L2ma.com | لقمة طيبة | L2ma.com | لقمة طيبة | الكبة المقلية | الكبة, · , على, الماء, كبيرة | L2ma.com

القائمة الرئيسية

الكبة المقلية

الكاتب/ منى

01/09/2007

كبة مقلية

من المقبلات اللبنانية و السورية اللذيذة التي لا تخلو منها وليمة في شهر رمضان المبارك ..

عند إعداد عجينة الكبة لا أستعمل اللحمة الهبرة بكميات كبيرة مثل باقي أنواع الكبب مثل الكبة بالصينية أو المبرومة أو اللبنية أو الكبة على السيخ و ذلك كي تبقى الكبة مقرمشة بعد القلي و هذا أول سر في إعداد الكبة المقلية . السر الثاني هو إضافة السميد بمعدل ملعقة كبيرة لكل كوب . السر الثالث هو وضع الكبة في الفريزر لمدة ساعة قبل القلي . السؤ الرابع هو استعمال برغل أبيض و عدم نقعه , أكتشفي بغسله بشكل سريع ثم تصفيته من الماء , أثناء العجن أضيف القليل من الماء البارد إذا لاحظت أن العجينة تحتاج و أخر سر هو طريقة القلي , النار يجب أن تكون متوسطة إلى قوية و أن تقلى بضعة حبات فقط في كل مرة ..

هذه الكمية تعطينا مقدار كبير جداَ من الكبة المقلية لذا يمكن تحضير نصف أو ربع الكمية إذا كانت عائلتك صغيرة

بالصحة و الهنا

مقادير الكبة :

7 كوب برغل أبيض ناعم
ربع كيلو من هبرة لحمة العجل المدقوقة خصوصاً للكبة
بصلة كبيرة مقطعة أرباع
رشة فلفل و ملح
كوب سميد

مقادير الحشوة :

كيلو لحمة غنم مفرومة
5 حبة كبيرة بصل
3 – 4 ملعقة كبيرة زيت
ملح
ملعقة صغيرة بهار مشكل
نصف ملعقة صغيرة قرفة
صنوبر و جوز حسب الرغبة
زيت قلي
direction

تحضير الحشوة :

·          يحمر الصنوبر بالزيت حتى يشقر مع الانتباه لضرورة رفعه من الزيت قبل الوصول للون المطلوب لأنه سيغمق قليلاً بعد رفعه عن النار ثم يوضع على ورق ماص , ينقى الجوز من القشور ثم يفرم .

·          يفرم البصل فرماً ناعماً جداً ثم يقلى بنفس الزيت على نار متوسطة حتى يشقر من دون أن يتغير لونه .

·          تضاف اللحمة و تتبل بالبهارات و تقلى على نار متوسطة و تفكك بالشوكة حتى تنضج و يجف مرقها تماماً .

·          يضاف الصنوبر و الجوز للحشوة , أصبحت الحشوة جاهزة .

تحضير العجينة :

·          يوضع البرغل في مصفاة ناعمة جدا و يغسل بشكل سريع  ثم يصفى جيداً من الماء و يضغط عليه للتخلص من أي ماء اضافي .

·          يفرم البرغل مع البصلة و البهارات على ماكينة فرم اللحمة باستخدام الشفرات المتوسطة مرتان .

·          يوضع البرغل المطحون و البهارات و السميد و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .

·          تدعك الكبة لمدة 10 دقائق أو أكثر و يضاف القليل من الماء إذا دعت الحاجة مع مراعاة عدم الإكثار من الماء كي يسهل تشكي العجينة , تعجن حتى الحصول على عجينة متماسكة, أصبحت عجينة الكبة جاهزة .

تحضير الكبة :

·          تبلل اليدان بالماء البارد , تقسم عجينة الكبة إلى كرات ثم تعمل حفرة في الكرة و ترق بين أصابع اليد .

تقطع العجينة لكرات ثم ترق كل كرة بين أصابع اليد

· تحشى بالحشوة المجهزة و يسد طرفها ثم تمسح الكبة باليد المبللة بالماء البارد ، تبلل اليدان بالقليل من الماء كل فترة و أخرى أثناء تحضير الكبة للمساعدة على سرعة العمل أولا و لمنع تشقق الكبة بعد القلي ثانياً .

يسد طرف الكبة مع تبليل اليدان بالماء البارد

·          توضع الكبة في الفريزر لمدة ساعة تقريباً .

·          يحمى الزيت على نار متوسطة ثم تقلى حبات الكبة كل أربع أو خمس حبات في المرة الواحدة حتى تشقر .

·          تقدم الكبة المقلية ساخنة أو باردة مع المخللات و السلطات .

أضافة إلى المفضلة (6) |

أقتباس | مشاهدات : 12974

تعليقات (73)

1 الكاتب linda, on 02-09-2007 14:53
:sigh

i dont have arabic key board

bs yammmmmmyyyyyyyyyyyyyyyy :zzz

2 الكاتب منى, on 02-09-2007 15:43
Hi linda

it`s v strange 2 talk to u in English

but u r most welcome

I hope u try it & like it

3 الكاتب ام نور, on 02-09-2007 18:00
ما شالله شكلا بيشهي بس الصراحة انا اول مرة بعرف انو ممكن نزيد سميد لا الكبةالمقلية وشو نوع السمميداخت منى ناعم خشن او وسط ولا ما بتفرق؟ انا بعملا عجينة واحدة من البرغل واللحمة وبستعملا للكبةالمقلية او المشوية بس الشكل الذي بتغير وهاك بلبنان منعملا وعطول منحط كل كيلو لحمة مقابل كيلو برغل الا الكبة النية لازم اللحمة تكون اكتر من البرغل وتكون لحم غنم فسبحان الله كل بلد له طريقة بس انشالله رح جرب هالطريقة انا كتير بعمل كبة وشو بعطل هم لان بتاخود وقت وخصوصي مع الاولاد يا لطيف

4 الكاتب منى, on 03-09-2007 10:14
هلا اختي ام نور

و الله أكتر أكلتين بياخدوا وقت هم الكبة و ورق العنب .. بس ما بيصير بلاهم ..
هلأ لما بتعملي الكبة المقلية اللحمة بقد البرغل ما بتطلع معك طرية ؟ :roll

السميد الي بضيفه هو سميد خشن و اذا مو متوفر فيك تديري مع البرغل ...

لا تستغري :eek

لان الطريقة إلي رح قولها مجربة

فيك تضيفي معه رغيف خبز و تديريه مع البرغل و تشوفي كيف القرمشة إلي غير شكل

لحمة الغنم الهبرة بتصير , بس بتعرفي عن تجربة لحم العجل أحسن بيخلي العجينة تساعدك بالشغل

أختي عن فطاير الكشك حابة اسالك , بعد ما نحضر العجينة كيف منحشيها بالحشوة ..
رح يصير شكلها متبل المناقيش ؟

5 الكاتب ام نور, on 03-09-2007 08:30
الله يخليكي انشالله رح جرب هالطريقة انا بعرف ان السميد منيح بس كنت مفكرة بس لا العجين حتى صديقتي المغربية ما بتعمل المسمن المغربي وابو غرير الا بالسميد وانا جربتون العجينة بتطلع روعة ما بتعجن ولا بتلزء وبتحط مع عجينة البيتزا سميد ونشا بتطلع مقرمشة .
بالنسبة لا فطاير الكشك شكلا متل السامبوسك او الهلال لازم تكون مسكرة على جنب وحجمها اكبر من السامبوك بتلات مرات لانها من الفطائر ما منعملا صغيرة

6 الكاتب منى, on 03-09-2007 21:35
أول مرة أعرف ان ممكن استعمال السميد بالبيتزا

الله يخليكي ام نور , لو تتكرمي و تبعتي هل الوصفات الحلوة لما يكون عندك شوية وقت زيادة

أنا بحب كتير الاكل المغربي بس مو مجربة إلا كم وصفة

تسلمي أختي على كرمك و زوءك

7 اتكرم عينك
الكاتب ام نور, on 04-09-2007 08:11
تكرم عينك اخت منى انشالله اليوم بالليل لما يناموا ولادي ببعتلك كم وصفة عرواء حضرتك عندك اولاد

;

8 الكاتب ام نور, on 04-09-2007 09:14
انا بدي اسألك اختي البرغل انا لا انقعه في الماء اغسله 3 مرات وفيالمرة الاخيره اصفيه من الماء تماما واتركه 15 دقيقة وهكذا ينفش لا حالو الماء بيكون ساخن والبصلة افرمها بتصير مرهم واضع على البرغل عند العجن فهل هناك فرق بين طربقتي وطريقتك ولا نفس النتيجة عم اسالك لان ناوية جرب طريقتك انشالله اليوم

9 الكاتب منى, on 04-09-2007 09:39
ان شاء الله , رح أستنى الوصفات منك أختي

اختي ام نور انا مو مجربة الطريقة الي ما منفرم فيها البرغل و لا مرة :roll

بس اتوقع ان في فرق , بس شو هو ما بعرف لحتى جرب و احكم بنفسي

الحمد لله عندي بنتين و صبيين الله يباركلي فيهم يا رب

و انت ؟

10 الكاتب ام نور, on 05-09-2007 21:18
ما شاء الله الله يحفظلك ياهون انا عندي بنوت طفلة وصبي .
جربت الكبة صراحة ما ظبتت معي السبب انو لما تركتت البرغل نصف ساعة بالماء شرب الماء كله طحنتو ام عجن يمكن كان لازم اعصره من الماء قبل الفرم بس بدي ارجع جرب مرة تانية بكمية فاشالله تظبط

11 الكاتب منى, on 06-09-2007 04:21
الله يباركلك فيهم أختي

أكيد لازم تعصريهم من المي تمام لحتى تشتغل معك العجينة و خصوصاً بالنسبة للكبة المقلية ..

ان شاء الله تظبط معك المرة التانية ..

شكرا ليك ام نور على تواجدك الطيب في الموقع

12 الكاتب رانيا الشرباتي, on 06-09-2007 07:53
يسلموا بتشهي

13 الكاتب منى, on 06-09-2007 13:12
الله يسلمك رانيا

كلك زووء

14 الله يرضى عليك يارب ويباركلك
الكاتب تورتاية بالكريز, on 12-10-2007 13:26
تسلمي أخت منى الله يرضى عليكي ويباركلك باولادك ووقتك كتير عجبتني نصائحك للكبة جبتي المفيد لان الانواع اللي فيها لحمة كتير بتكون تقيلة شوي وكان نفسي اعملها خفيفة ومقرمشة وهل كبة الدراويش موجودة بالوقع ام هي نفس طريقة المقلية بس باختلاف الشكل يااخت منى وحيققي عجبتني طريقة الكبة المقلية وان شاء الله عندي السميد حجربها بيه باذن الله وحوله وقوته وجزاك الله كل الخير على سرعة ردك وتواصلك الرائع جعله المولى بميزان حسناتك يارب

15 الكاتب منى, on 12-10-2007 18:18
ما بتعرفي اختي قديه مبسوطة بكلامك و دعواتك , وان شاء الله ليك بالمثل أختي

أختي الكبة الدراويش نفس طريقة تحضير الكبة المقلية تمامابس باختلاف الشكل
ان شاء الله تجربيها و تعجبك , بس انتبهي على كمية الماء , يعني لما تنقعي البرغل لاو\زم يكون بالمية الباردة من الصنبور و بعدها تصفيها كتير منيح لحتى تتماسك معاك

و اي سؤال تاني انا تحت امرك أختي

16 الكاتب Eman, on 18-12-2007 05:28
كل عام وأنت والجميع بخير ،وإنشاء الله السنة الجاية الله يجمعنا على عرفات،آآآمييين.

يسلمو حبيبتي منى على إمدادنا بالوصفات الشهية،صراحة واللي مبسوطة منه أكتر، تعليماتك الدقيقة وملاحظاتك الجميلة؛ فبتتبعي لموقعك صار عندي الجرأة أكتر لجرب كلشي جديد و قديم

.

من كم يوم عملت كبة مقلية وطلعت معي تحفة والحمد لله.

بس لسه عندي عقبة ، وهي الحلويات ، كل ما بجرب شغلة بتفشل معي، واللي كنت جربه وينجح مقاديره مو متوفرة :sigh

(متل القشطلية،سمعت فيها؟) ،وهون ما عنا حلو تشتريه جاهز فمضطرة أتعلم أعمل لحالي، بس عم أستنى لاقي وصفة سهلة ومفاديرها متوفرة :zzz

.

في أمان الله حبيبتي.

17 الكاتب منى, on 27-12-2007 16:25
أأأمين يا رب العالمين , و الله ناطف قلبي على ما روح للحج ..

يا الله الله كريم ان شاء الله

ان شاء الله عوافي و هنا يا رب ..
تعليقك حلو كتير

رح اعتبره أحلى عيدية منك

حبيبتي في في الموقع وصفات سهلة كتير
متل
حلى الكاسترد

و كمان التيراميسو السهل

أظن أن المقادير متوفر حتى لو كنت باي بلد

يا ترى جربت شي من وصفات الحلويات من الموقع و ما نجحت معك ؟ ممكن ساعدك .

القشطلية سامعة فيها بس ما بعرف اعملها , لو فيك تكتبي طريقتها و نزلها , لما بتكوني فاضية

مية أهلا و سهلا فيك

18 الكاتب Eman, on 18-12-2007 20:46
الله يجزيك الخير ..

رح جرب حلى الكاسترد كأول تجربة إلي ،الصراحة ما جربت شي لأني جبانة، والقشطلية ما عملتها لأنها بدها قشطة ومو مسترجية جرب أطبخها،برأيك بتنفع بدل القشطة الطازجة؟

يسلمو حبيبتي على التشجيع الحلو ، إنشاء الله بس جرب شغلة رح أخبرك بالنتائج.

الله لا يحرمنا منك ومن أكلاتك الطيبة يا رب.

19 الكاتب أم عباده, on 26-12-2007 22:07
الله يعطيك العافيه كل اكله اطيب من اللي قبلها خليتيني احس اني بحلب
بس بدي اسالك اش الفرق بين البرغل الابيض والاسمر بعمل الكبه واحيانا الكبه الدراويش بتتشقق معي خلال القلي قولك من ايش استعملت مرة برغل ابيض ومرة اسمر ومرة خلصت من الاتنين وبحط لكيلو البرغل نص هبرة او اكتر شوي يمكن طولت عليك بس عن جد هالكبه رح تجنني وبتعرفي الرجال الحلبي عندو الكبه اهم شي وعزيمه من غير كبه مابتسوى ودائما بخاف من التشققات فشو الحل الحقيني

20 الكاتب منى, on 27-12-2007 16:21
هلا ايمان

عفوا حبيبتي على التأخر بالرد , بتعرفي العيد و زحمته :roll

لا أختي أكيد القشطة المعلبة ما بتنفع بدل القشطة الطازجة

ان شاء الله تجربي الحلا و يكون متل ما بتحبي

على فكرة نزت الفريكة فيك تشوفيها على هل الرابط

21 الكاتب منى, on 27-12-2007 17:34
هلا أختي ام عبادة

أختي ما كتير قي فرق في الطعم , الفرق باللون أكتر لحتى ما تصير الكبة كتير غامقة بعد القلي ..

البرغل الأبيض منستعمله بس للكبةالمقلية و فيك تستعملي البرغل الأسمر أما باقي الكبب ما بتصير إلا بالبرغل الأسمر

الكبة ممكن تتشقشق لعدة أسباب , لازم تعجنيها كتير منيح و تعطي العجينة حاجتها من المي , يعني ما تكون كتير ناشفة و إلا بعدها رح تتشقشق , و كمان لا تزودي المي و الا بعدها بحياتها ما بقى تصير معك دراويش

و انت عم تعملي الدراويش حطي ادامك صحن فيه مي باردة و بللي الدرويش بالمي بشكل بسيط بعد ما يخلص و ان شاء الله ما بقى تشقشق معك

حبيبتي لا تكتري الهبرة للكبة المقلية ,بكل هل الهبرة الي عم تحطيها ما رح تطلع الكبة مقرمشة معك

يا ريت لو تجربي كمية صغيرة بطريقتي و تشوفي إذا رح تظبط معك

22 الكاتب أم عباده, on 27-12-2007 21:40
الله يجزيك الخير ويعطيك الف عافيه على هالنصائح الغالية واكيد رح اعملها على طريقتك ومتل ما وصيتيني
ألف ألف شكر

23 الكاتب منى, on 28-12-2007 10:10
ان شاء الله ام عبادة

و ابقي خبريني شو بيصير معك ..

نورتي اختي

24 الكاتب kuwaiti_girl, on 19-02-2008 16:38
غاليتي منى شو اخبارك
بغيت اسال عن الهبره بالكبه هل اقدر ان استخذم الهبره المفرومه بدال المدقوقه؟؟ وما هي الطريقه لذلك
لاني لا اعرف اين اجد هبره مدقوقه هنا لان اغلب العاملين لدى اللحامين يكونون من الجنسيه الهنديه ولا يعرفون ما هي الهبره المدقوقه و شكرا

25 الكاتب منى, on 19-02-2008 19:48
هلا أختي كويتية

حبيبتي الهبرة المدقوقة فيك تعمليها بالبيت , بتجيبي لحمة هبرة بشرط أن لا يكون فيها و لا أي أثر للدهنة , هذا شرط أساسي و إلا فان الكبة رح تفرط , بتفرمي الهبرة على ماكينة فرم اللحمة أو بتجيبيها مفرومة و خالصة من عند اللحام, بعدها بتحطي الهبرة مع شوية ملح و شوية من الثلج المكسر في خلاط الكوكتيل العادي

لا تستغربي و بتطحنيها لحتى تصير ناعمةو كأنها مدقوقة

و بعدها بتستعملي الهبيرة للكبة أو لأقراص النعناع و صحتين و هنا على قلبك

26 الكاتب abeer, on 01-05-2008 18:53
حبيبتي منى يا سلام عليك هلا حتى صدقت انو الحلبية اهل المحاشي والكبب0 ولهيك بدي اسالك السميد بنقعه مع البرغل ولا بعدين ضيفه وشكرا

27 الكاتب منى, on 01-05-2008 19:36
هلا عبورة :grin

و كمان أهل المعالي و الرتب

السميد بتضيفيه مع العجن من غير نقع

28 الكاتب غرام, on 10-07-2008 07:42
[السلام عليكم
دى اول مشاركه ليا وانا من معجبينك جد ا جدا
ومتابعك
عندى سؤال معلش البرغل قد ايه بالكيلو فى الكبه المقليه
لانى عايزه اجربها يعنى مثلا لو نص كيلو لحمه مفرومه احط اد ايه برغل
فى انتظار ردك اختى

29 السلام عليكم
الكاتب غرام, on 10-07-2008 07:47

30 السلام عليكم
الكاتب غرام, on 10-07-2008 07:53
:zzz

اختى منى شكرا على موقعك الجميل وانا من متابعينم من لكوفرحت انى سجلت هنا كتير لاستفيد منك ومن خبرتك الواسعه
انا من مصر

عندى سؤال انتى حطيتى ربع كيلو لحمه عليها برغل اد ايه بالكيلو
يعنى متلا نص كيلو برغل والا اكتر لانى نفسى اجربها اووى
واللحمه عندنا مفرومه جاهزه والا انتى تقصدى نوع تانى ممكن التوضيح معلش غلبتك باسلتى

عاوزه منك كمان طريقه سمبوسك مضمون طريقته وتكون مقرمشه

وكمان حاجه تانيه معلش
عايزه اتعلم اعمل تورته بالبيت عندى مناسبه بعد عشر ايام ونفسى اعملها كويس وتكون فيها كريمه الزبده
وشكراااااااااااااا

31 الكاتب منى, on 10-07-2008 09:29
هلا غرام

مية هلا فيك و بك المصريات العسل , منورة الموقع أختي

البرغل كميته بالنسبة للحمة تقريباً كيلو و نصف برغل لكل ربع كيلو لحمة , معلش الكمية يمكن تكون مش معقولة , بس هي هيك بتتحضر

عندي طريقة سمبوسك تجنن و فيك تشوفيها على هل الرابط, كتير سهل و طيب

التورتة أختي تقصدي فيها الكيكة الاسفنجية ؟ اذا هيك ممكن تشوفيها على هل الرابط و لو سمحت ممكن اقترح عليك قالب بياخد العقل كمان على هل الرابط

اي سؤال من عيوني

32 الكاتب سارونات, on 13-08-2008 23:35
السلام عليكم و رحمة الله و بركاته
اختي منى يعطيك العافية على الوصفةعندي سؤال انا عندي كمية قمح و بدي اعمل برغل بالبيت فهل هالشي ينفع او صعبة
ازا ينفع ياريت تقليلي على الطريقة
بالتوفيق
سلام

33 الكاتب منى, on 14-08-2008 07:40
هلا أختي

أظن صعبة , بتعرفي و لا مرة فكرت حضر البرغل , بعرف كيف بيتحضر بس حضره انا ما جربتها

هلا فيك أختي

34 الكاتب Eman, on 07-09-2008 23:01
سؤال:ممكن أستخدمها باللبنية ؟؟
يعني هالكبة متل الكبة باللبنية ولا طريقتهاغير؟؟

35 الكاتب منى, on 08-09-2008 08:11
لا أبداامولة هي غير تبعة اللبنية , عندك اللبنية و ريقتها بالتفصيل , كبة اللبنية لازم يكون هبتها بنفس كمية البرغل لحتى ما تفرط باللبن

36 الكاتب Eman, on 23-03-2009 22:01
السلام عليكم .. كيفك منوشة الحلوة ؟ اشتقت لك كتير ولأكلاتك ..

من يومين طالعت كبة مقلية مفرزة وحطيتها بعد عشر دقائق بالزيت .. ما تلاقي إلا الكبة فرطت ونزلت !! :eek

ما عرفت شو أعمل طالعتها وحطيت وجبة تانية كمان فرطت

...بعدين صرت :cry

من قهري عليها ! خصوصا أنها لعزيمة رفقة زوجي في المشفى وما بقى غير عشر دقائق ليجي ياخد الأكل .. الحمد لله كان في أوزي وفروج ببطاطا مع التبولة ..بس كتير انقهرت ليش هيك صار ؛خصوصا إني جربتها قبل بيوم لحتى أتأكد وكانت كتييييير طيبة ،وقعدنا ناكلها أنا وزوجي ويقول لي هي أطيب لأنها تازة

،وحطيت لها دبس رمان لتعطي شوية حموضة على حلاوة

..طيب ليش هيك صار معي يوم العزيمة؟؟

37 الكاتب منى, on 24-03-2009 08:24
لان استنيتي 10 دقايق :sigh

المفروض من الفريزر بتلجها على القلي مباشرة و الا رح يصير معك الي صار , يلا الحمد لله ان كان في غير شي و الا كان الموقف ما في اصعب منه , و الواحدة فينا ما بتتعلم الا اذا غلطت , يلا المهم ان شاء الله عجبوهن بقية الاشيا

38 رائعة جدا تسلم يدينك
الكاتب روح الجمان, on 05-05-2009 15:56
جاري التطبيق في أقرب وقت جزاكِ الله خيرا حبيبتي في الله

39 رائعة تسلم ايدينك
الكاتب روح الجمان, on 05-05-2009 15:58
جزاكِ الله خيرا فعلا الشرح واضح والصور رائعة ما شاء الله قريبا أطبقها بارك الله فيك

40 الكاتب منى, on 05-05-2009 18:25
هلا

ان شاء الله تجربيها و تظبط معك و اي سؤال بيخطر ببالك انا تحت الامر و بالخدمة ان شاء الله

41 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-05-2009 19:25
هلا منى كيف الصحة مبارح جربت الكبة المقلية على طريقتك كثير كانت زاكية ورائعة وضبطت معي وطلعنا انا وانت نفس الطريقة لكن في اختلاف بسيط بيني وبينك انو انت بتحطي معها السميد بس فكرة السميد عجبتني تسلم ايديك يارب
بس في عندي سؤال انت قلت نستعمل البرغل الابيض طيب شو بيفرق البرغل الابيض عن الاسمر يا ريت تفيديني لأني انا عملتها بالبرغل الاسمر لأنه ما كان عندي الابيض فحبيت استفسر منك عن الفرق بينهم وشكرا الك مرة ثانية على وصفاتك ومقاديرك الرائعة

42 الكاتب منى, on 04-06-2009 19:51
هلا هيا

الف صحة و هنا يا حق على كل لقمة أكلتلتيها , كتير انبسطت انها ظبطت معك و عجبتك و كانت على زووءك

هيا حبيبتي , البرغل الابيض بيطالع الكبة هي عم تقرش اكتر , ليش ما بعرف , بس بالتجربة هيك طلع معي و الفكرة هي اتعلمتها من اختي اية , الله يعطيها الف عافية

43 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 05-06-2009 08:31
شكرا الك منى كثير على الرد والمرة الجاي ان شاءالله راح جربها بالبرغل الابيض والله يخلي لك اختك ايه يارب

44 الكاتب منى, on 08-06-2009 12:18
ان شاء الله تجربيها و تطلع على زووءك هيا

45 الكاتب JoJo, on 10-06-2009 01:17
ما شاء الله رووعة والله
يسلموو الايادي منى

46 الكاتب منى, on 10-06-2009 11:33
لله يسلمك جوجو و يا رب تجربيها و تكون على زووءك

47 الكاتب حنان, on 28-07-2009 14:34
السلام عليكم يا اخت منى كيفك انا عملت الكبة المقلية وصبطت معي الكثير والله يخليك ويخلي اولادك بس بدي اسال خبز لازم نبلله بالماء ونفرمه مع البرغل بالماكينة مرتان ولا كيف وبدي اغلبك معي شوية المكدوس ممكن نضع بدل الجوز صنوبر وشكرا حبيبتي

48 الكاتب منى, on 28-07-2009 20:41
هلا حنونة

هنا و الف عافية و صحة يا حق

ايه حبيبتي الخبز نبله و نفرمه مع البرغل مرتين اما المكدوس فاصوله بالجوز و غيره نو

49 ماكينة الكبة
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-08-2009 09:58
اهلن انا عوزة اشترى ماكينة الكبة ما هو نوعها و شكلها اية????? و شكرا

50 الكاتب منى, on 25-08-2009 11:59
ماكينة الكبة هي نفسها مفرمة اللحمة , و انا استعمل ناشيونال

51 الكاتب RABBSO, on 27-08-2009 12:22
مررسى اوى

52 الكاتب منى, on 27-08-2009 14:00

53 الكاتب ام عون, on 22-01-2010 18:28
انا حابه اعمل الكبه المقليه.ولامره اعملتها والسبب انه ماعندي ماكنة فرم لحمه .وباختصار بشتريها جاهز الكبه. لكني حابب اعملها وبذات طريقتك.عندي استفسار ممكن استغني عن الماكنه بفرامة الملوخيه لانها بتفرم البصل ناعم

54 الكاتب Eman, on 22-01-2010 18:37
اليوم صايرة عم أتغالظ عليك كتير ما هيك

رجعت عملت الكبة ،وهالمرة مع حب رمان ودبس رمان .. عن جد كتير طيبة هالإضافة ونصيحة جربوها .. هلأ الكبة مصورة من برا بس إنتو هيك تخيلوا منظر حبات الرمان عم تبرق متل الياقوت الأحمر .. عن جد طعم ومنظر طيبين ،وعلى قولة منى صارت كبة ياقوت وجواهر :grin

[/img]

55 الكاتب منى, on 23-01-2010 18:16
و الله اختي ام عون ما بعرف , بخاف قلك جربي و ما تزبط لان انا مو مجربتها الا بالماكينة , على كل كل اخواتنا اللبنانية ما بيفرموا الكبة على الماكينة و بيكتفوا بنقع البرغل

56 الكاتب منى, on 23-01-2010 18:23
بالعكس امولة , الف هنا و صحة يا رب على الكبة و طريقتك بالحشوة اتعلمتها من حماتي , بيطلع منظرها حلو كتير و كمان طعنتها مميزة , الف صحة يا رب .

الصور ما طلعوا :roll

57 شكرا
الكاتب ام عون, on 26-01-2010 19:19
اول مره بعمل الكبه .والجمد لله كانت كتير طيبه بس حسيت انها مقرمشه كتير معقول السميد كان ياده شوي رح احاول مره تانيه واعملها بس اقلل السميد

وبالمناسبهطحنت البرغل بماكنة الملوخيه ممتازه النتيجه

.شكرا الك يااخت منى والي طلب منك حابه تكوني صديقتي في الفيس بوك

zzz

58 سؤال بسيط
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 12-06-2010 15:56
يا سلام على الكبة
بس في عندي سؤال
ممكن أعرف المقادير كلها بالغرامات
لأنو صعب حدد كمية الكوب
و شكراً كتير كتير إلك على هالوصفات الطيبة

59 سؤال تاني :)
الكاتب 7ayah, on 15-06-2010 12:50
طيب بدي اتغالظ عليكي منى و اسألك سؤال تاني
هلأ ممكن أعمل كمية عجينة كبيرة و أعمل كمية منها و فروز الباقي بالفريزر كعجينة

لأنو شغلا بياخد وقت و ما عندي ماكينة فرم اللحمة
بدي افرما عند واحد صاحب مطعم و عندو ماكينة الفرم
و صعب كل فترة ابعت كمية صغيرة لعندو يفرما :eek

بقى فيني فروز العجينة و اشتغل فيا امتى ما بدي

و بالنسبة لسؤالي الأول
أنا شفت بين الردود إنك حاكيي 7 كوب برغل بطلعولن شي كيلو و نص صح

بس السميد ما عرفت كم بطلع :cry

يا الله أنا شو بسأل :upset

معلش منى بدك تتحمليني شوي الله يخليكي :zzz

60 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-06-2010 08:00
مدام منى حابة اسالك شو الفرق بين البرغل الابيض والبرغل الاسمر لان بعتقد هون بلبنان ما منستعمل غبر الاسمر. هل المقصود بالبرغل الابيض المطحون من القمح الابيض المقشور؟ وشكراً لك دمت بخير

61 الكاتب منى, on 18-06-2010 12:36
هلا ام عون

هنا و الف صحة و عافية , هي الطريقة و انتي بعدها عدليها على كيفك لحتى تناسب ذوقك

نوررتي اختي

62 الكاتب منى, on 18-06-2010 12:47
هلا فيك اختي vayah

متل ما ذكرت قبل كمية البرغل , و السميد هلا خلصان عندي ما فيني حدد الك الكمية بالغرامات :roll

ما فيك تشيلي العجينة مع اللحمة بالفريزر لان رح تعزبك بالشغل و ما تمسك على بعضها و انا مجربتها , بس فيك تحضري البرغل و تفرميه و تشيليه على الفريزر و بس ما بتحبي طالعيه و ضيفي اللحمة و اشتغلي فيها

ايا سؤال تاني من عيوني

63 الكاتب منى, on 18-06-2010 13:05
هلا فيك اختي lebnadeen

ما بعرف الفرق بالضبط لحتى فيدك , ممكن احط صورة للتنين لحتى تشوفي بنفسك

64 ........
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 20-06-2010 18:41
شكراً على الرد كتير :zzz

خلص ان شاء الله بفروزا متل ما قلتي

65 الكاتب منى, on 20-06-2010 19:27
ان شاء الله

66 الكاتب عالم آخر, on 14-08-2010 06:49
جدانت رائعه وبتشهي الواحد يطبخ

67 رآئعه
الكاتب أمــ نــــدى, on 01-09-2010 15:58
أهلا منى
جزاك الله خيرا على الكبه اللي بتشهي
لكن أنا عندي كم سؤال معلش , لأني حابه أجربها
أولا , لحم العجل الخاص بالكبه, من أى منطقه يعني فخذ , كتف , لأن اللحام عندي ما يعرف الكبه أساسا ..
ثانيا , السميد يكون ناعم أم خشن
وجزاك الله خيرا على الافاده
وعلى فكره أنا جربت منك وصفة شيش الدجاج والسمبوسه واعتمدتهم طرقي المفضله وعديت لك كثير ...ربي ينفع بك وبعملك

68 الكاتب منى, on 05-09-2010 13:18
هلا فيك اختي

ما عندي فكرة عن اجزاء اللحمة المطلوبة , المهم ان تكون قطع اللحمة هبرة و ما فيها دهن نهائي

السميد ناعم

الف الف صحة و هنا و عافية , ان شاء الله الك متل هل الدعوات و اكتر اختي الكريمة
شرفتينا و نورتينا اختي

69 الكاتب منى, on 05-09-2010 13:22
هلا عالم اخر

من زووءك حبيبتي , شرفتي يا احلى قمر :zzz

70 كمان مو معقول ... ؟!!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 14-09-2010 03:53
السلام عليكم ...

ليش مو معقول ؟ كلما بعمل وصفة وبتزبط وبتطلع بتجنن (متل الأكل برا هههه) بستغرب كتير وهيك بنبسط

ببيت أهلي ما كتير كنا نعمل الكبة متل الحلبيين هههه ما بعرف ليش، وماما ما كانت تزبط معها هيك كرات فكانت أكتر تعمل كبة بالفرن أو المقلية تعملها عشكل أقراص. ولما انتقلنا عأوروبا صرنا نعملها بالسنة مرة.

لكن من لما تعرفت عالموقع قلت هي هية الطريقة المأصلة ولازم جربها، خصوصي أنها من الست منى وولا مرة ما خابت ولا وصفة معي من هون.

بس ما عندي ماكينة الكبة :roll

جوزي قلي: لا تخربي المواد ههههه .. وكان يجيب الكبة من برا.
بس أنا أصريت ولقيت بالاترنيت مرة أخت كاتبة أن ممكن الشغلات كل وحدة تنفرم لحالها بعدين بينجمعوا وبينعجنوا.
أول الشي نعمت البرغل كتير بالخلاط اللي بينعّم ، بعد هيك غسلتو (متل الهبلا :upset

) بس مشي الحال واتصفى منيح من المي. ولما نزلت لجيب اللحمة الحمد لله طلعلي لحام عربي، لأن لآخر لحظة كنت عم دور ببالي شو قلو إذا طلع هندي، وقلتلو ان بدي لحمة للكبة :grin

. قلي: أيوه اللحمة دي عجل وتدار عالماكينة كتير. ووالله ما كذب خبر حطلي قطعة لحمممم أحمممممر، ودارها عالماكينة شي 10 مرات

لما جبتها عالبيت لقيتها متشتشة وهيك مو قطع أبدا ههههه يعني مشي الحال. وخلطت المكونات وطببببعا السميد وكل شي متل ما حضرتك حطيتي. بس طبعا عملت كاسة برغل وحدة، وما عرفت أديش اللحمة فحطيت عالنظر ههههه .. هالكمية عملتلي 9 كرات كبة . وعجنتها شي نص ساعة. حطيتها بالبراد ونعست ونمت ..... وما بتسدئي اني شفتك بحلمي يا ست منى :grin

والله العظيم عم تقليلي: قومي عملي الكبة.
فزيت وقعدت اعملها، بس ما لحقتها عالغدا، لذلك خليتها لتاني يوم بالفريزر ، واليوم عالغدا قليتها ... يا عيني على هالكبة والله طلعت أطيب من اللي جوزي بيجيبها من المطعم وطلعت بتجنن وما تشققت ولا صرلها شي وبتجنن :zzz

. بس أن طلعت حوافها شوي سميكة لأن أول مرة بعملها فما رققتها لحد اللزوم.

يسلموووووووو كتير يا منى والله انتي شغلة كبيرة .. لازم مو بس تطالعي كتاب ... لازم يعملولك برنامج تلفزيوني !!!

بدي اسألك، بوصفة الكبة السمبوسك الوصفة مختلفة، طيب مو تنيناتون مقليات ؟؟؟
ممكن بهالوصفة يلي هون اعملها شكل السمبوسك بدال الدوائر؟ شو الفرق بالطعم بين الوصفتين هون وبصفحة الكبة السمبوسك ؟ مع ان تنيناتون مقليات ؟!!

الله يطول بعمرك يا منى ويديمك عراسنا !

والسلام عليكم

71 noora
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 25-02-2011 16:50
الله يعطيكي العافيي أخت منى بدي أسألك اذا مندير السميد مع البرغل واذا نقدر نحط الكبة باالبراد لتاني يوم والك جزيل الشكر أخت منى

72 الكاتب منى, on 28-02-2011 11:59
هلا jassy

ما قرات ردك لليوم و عن جد ما بتعرفي اديه انبسشطت ان الكبة زبطت معك و نجحت و انبسطت اكتر انك قدرتي تحضريها حتى من دون ماكينة , عن جد همتك و نشاطك و حبك للطبخ هنن الشغلة الكبيرة الي خلت الكبة تنجح :zzz

صحتين و الف عافية حبيبتي و ما بتعرفي اديه انا ممنونة ردودك و التفاصيل الصغيرة الي بتذكريها , لان هل الردود هي الي بتغني الوصفة و بتعطي افكار مهمة لبقية الاخوات

صحة مرة تانية و ربي يديم هل الود الي بيناتنا

73 الكاتب منى, on 28-02-2011 12:01
هلا نورا

اي اختي منديرهم مع بعض و اكيد فيكي تتركي الجينة لتاني يوم بالبراد , بس تكون مغطاية منيح كتير

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 16/08/2009 )

< السابق		التالى >

[ عودة ]