L2ma.com | لقمة طيبة | L2ma.com | لقمة طيبة | سلطة البطاطا بالنعناع | صغيرة, البطاطا, ملعقة, · , تترك | L2ma.com

القائمة الرئيسية

الأكثر تصفحاً

سلطة البطاطا بالنعناع

الكاتب/ منى

19/03/2007

سلطة طيبة كتير و خفيفة و نعنوشة بنكهة النعناع , بحبها كتير لاني من عشاق البطاطا و انا اكيدة انها ره تعجبك كمان

بالصحة و الهنا

6 حبة صغيرة بطاطا غير مقشرة
2 ملعقة صغيرة ملح
حبة بصل متوسطة مفروم
نصف كوب نعناع طازج مفروم أو أكثر حسب الرغبة
فص ثوم مهروس
نصف كوب زيت زيتون
ربع ملعقة صغيرة فلفل
ملعقة صغيرة كمون
ملعقة صغيرة فليلفة حمراء ناعمة

طريقة التحضير

· تغسل البطاطا جيداً ثم توضع في وعاء مناسب من دون تقشير و تغمر بالماء مع ملعقة صغيرة ملح .

· تسلق البطاطا لمدة 25 دقيقة أو حتى تنضج بدون زيادة في السلق كي تبقى محافظة على بعض الصلابة .

· تسحب البطاطا من الماء المغلي و تقشر أو تترك من دون تقشير . تقطع مكعبات صغيرة ثم ترتب في طبق التقديم .

· يمزج الثوم و عصير الليمون و زيت الزيتون و البصل و النعناع و الملح و الفلفل و الكمون و الفليلفة الحمراء الناعمة ثم تصب الصلصة فوق البطاطا و هي لا تزال دافئة و تقلب بلطف ثم تترك حتى تبرد قليلاً ثم تقدم .

أضافة إلى المفضلة (0) |

أقتباس | مشاهدات : 3354

تعليقات (23)

1 الكاتب الدمشقية, on 02-12-2008 08:32
يممممممممممي شو لذيذة فعلاً وانا بحبها كثير :grin

ربي يسلم ايديكي يا رب :zzz

2 الكاتب منى, on 02-12-2008 17:40
هلا دمشقية

و انا متلك , سهلة و طيبة و دايما مقاديرها متوفرة

3 الكاتب سارونات, on 12-12-2008 22:35
السلام عليكم و رحمة الله و بركاته
السلطة صحية و بسيطة و ان شاء الله بجربها بس اشتري نعناع لان جربت اغرس النعناع بس ما ضبط معي :cry

و كان بدي اغرس الاعشاب اللي عطول منحتاجها متل البقدونس و الكزبرة :cry

بالتوفيق
سلام

4 الكاتب منى, on 13-12-2008 09:18
و انا متلك بسالصراحة لسا ما جربت :roll

يلا اذا ظبطت معك الغرسات ابقي خبريني كيف و ان شاء الله تجربي الوصفة و تحبيها :zzz

5 الكاتب سارونات, on 11-05-2009 21:23
السلام عليكم و رحمة الله و بركاته

اختي منى زرعت شوية نعناع بجذوره و ضبط معي الحمد لله بتعرفي شو بيصير

هو بالاول بيذبل و ييبس و بتفكير خلاص ما ضبط بس انت ظلي اسقيه و راح يرجع يصحى )) ليش كان نايم

)) و ينمو

اما الكزبرة فحطي بذور الكزبرة اليابسة في تربة او وعاء للغرس بعد ما تحفري شوي و بعدين غطيها و اسقيها و راح تطلع
و انا هلا عم دور عطريقة غرس البقدونس و ان شاء الله لاقي

قطفت شوية نعناع من اللي غرسته و ساويت السلطة من شوي و حطيت بدل الليمون خل لان ما عندي ليمون و ما حطيت بصل لان كمان ما عندي بس طلعت بتجنن و كتير طيبة

اختي منى خبريني وصلتك وصفة حلوى السمسم بالشوكولا و المكسرات

بالتوفيق
سلام

6 الكاتب منى, on 12-05-2009 06:44
يا عيني عليك سارونات

لااازم تبعتيلي كم غرسة , شجعتيني كتير لان جرب الزراعة بنفسي , يا ترى بدهم شمس أو لا ؟

الف هنا و عافية على السلطة بكل لقمة , و الوصفة وصلت شكر كتير للمشاركة و سلام خاص لماما

7 الكاتب سارونات, on 12-05-2009 22:20
السلام عليكم و رحمة الله و بركاته

نعم اختي منى بدهم شمس بس اذا مكان مظل نسبيا بينفع مو مشكلة و كمان النعناع بيحب الماء

الله يسلمك و امي كمان عم تسلم عليك

بالتوفيق

سلام

8 الكاتب منى, on 16-09-2010 12:00
زرعت :eek

جبت بذور بقدونس و كزبرة و زرعتهم و هلا بديوا يطلعواا , انا طاير عقلي فيهم , شكرا للفكرة سارونات

9 الكاتب ام خليل, on 16-09-2010 22:35
سلام عليكم انا كتيربحبهاهل اكلة ولازم ساويهاشكرا الك وعلى جهودك بس ملح مو بطولو ليستوولا كيف ولو بدي عزبك بسؤالي بس انه بعرف كلشي عما ينصلق مابده ملح بالبدايةانا بحط معلقة كبيرة زيت زيتون وبغطيهن ما بياخدو وقت طويل بس ملح بدي ساويها ان شاء الله سامحيني طولت عليكي تسلم هل ايدين

10 الكاتب نور الأسلام, on 17-09-2010 19:04
السلام عليكم كيفك منى يسلمو على السلطه منظرها بشهي انا بعمل سلطه قريبه منها لكن مايونيز وليمون وتوم وبقدونس بمزجهن مع بعض وبسكبن فوق البطاطا

كيف الزرعات اكيدصغار وحلوين بس انزل رح حاول ازرع كيف الجو بسوريا نازلين انشاء الله اول شهر عشره :zzz

11 الكاتب ام خليل, on 18-09-2010 23:10
الله يعطيكي لعافية شو طيبة جربتها وحطيط توم انا ماكنت حط توم طلعت طيبة كتيركتيربفرح كتير لما ادخل موقع بكون مكتوب مية اهلا وسهلابزكريني بشام وايامها لحلوةالله يحلي ايامك يامدام منى بس سؤال انه طريقة كروسان مكتوب باول صفحة انها هي طريقة خطا فما عرفت انه اذا في غيرها وين لانه بدي اسويهااذا سمحتي لح غلبك معي بس انا حبيت كل اكلاتك ولازم اطبقها بهل فترةوشكرا سامحيني على اطالة

12 الكاتب منى, on 03-10-2010 20:54
هلا ام خليل

الف صحة و عافية و هنا حبيبتي , شو مبسوطة انها عجبتك .
انا بحط مع البطاطا ملح وقت السلق بحس انها بتطلع اطيب

ما كتير فهمت شوبها وصفة الكروسان :roll

, ممكن توضحيلي و ايا سؤال من عيوني

13 الكاتب منى, on 19-09-2010 16:49
هلا نور

في سلطة متل الي قلتيها بالموقع و هيا كتيررر طيبة , بس انا بصورة عامة بالصيف ما بقدر اكل شي تقيل لهيك هي باكلها بالصيف و سلطة المايونيز باكلها بالشتي

زرعاتي بيجننوا , عن جد الزراعة متعة , هلا عم استناهم يطولوا و يصيرا متل الخلق لحتى لقمشهم :grin

الجو هلا تحفة , بتعرفي بديت الغبوقات شوي و خف الشوب , هلا احلى وقت , ان شاء الله توصلي بالسلامة

14 الكاتب yaso, on 19-09-2010 23:40
نيالكن بتقدرو تزرعو :cry

أنا بحب كتير اني ازرع بس المشكلة انو عنا بالسعودية مافي شي بعيش من الحر

ومشكورين كتير على هالأفكار الحلوة يعني ممكن الواحد بس يروح عسوريا يحاول يجرب

15 الكاتب منى, on 20-09-2010 19:09
و الله معك حق , نحنا مرت علينا فترة حر موتللي أغلب زرعاتي و ما بقي منهم الا كل طويل عمر :roll

يلا ان شاء الله بترجعي سالمة و غانمة و بتعملي كل الي نفسك فيه

16 فايئة ورايئة !!!!!!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 22-09-2010 03:16
السلام عليكم ورحمة الله

امبارح كنت رايئة وما وراي شي ههههههه أمت فتحت الموقع ويللللللله اعمل منو شغلات، قلت بعمل يلي بلحقو قبل ما يجي جوزي :grin

خاصة ان قبلها كنا متسوئين وانا جبت شغلات لكتير أكلات من هون فكان متوفر كل شي.
وهادا يلي طلع معي :

وعملت قدر المستطاع شي بيشبه يلي بالموقع من الشكل ... فمين بتحزر الأكلات ؟

غير هدول كان بقيان عنا من قبلها بيوم مسقعة باذنجان (أو منزلة

) منوش علوا تكتبيلنا الفرق بيناتون ... أنا بعملها متل ما ماما كانت تعمل لذلك ما كان إلها تسمية عنا بالبيت :grin

. وكمان عملت شوربة خضار.

طبعا العائلةالكريمة عهالغدا كنا أنا وجوزي :grin

أكلنا من كل شي لقمة وشبعنا !!! بس جوزي أكتر الشي حب سلطة البطاطا

وهادا الصحن الوحيد اللي خلص.

شكرا منى كتير كتير كتير ونرجعلكون ياها بالأفراح (ولا شلون كانوا بيقولوا بسوريا ؟ :upset

)

والسلام عليكم

17 الكاتب ام خليل, on 22-09-2010 08:14
سلام عليكم شكرا على رد بس على كروسان انه مكتوب نص ساعةانها صفحة خطا كنت عما اسال انه هي وقت هل منساوي فيه كروسان ولاانه هي اذا بدي ساويها بنص ساعة فهي كروسان خطايعني لازمها وقت اكتروانه ما عرفت تبع زبدة ومعلقتين طحين كيف انه بدي ساويهن تكون من حرارة غرفةحتى ما يكتلو وبعدين بحطها على عجينة صح شاكرة فضلك كتير ياست لكل انا اسفة على اطالة

18 الكاتب om nabeel, on 25-09-2010 00:05
يسلموا كتير
اكلة طيبة كتير
بس بتسمن لبطاطا كتير
الله المستعان

19 الكاتب منى, on 25-09-2010 09:54
هلا jassy

ممممم , يمكن بطاطا كوينز و هل السلطة و السلطة المقلمة . المهم تكوني اكلتي عني كم لقمة

الف الف صحة و هنا على البك و الب الباشا

المسقعة هي طبخة فيها البانجان و اللحمة مع بعض , و بيكون البانجان مقطع مكعبات . أما المنزلة فهي حبات البانجان الكاملة المحشي باللحمة و ممكن احيانا لحمة و بقدونس و الصوص اما مرق لوحده أو مرقة مع عصير بندورة و كل مدينة بسوريا بتطبخ المنزلة شكل و كمان بتطبخ المسقعة شكل , المهم انه كله طيب و البانجان ملك الخضار الصيفية :zzz

انا ممنوتك لثقتك في و لردودك الحلوة

20 الكاتب منى, on 03-10-2010 19:16
هلا ام خليل

هي بتاخد اكتر من نص ساعة بكتير , بدها طولة بال
الزبدة و الطحين بتخلطيهم مع بعض و بعدها بتخليه ليبردوا و بعدها تستعميهم

ايا سؤال تاني من عيوني

21 الكاتب منى, on 03-10-2010 20:51
هلا ام نبيل

ما بتسمن البطاطا اذا مسلوقة و هل السلطة شهية بكل النكهات الي فيها , ان شاء الله تجربيها و تكون يمممممم :zzz

22 الكاتب lalosh, on 06-12-2011 04:26
كيفك منووووش؟ زمان عني مو :roll

هلأ بدي توضحيلي بعد ازنك شو المقصود بالفليفلة الحمرا؟؟ يعني فلفل حلو لونه احمر؟؟وللا البابريكا؟؟ لأنو اليوم بدي أعملها

ان شاء الله رح أتزكرك بدعوة وقت الإفطار وأكييد دعائنا دايما لسوريا وأهلها الطيبين

23 الكاتب منى, on 07-12-2011 07:46
المقصود فليفلة حمراء ناعمة بقى بدي ياها حرة او حلوة ( بابريكا )

ان شاء الله الف صحة و هنا و عااافية يا رب , و الله يلطف فينا :roll

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 23/09/2010 )

< السابق		التالى >

[ عودة ]