L2ma.com | لقمة طيبة | L2ma.com | لقمة طيبة | مكدوس الباذنجان | · , الباذنجان, على, المكدوس, حتى | L2ma.com

القائمة الرئيسية

مكدوس الباذنجان

الكاتب/ منى

12/09/2007

مكدوس الباذنجان

من أشهر و ألذ أطباق وجبة الفطور أو العشاء في سوريا , و الذي يحضر ما بين أواخر شهر أيلول أو بداية تشرين الأول من كل سنة .

نزلت الوصفة خصوصاً في هذا الوقت ليكون حاضرا على سفرة السحور خلال شهر رمضان الكريم ..

المكدوس الجاهز المعلب لا يشبه المكدوس الحقيقي بشيء , لذا أتمنى أن تجربي هذا المكدوس و لو بكمية قليلة و تحكمي بنفسك ..

بالصحة و الهنا على أطيب مكدوس

5 كيلو باذنجان تاتفي
3 - 4 ملعقة كبيرة ملح خشن صخري
زيت زيتون حسب الحاجة

الحشوة :

نصف كيلو فليلفة حمراء ( 3 حبة كبيرة جداًً )
رشة صغيرة من الملح الصخري
2 كوب جوز مفروم
4 فص ثوم
direction

· يختار الباذنجان بحيث تكون حباته صغيره و من النوع المدعبل و ذو اللون الفاتح الباذنجاني و ليس الأسود ثم ينزع الجزء الأخضر من كل حبة و يغسل و يوضع على مصفاة .

· يسلق الباذنجان على دفعات , تملئ طنجرة كبيرة بالماء حتى منتصفها و توضع مع حبات الباذنجان على نار مرتفعة و تترك حتى تغلي , تغطى بغطاء أصغر من القدر كي لا تطفو الباذنجانات و تسلق لمدة 10 – 15 دقيقة أو حتى تطرى الحبات عند الضغط عليها بالإبهام و السبابة , لا يسلق الباذنجان زيادة كي يحافظ على تماسكه و شكله .

يضغط على الحبة بين السبابة و الابهام للتأكد من أن البانجان قد نضج مع ضرورة الانتباه أن لا يسلق زيادة

· بعد أن يطرى الباذنجان يرفع على مصفاة و يترك حتى يبرد قليلاً ثم تؤخذ كل حبة باذنجان و يفتح شق بالطول في منتصفها باستخدام الإبهام مع الانتباه كي لا تشق الحبة ثم يملئ الشق بنصف أو ربع ملعقة صغيرة من الملح حسب حجم الحبة , يستخدم الملح للتخلص من الماء الزائد في الباذنجان و للحفاظ عليه من العفن .

·          ترتب حبات الباذنجان المحشية بالملح على مصفاة بحيث يكون الشق للأسفل على شكل طبقات ثم تغطى بطبق مسطح أصغر من المصفاة و يوضع عليها ثقل كبير كي يساعد الباذنجان بالتخلص من كل ماءه و يترك لمدة 12 ساعة في مكان بارد أو حتى يجف من الماء تماماً ( أنا أضعه في الشرفة ) .

·          في اليوم التالي يرفع الثقل , ستكون حبات الباذنجان أصبحت رقيقة و جافة و ستلاحظين الكثير من الماء في الوعاء تحت المصفاة .

·          تحضر الحشوة : تنتقى حبات الفليلفة بحيث يكون نصفها حلو و نصفها حرّ ثم تغسل الفليلفة و تفرم مكعبات صغيرة جداً و ترش بالقليل من الملح و تترك في البراد لمدة ساعتين أو حتى تنزل كل مائها ثم تنشر في الشمس لمدة ساعتين تقريباً .

·          يفرم الجوز ثم يخلط مع الفليلفة و الثوم المهروس و نصف ملعقة كبيرة ملح , أصبحت الحشوة جاهزة .

· تحشى حبات الباذنجان بحشوة الفليلفة المجهزة ثم تصف في المصفاة بحيث يكون الشق للأسفل و تكرر عملية تثقيله بالثقل و يترك المكدوس لمدة 6 – 8 ساعات تقريباً .

· أصبح المكدوس جاهزاً , يصف في مرطبان زجاجي و يغمر بزيت الزيتون بحيث لا يبقى أي جزء و لو صغير غير مغطى بالزيت و يترك لمدة أسبوع حتى يستوي و يصبح جاهزاً للتقديم .

طريقة تفريز المكدوس :

·          كي لا يهدر زيت الزيتون بكميات كبيرة يمكن حفظ المكدوس في الفريز , بعد كبس المكدوس للمرة الثانية تقسم حبات الباذنجان على أكياس صغيرة و تغلق الأكياس بإحكام ثم توضع بالفريز حتى وقت الحاجة , و عند اللزوم يخرج كيس المكدوس و يوضع في مصفاة حتى يفك عنه الثلج تماماً ثم يرتب في مرطبان صغير و يغمر بزيت الزيتون و يترك لمدة أسبوع تقريباً حتى يصبح جاهزاً للتقديم .

سر الطبخة :

·          أهم سر في تحضير المكدوس هو تثقيله بشكل جيد كي يتخلص تماماً من الماء و إلا فانه سيفسد و يتعفن .

·          لا تستخدم كمية كبيرة من الثوم كي لا تطغى على نكهة الباذنجان و الفليلفة و الجوز .

·          يمكن استبدال الفليلفة بدس الفليلفة و لكن الطعم سيكون أطيب بكثير باستخدام الفلفيلة الحمراء الطازجة

أضافة إلى المفضلة (2) |

أقتباس | مشاهدات : 6742

تعليقات (25)

1 الكاتب بدور, on 17-09-2007 13:55
الله يسلم هالايدين الحلوين يا رب والله وصفك مافي أوضح منو خصوصي إنو مع الصور الله يباركلك بوئتك وعملك يا رب

فعلا المكدوس طيب كتير عالسحور نحنا لسا ما عملناه هالسنة عمنستنى ينزل الباتنجان الناعم :roll

2 الكاتب منى, on 17-09-2007 14:24
أنا لحقت لي شوي مشان رمضان , الواحد بيحتار شو بده يحط للسحور

الله يسلمك بدور , و لا يحرمني من هل الدعوات الحلوة

3 الكاتب Eman, on 14-02-2008 21:45
جاي على بالي أعمل مكدوس.

أنت ذكرت أنه لازم يون لون الباذنجان فاتح ، أنا شفته كله نفس اللون ، بعدين ما بعرف إذا موسم الباذنجان هون متل بلادنا، بخاف يطلع مر متل ماقلتي وتخرب الطبخة :upset

شغلة تانية ، عيلتي بس شخصين ،برأيك شو الكمية المناسبة إلها؟ وبما أنه رح أعمله تجربة أولى إلي مابدي يطلع كتير ،وبقية المكونات شلون رح أقللها، لا تواخذيني مو شاطرة كتير وبدي أتعلم بالمسطرة والقلم(يعني بدي تعبك معي) :roll

بس بعرف بتعزيني بسعر أختك الصغيرة ورح تتحمليني :zzz

،هههه مصدقة حالي كتير ،مو؟

4 الكاتب منى, on 16-02-2008 06:04
هلا أمولة , اي سدقي حالك و اطلبي و ادللي , ايه انا كم أخت ديجيتال عندي

أمولة إذا هادا البانجان الي طالع بالصورة مو متوفر فنصيحة لا تجربي :roll

ما رح يطلع متل المكدوس و بعدها حرام تعبك :sigh

الكمية فوق بتعطيك تقريباً ثلاث مراطبين من القياس الوسط , إذا قسمتيها بالنص كتير منيحة لعيلتك كتجربة أولى

5 الكاتب قهوه مُره, on 12-09-2008 09:55
كيفك منى...أنا صرلي زمان مشتركه بالموقع بس ماعم بعرف كيف إتواصل معكم..المهم أكلاتك يلي جربتها بتجنن..بس بدي إسألك أنا لما عملت المكدوس ماتصفى من المي مظبوط شو ممكن يؤثر على المكدوس هدا الشي...هل ممكن يتلف..أفيديني أفادك الله...

6 الكاتب منى, on 12-09-2008 11:14
هلا أختي

نورتي و نور الموقع و عوافي على كل شي جربتيه

هلا إذا ما نشف من المي رح يفسد لان هل المي البقيانة فيه رح تخليه يهلط أو يعفن ..

إذا ما في مجال تنشفييه منيح من المي , أنصحك تحفظيه بالفريزو تطالعي شوي على حسب حاجة العيلة عندك و تاكلوه أول بأول , بركي ان شاء الله بيمشي الحال :roll

7 الكاتب ام ناصر, on 12-09-2008 21:10
اخت منى شكرا عالوصفة قد جربتها كذا مرة وطلعت تمام لكن اخر مرة عملتها طلعت مالحة مو عارفة السبب كيف ممكن اتخلص من الملح الزيادة

8 الكاتب منى, on 13-09-2008 10:24
هلا ام ناصر , مشكلة الملح الزيادة أو الحرّ الزيادة ما الهم حل :roll

الحل الوحيد لحتى تستفيدي من المكدوس انك تقدميه بشكل سلطة تفرمي معه بندورة و تتبليه بزيت المكدوس و كمون و فليلفة حمراء ناعمة و تقدمييه , مرّة أنا هيك صار معي و المكدوس كله طلع مالح , بس مع هل السلطة خلصت كل مونة المكدوس و صارت من سلطات أولادي المفضلة على العشاء

9 Pickeld Eggplant
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 02-07-2009 16:28
Marhaba Mona,
Finally I was able to use your program and sign, sorry for my late visit, I want to ask you about freezing the eggplant? does it retain its shape and texture after taking it out of the freezer.

10 الكاتب منى, on 08-07-2009 18:33
Hi Arlette

you r welcome dear , I`m sorry 4 the problems .
For this recipe the eggplant wont be affected after freezing

11 الكاتب آرام, on 16-10-2009 07:24
مرحبا أخت منى
فعلاً المكدوس من ألذ أطباق الفطور إن لم يكن ألذها على الإطلاق .. بعرف طريقته من زمان وهي نفس طريقتك تماماً بس ما تجرأت سابقاً أعمله وكنت محروم منه سنين طويلة .. البارحة انتهيت من تحضيره وحطيته بالمرطبان وبعد أسبوع بخبرك النتيجة .. عملت 2 كيلو بس لأنها أول مرة بس ما بتكفي وأكيد رح أعمل كمية أكبر بأقرب وقت .. للأسف ما لحقت جهز الفليفلة الحمرا فاستخدمت دبس فليفلة .. المرة الجاية إن شاء الله رح أستخدم الفليفلة الطازجة

12 الكاتب منى, on 16-10-2009 11:58
هلا ارام

سبحان الله انا كمان حشيت مكدوساتي من يوميين .
ان شاء الله يطلعوا طيبين و على زووءك و تمام و كتير ناس بتعمل متلك , ان تحشي المكدوس بالدبس و كله طيب .

ان شاء الله هنا و صحة مقدما و عم استنى رايك بعد التذوق .

13 الكاتب آرام, on 22-10-2009 16:24
مرحبا أخت منى
أفطرت من المكدوس اليوم الصبح .. كنت متفائل كتير بس للأسف النتيجة كانت مخيبة للآمال :sigh

الطعمة طيبة ومو ناقصه غير شوية ملح .. المشكلة أن المكدوس كان قاسي .. قطعته بالسكين مع أن المفروض أنه ينهمس بالخبزة .. الظاهر أني ما سلقتهم كفاية مع أني على حد علمي عملت متل مو مذكور بالوصفة تماماً :roll

يا ترى ممكن المكدوس يطرى شوي مع الوقت ولا خلص رح يضل هيك

بكل الأحوال .. حيتاكل يعني حيتاكل

المصيبة أني تسرعت وعملت كمية مكدوس تانية من يومين وبنفس الطريقة وخايف تطلع النتيجة نفسها :upset

وإذا كانت المشكلة في السلق فالمخلل كمان رح يطلع قاسي لأني سلقته بنفس الطريقة :cry

14 الكاتب منى, on 22-10-2009 18:42
:roll

كله رح يطلع نفس النتيجة ما دامك سلقتهن بنفس الطريقة , هو ادق خطوة في تحضير المكدوس و كمان المخلل سلقه , لان اذا كان قليل رح يطلع قاسي و اذا جرت عليه رح ينهمس , بقى متل ما اتوقعت كله رح يكون متل بعضه و ما رح يطرى :sigh

و الله ما بعرف شو بدي قلك , يلا عوضك على الله و ان شاء الله اذا غير مرة اتشجعت و جربتهن يطلعوا منااح

15 الكاتب آرام, on 04-11-2009 06:19
مرحبا أخت منى
حبيت أخبرك أن الوجبة التانية من المكدوس طلعت أفضل بكتير من أول وجبة .. يبدو أني سلقت تاني وجبة بشكل أفضل أو ربما نوع الباذنجان مختلف .. عملت وجبة ثالثة وطلعت جيدة جداً .. بس يمكن سلقتها شوي زغيرة زيادة

بكل الأحوال هيك وصفات ما بيأس منها ومصر على تكرارها حتى تزبط متل ما بدي لأني ما بستغني عنها.

16 الكاتب karmen, on 20-12-2009 08:48
مرحبا منى كيف حالك شكرا لك على كل الوصفات والنصائح بدي اسالك عن المكدوس بعد مانضعه في المرطبان مع الزيت ونقفله بفور الزيت برجع بفتحه متى استطيع ان اغلقه تماما ومايفور الزيت وينكب وتسلم ايديكي على كل شىء

17 الكاتب منى, on 21-12-2009 20:16
هلا ارام

انا كتير اسفة للمشاكل الي صارت معك و متل ما قلت , في وصفات التجربة هي اكبر معلم الها و هي واحدة منهم لان اد ما حدا شرح و حكى مو ممكن تعرف درجة البانجان المطلوبة للسوا الا بالتجربة :roll

بكل الاحوال الحمد لله ان التجربة الاخيرة كانت منيحة و الف هنا و صحة يا رب

18 الكاتب منى, on 21-12-2009 20:24
هلا كارمن

احيانا ممكن يفور الزيت و لحتى تحلي المشكلة ممكن تحطي تحته طبق لحتى ما ينزع الدنيا :roll

ممكن ترجعي تسكريه بعد يوم او يومين , حسب حجم مرطبانك و انا عني ما بفتحه حتى لو فار

الله يسلمك و يحفظك اختي

19 المجدوس مالح كتير -أرجو إنك تساعديني
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 03-08-2010 01:39
هاي كيفك منى لو سمحتي عندي سؤال أنا عملت مجدوس أول مرة بس في مشكله طلع مالح كتير
عندك إقتراح إلي ممكن ازابطه أو أعمل إشي
أرجو إنك تساعديني
شكرا :cry

20 الكاتب منى, on 03-08-2010 10:33
لا بعد ما طلع مالح ما عاد يزبط , ممكن تعملي منه سلطة مع بندورة و بقدونس و تحضريها من دون ملح ابدا بتطلع طيبة كتير

21 الكاتب م نور, on 18-09-2010 23:31
كيفك حبيبتي
ان شاء الله تكوني بخير
والله يجزيك كل خير والله قد ما دعينالك ما منوفيك عقد ما فكيتيلنا ازماتنا بلطبخ بالزات بالغربة والاهل بعاد انو نسالن
كان بدي اسالك حبيبي عن نوع البيتنجان
انا جبت صغير مدعبل بس لونو غامق بينفع ولا بيكون مر؟؟
بيني وبينك بس المهم ما يطلع مر لان شو ما كان رح اكلو خخخخخخ

22 الكاتب م نور, on 18-09-2010 23:36
بتصير الفليفلة تكوني رومي؟؟

23 الكاتب هشام, on 22-07-2011 22:43
مرحباَ.... هل من الممكن طهي البذنجان بواسطة البخار Steaming بدل السلق بحيث نقلل كمية المياه التي نود التخلص منها لاحقاَ منعاَ للعفن؟ شكراَ

24 الكاتب منى, on 23-07-2011 00:56
و الله يا اخي ما اتوقع بيصر , بس فكرة انو واحد يجرب على كمية قليلة ليشوف شو النتيجة
هلا فيك

25 الكاتب منى, on 23-07-2011 01:24
هلا نور

من زووءك حبيبتي , ان شاء الله الف الف صحة و مية هنا يا رب

جربي دوقيه اذا كان طعمه ما فيه مرار ان شاء الله بيمشي حالهو الفليفلة بتقدري تستخدمي النوعية الي متوفرة عندك , بس لو كانت ريقية بيكون اطيب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 21/09/2008 )

< السابق		التالى >

[ عودة ]