L2ma.com | لقمة طيبة | L2ma.com | لقمة طيبة | الكبة اللبنية | الكبة, على, حتى, · , اللحمة | L2ma.com

القائمة الرئيسية

الأكثر تصفحاً

الكبة اللبنية

الكاتب/ منى

06/09/2007

الكبة اللبنية : أكلتي المفضلة من ألذ وصفات المطبخ السوري , حاولت أن أضع هنا الطريقة بأدق التفاصيل لمن لا يعرف الوصفة و سأضيف خطوات مصورة لتحضير الكبة قريباًَ ان شاء الله

- مقادير الكبة :

ربع كيلو برغل أسمر الخاص بالكبة ( من النوع الناعم )
ربع كيلو لحمة هبرة
بصلة صغيرة مقشرة و مقطعة أرباع
ملح , بهار

- مقادير الحشوة :
نصف كيلو لحمة مفرومة
جوز مقطع ناعماً
نصف ملعقة صغيرة بهار
رشة قرفة و ملح
سمنة أو زيت

- مقادير اللبنية :
2 ليتر لبن غنم
3 – 4 ملعقة كبيرة رز مسلوق
بيضتان
نصف ملعقة صغيرة نعناع يابس مطحون
1 - 2 فص ثوم
نصف كيلو لحمة مقطعة لمكعبات متوسطة الحجم

direction

·          يطلب من اللحام أن يدق اللحمة حتى تصبح ناعمة مثل المرهم و يجب تكون اللحمة خالية من الدهن تماماً .

·          ينقع البرغل بالماء البارد مع الملح مدة 10 إلى 15 دقيقة ثم يصفى جيداً و يطحن على ى ماكينة فرم اللحمة مع البصلة ثلاث مرات .

·          تبلل اليد بالماء البارد ثم يدعك البرغل باليد أو على العجانة الكهربائية قليلاً ثم تضاف اللحمة الهبرة و تدعك الكبة حتى الحصول على عجينة متماسكة و طرية و دبقة قليلاً .

·          تقلى اللحمة في مقلاة تيفال بالقليل من السمنة أو الزيت , تتبل بالملح والبهارات و تقلب حتى يجف مرقها تماماً و تنضج اللحمة ثم ترفع الحشوة عن النار و يضاف الجوز , أصبحت الحشوة جاهزة .

·          تقطع عجينة الكبة إلى كرات أصغر بقليل من حجم حبة الجوز ثم ترق كل كرة باستخدام الإصبع حتى الحصول على تجويف صغير , تحشى قطع الكبة بالحشوة ثم تسد , و تبلل اليد بالماء البارد في هذه المرحلة .

·          تصف القطع على صينية مغطاة بكيس نايلون كي لا تلتصق القطع بالصينية و يسهل رفعها .

·          يوضع لتران أو ثلاثة من الماء على نار متوسطة و يملح و بعد إن يغلي يوضع فيه بضعة أقراص من الكبة المجهزة و تترك لتسلق مدة 5 دقائق تقريباً , لا تسلق أقراص الكبة لمدة أطول و لا توضع كمية كبيرة من أقراص الكبة في كل مرة كي لا تتفتت الكبة , ترفع الأقراص على مصفاة .

·          تقلى اللحمة بالقليل من السمنة حتى تشقر من كل الأطراف و يجف مرقها , تغمر بالماء و تبل بالبهار ثم تترك حتى تنضج ثم ترفع من المرق .

·          يوضع اللبن مع الرز و البيض في خلاط العصير و يمزج الكل حتى يطحن الرز ثم يوضع اللبن على نار متوسطة و يتبل بالنعناع و الثوم و يحرك , سيبدأ مزيج اللبن بالسمك   .

·          أخيراً تضاف أقراص الكبة الجاهزة و اللحمة المسلوقة و تترك اللبنية تغلي على نار هادئة مدة عشر دقائق مع التقليب بلطف كي لا يعلق اللبن في الطنجرة و تقدم اللبنية مع النعناع الطازج و الفجل المقطع و بالصحة و العافية .

أسئلة شائعة :

اللبن فرط معي :

إذا لم يمزج اللبن مع البيضة سيتكتل اللبن و يفرط , و إذا لم يحرك اللبن باستمرار فممكن يعلق في الطنجرة .
بالنسبة لي كنت أضيف ملعقة من النشاء ثم جربت استبدال البيضة بالنشا فكانت النتيجة أفضل بكثير لأنها أسهل و لا تجعل اللبنية سميكة كثيراً .

الكبة فرطت ؟

في عدة أسباب لتفتت الكبة , يجب أن لا تكون كمية اللحمة الهبرة أقل من البرغل بكثير فلكل ربع كيلو برغل إما ربع كيلو هبرة أو 200 غ حسب الذوق , و يجب دعك البرغل مع الهبرة بشكل جيد حتى تتكون عجينة دبقة .و السبب الثاني أن يكون الماء الذي سلقت فيه أقراص الكبة لم يصل لدرجة الغليان أو من دون ملح , و يجب أن تسلق الكبة على مراحل من دون تكثير كمية الأقراص في كل مرة و لا تترك الأقراص لتسلق أكثر من خمس دقائق .

ممكن تفريز قطع الكبة و استخدمها عند اللزوم ؟

أكيد ممكن تفرز أقراص الكبة , توضع أقراص الكبة في صينية مغطاة بكيس نايلون بحيث لا تلتصق الأقراص ببعضها و توضع الصينية في الفريزر و بعد أن تجمد القطع تماماً توضع بكيس و تحفظ حتى وقت الإستخدام .
عند الاستخدام , تذوب ملعقتان أو ثلاثة من الكورن فلاور في ماء السلق مع الملح و بعد أن يغلي الماء تضاف بضعة أقراص من الكبة المجمدة من دون أن يترك الثلج حتى يذوب عنها , يعني من الفريزر للسلق فوراً و تترك الأقراص لمدة كم دقيقة حتى تنضج ثم ترفع على مصفاة و تستخدم .

أضافة إلى المفضلة (3) |

أقتباس | مشاهدات : 7240

تعليقات (25)

1 الكاتب بدور, on 08-09-2007 18:05
يعني ما شاء الله عليكي ما بتتركي مجال للسؤال أبدا كلشي ممكن الواحد يسألو خطرلك

الله يعطيكي ألف عافية أنا كتير بحب هالنوع من الكبة كمان

2 الكاتب منى, on 10-09-2007 19:22
هدا نوعي المفضل

كتير كتير بحبها , و باكلها باردة و ساخنة و بضل بنقنق من البراد لحتى تخلص :zzz

هلا بدور

3 الكاتب بدور, on 12-09-2007 16:45
لك صحة و هنا عألبك يا رب و أنا من صغري ربيت عليها هيك بتئلي ماما.

بتعرفي الحلبية روح ألبون يسمنوا اولادون و هنن صغار مشان هيك كانت تطعميني ياها كتير و من وئتا نفسدت أخلائي عليها :zzz

4 الكاتب منى, on 12-09-2007 16:59
كمان صحتين و هنا يا رب على قلبك

و كل سنة و انت بالف خير و ينعاد علك و علينا و على المسلمين كلهم و هم بأمان يا رب

انتظر برنامجك بدور

5 الكاتب arwen, on 29-10-2007 11:30
هلق مابتنطبخ بالزبادي؟
لانو عندي مومتوفر الا زبادي
فكيف ممكن اعملها ؟ :sigh

6 الكاتب منى, on 29-10-2007 12:53
ممكن تنطبخ بالزبادي ..
بتحطي مع كل كيلو من الزبادي ( ما بعرف قديه وزن العلبة :roll

) بتحطي معه ملعقة كبيرة نشا و بتخفقيهم على البارد كتير منيح و بعدها بتحطيه على النار وبس ما غلي بتحطي معه شوية مرق لحتى تصير بالسماكة المطلوبة, بس استعملي مرق حقيقي مو ماجي و إذا ما عندك اضيفي ماء عادي

أي سؤال تاني أنا تحت أمرك

7 الكاتب arwen, on 30-10-2007 09:44
هلق تقبريني لو تقلت عليكي بس منشان تطلع المقادير مظبوطة...
كيلو زبادي مع هالمقادير ولا بدها اكتر؟ :roll

8 الكاتب منى, on 30-10-2007 11:59
لأ اختي مقادير هل الكبة بيلزمها كيلين أو ليترين من الزبادي

9 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 29-12-2008 16:40
يييي يا منى تسلم ايدك على وصفة كبة اللبن كنت بدي اعملها من زمان بس ماكنت متأكدة من المقادير وبس شفتها قررت ان شاءالله اعملها ويارب تطلع زاكيه مثل الصورة

10 الكاتب منى, on 31-12-2008 10:28
ان شاء الله تعمليها و تعجبك , هي نوع نفضل عند كل عيلتي :zzz

ان شاء الله بتطلع متل الصورة و اطيب

11 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 01-01-2009 06:53
تسلم ايديك يا منى جربتها وطلعت رائعة واولادي كثير انبسطوا عليها خاصة انهم كانوا عم يطلبوها مني بس انا ماحشيتها بصراحة كسلت بس المرة الجاي ان شاءالله راح احشيها واكيد راح تطلع طبعا اطيب

12 الكاتب منى, on 01-01-2009 10:36
هنا و الف الف عافية يا رب على قلبك و قلب القطط الحلوة و الصغيرة , كتير انبسطت انها عجبتكم و لما رح تحشيها اسا بتطلع نغم غير شكل

13 الكاتب gsm, on 12-09-2009 22:22
بكرا يا منونة رح اعمل الكبة بلبنية بس من غير كبة :grin

والله لأنو ما عندي ماكينة كبة مو كسل يعني :sigh

بس بدي اطبخ جنبها برغل يعني على أساس هو من مشتقات الكبة :grin

ببقى بخبرك على النتائج بكرا سلام يا حلو بوسيلي القطاط امانة

14 الكاتب منى, on 15-09-2009 09:37
ممم , بيصير كمان تقدميها مع البرغل عوض الكبة , و كله مع العافية طيب

هي كريم بحضني و بوسته , تبوسك العافية يا رب , الله يخليلك كل الغوالي على قلبك و يكونوا متل ما بدك و احسن

عم استنى رايك

15 سؤال صعب هاها
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-12-2009 15:54
ما هي أفضل أقسام الذبيحه لاستخدامها في عمل الكبه، وهل فرم اللحمه بنفس طريقة الهامبرغر مناسبه للكبه؟؟ بصراحة أنا أعيش في بلد أجنبي ولا أعرف كيف أختار اللحمه المناسبه للكبه، لذلك أقترح عليكي وضع ارشادات عن أقسام الذبيحه وما هي الأكلات التي تستخدم فيهاوعندها بإمكاني ترجمتها والاستفاده منها، وشكرا.

16 الكاتب منى, on 22-01-2010 17:18
هلا قمر

سؤال صعب , صح لاني ما عندي خبرة باجزاء الذبيحة ابدا , النوع المناسب هو الخالي من الدهن تماماً و هو مختلف اكيد عن النوع المناسب للهمبرغر , سواء بنوعية اللحمة أو بطريقة الفرم .
بما انك ببلد اجنبي , ممكن تجيبي اللحم الهبر و تحطيه بالخلاط مع شوية تاج و تخلطي حتى تحصلي على مرهم و هادا الي تستعمليه للكبة و كمان للمرتديلا الحلبية

17 الكاتب farah, on 17-05-2010 22:34
سبحان الله يا منون طريقتكم بالكبة لبنية بتختلف كتير عن طريقتنا أهل الشام قصدي دمشق يعني نحنا بنحط لللبن رز ونشا يعن يللتر اللبن نصف كوب شاي رز مسلوق ونصف كوب نشا والكبة ما بنسلقها بالماء بنحشها نفس حشوتكم بس بنضيف الدهنة الناعمة والبصلة المفرومة معها وطبعا بس اللحمة والبصلة بتكون مقلاية والدهنة والبصلة التانية بتكون نية وبعد عملية حشو الكبة بنمرر سيخ بالكبة قبل اسقاطها باللبن المشوي وهو يغلي حتى تشرب الكبة اللبن وتنضج داخل اللبن
واذا بدك أهل الشام المعتقين ما بيرضوا يحطوا فيها لحمة بيقولو هي اصولها دهنة وبصلة وجوز :roll

بس انا بلاقيها باللحمة والدهنة سوا اطيب واخف
يا ستي سلم دياتك انا كتير وصفات بلاقيها مختلفة عن اللي بعرفها بس اليوم حبيت اتركلك تعليق

18 الكاتب خولة, on 03-06-2010 04:33
أختي منى .. ألف شكر لك على الوصفات الطيبة وأنا متابعة لك من زمان وربي يعلم حبي لسوريا وأهلها الكرام

عندي سؤال بالنسبة للكبة اللبنية، ينفع أقلي الكبة قلي خفيف بهالوصفة بدل السلق؟

لاتضحكي علي أنا أعشق الأكل الشامي بس لساتني أتعلم

19 الكاتب منى, on 03-06-2010 20:00
هلا فروحة

يا ستي على راسي الشام و اهلها , انا اتعلمتها بالطريقة الشامية بس ما طاوعني قلبي احشيها بالدهنة , لان قلبي ضعيف و ما بيلقى :grin

نحنا عنا في كتير ما بيسلقوها , انا بحسها هيك اطيب , بس كمان كتير طيبة لمن بتنضاف على اللبن فوراً :zzz

الف شكر الك لاغناء الوصفة و كل الوصفات و اتمنى ان تشاركي بوصفاتك الشامية الاصيلة لان نفسك كتير بحسه طيب

20 الكاتب منى, on 03-06-2010 20:10
هلا فيك اختي خولة

منورة الموقع و بتنوري سوريا يا مزوءة , بيتك دوما :zzz

الله يسامحك , معقولة اضحك :roll

نحنا بحلب ما منقليها ابدا , هيك اصولها و هيك بتطلع بتجنن , بس ممكن فورا تضيفيها على اللبن اذا بتحبي

21 الكاتب خولة, on 04-06-2010 05:06
أهلين منى
عملتها اليوم وكانت طيبة كثير ..
بس بقلك اختراعي فيها :grin

قمت شويت الكبة بالفرن شوي خفيف والحمدلله إني ماقليتها كان صارت دسمة

بس ما كان عندي لبن فاستخدمت زبادي وصار الطعم فيه لسعة حموضة خفيفة.. هيك صح ولا ماالمفروض يكون فيه طعم حموضة؟ :roll

حاسه إتي ألفّت وصفة جديدة

22 الكاتب منى, on 04-06-2010 09:07
هلا خولة

اللبن هو الزبادي , مو هيك :roll

بس نحنا منستعمل لبن الغنم و هو مو متوفر عندكم , اكيد الزبادي بينفع و حتى في من رفقاتي الي بالخليج بيضيفوا عصير ليمون شوي لحتى يطلع الطعم متل ما بيحبوا .

الوصفة اصولها فيها حمض بس خفييييييف , و اكيد الكبة ما بدها شوي

الف هنا و صحة يا رب , مطرح ما سرى مرى خولة

23 الكاتب r0sa_rimi2, on 18-05-2011 17:20
أنا نباتية جدا يعني ما باكل لحمة ولا دجاج ولا سمك من خمس وعشرين سنة يعني من وانا عمري خمس سنين المهم وانا كتير بشتهيها للكبة اللبنية كتير كتير قمت اخترعت كبة بلبنية نباتية استبدلت اللحمة بالطحين والبطاطا والحشوة بالصنوبر والبهار والحمص طلعت شي فاخر ومرتبة وكمان شغلة انا بحط للبن توم وكزبرة حتى تزيد حموضتو لاني بحبو حامض بالمناسبة اللبن ما بحب ابدا اروبو ببيضة بحسها مزنخة فانا بستعمل شوية نشا وبيطلع معي اللبن متل الكريما

24 الكاتب منى, on 19-05-2011 07:32
انا مو نباتية بس بقدر كتير الاكل النباتي و بحبه كتير لهيك وصفتك خرطت مشطي جدا

و ان شاء الله بجربها بااقرب وقت

شكرا كتير للاضافة و منورة الموقع اختي و اتمنى اذا عندك ملاحظات على ايا وصفة تكتبيها و بكون ممنوتك

25 الكاتب r0sa_rimi2, on 20-05-2011 18:01
بس قبل لا تجربيها عندي كم نصيحة زغيرة ولو اني مستحية منك كون عندك خبرة وست بيت اكتر مني اول هام هو انو تنقعي البرغل بمي سخنة نار انا بالعادة بغلي مي وبسكبها فوق البرغل وبصفيها منو وبغطيها وبتركها شي ابو ربع ساعة تاني هام لا تكتري كتيييييييييير طحين حتى ما يغلب طعم الطحين عل البرغل السر بنقع البرغل بمي سخنة انو عند فركو حيصير زي العجينة تمام التمام واللبن دوريه عل النار زي ما هو بس بالاول دوبيي بفنجان شاي زضير معلقتين نشا زغار ورشة ملح وزيديهم فوق اللبن بس هل القد مي فنجان شاي زغير واللبن وبس وحركيه حركيه لين ما يغتلي اول ما يغلي بسرعة نزلي الكبة
تالت هام اوعا تقلي الكبة بنزلها مباشرة عل اللبن من دون قلي لانو احتمال تفرط وشو كمان مممم الكزبرة والتوم اكيد بنزلها مع الكبة ليغلو مع بعض وياخدو نكهة بعض وسبق وقلت بمشاركة بعتلك ياها انو عندي لسه وصفات كتيييييييييييييييرة نفسي ابعتلك ياها لو بتأذنيلي

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 19/01/2009 )

< السابق		التالى >

[ عودة ]