شاورما الدجاج

·          تغسل صدور الدجاج ثم ترتب فوق بعضها البعض و توضع فيي الفريزر لمدة 3 – 6  ساعات تقريباً أو حتى تكون جامدة بشكل غير كامل , هذه الخطوة هدفها الحصول على قطع رقيقة من الدجاج عند التقطيع  .

·          تخرج صدور الدجاج من الفريزر ثم تقطع إلى شرائح رقيقة  باستخدام سكين حادة .

·          توضع شرحات الدجاج في وعاء غميق و تتبل ببهارات الشاورما و السماق و الأوريغانو أو الكاري في حال استخدامه و الخل و الليمون و بشر الليمون و الثوم و الزيت و تقلب حتى يمتزج الكل جيداً ثم يضاف البصل و الجزر ثم  يغطى الوعاء و يترك منقوعاً لمدة 24 ساعة في البراد .

·          يرفع  الجزر و البصل من مزيج الشاورما ثم ترفع شرائح الدجاج من مرق النقع و تقلب في مقلاة غير لاصقة على نار قوية على دفعتان و تقلب حتى تنضج و تشقر من الطرفيين .

·          تقدم الشاورما ساخنة مع البطاطا المقلية و البندورة و المخلل و كريم الثوم .

تعليقات (39)

1  الكاتب ام نور, on 10-09-2007 19:43 اه والله يسلموا هالديات وما ننحرم من هالوصفات الحلوة. بالمناسبة سمحولي باركلكون بحلول هالشهر الفضيل اعاده الله علينا وعليكم وعلى جميع المسلمين بالخير والسلام

2  الكاتب منى, on 11-09-2007 15:02 و أنت بالف خير أختي ام نور     يا ريت تجربي الشاورما و تعجبك أختي ..

3  الكاتب ام نور, on 11-09-2007 16:28 اكيد رح جربا بدون كلام بهيدي الجمعة باذن الله لان الجمعة القادمة بتبلش جامعتي وبيصير الوقت ضيق وبدي اطلب منك اختي طريقة تحضير الفتة بعملا بس ما بتنجح كتير وبرمضان كتير منعملا

4  الكاتب منى, on 11-09-2007 17:38 تكرم هل العينتين ام نور     بس يا ترى أيا فتة بتقصدي ؟    فتة الحمص و إلا فتة الجاج و إلا فتى البتنجان و إلا فتة المكدوس     شو عم تدرسي ؟

5  الكاتب ام نور, on 11-09-2007 20:18 والله في فتة مكدوس وباتنجان انا صراحة بعرف الجاج والحمص وانت شو بتحبي تحطي وصفات بتكوني مشكورة منتعلم .  انا دارسة معلوماتية ادارية والان عم ادرس ادب فرنسي كتير في فرق مهاك

7  الكاتب منى, on 12-09-2007 07:13 وصفة البيتي فور شكلها بتاخد العقل     الله يخليلك باباتك و لا يحرمكم من بعض يا رب     تكرم عيونك ام نور , رح نزل الوصفات اذا الله راد...    انا دارسة ادب انكليزي , يعني في شي مشترك بينا

8  الكاتب ام نور, on 22-09-2007 21:43 اليوم اشتريت صدورة جاج وجلدتون والصبح انشالله رح قطعون وانقعون بالتوابل يعني الاثنين بطبخون وبقول شو صار معي انشالله تظبط لان وعدت زوجي فيا وناطرا لان كتير بيحب الشاورما

9  الكاتب منى, on 23-09-2007 11:30 ان شاء الله بيطلعوا طيبين ام نور     عم استنى رايك حبيبتي , بس ما في داعي تجلديهم لبكرة   بيكفي لليوم المسا

11  الكاتب منى, on 26-09-2007 12:28 هلا رينو     سبحان الله , الدم غلي     رينو بهارات الشاورما فيك تحضريهم على ايدك و بتشوفي الطريقة على هل الرابط    مية اهلا و سهلا فيك   و ان شاء الله اذا جربتيهم رح يعجبوك كتير

13  الكاتب منى, on 22-01-2008 12:27 بالفعل أختي ام عبادة أهم بهار للشاورما هو الهال مع المستكة , كلك زووء أختي و الله يسلمك و يخليك يا رب

14  .... الكاتب رنا, on 11-05-2008 20:28 عزيزتي منى انا قطعت الشاورما ونقعتها وكل شي بس هلأ هي بالبراد .....خسيت عم يطلع منها مي بيضا يمكن مزيج اليمون والزيت والخل .....بس سؤال هلأ المستكة مو اذا الواحد اكلها بتصير متل العلكة يعني بتعطي علكة ولا بتفرط ....لانه عطتني حماتي شوي وحكيتها بس بعدين دقتها شفتها مابتعلك بقا ياترى شو هاد اللي حطيته ؟؟؟وسؤال كمان المي يلي طلعت مع الشاورما اتخلص منها ولا احطها كلها سوا بالفرن ؟؟؟وكمان شغلة اغطي الصينية بالقصدير ولا اتركها بلا غطا ؟؟؟  وجعتلك راسك باسئلتي بس انشالله تزبط لانه جرحت ايدي اربع جرحات وانا عم قطعها بقا ياريت يطلع شي طيب ومايروح تعبي عالفاضي

15  الكاتب منى, on 12-05-2008 10:28 هي هي المستكة المظبوطة , مو لازم تعلك هي بتفرط لما بتطحنيها     بعد ما ينتقع الدجاج لمدة يوم كامل بترفعيه من ميته و بتحطيه بالصينية , و بتخبزيه من دون ما تغطي الصينية لحتى تستوي الشاورما     أي سؤال تاني أنا تحت أمرك و بخدمتك و ان شاء الله رح تعجبك و بتدعيلي

16  صارت الكاتب رنا, on 12-05-2008 16:23 ساويتها ...بس ماطلع الطعم متل مابدي ..مابعرف طلع فيها طعمة معطرة انا بظن يامن الخل لانه استعملت خل ابيض ...ويمكن طبشت ايدي شوي بالكمية .....بس انتي متأكدة انه المستكة ماممكن تكون مسؤولة عن هالطعمة ؟...كمان شغلة انا ماصفيتها من ميتها ...لانه حطيتي الرد بعدمااكلناها وقلت لحالي اذا ماغطيتها يمكن تقرمد ؟؟؟مابعرف عجبتني فكرتها ونويت اعيدها بس بدي اسألك اذا حطيت مع التتبيلة شوية دبس فليفلة بتخيل بتعطيها نكهة طيبة   ويسلمو ايديكي يااحلى منى بالعاللللللللم

17  الكاتب منى, on 12-05-2008 20:12 ما بعرف رنا , انا المستكة الي بستخدمها عبارة عن قطع صغيرة متل البلور الشفاف ..    يمكن الطعمة المعطرة اجتك من مية النقع !! احترت و الله     فيك تحطي معها دبس فليلفة أكيد , بس اصولها ما بدها , بقى كمان على زووءك     الله يسلمك رنونة يا قمر و اذا جربتيها مرة تانية يا ريت تخبريني

18  hi الكاتب رنا, on 13-05-2008 12:12 ياستي اكتشفت انه طعمت التعطيرة اجت من الخل لاني زودت الكمية شوي وماصفيتها يعني بميتها ... بالفرن ...بس على فكرة جوزي كتير حبها وصرت راقبه وهو عم ياكل واضحك قله عن جد حبيتها يقلي والله كتير طيبة بس بدي اعيدها اكيد وشكرا للاهتمام

19  الكاتب منى, on 13-05-2008 12:46 هلا رنونة هنا و عوافي على قلبه و قلبك كمان     ان شاء الله بتجربيها مرة تانية و بتعجبك .

20  الكاتب سارونات, on 14-08-2008 05:09 السلام عليكم و رحمة الله و بركاته  الشاورمااااااا بدي جربا بالبيت و ان شاء الله تضبط معي بس بدي ساويها سندويشات اختي منى عندي طلب الله يخليكي بدي طريقة عمل الخبز بالتفصيل و اهم شي طريقة خبزه تحتى احشي الشاورما فيه   و بدي اعرف هل فيني ادهن رغيف الخبز بكريم الثوم بدل المايونيز او صلصة الطحينة   بالتوفيق  سلام

21  الكاتب منى, on 14-08-2008 07:44 من عيوني أختي وصفة الخبز حابة نزلها بالموقع بس لحتى تظبط معي وصفة تكون تمام ..    الخبز فيك تحشيه بكريم التوم أو المايونيز على كيفك أما الطحينة لأ لان الطحينة منحطها مع شاورما اللحمة

23  الكاتب منى, on 14-08-2008 17:41 هلا أختي   انا بالعادة بحضرها قبل بيوم كامل , ما جربت اتركها أأقل     شو قصدك بالبراد ؟ ما كتير فهمت , يا ترى قصدك بعد التتبيل ؟ إذا هيك أكيد منتبلها و منخليها في البراد لمدة يوم كامل أو ممكن تتبليها و تحطيها في الفريزر بتقعد معك لمدة شهر

24  الكاتب سارونات, on 15-08-2008 04:56 السلام عليكم و رحمة الله و بركاته  عفوا لا تواخزيني اختي منى انا قصدي الفريزر ما بعرف كيف كتبتها براد   جازاك الله خيرا على المساعدة  بالتوفيق  سلام

26  الكاتب منى, on 23-09-2008 22:15 مية هلا سوسو نورتي و نور الموقع بأخت جديدة و كريمة و غالية الشاورما لازم تنقيها بالخل و الزيت و لما تجي تقليها تكون النار عالية و إذا بتحبيها مدهنة ممكن تنقعي معها شرائح دهن بتكون مقطعة كتيرررر رقيقة , و عندي وصفة للشاورما بتاخد العقل , ان شاء الله بنزلبها و بتجربيها لانها اطيب من الشاورما الجاهزة

28  الكاتب منى, on 24-09-2008 12:23 لا اكيد مو دايما بس صدفت ان انا و انت كنا اون لاين مع بعض , ان شاء الله تظبط معك

30  الكاتب منى, on 15-11-2008 11:10 هلا هيا   عافية و صحة على قلبك و قلب كل العيلة .  كتير انبسطت انها عجبتك و فيك انت تطبخيها بالطريقة الي بتريحك

31  الكاتب Eman, on 20-11-2008 18:06 وأخيرا عملت الشاورما الرائعة !!1  طول حملي كنت متوحمة عليها بس ما كنت أتجرأ أعملها لحاللي ،، يا ريت لو كنت بعرف إنها رح تطلع هيك لكنت عملتها من زماااااان ..   حبيناها أنا وزوجي .. والمسا رجعت سخنتها وحطيتها بالشواية وكانت أطيب بكتير يسلمو منوشة على هالوصفة الروعة

32  الكاتب منى, on 21-11-2008 07:08 الف الف هنا على الشاورما , كتير انبسطت انك جربتيها و انك حبيتيها و عجبتك,  لو تجربيها سندويش ,, ممممم رح تفتحي محل بعدها ببقى بنزل طريقة السندويش اذا الله راد

34  الكاتب منى, on 22-02-2009 10:10 هلا ريم   الف شكر الك اختي للرد والتواجد الطيب بالموقع , ان شاء الله تجربي هل الشاورما و تحبيها , و كمان تجربي بقية الوصفات الي كانت بنفسك   نورتي اختي

36  الكاتب majdo, on 29-06-2009 02:45

38  بهارات كتير كتير طيبة ... !!! الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-01-2011 19:50 السلام عليكم ورحمة الله    من زمان بخاطري إعملها وما كنت أوصل. أولتا امبارح اشتريت صدور مخصوص وجمدتون، امبارح تبلتون واليوم ساويتون .. يااااااااي طلعوا جناااان طييييبييييين.. ونكهة الليمون بتسطل !  صحي ما أضفت أكتر مكونين أساسيين - على قولتكون - واللي هنة المستكة والهيل .. لكن حتى هيك طلعت بتجنن ...... يسلمو كتير منى الله يجزيك الخير وجوزي كتير عجبتو واتفقنا ارجع اعملها شي يوم (مع العلم هو ما بيحب شي جديد بنوب ولا حتى يدوقو).   بس الجزرات والبصل ما سخيت كبون، فبعد قلية الشاورما قليتون بنفس المقلاية آموا خلصوا قبل الشاورمات الله وكيلكون ! طيبين كتير طلعوا عالتتبيلة.    الاسبوع الجاي حاعمل كليين وفرزهون، مالي كتير خلق عالطبخ آخر شهرين من الحمل. برغم أن جاي عبالي بس بوقت التنفيذ بفوت بالحيط هههههه.    عذكر الشاورما تذكرت نكتة:  كان في واحد مبالزووور بالزور يطلع معو حرف الشين وبالصدفة بس، فكان دايما ياكل فلافل، بيوم فاق الصبح وهو مشتهي على شاورما، آم ضل ساعتين بالبيت وهو عم يغسل ويلبس تيابو ويحلق يتدرب على قولة حرف الشين لبييييين ما زبطت معو، آم ما فلت هالحرف من تمو : ( ششششششـ )، لبس جراباتو وهو عم يقول: ( ششششششـ ) وجزمتو وطلع عسفل البناية وهو عم يقول : ( ششششششششششـ ) وهييييك توصل عالمحل، وقلو للبياع : (شششششششششششششششششششاورما !!!!)، آم البياع بحلق فيه شوي وقلو: ( شو قلتلي بدك ؟؟ ) .. آم الزلمة قلو : (اللعنة عليك ! هات فلافل) .    مع فائق الاحترام

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved