L2ma.com | لقمة طيبة | L2ma.com | لقمة طيبة | الكبة المشوية | الكبة, الطريقة, على, · , حتى | L2ma.com

القائمة الرئيسية

الأكثر تصفحاً

الكبة المشوية

الكاتب/ منى

29/08/2007

طبق لذيذ جداً من المطبخ السوري و لربما كان من أكثر الوصفات شهرة و من أكثر الوصفات التي سألتني الأخوات عن طريقة تحضيرها ..

تختلف كل مدينة من مدن سوريا بطريقتها في الكبة المشوية و تبقى حلب الأشهر في تحضير الكبب . في حمص يضيفون حبتان من البصل المفروم ناعماً مع قلية اللحمة للحشوة . و في دمشق يضعون مع الحشوة القليل من دبس الرمان مع حبات الرمان لكسر دسامة الشحمة , في حلب , بعض ستات البيوت تغمس قرص الكبة المشوية بالسمنة الذائبة قبل شويها لمنع تشقق القرص أثناء الشوي , و الطرق كلها لذيذة و متميزة تستاهل التجربة

يمكن أن تعد الحشوة بطريقتيين , من دون لحمة باستخدام الدهنة و الشحمة فقط , و لكن هذه الطريقة ثقيلة جداً , بالنسبة لي لا أستطع مجرد التفكير بتذوقها و الطريقة الثانية باللحمة و الشحمة و هي الطريقة التي أعد كبتي بها .

استعداداً لشهر رمضان الكريم , أعدت أمي الكبة المشوية و كنت معها أنا و أية , حضرنا الكبة ثم شويناها ,, يممي , و اللذيذ في القصة أن ماما , و هي المعروفة بقلبها النار متل ما بيقول المثل , سمحت لي أن اصورها و هي تعد الكبة ...سلم دياتك يا أحلى ماما ..

بالصحة و الهنا

مقادير الكبة :

نصف كيلو برغل ناعم
نصف كيلو لحم هبرة عجل مدقوقة للكبة
حبة بصلة كبيرة مقشرة و مقطعة أرباع
ملعقة صغيرة ملح
نصف ملعقة صغيرة قرفة مطحونة
نصف ملعقة صغيرة بهارات مشكلة

مقادير الحشوة :

نصف كيلو لحم مفروم
جوز مفروم و محمص
ربع كيلو شحم الخروف مفروم ناعماً
ملح و بهار مشكل
ملعقة كبيرة فليفلة حمراء ناعمة
نعناع يابس ( اختياري )

direction

تحضير الحشوة :

·          تقلى اللحمة المفرومة بالقليل من السمن أو الزيت ( أو تستعمل مقلاة غير لاصقة و تقلى اللحمة بدون مواد دهنية ) , تقلب اللحمة على النار و تفكك بالشوكة حتى تنضج و يجف مرقها تماماً ثم تتبل بالبهار و الملح .

·          تتبل الشحمة بالفليفلة الحمراء و النعناع ثم يضاف الجوز و اللحمة يقلب الكل حتى تتجانس الحشوة .

تحضير العجينة :

·          يطحن البرغل المنقوع مع البصلة و البهارات على ماكينة فرم اللحمة ثلاثة مرات .

·          يوضع البرغل المطحون و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .

·          تدعك الكبة و الهبرة لمدة 10 دقائق أو أكثر و يضاف القليل من الماء إذا دعت الحاجة حتى الحصول على عجينة رطبة و طرية و متماسكة, أصبحت عجينة الكبة جاهزة .

تحضير الكبة :

·          تقسم عجينة الكبة إلى كرات متوسطة الحجم .

·          يؤخذ صحن مستو ويقلب على قفاه , يغطى بورق نايلون و يبلل بالماء ثم توضع عليه كرة من الكبة و يوضع فوقها كيس نايلون ثاني ثم تكبس الكبة بصحن مستو أخر حتى الحصول على قرص رقيق , و يمكن رق الكبة بين راحتي اليد و لكن الطريقة الأولى أسرع و تضمن أقراص متشابه بالشكل و متساوية بالقياس كل مرة .

·          يرق قرص أخر بنفس الطريقة و توزع عليه ملعقة أو ملعقتان من الحشوة ثم يوضع أول قرص على الثاني بحذر و يلصقان معاً باليد المبلولة بالماء البارد ثم يدار القرص بلطف و حذر بين راحتي اليد حتى يستوي شكله و يصبح جاهزاً و له شكل مثل القبة , تحضر باقي الأقراص بنفس الطريقة .

يوضع القرصان فوف بعضهما البعض و يدوران بين راحتي الكف

· أصبحت الأقراص جاهزة , بالنسبة للشوي عندك طريقتين :

· الطريقة الأولى هي أن تشويها على الفحم , بحيث توضع شبكة فوق الفحم و ترص عليها أقراص الكبة مع تقليبها على الجهتين حتى تصبح بنية اللون و تنضج و هي الطريقة الأصلية . -

تشوى الأقراص على الفحم , ما أطيب الكبة المشوية

· أما الطريقة الثانية فهي أن تشويها في الفرن و مع التقليببين فترة و أخرى حتى تنضج و هي الطريقة الأسهل و لكن ستكون نكهة الشواء ناقصة .

· تقدم الكبة المشوية فوراً مع عصير الرمان , أما إذا لم يوجد تقدم مع السلطة أو الفتوش أو اللبن .

أضافة إلى المفضلة (2) |

أقتباس | مشاهدات : 5935

تعليقات (28)

1 الكاتب linda, on 30-08-2007 11:30
صباحووووووو
الله يسلم هل الايدين يا رب
اكلة امي و ابي المفضلة
بس انا ما بحبا لانو فيها دسم كتير
يالله عم استنى الكبة المقلية بفارغ الصبر :zzz

2 الكاتب منى, on 30-08-2007 11:52
صباح الورد و الفل و الياسمين الشامي

هي طيبة كتير بس متل ما قلتي دسمة , يعني أنا يا دوب قطعة و التانية بكون شبعت كتير

بس طيبة و بتبيض وش في العزايم ..
و لو تعرفي شو سألوني عنها أخوات من الخليج ..

تكرم عيونك ليندا , ان شاء الله اليوم بنزلها أو السبت إذا الله راد

غالي و الطلب رخيص

3 الكاتب ام نور, on 30-08-2007 18:02
اوالله كتير طيبة وانا اكلت كتير انواع كبة بس اطيب من الكبة الحلبية ما لاقيت جربتا مرة نفس الطريقة بس بدون شحمة لان زوجي معو كوليسترول بس ما طلعت طيبة

4 الكاتب منى, on 30-08-2007 18:28
ايه أكيد رح تطلع ناشفة من دون الشحمة :roll

فيك تخففي من الشحمة شوي , بس مع ذلك بتبقى تقيلة

الله يخليك أختي ام نور و يا مية أهلا و سهلا فيك

5 الكاتب رانيا الشرباتي, on 06-09-2007 07:51
شكرا اكلة لذيذة جدا

انا بحب هذه الاكلة كتير

كل ما اسافر الشام بطلبها

6 الكاتب منى, on 06-09-2007 13:22
مية أهلا و سهلا فيك رانيا أخت جديدة و عزيزة

هلا صار فيك تعمليها لحالك

, بس بدها شغل ..

نورتي

7 الكاتب بدور, on 08-09-2007 17:49
الله يسلم ايديكي كتير بحب هالاكلة
أطيب أنواع الكبب عندي بس مشكلتا بتأذي الصحة :roll

8 الكاتب منى, on 10-09-2007 13:42
و أنا كمان .

لهيك ما فيني اكل منها إلا قطعة أو قطعتين بالكتير..

هلا بدورة

9 الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-08-2008 01:41
اهلين منى يعطيها العافيه امك . وصفه حلوه كتير. يعني بفهم منك منى انكم بتشووها و بتحطوها بالفريزر لرمضان?? يعني ما بيتغير طعما?? اذا هيك كتير منيح و بتسهل علينا. شكرا

10 الكاتب منى, on 18-08-2008 10:06
هلا أمونة

أنا ما بحضرها إلا تازة , بس امي بتشويها و بتحطها بالفريزر , هيك بتحب تكون مستعدة للضيوف دايما

بعد ما تبرد بتعبيها بكيس و لما حابة تستعملها بتفردها على منشفة نظيفة لحتى يفك عنها الثلج و بعدها بتشويها في الفرن مع شوية سمنة

11 الكاتب muna.g.7, on 06-09-2008 15:09
واو يامنى على هالكبه الرائعه شفتها في باب الحارة لاكن صورتك ووصفك اكيد احلى بمراحل بس ما اعرف ليش خايفه اجربها احسها صعبه وما راح تنجح معاي

12 الكاتب منى, on 06-09-2008 18:58
له يا منونة , بتنجح و نص ان شاء الله , انت بس اتبعي الخطوات بالتفصيل و بتشوفيها و لا أطيب , هي بدها شغل بس ممكن تعملي بالاول كمية صغيرة كتجربة

يلا اكشخي ادام زوجك و جربيها و اي سؤال تاني انا تحت الخدمة و الامر

13 الكاتب حنان, on 20-05-2009 13:27
السلام عليكم بتعرفي يا اخت منى اني بعرفك من موقع لك وتعلمت الكبة المشويةوالكبةالمبرومة كتير لذيذة وتسلم ايداك

14 الكاتب منى, on 20-05-2009 17:23
هلا حنونة

اتشرفت اختي بهل المعرفة الحلوة و ريتو الف الف هنا و عافية على الكبة , سلم دياتك لو ما انت ست بيت شطورة ما كانوا زبطوا معك

15 الكاتب omyosef, on 11-04-2010 23:29
انا روح قلبي هل الاكلات تسلم ايديكى وايادى امك والله يخليلك ياها ويجعلكم دايمين

16 الكاتب ريم برهان, on 25-04-2010 10:49
ياخيتو انا حلبية وعاملة ريجيم اش اعمل مشتهية آخدهلق الكبة واقطع الدايت يسلمو ايديكي ومشتهية اذوقك من الكبة اللي بعملها وانا بعملهاطريقة ثانية على شكل اصغر وبقليها بالزيت متل المقلية وادعولي كتييير طيبة :grin

nullوماما كمان كتيير حبتها

17 السلام عليك
الكاتب أم لطفي, on 16-06-2010 11:44
كيفك يا ست منى انا من المعجبين بموقعك وطريقتك بتقديم الاكلات كتير مرتبه ومهضومه وحتى المعلومات اللي بتحكيها كتير مفيده ومسليه تسلم ايديكي على هالاكلات اللذيذه وبالنسبه للكبه اولادي كتير بحبوها وانا بعملها متلك وكتير بتطلع طيبه .....

18 الكاتب منى, on 16-06-2010 13:03
هلا ام يوسف

الله يسلمك و يحفظك على هل الدعوات الحلوة و الغالية , شكرا كتير :zzz

19 الكاتب منى, on 16-06-2010 13:08
هلا ريم

ابعتيلي كم قرص بالايميل :grin

ممم , اتوقع بتطلع طيبة و كمان اسهل من الشوي بس كل واحدة طعمة

سلم ايد على الفكرة

20 الكاتب منى, on 16-06-2010 13:11
هلا ام لطفي

كلك زووء اختي , مية هلا فيك بالموقع شرفتي و نورتي

الظاهر انك حلبية :zzz

21 المطبخ
الكاتب حماه, on 02-06-2011 00:19

يسلمو استاذة منى والله اني من سنة بدور على طريقة الكبة المشوية الاصلية للاسف ما لقيت :sigh

بس وقت دخلت على موقعك الرائع شفت كل الاكلات السورية اللي بحلم اعرفا بالطريقة الصح
يسلمو ايديكي والله لا يحرمنا من اكلاتك الطيبة دائما

22 الكاتب حماه, on 02-06-2011 00:23
ممكن استاذة منى تبعتيلي ايميلك لاني عنجد كتير مبسوطة لاني عرفت ناس بيفهمو بالطبخ مو متل اللي حواليي ما بيعرفو يطبخو متل العالم والناس انا على فكرة متزوجة وعايشة بالسعودية لهيك بلاقي صعوبة بمعرفة جميع الاكلات ويمكن انتي بتعرفي لذة الاكلات الحموية وتشرفنا بمعرفتك رجاء لا تردي طلبي

23 الكاتب حماه, on 02-06-2011 12:03
السلام عليكم

سلمت الايادي

24 الكاتب amani.dd, on 22-10-2011 11:09
كيفك مدام منى بس ممكن اعرف قديش ممكن تعمل كمية وممكن لكم شخص

25 الكاتب منى, on 22-10-2011 19:58
:roll

ما بعرف كم قرص , بس ممكن تكفي من 6 الى 8 اشخاص

26 الكاتب منى, on 22-10-2011 20:31
هلا حماه

الله يسلمك حبيبتي , منور الموقع بطلتك الحلوة و الغالية و كلامك من زووءك و لطفك

بعتلك على الفيس بوك , ان شاء الله بيوصل وبتشرف اختي :zzz

27 الكاتب syrian girl, on 21-01-2012 20:56
ممممممممم بمووووت بالكبة :cry

28 الكاتب منى, on 23-01-2012 11:43
و انا كمان :grin

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 19/01/2009 )

< السابق		التالى >

[ عودة ]