و أمي الله يحفظها و يخليها مشهورة بمعجناتها , و هي متل أغلب الستات بتشتغل من دون عيارات و مع ذلك عجينتها كل مرة بتطلع تحفة . و هي الطريقة بالاساس لاختي اية بس ماما صارت تعملها و انا اتعلمتها منهن هنن التنتين , و امي و اية بيستعملوها لكل أنواع الفطاير و الميني بيتزا . 
لما نويت نزل العجينة  ,  رحت لعند ماما و قبل ما تضيف ايا شي صرت قيسه و زينه لحتى قدرت اكتب وصفتها " الي على النظر "

الكروسانات الي ظاهريين بالصورة لفتهم لولو  ,بعزيمة الفطور انشغلت و حسيت الامور خرجت عن السيطرة فاتصلت فيها و طلبت منها مساعدة  بلفهم و خليلي عينها شو شاطرة فيهم بنص ساعة كانو بالفرن و ما أحلاهم و طلع شكلهم بيجنن .


أتمنى أنو تجربي العجينة و تحكمي بنفسك ..

كيلو طحين
3 ملعقة كبيرة خميرة
3 ملعقة كبيرة سكر
3 ملعقة كبيرة حليب بودرة
1 ملعقة كبيرة ملح
2 بيض
نصف كوب لبن
نصف كوب سمنة نباتية ( مثل مازولا )
ماء مغلي حسب الحاجة

تعليقات (56)

1  الكاتب بدور, on 08-09-2007 17:30 يا سلااااام شي مشهي فعلا الله يسلم ايديكي و ايدين ماماتك الحلوين لإنها جابت بنت متلك و اكلاتا طيبين كمان لاااااااا هيك كتير     والله على أد ما عبشوف وصفات طيبة بطلت أعرف اش ارد   ضروري جرب هالوصفة

3  الكاتب ام نور, on 08-09-2007 20:46 الله يخليليك امك يا رب .  العجينة روعة بتطلع اكيد بس ممكن نعملها لا الكروسان لان شفت كروسان بالصورة ولا عجينة خاصة

4  الكاتب منى, on 09-09-2007 09:57 هلا بدور   ان شاء الله رح تعجبك إذا جربتيها   مية أهلا و سهلا

5  الكاتب منى, on 09-09-2007 07:28 هلا أخت نداء   الشكر ليك على تواجدك الطيب بالموقع   نورتي

6  الكاتب منى, on 09-09-2007 10:00 هلا أختي ام نور   العجينة ممكن تستعمليها لاي نوع فطاير و تحشيها بشو ما بتحبي   بس انا مو نسيانة وعدي بالكروسان , بكرة أو بعده إذا الله راد رح نزل لك الوصفة

7  الكاتب ام نور, on 09-09-2007 11:35 الله يبارك فيكي عم نعذبك بطلباتنا.   بدي كمان اطلب منك اذا مجربة وصفة النعنع يابس خلصت نعنع يابس وبما اني في فرنسا لا اجد الا نعنع اخضر وانا كتير بستعمل النعنع فعم فكر اشتري اخضر ويبس بس ماني عارفي كيف الف شكر

8  الكاتب منى, on 09-09-2007 13:49 بالعكس ام نور   انا كتير مبسوطة فيك و بباقي الاخوات , الله لا يحرمني هل الطلة الحلوة ..    النعناع أنا بحضره كل سنة , بشهر تموز لحتى تكون الشمس قوية .  بتجيبي النعناع و بتنتفيه من الاعواد و بعدها بتغسليه كتير منيح و بتحطيه على مصافي لحتى ينشف .. بالنسبة الي أنا بجفف تقريباً 5 كيلو كل سنة من الورق الجاهز     هلا بتمدي شرشف أبيض في أكتر محل في بيتك بتجيه الشمس و بتفردي ورق النعاع على الشرشف و بتخليه لحتى ينشف , بالكتير بياخد معي يومين   بعدها بتحطي الورق الناشف على مصفاية و بتفركيه بين ايديكي و بتشوفي ان كله صار ناعم معك و بعدها بتحركي المصفاية لحتى يهر الناعم لتحت و تبقى الأعواد أو الاشياء الخشنة في المصفاية     النعاع الناشف بتخزنيه في مرطانات بلور لوقت الاستعمال ..    ان شاء الله تكوني فهمت علي , و اي سؤال تاني انا تحت أمرك أختي

11  الكاتب منى, on 22-10-2007 21:19 هلا فيك أختي arwen أخت جديدة و عزيزة     كلك زووء اختي , و ألف شكر ليك على الرد الطيب ..    أختي اللبن الذي يستعمل هو اللبن الزبادي و مش اللبن الرايب , و إذا مش متوفر استخددمي اللبنة و خففيها بشوية مي أو استخدميها من دون تخفيف كمان بيصير     أي سؤال تاني مية أهلا و سهلا فيك أختي

12  الكاتب arwen, on 22-10-2007 23:09 تسلمي يارب

14  الكاتب منى, on 06-02-2008 09:31 هلا فيك أختي   ممكن أن يستعمل مكانه , بس في هل الوصفة لأ , إذا حابة تجربيها لا تغيري في نوع السمنة ما رح تطلع مضبوطة

16  الكاتب منى, on 06-02-2008 12:48 إن شاء الله أختي و أنا أكيدة رح تعجبك إن شاء الله , بس لا تنسي تدعي لأمي

17  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-02-2008 06:05 باذن الله بجربها اليوم وبدعيلك ولامك ان شاء الله     صار روتين يومي ادش الصفحه واتجول فيها ههههnull

18  الكاتب منى, on 09-02-2008 09:45 ان شاء الله كلك زووء حبيبتي و أتمنى كمان تجربي وصفات و تكون متل ما بتحبي

20  الكاتب منى, on 25-02-2008 11:59 من عيوني التنتين , ان شاء الله هل الوصفة رح نزلها بالاسبوع الي جاي , معلش سامحيني رح اتاخر عليك شوي لان هل الاسبوع امتحانات ولادي

21  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 31-03-2008 12:09 أختي الحبيبة منى     اشتقت لك كثيرا،وأردت أن أبعثلك برد،لكن لا أعرف لماذا لا تظهر لي صور المنتدى .    مابعرف شلون طلعت معي هلأ،يمكن لأنو هي الصفحة مخزنة بكمبيوتري ،إذا عندك فكرة تساعدني لأقدر أفتح الصفحة بشكل طبيعي ،يا ريت تسعفيني فيها .

22  الكاتب منى, on 31-03-2008 14:20 هلا أمولة حبيبتي ما كتير فهمت عليك , ممكن تشرحيلي أكتر , كيف يعني الصور ما عم تظهر و شو دخل الصور بالرد ؟  بانتظار ردك أختي

23  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 31-03-2008 14:52 ما عم تطلعلي الصور ،يعني حتى صورة الكود الموجود فيها الرقم ما عم تطلع ،هي الصفحة مخزنة بالكمبيوتر عندي مشان هيك ما عم أقدر رد من غير هالصفحة،مابعرف يا ترى بس أنا عم عانى من هي المشكلة؟؟

24  الكاتب منى, on 31-03-2008 15:15 غريبة ايمان ما حدا اشتكى من المشكلة ,..    هلا حتى لو عملت تحديث ما عم تطلع الارقام ؟    على كل الاحوال رح ابعت المشكلة للمهندس المختص و ان شاء الله بيبقى بيحلها , و من هون لوقتها فيك تردي على اي وصفة حابة تردي عليها على هل الصفحة بس اكتبيلي اسم الوصفة

27  الكاتب منى, on 01-04-2008 19:07 هلا أختي كويتية أسفة أختي كتيرر على المشكلة الي عم تصير معك و مع ايمان و ان شاء الله بتنحل قريبا جداًعلى ما أتمنى

28  الكاتب رنا, on 04-04-2009 22:22 ولي شي بيطييير العقل عن جد كتير رائعين   بس شو بدي قلك هلأ السمنة النباتية يعني بتصير الاصيل مثلا ؟  طيب شغلة تانية ليش ماصورتيلنا اية وهي عم تلف الفطاير

29  الكاتب منى, on 05-04-2009 13:56 هلا رنونة   و الله شو بشتهي هل الصحن لكل اخت معنا بالموقع     السمنة اي نوع و ايا ماركة المهم ان تكون نباتية , و يا ستي بنهارتها ما كنت عرفانة راسي من رجلي , بقى شو صور و ما صور , الله ستر سمسومة اختي صورت السفرة و الا كانت راحت عليكم عزيمةالفطور الي رح نزلها بعد كم يوم

30  الكاتب عبير, on 05-04-2009 22:50 الله يعطيك العافية يامنى ويسلمو ايديك وايدين اللي حضر وعجن وخبز واكل وصور كمان00000000000  في عندي سؤالبشو داهنة الوش بحليب ولا بيض

32  الكاتب قهوه مُره, on 11-04-2009 21:39 سلام منى ...كيف حالك...كيفكم ياأخوات..أتمنى أن تكونوا كلكم بخير وصحه  منى ..ممكن تعطيني بعض الحشوات يلي ممكن أحشي فيها هالعجينه ..ومشكوره كتير عزيزتي

33  الكاتب منى, on 13-04-2009 06:53 هلا عبورة   داهنة الوج بشوية حليب مع نسكافييه و هي فكرة من حورية المطبخ على فتافيت

34  الكاتب منى, on 13-04-2009 06:55 هلا رنونة   كلك زووء حبيبتي , ان شاء الله يعجبك الفطور

35  الكاتب منى, on 13-04-2009 06:59 هلا قهوة   انا بحشيها بجبنة لحالها و ممكن جبنة و بقدونس او جبنة و نعناع أو جبنة و نعناع يابس مع فليلفة حرّة , احيانا خلطة مناقيش الفليلفة و احيانا زعتر مع زيت زيتون و دبس رمان و ممكن جبنة كيري أو حلوم و كمان ممكن شوكولا و كتير بيطلعوا طيبين لمن بحشيهم بزيتون و فليلفة مفرومة مع دبس رمان و رشة زعتر اخضر و كمون , يممم

36  الكاتب نهى, on 13-04-2009 08:52 هلا منى  ياتري ممكن استبدل اللبن البودرة بشئ ولا؟؟   كمان ياريت اعرف ازاى لفتيها زى الكرواسون ولا ازاى؟؟

37  الكاتب منى, on 15-04-2009 12:41 هلا نهى   الصراحة هيك الوصفة بدها , ما فيك تستبدليها بشي ,     اللف متل الكروسان تقطعي العجينة كرات كبيرة شوية و ترقيها و بعدها تقطعي الدائرة لمثلثات متل البيتزا , تحشي اول طرف و تدوريها     ان شاء الله اذا صح الي رح صور الوصفة و تحضيرها و نزلها

38  الكاتب حنان, on 18-04-2009 06:38

39  الكاتب منى, on 18-04-2009 11:37

41  الكاتب منى, on 21-04-2009 11:33 اتذكرتي يومتها نوارة ما بقى ااقوم من ادام كروسانات الفليلفة , يمممم   يلا انحفي و جربيهم و ان شاء الله محمد رح يدعيلي و لاية و ماما كمان

42  الكاتب بشرى, on 23-05-2009 22:33 الله يسلم إيديكي يا منوشة وإيدين الوالدة ويخليلك ياها ويحميا من كل شر ومكروه .. خلال هالسنة صار جربت 4 عجائن وكلون ما كانو يزبطو معي بس هي ما شاء الله حولها .. مقاديرا مزبوطة مليون بالمية ولا بتحتاجي أي إضافة .. ماشاء الله حولك وحول آية ومامتك .. يسلم إيديكن جربتها اليوم وطلعت ممتازة ورائعة وخيلة ..

43  الكاتب منى, on 24-05-2009 08:00 الف الف هنا و عافية بشورة , ربي يخليك احبابك و الغوالي عليك   كتير انبسطت انك جربتيها و عجبتك , هنا يا رب

45  الكاتب منى, on 27-01-2011 23:04 ان شاء الله بتجربيها و تطلع متل ما بتحبي

46  الكاتب رغد غسان علاء الدين, on 22-02-2011 23:44 النتيجة خطيرة..وسميتها أسلحة الدمار الشامل..فظيعــــــــة طلعت..وبصراحة منمون ولا تزعلي مني..يعني هالوصفة أزبط للكروسان..عنجد عنجد هديك حسيتها عقاب..عذاب..

47  الكاتب منى, on 23-02-2011 11:08 لا رغود كل شي و اله شي , يعني هي الواحد بيعملها كل يوم , هديك شغل محلات احترافية و فن و بس ما الواحد جربها اول مرة رح يعرف انه مو كل هل الاد صعبة , بس بدها وقت

49  الكاتب منى, on 26-06-2011 12:47 تسلميلي حنان , شكرا لسؤالك     الوضع الامني عنا منيح ......    لا ما فيك , اذا عندك استعملي البودر و اذا مو متوفر استبداي المي بالحليب , مع ان الحليب البودرة رح تعطيها طعم طيب

51  الكاتب منى, on 23-07-2011 00:49 هلا حبيبتي   اي بستخدمه و هو بيساوي 125 غ طحين لكل كوب من دون ضغط

52  رااااائعة الكاتب imabeer77, on 27-07-2011 04:42 يسلم ايدك ويجزيك كل خير يا منمن  اليوم جربتها واستخدمت نصف المقادير  ودعينالك انا وجارتنا الله يجزيك الخير  طلعت على كيف كيفك   انادهنتها بزيت الزيتون وحطيت عليها زعتر  ودهنت اطرافها باللبن لحتى يحمر لونها  ان شاء الله رح تكون هاي العجينة هي المعتمدة دائما عندي

53  الكاتب منى, on 28-07-2011 11:26 صحتين و الف الف هنا حبيبتي على قلبك و قلب جارتك , حلوة فكرة اللبن , يممي     منورة

55  الكاتب منى, on 13-08-2011 22:39 بتضيفي مي لحتى تصير طرية و ناعمة و بتعجني شوي , بعد شي 5 دقايق عجن بتحسيها اتماسكت و ممكن تزيدي شوية مي بس لازم تبقى طرية و ناعمة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved