التفصيلية لازم تظبط مع و اظن الخطا كان بطريقة التحريك و الخفق , دربي و انا اتمنى ان تجربيها من كل قلبي و باذن الله رح تظبط معك و اي سؤال انا تحت امرك

عن جد خجلتيني و حسيت بالعطر حوالي , الف شكر الك للتشبيه الحلو الي بينعنش اكتر ما الواحد متنعنش :zzz

15 الكاتب منى, on 13-05-2009 20:31
هلا سارونات و متل ما قلتي أتمنى كل أخت بالموقع تصير أحسن طباخة في العالم و الله و تطعمي عيلتها من شغل دياتها بمحبة و حنان

تكرم عيونك على الشارلوت و التيراميسو بس بشرط

تجربي هل البسكويت :eek

شو قلتي

16 الكاتب منى, on 13-05-2009 20:34
هلا ام دانية الدندونة الأمورة

الكورن فلور هو نشاء الذرة و اذا مو موجود استخدمي اما نشا عادي او طحين و الكمية هي مو كبيرة مو مستاهلة تقسميها و الا ما بتعود تنخفق معك :roll

ان شاء الله تجربيها و انا اتمنى هيك و بانتظار اسئلتك و تجربتك

17 الكاتب سارونات, on 14-05-2009 15:49
السلام عليكم و رحمة الله و بركاته

طيب موافقة :grin

راح جرب الوصفة بس في عندي سؤال قديش بيضاين البسكويت بعد ما نساويه و نحطه بعلية مغلقة و هل منخليه بالبراد خصوصا ان الجو كل مانو عم يصير حر اكتر
بالتوفيق
سلام

18 الكاتب souha, on 14-05-2009 21:07
هلا منونة
سبحان الله قبل ماتحطي هالوصفة تحت المجهر كنت من كم يوم ساويتها مرتين بس بغير هالمقادير طبعا الليدي فينجرز إلها مقادير كتيرة بس الطريقة في التحضير نفسها من زمان أول مرة ما نجحو معي بس لما جمعت معلومات منيحة من الإنترنت صرت شطورة فيهن و بشجع الصبايا يساوها و ماييئسوا من أول مرة بس عندي نصيحة للصبايا بعد تجربتي أنا خبزت البسكوتات مرة بالصينية يلي بتجي مع الفرن و مرة بصينية ألمنيوم طبعا يلي انخبزو بالألمنيوم أفضل بكتييييير و ظهر البسكوتات بيطلع لونها كلو متل بعض
سلام

19 الكاتب freesoul, on 16-05-2009 00:21
مرحبا منى انا جربت البسكويت وطبقت كل التفاصيل يسلمو ايديكي وعم افكر اعمل تراميسو على البسكويت.
كتير انبسطت وقت يللي شفت بهارات الماسالا لأنو كنت مشتهية على تندوري وما عندي هالبهار. ولمن شفته بموقعك فرحت كتير وعلى الطاير :zzz

ساويته ونقعت الدجاجة بخلطة التندوري منشان بكرا اشويها بالفرن
وبكرا بخبرك بالنتيجة

20 الكاتب رنا, on 16-05-2009 13:21
شكرا كتير سهى على معلومة الصواني وياريت اذا في شي تاني تفيدينا

21 الكاتب بسمة الأقصى, on 16-05-2009 16:32
ربي يبارك فيكي يا أحلى شيف منى
فكرتك جميلة وبتزيد الموقع جمال والله
الحقيقة انا نفسي فعلا أجرب البسكويت ده ان شاء الله يطلع حلو ويظبط معاياوأتجرء وأعمل بقية الوصفات منه
وان كنت متخوفة من النتيجة لأنه مثل ماقلتي يشبه الكيك الإسفنجي اللي عمره ما نجح معي ابدا سبحان الله ان شاء الله باجربه واقولك على النتيجة
سامحيني على انقطاعي لكن انا متابعة للموقع وكذلك الدعاء لكي يا مني
والله انتي تستحقي كل خير يكفي ذوقك وسعة صدرك معنا وده مش رأيي وحدي
الله يبارك فيكي وفي أولادك وزوجك ويحفظك من كل سوء
وسلامي للوالدة الله يطول بعمرها ان شاء اللهnullnull

22 الكاتب منى, on 17-05-2009 11:28
هلا سارونات

ايه ها , هيك بدي ياكي ابضاية و لا تهابين الصعوبات

البسكويت ممكن تحفظيه بالفريز و بيقعد معك شهريين من دون ما يتأثر بس طبعا بيكون محطوط بعلبة بلاستيك محكمة الاغلاق , يلا بانتظار النتائج

23 الكاتب منى, on 17-05-2009 11:53
هلا ام السوس

الف عافية و صحة و كتير انبسطت ان البسكوتات ظبطوا معك و كمان الف شكر للنصيحة المهمة , بالفعل للكيك و المخبوزات افضل الشي الالمنيوم

24 الكاتب منى, on 17-05-2009 11:54
هلا ام جود

كتيررر انبسطت انك جربتيهم و كمان ظبطوا معك عوافي ان شاء الله على كل شي يا عسل
يا ترى شو صار معك بالتندوري ؟

25 الكاتب منى, on 17-05-2009 11:54
هلا بسمة

الله يخليلي ياكي , دعوات كريمة من اخت كريمة , ربي يبارك فيك و بكل اهل بيتك واحد واحد , خجلتيني بهل الدعوات الحلوة

سلامك بيوصل لماما باذن الله .

اتمنى تجربي الوصفة و تظبط معك و حتى لو ما ظبطت من اول مرة ممكن تستخدميها في الحلويات لان لما بتتغطى بالكريما ما بقى تبين , و انا معك باي سؤال و تحت الخدمة و الامر

26 الكاتب freesoul, on 17-05-2009 13:05
انا لمن حمصت البهارات وطلعت ريحتهن قلت الله ... لازم يكون التندوري طيب.طبعاطحنتهم و خلتطهم بخلطة التندوري المكونة من زبادي وحمض ليمونة وكمان كزبرة مطحونة وفلفل احمر وشوية زيت حطيتهم على الدجاج ونقعتهم طول الليل وتاني يوم حطيت الدجاج بالفرن طلعوا كتير طيبين ونكهة بهارات الماسالا واضحة وعطت الدجاج نكهة غير شكل
يسلمو اديكي. عن جد هالبهارات كتير طيبين

27 الكاتب منى, on 17-05-2009 13:22
مممم , يا عيني يا عيني

الف هنا و عااافية ام جود

شي بيشهي من الوصف ريتك اكلتي عني كم فروجة :grin

28 الكاتب omtasneem, on 18-05-2009 17:10
السلام عليكم ياستي اليك بث حي ومباشر من المطبخ للاسف مع خيبة امل بصراحة مابعرف ليش مرحلة الصفار حسيت نجحت معي بس البياض لأ والبسكوت بالتالي ماثبت معي وقت صبيتوبدي اسالك بالضبط شو قصدك بمحضرة الطعام الي عملتي فيها البياض بصراحة لتاني مرة عالتوالي فشل ذريع ساعديني :sigh

29 الكاتب منى, on 19-05-2009 11:01
هلا ام تسنيم

بالاول الف شكر الك للمحاولة و لا يهمك المهم ان عرفتي وين المشكلة و ما دام البيض ما نفخ معك , قصدي البياض معناها لمن كنتي عم تفصلي بين الصفار و البياض نزل نقطة من الصفار على البياض فمنع انتفاخه , او انك نسيتي تحطي رشة الملح ؟

محضرة الطعام ااقصد فيها الالة الي بيجي معها كذا الة كهربائية و من بينهم خفاقة البيض :roll

30 والله وصفة سهلة
الكاتب لارا مينا, on 02-09-2009 21:50
وأخيرا عملت الليدي فنجرز وصفة طلعت سهلة جدا بعد ما نفذت الخطوات بحاذفيرها ومن أول مرة نجح وما تعرضت لأي مشكلة , واستخدمت كيس نايلون عادي , وبياض البيض خفقته في المضرب الكهربائي العادي بعد ماخفقت الصفار ونظفته من الصفار لأن ماكان عندي محضرة الطعام , وكل شيء تمام ويمكن السر لهذه الوصفة اتباع الخطوات وبس وبكل دقة , وأنا لما كنت أخلط الصفار مع الطحين بنفس الوقت واللحظة كانت أختي تخفق البياض وأضفت البياض مباشرة وهو في قمة انتفاخه لأن مرة في إحدى الوصفات خفقت البياض وتركته شوي لأخلط الطحين ولما حطيت البياض طلع في القاع السائل الشفاف إلي ذكرتيه هناوخربت علي .. وكمان أشجع كل الأخوات يعملوها لأن أطيب من الجاهز بكثير ويتلافو أخطاء الأخوات إلي قبل وأهم شيء الحرارة وسط والحبات سمكها يكون مثل الصورة لارقيقة ولا سميكة والبسكويت أول مايطلع من الفرن يكون طري شوي من فوق بس مجرد مايبرد بيجمد أكثر مثل الجاهز وأحسن . حبيت أخبركم بتجربتي للإستفادة والله يعطيكي العافية يامنى على مجهودك الرائع وفعلا وصفة تستحق التجربة.
ملاحظة : للأهمية بعض الصور التفصيلية ماطلعت مع إنها كانت موجودة قٌبل.

31 الكاتب منى, on 03-09-2009 12:50
برافو عليك لارا , عن جد لوتعرفي شو مبسوطة انك جربتيها و انها زبطت معك , هادا هو المهم تطبيق الخطوات لان كل خطوة مكتوبة هون معناها في وراها خبصة خبصتها و كان سببها فشل الوصفة , ردك كالعادة كافي و وافي و بحس بكل كلمة فيه انك انسانة كريمة لان شاركتينا بكل شي جديد اتعلمتيه

هنا لارا و الف صحة , رح ارجع حمل الوصفات لاتخلص من هل المشكلة و هلا جاية وراكي على كاتو جلاس , استنوا لا تخلصوا الكيك قبل ما اجي :grin

32 الكاتب omyosef, on 16-03-2010 21:04
اهلا حبيبتى منى بدى اسئلك اشغلل الفرن من فوق ومن تحت وقت الخبز ارجوك ردى على بسرعه ماشي حبيبتى الله يعطيكى العافيه
ويسلمو ايديكى

33 الكاتب منى, on 17-03-2010 08:58
لا اختي بس من تحت و بحرارة الفرن رح يحمر شوي من فوق و الخبز على الرف الوسطاني

34 الكاتب haya, on 03-09-2010 09:44
رمضان كريم على الجميع باذن الله انا بعرف انها متأخرة بس لسة رمضان في نهاياته وان شاءالله ربنا يتقبل من الجميع الصيام والقيام باذن الله
وعيد مبارك للجميع سؤالي يا منى هل بقدر اعمل نص الكمية اللي انت عاملتيها بدي اجربها وما بدي انها تخرب معي واذا بدي اعمل حلو التيراميسو هل بستهلك كل كمية البسكويت اللي انت عامليته على مقدارك يعني وشكرا الك انا كثير بغلبك معي باسئلتي

35 الكاتب منى, on 05-09-2010 13:14
امين هيا و ينعاد علينا بالخير و ما نطلع منه الا و نحنا من العتقاء , امين يا رب
فيك هيا , بس ما بعرف شو رح تطلع معك , لان هل الكمية مو كبيرة ابدا و يا دوب تتحرك الخفاقة عليها , بقى كيف اذا نقصتيها ؟

من عيوني و على عيوني كل اسئلتك حبيبتي

36 من الضروري. . . .
الكاتب حمودي, on 10-01-2011 15:13
سلام منوشه
كيفك ؟
انا اسف انقطعت عن تجربت الوصفات لان النت انقطع :cry

...........
اي ست الكل ممكن نضع دقيق عادي بدل دقيق الحلويات وكمان نقدر نستغني عن ورق الزبده
..........
مع خالص تحياتي
Ahmed

37 الكاتب ssweetangela, on 16-03-2011 16:46
مرحبا ست منى الله يعطيكي العافية ويسلم ايديكي يارب طلعو الفنجرز بيجننو وانا كمان حطيت كل تنتين فوق بعض وحشيتهن شوكولا طلعو كتير طيبين
يعيشو هالايدين يارب

38 الكاتب منى, on 16-03-2011 20:33
هلا اخي احمد ,
و الله الطحين ضروري , اما ورق الزبدة فممكن تمسح الصينية مسحه صغيرة و تستغني عنه

39 الكاتب منى, on 17-03-2011 22:12
هلا اختي سلوى

صحتين و هنا و تعيشي و تعملي ان شاء الله
هي الفكرة الي ذكرتيها حلوة , رح جربها مرة تانية اذا رب العالمين راد :zzz

40 الكاتب zina, on 05-04-2011 23:03
يسلمو اديكي على هل وصفة عن جد بتجنن أنا اليوم جربتها وطلعت فظيعة بس عاملة قياس كل وحدة إد ثلاثة من يلي بالصورة شكرًا كتير والله يجزيكي الخير

41 الكاتب منى, on 06-04-2011 05:55
صحتين و عافية زينة

الحمد لله زبط معك و كان يممي , شكرا للدعوات الغالية

42 الكاتب amoula, on 10-05-2011 11:07
السلام عليكم اختي منى , بدي أسألك فينا نعمله نفسه بالكاكاو ؟
يعني نحطله كاكاو بيطلع بالشوكولا ؟؟
الله يجزيكي كل خير يارب , وبالنسبة لورق الزبدة فينا نستغني عنه بشي شغلة تانية ؟
يسلمن يارب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 18/02/2010 )

< السابق		التالى >

[ عودة ]