L2ma.com | لقمة طيبة | L2ma.com | لقمة طيبة | كبة سوار الست | على, · , الكبة, يوضع, حتى | L2ma.com

القائمة الرئيسية

الأكثر تصفحاً

كبة سوار الست

الكاتب/ منى

05/09/2007

من المطبخ السوري و بالتحديد من ألذ الكبب الي تشتهر فيها مدينة حلب و أنا الصراحة ما بعرف سبب التسمية , يمكن من شكلها الي بيشبه السوارة أو يمكن لأن صغيرة و نعومة , الي بعرفه اني بحبها كتير كتير و لمن بتحضرها حماتي الله يخليلنا ياها بترك كل الأكل و بقعد جنبها , صاحبتي هل الكبة .

شكلها حلو كتير و هي سهلة مقارنة بأنواع الكبب الأخرى و نجاحها مضمون ان شاء الله .

بالصحة و الهنا

مقادير الكبة :

2 كوب و نصف برغل أسمر ناعم
نصف كيلو لحم هبرة عجل مدقوقة للكبة
حبة بصلة متوسطة مقشرة و مقطعة أرباع
ملعقة صغيرة ملح
رشة قرفة مطحونة
نصف ملعقة صغيرة بهارات مشكلة

مقادير الحشوة :

ملعقة كبيرة سمنة
كيلو لحمة مفرومة خشن
نصف كوب صنوبر
ملعقة صغيرة بهار
رشة قرفة و ملح

للزينة :

فستق حلبي محمص و مطحون ناعم
direction

تحضير الحشوة :

·          تذوب السمنة على نار متوسطة ثم يحمص الصنوبر بالسمنة حتى يشقر مع مراعاة رفع الصنوبر قبل الوصول لدرجة اللون المطلوب لأنه سيغمق قليلاً بعد رفعه عن النار , يوضع على ورق ماص .

·          تقلي اللحمة بنفس السمنة و تفكك بملعقة خشبية ثم تتبل بالملح والبهارات و تترك على النار مع التقليب حتى تنضج و يجف مرقها تماماً ثم ترفع اللحمة عن النار و يضاف الصنوبر , أصبحت الحشوة جاهزة .

تحضير العجينة :

·          يغسل البرغل ثم ينقع بالماء البارد مع البصلة لمدة ربع ساعة تقريباً , يصفى بعدها من الماء تماماً .

·          يطحن البرغل المنقوع مع البصلة و البهارات على ماكينة فرم اللحمة ثلاثة مرات .

·          يوضع البرغل المطحون و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .

·          تدعك الكبة و الهبرة لمدة 10 دقائق على الأقل و يفضل أكثر و هذه الخطوة يسهى عنها كثير من من يعد الكبة و هي خطوة مهمة جداً , و يضاف القليل من الماء إذا دعت الحاجة حتى الحصول على عجينة رطبة و طرية و متماسكة, أصبحت عجينة الكبة جاهزة .

تحضير الكبة :

·          تدهن صينية كبيرة بالسمنة و يوضع طبق من الماء البارد على طاولة العمل .

·          تقطع العجينة إلى كرات ثم تجوف كل كرة باستخدام الإصبع و ترق و يعمل فيها حفرة ثم تحشى بالحشوة .

·          تقفل الكرة بحيث تحرك بإليد اليمنى و تقفل باليد اليسرى بين السبابة و الإبهام حتى يقفل قرص الكبة تماماً ثم تدور بين راحتي اليد لتأخذ شكل الكرة و تبلل الأيادي بالماء البارد كلما دعت الحاجة ثم تصف الكرات الجاهزة على الصينية المجهزة .

·          بعد تجهيز كل الكرات يضغط على كل كرة بطرف الإصبع لعمل تجويف صغير فيها ثم تخبز الكبة في الفرن المحمى و تسقى بالسمنة عدة مرات اثناء خبزها حتى تشقر و تنضج .

·          بعد أن تبرد الكبة قليلاً توضع في طبق التقديم و يوضع الفستق المبشور في التجويف الذي عمل بطرف اليد و تقدم سااخنة مع السلطات أو اللبن أو المخلل .

أضافة إلى المفضلة (2) |

أقتباس | مشاهدات : 8319

تعليقات (16)

1 الكاتب ام نور, on 05-09-2007 23:24
شو هالكبي اخت منى ما شاء الله عنك شي بيشهي يعني مشتهية جربا.بلا مجاملة انتوا اهل حلب كتير مزوقين بالكبة شي مبرومة وشي سوار.... :grin

كل مرة بتفاجىء بموديل جديد وكلون بدون شغل

2 الكاتب منى, on 06-09-2007 03:36
معك حق , نحنا في عنا كتير كتير أنواع للكبة , ما بيقولوا عن حلب ام المعالي و الرتب و بيت المحاشي و الكبب :grin

ان شاء الله إذا جربتيها رح تعجبك

3 الكاتب بدور, on 06-09-2007 18:49
شكلا مغري كتير

والله جوعتيني :cry

نحنا منعملها كمان بس بتختلف شوي الطريئة و نوع البرغل يلي منستعملو كاشف يعني بيطلع اللون أفتح :roll

ما شاء الله عليكي شئد مزوئة و سفرتك مرتبة يعني المو جوعان من شكل أكلاتك بجوع متلي أنا

4 الكاتب منى, on 07-09-2007 11:47
أنا البرغل الكاشف ما بستعمله إلا للكبة المقلية ..

سبحان الله حتى في المدينة الواحدة بتختلف الطرق

, بس كله طيب أكيد

انت الي مزوءة و كلامك أحلى من العسل

نورتي بدور

5 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 07-02-2008 07:27
ما شاء الله

تسلم ايدك

شكل هالكبه جدا رايق و جديد لاني اول مره اشوفها مع اني اعتبر خبره اكلات بين صحباتي ههههه

بجرب اسويها باول تجمع مع صديقاتي واتفاخر فيها بينهم
يسلمو يا غاليه

6 الكاتب منى, on 09-02-2008 19:18
هلا كوكو

و الله هل الكبة غيرر شكل و رح تخلي طاولتك مميزة , و يلا يا عمي اتفشخري بس لا تنسي تعزميني :grin

7 الكاتب DOUHA, on 07-05-2009 22:07
طيبة بس مافيني اعملا مالي شاطرة بالكبب :sigh

بس حبيت اشكرك على عل الترتيب :zzz

8 الكاتب منى, on 08-05-2009 09:21
هلا ضحى

يا ستي لا تعمليها , ما دامها ماماتك ست الستاتبتحضرها , انت تبقى نيالك متل الحلويين بس تفرمي سلطة و تروبي لبن و تاااكلي :grin

لا تنسي تعزميني , بحبها كتير هل الاكلة و ببقى بجيبمعي مخلل

9 الكاتب nadin09, on 22-04-2010 23:51
how great mona... this is so nice.. i loved it

10 الكاتب منى, on 23-04-2010 11:38
جربتيها

11 الكاتب farah, on 24-04-2010 22:42
شلون هربانة مني هالوصفة؟؟ :zzz

مع اني تقريبا صرت شايفة كل وصفات الموقع بس اليوم اكتشفت هالوصفة يا ستي جديدة بالنسبة الي مية% عجبتني طريقة الشوي بس رعبتني قصة السقي بالسمنة :eek

يا ترى اذا ما سقيناها بتعطش :grin

تسلميلي انتي ووصفاتك ما الذك

12 الكاتب منى, on 25-04-2010 07:21
بتعطش و بتروح كل نضارة وجهها :grin

بقى اذا نويت تجربيها يا اسقيها يا خليها هربانة احسن

13 الكاتب nadin09, on 03-05-2010 15:38
mona pleas I have gest in friday, what do you suggest ? I want to do it like (sahen englizi).. thank you

14 الكاتب منى, on 04-05-2010 07:52
بيتزا سواريه , تبولة , نوع كبة متل سوار الست او كبة مبرومة , صمونة صغيرة محشبة حشوة مكسيكانو او فيلادلفيا , يلنجي , برك بجبنة , خبز صغير كتير فيك تحشيه مرتديلا او سجق .. هادا الي خطر الي

15 الكاتب jenna, on 21-10-2011 18:48
مرحبا منوش أول شي أنا كتير بحبك تاني شي اناسورية وبعرف كتير كبب بس ولا مرة مجربة البرغل الاسمر برايك لهل لكبة بيطلع اطيب من البرغل الفاتح سؤال تاني ما عندي هون بامريكا هبرة بحسن استخدم اللحمة الناعمة العادية شكرا سلفا

16 الكاتب منى, on 22-10-2011 19:59
هلا حبيبتي

منورة الموقع مية هلا فيك

انا بحب البرغل الغامق لكل الكبب , اذا انت متعودة على الفاتح فيكي تستعمليه هون

ما فيكي تستعملي اللحمة الناعمة , بس جيبي لحمة شقف يكون ما فيها دهن و كلها هبر , و حطيها بمحضرة الطعام مع شوية تلج و اخلطي , بتصير عندك اطيب هبرة

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 05/05/2009 )

< السابق		التالى >

[ عودة ]