L2ma.com | لقمة طيبة | L2ma.com | لقمة طيبة | الكبة المبرومة | الكبة, · , على, حتى, الحشوة | L2ma.com

القائمة الرئيسية

الأكثر تصفحاً

الكبة المبرومة

الكاتب/ منى

06/09/2007

حين دخلت لعالم النت منذ بضع سنوات , اشتركت في منتدى لك و شاركت بوصفة الكبة المبرومة و كانت الوصفة جديدة على كل من سمع بها في المنتدى ..

بعد بضعة أيام من إنزال الوصفة أجريت بحثاً في الجوجل عن الكبة المبرومة و أظهر لي نتيجة واحدة فقط هي موضوعي ..

الآن عند إجراء البحث بنفس الكلمات , ستجدين وصفتي في كل منتدى تقريباً .. .. من دون ذكر المصدر على الأغلب , مع سرقة الصور في بعض الأحيان , باستثناء البعض ..

الوصفة نفسها تقريباً إلا أنني أضفت بعض التفاصيل الصغيرة التي أحب أن أخص بها زوار موقعي ..

الوصفة مشهورة جدا في مدينة حلب و هي تقدم في المطاعم و قليل من ستات البيوت تعرف و تتقن طريقتها ...

بالصحة و الهنا

مقادير الكبة :

5 كوب برغل أسمر ناعم
كيلو لحمة هبرة عجل مدقوقة للكبة
2 بصلة صغيرة مقطعة أرباع
ملعقة صغيرة ملح
ملعقة صغيرة بهارات مشكلة

مقادير الحشوة :

ملعقة كبيرة سمنة
نصف كيلو لحم غنم مفروم ناعماً
نصف كيلو لحم غنم مفروم خشناً
فستق حلبي ( كمية كبيرة )
ملح
بهار مشكل
رشة صغيرة قرفة

للوجه :

4 – 5 ملعقة كبيرة سمنة ( و يفضل استعمال مزيج من السمن العادي و السمن البلدي )
direction

تحضير العجينة :

· يغسل البرغل ثم ينقع بالماء البارد مع البصل لمدة ربع ساعة تقريباً , يصفى بعدها من الماء تماماً و يكبس باليد للتخلص من الماء الزائد .

ينقع البرغل و البصل بالماء البارد لمدة ربع ساعة

· يطحن البرغل المنقوع مع البصلة على ماكينة فرم اللحمة ثلاثة مرات .

يفرم البرغل و البصل على ماكينة فرم اللحمة ثلاث مرات

· يوضع البرغل المطحون و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .

· تدعك الكبة و الهبرة و البهارات لمدة 10 دقائق على الأقل و يفضل أكثر و هذه الخطوة يسهى عنها كثير من من يعد الكبة و هي خطوة مهمة جداً , و يضاف القليل من الماء إذا دعت الحاجة حتى الحصول على عجينة رطبة و طرية و متماسكة, أصبحت عجينة الكبة جاهزة .

تدعك الهبرة مع البرغل جيداً و كلما دعكت الكبة أكثر كانت النتيجة أفضل

تحضير الحشوة :

·          يقلي اللحم المفروم خشن بالسمنة و يفكك بملعقة خشبية ثم يتبل بالملح والبهارات و يترك على النار مع التقليب حتى ينضج و يجف مرق اللحمة تماماً ثم ترفع اللحمة عن النار .

·          يحمص الفستق الحلبي بالفرن أو على الميكروويف حتى تظهر رائحته الجميلة من دون أن يتحمص بشكل زائد .

·          يخلط اللحم الني و المقلي و الفستق جيداً حتى الحصول على عجينة متجانسة , يجب استعمال كمية أكبر من الظاهر بالصورة و لكن أولادي ما بيحبوا الفستق لذا لم أستخدم كمية كبيرة   , أصبحت الحشوة جاهزة .

تخلط اللحمة النية و اللحمة المقلية مع كميية كبيرة من الفستق الحلبي

تطبيق الوصفة :

· تدهن صينية فرن بالسمنة .

· يفرد قسم من عجينة الكبة على ورق نايلون مبلل بالماء على شكل مستطيل متوسط الحجم بسماكة نصف أو ثلات أرباع سنتيمتر تقريباً .

تفرد العجينة على ورق نايلون مبلول بالماء

· يوضع قس من الحشوة في منتصف المستطيل .

· يلف النايلون من أحد الأطراف فتلتف معها الكبة حتى تغطي الحشوة .

تلف الكبة فوق الحشوة بمساعدة ورق النايلون ثم تسد الأطراف جيداً

·          يملس السطح باليد المبلولة بالماء و تسد الأطراف بعجينة الكبة و تنقل بحذر للصينية المدهونة بالسمنة .

·          بهذه الطريقة حضرنا أول أسطوانة , تكرر العملية حتى تنتهي كل الكبة و الحشوة , و تصف الأسطوانة الثانية ثم الثالثة مع ترك مسافة بين الاسطوانات كي لا تلتصق الاسطوانات ببعضها البعض .

·          يبلل طرف سكين غير حاد بالماء ثم ترسم خطوط مائلة على وجه الكبة المبرومة لتحدد حجم القطع بحيث تغرز السكينة بشكل لطيف في الكبة .

باستخدام الطرف الغير حاد للسكينة يحدد وجه الاسطوانات

·          يحمى الفرن على درجة حرارة 180 مئوية , تذوب السمنة على نار هادئة ثم يدهن وجه الكبة بالسمنة و توضع في الفرن, و تسقى الكبة من وقت لأخر بالسمنة حتى لا يجف وجهها و تترك حتى تنضج , تحتاج تقريباً لمدة نصف ساعة .

·          بعد أن تبرد الكبة قليلاً تقطع في نفس مكان التحديد .

·          ترتب قطع الكبة في صحن التقديم و تزين حسب الذوق و تقدم مع السلطة أو الفتوش أو اللبن .

سر الوصفة :

·          عند إعداد الحشوة استخدامنا نوعين من اللحمة حتى تبقى الحشوة متماسكة أثناء تقطيع الكبة بعد نضجها .

·          قبل تقطيع الكبة يجب أن تترك لتبرد قليلاً كي لا تتفتت أثناء التقطيع .

أضافة إلى المفضلة (2) |

أقتباس | مشاهدات : 9075

تعليقات (31)

1 الكاتب linda, on 06-09-2007 20:06
:zzz

يا سلام يا منى
الله يعطيكي الصحة والعافية
كتير منظرها حلو
انا ولا مرة دايئتها و لا حتى شايفتها بس بسمع فيها سمع

2 الكاتب منى, on 07-09-2007 11:33
الله يسلمك ليندا العسل

أنا هل الكبة نوعي المفضل مع الكبة اللبنية ..

و كل ما بيكون عندي جمعة لرفقاتي أو رفقات زوجي بساويها و الكل بيقول لي كتير ناجحة معي

إذا جربتيها أكيد رح تحبيها

3 الكاتب ام نور, on 07-09-2007 14:22
عنجد شي ظريف كتير سلم دياتك اخت منى اسا في شي نوع كبة مشهورين فيها اهل حلب ولا هول هني ما شالله شي روعة

4 الكاتب ام نور, on 07-09-2007 14:24
شكلها مع الفستق حلبي بتشبة المبرومة نحن منسميها نوع من انواع الحلويات بقلب فستق وملفوف بشعيرية

5 الكاتب منى, on 08-09-2007 07:06
هلا اختي ام نور

في لسا انواع كتير , بس هدول هم أشهر الأنواع تقريباً :roll

بس انا رح حاول نزل كل الوصفات إذا الله راد

هدا الحلو كمان بيحضروه عنا و بيتسمى المبرومة ..

كنت فاكرة ان اسمه برما في لبنان

أختي جربي الكبة و ادعيلي

6 الكاتب ام نور, on 10-09-2007 09:19
صح ناس بيسموها برما وناس مبرومة كتير طيبة بس شغلا صعب كنت شوف البابا لما يشتغل فيها . وبالنسبة لا الكبة شي بيشهي وبيستاهل التجربة الصراحة بس صرت محتارة شو جرب

7 الكاتب منى, on 10-09-2007 13:02
الله يجبر بخاطرك ام نور يا رب

كلك زووء , و ان شاء الله تجربي الوصفة و تكون على زوءك

8 الكاتب أم عباده, on 15-01-2008 01:44
أختي منى بدي أطلب منك طلب صغير إذا ممكن
بدي لو سمحتي تنزلينا المعجوقه لانو لما بناكلها بالمطاعم من حبها كتير ومرةطلبت من شف المطعم المقادير بس ماطلعت تمام :cry

9 الكاتب منى, on 15-01-2008 12:26
هلا حبيبتي ام عبادة

من عيوني بس يا ترى قصدك أيا نوع , المعجوقة بحلب هي لحمة محشية بالجبنة و الفطر أما المعجوقة بالشام فهي نوع حلو :roll

10 الكاتب أم عباده, on 15-01-2008 21:34
تسلم عيونك أختي
لا بقصد المعجوقه الحلبية المحشيه جوز وفطر واللذي منو
وبيعتبروها نوع كبه مع انو على ما بعرف مافيها برغل
والف شكر عم نعذبك معنا

11 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-02-2008 07:31
هالكبه مره شفتها في موقع بالانترنت بس الصور ما كانت واضحه وما كنت مستوعبه شلون تكون الكبه ملفوفه

شكلها جدا حلو.. بس اشعر شغلها صعب.. خاصه اني ما اعمل الكبه الا برمضان فيدي مو متعوده على فرد الكبه

بجرب بيوم من الايام اعملها ان شاء الله

12 الكاتب منى, on 09-02-2008 19:29
و الله اختي انا هل الكبة من أسهل الانواع علي و صدقيني مو صعبة و لا بدها شطارة

يا ريت تجربيها عن جد ما رح تندمي أبدا

13 الكاتب رندوش, on 15-04-2008 13:43
عزيزتي منى سلم الديات عزيزتي
كل اطباقك شهيه ومشجعه للتطبيق
وانا كنت طبقتها للكبه المبرومه
وطلعت بتشهي وصدقيني كل العائله بتسأل وبدعيلك
تسلم الايادي

14 الكاتب منى, on 15-04-2008 17:12
الله يسلمك رندوشة حبيبتي , و ان شاء الله هنا و صحة على قلبك و قلب كل العيلة الحلوة , و يا ريي الك متل هل الدعوات و أكتر

15 الكاتب Eman, on 03-08-2008 03:25
السلام عليكم ورحمة الله وبركاته،
أنا عملت الكبة وضبطت معي ، بس المشكلة صارت وقت حطيتها بالفرن ، أنا كنت مفرزتها ودخلتها الفرن ولسه التلج عليها ، وتأخرت لحتى استوت ،فاضريت قطعها ورجعها للفرن ،فاستوت أكتر ونشفت، وبقيت أحطلها سمنة حتى ما تنشف لبين ما خلصت العلبة ،فصرت أحط زبدة :upset

، كتير انقهت لأنه صار هيك معي يوم العزيمة..
يا ريت تنصيحيني كيف أعملها إذا مفرزة..

16 الكاتب منى, on 03-08-2008 07:15
ولي على قلبي , يلا معلش خيرها بغيرها

لما بتفرزي الكبة بتطالعيهاو بتحطيها فورا على صينية مدهونةو بالفرن الحامي على طول و بتسقيها بالسمنة بس من دون تقطيع ..كان أخذت سمنة أأقل بكتير :cry

على كل انا ما كتير بحب حط الكبة بالفريزر , بحسها بتنفش الحبة و ما بتبقى متل التازة ابدا ..

يلا خيرها بغيرها و انا هلا اكلت هم العزيمة

17 يممممممممممممممممممم
الكاتب الدمشقية, on 14-10-2008 12:40
تسلم ايدك يا منى فعلاً منظرها بياخد العقل
إن شاء الله شي يوم بجربها
نحن منعمل كل أنواع الكبة بس الحقيقة هي من زمان جاي على بالي ساويها وصورتك عنها شجعتني اكتر :zzz

18 الكاتب منى, on 15-10-2008 04:19
مية هلا فيك اختي

لسا الصور هي صور قديمة و من موبايل , لو تشوفي صور منيحة الها رح تجربيها فوراً :zzz

مستاهلة كتير و الله

19 الكاتب souha, on 29-11-2008 20:54
هلا منى

تسلم دياتك أنا و لا مرة ساويت كبة لحالي دايما مهمتي هي مساعدة ماما و تنظيف المطبخ و المهمة الأحلى هي إني أكل الكبة
هلأ سؤالين

1-قصدك بلحمةغنم مفرومة ناعم بالحشوة هبرة؟
2-الصورة و إنت عم تلفي مستطيل الكبة مو واضحة كتير ما عم استوعب كيف بدو يقفل الممستطيل على بعضو :upset

20 الكاتب منى, on 30-11-2008 06:53
هلا سهى

انا كنت متلك بس بعدها صرت اعملها لحالي , هي بدها شغل بس بعدها مستاهلة , هلا انا صرت الخبير الفني بعيلتي لتحضير المبرومة :grin

بقصد باللحمة المفرومة خشن لحمة ايما و اللحمة المفرومة ناعم هي لحمة كباب , انا كتبت هيك لحتى الكل يفهم علي

الصور مو واضحة لان تصوير موبايل , ان شاء الله بس ما اعملها مرةتانية ببقى بصورها بصور كبيرة و بنزلها

21 الكاتب hajar, on 23-10-2009 20:32
يمممممممممممممممممممممممم هي أكلتي المفضلة يسلمو منى

22 الكاتب منى, on 23-10-2009 21:54
الله يسلمك هاجر , ان شاء الله تجربيها و تكون طيبةةةة

23 الكاتب na3oom, on 29-03-2010 05:26
منوش هالكبة بعزها كتير ومن زمان ما اكلتها نفسي أعملها انا شفت خالتي بحلب كانت شاطرة فيها
هلأ أنا مو شاطرة بالكبة أو فيك تعتبريني مبتدئة فيها ونفسي أعمل شي نوع لعزيمة عندي ناوية اعملها الأسبوع الجاي
فأي نوع بتنصحيني أعملها وكيف كريقة شوائها بحيث لما سخنها يوم العزيمة ما تنشف أو تستوي بزيادة

24 الكاتب منى, on 31-03-2010 11:16
هلا نعوم

هلا اسهل نوع هو الكبة بالصينية و فيكي كمان تعتبري هل النوع مو صعب .
ما فيكي تشوي الكبة قبل بيوم لازم تشويها بيوم العزيمة , لان ما بتطلع طيبة الا تازة . فيكي تشويها الساعة 12 مثلاً و ترعي تسخنيها على خفيف بالفرن

لازم تكون عينك عليها لحتى ما تتقمر و اذا عم نحكي عن المبرومة لازم تقلبيها

الله يسر العزيمة عليك

25 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 01-01-2011 14:20
مرحبى منى انا مشتركة جديدة بالموقع واشتركت على ئد ماشفت وصفات بتجنن لئلك حسيت ئنو لازم كون متواصلة معكن - بدي اسئلك بخصوص الكبة المبرومة لانو بصراحة بسمع كتير عنا بحلب وئنا كتييييير طيبي فمشتهية ئنو جربا بس خايفي من موضوع اللحمة النية خايفي ئنو ماتستوي مظبوط وشغلي تانية هلا مابصير ئنو ئطعا ئبل مافوتا عالفرن ؟؟بتصور ئنو هيك بينضمن سوي اللحمة -وشكرا كتير لئلك

26 الكاتب منى, on 01-01-2011 20:44
هلا نورا

لا لا تخافي ابدا من اللحمة لان رح تستوي باذن الله بالمية مية و على ضمانتي :zzz

ايا سؤال تاني من عيوني , و منورة نورا , ان شاء الله تتواصلي معنا دوما

27 الكاتب noura, on 01-01-2011 23:41
شكرا كتير حبيبتي على ردك واهتمامك معلش رح تئل عليكي بسؤوال تاني لئت بطريئتك بالكبة عموما ئنك بديري البرغل 3 مرات لحالو نحنا بحمص منديرو مرة لحالو ومرة مع الهبرة سؤوالي ئني لما بدي ساوي المبرومة ساوي العجينة على طريئتنا ولا اتبع طريئتك بحذافيرا ؟؟؟ وبالنسبي للفستق انتي بالصورة حاطتي حبة كاملي من دون تئطيع صح ؟؟ واااااخر سؤوال هي طعمتا اريبي لاي نوع كبة؟وشكرا كتييييير لئلك

28 الكاتب noura, on 01-01-2011 23:49
نسيت ئلك حبيبتي ئني جربت من وصفاتك كاتو التفاح بالصوص الدهبي طبعا رائع جدا ونكهة جدا راقيةوجربت كيك السفن اب بالليمون وعجينة امي الذهبية هدول التنين زكروني بنكهة ئديمة ئلي زماااان مادئتا خاصة العجينة -وكمان ناوي اعمل اللحم بالعجين ياترى بيطلع اريب ليلي منوصي علي

29 الكاتب منى, on 02-01-2011 11:37
هلا نورا

فيكت تعمليها بطريقتك مو مشكلة , و الفستق بحطه حب بيطلع منظره تحفة وقت التقسيم , اما عن طعمتها فهي مو قريبة على ايا نوع , نكهة خاصة فيها :zzz

الف الف صحة و هنا على كل شي جربتيه ,
اللحم بعجين بيطلع متل الجاهز و انظف و اظمن , بس بده شغل :roll

30 كبة راهب
الكاتب r0sa_rimi2, on 20-05-2011 17:44
عجبتني اكتر انواع الكبب الي هون مع اني نباتية بس بحب اعملها لزوجي ولولادي المهم بس في كبة اتعلمتها من ستي الله يرحمها وهي كبة غالية علي كتير لانو بتذكرني فيها المهم طريقتها سهلة جدا واهم شي ما فيها لحمة وهي عبارة عن برغل وطحين وريحان وبصلة مدقوقة وبهارات الكبة من كمون وفلفل اسود وبهار ابيض ... بنعملهم هيك قراص زغيييييرة بس مش كتير صغيرة زي الشيش برك بنفس الحجم وبعدين بنغلي مي سخنة مملحة وفيها زيت زيتون بس مش كتير يكون في مي حتى تعقد مع قراص الكبة وبننزلهم فيها وبعدين بنزيدتوم مدقوق ولمون يعني حامض ونعنع يابس مع المي وبس تعقد المرقة وتستوي الكبة بنطفي تحتها في ناس بتسمي هاي الكبة برصاص عزرايل بس ما حلو هل الاسم انا بسميها متل ما كانت ستي الله يرحمها تسمهيها كبة الراهب وجربيها وادعيلي واترحمي على ستي

31 الكاتب r0sa_rimi2, on 20-05-2011 17:47
بالمناسبة عندي كتييييييييييييير وصفات عن الكبة وغيرها ممكن اقدر شارككم فيها بس في مشكلة ما بقدر نزل الصور بلاقي الفيسبوك اهين بتحميل الصور يعني ممكن انزلهم هناك وانتو بمعرفتكم تنزلوهم هون واذا بدكم فيكم تنزلو الوصفة كمان وتعدلو عليها لو بدها اي تعديل ممكن؟

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 04/08/2009 )

< السابق		التالى >

[ عودة ]