L2ma.com | لقمة طيبة | L2ma.com | لقمة طيبة | كاتو شوكولا كولا | حتى, · , المزيج, على, الكولا | L2ma.com

القائمة الرئيسية

الأكثر تصفحاً

كاتو شوكولا كولا

الكاتب/ منى

04/08/2007

كيكة شوكولا كولا , فكرة لذيذة للاستفادة من الي بيزيد عندك من الكولا و الكاتو طري لذيذ مع الكريما الغنية بنكهة الكولا و الشوكولا , و مع أني ما بحب الكولا بس هل الوصفة من الوصفات المفضلة عندي ..

بالصحة و الهنا

نصف كوب زبدة ( نصف باكيت )
ثلث كوب كاكاو
كوب كولا
3 بيض بحرارة الغرفة
فانيليا
تلات ارباع كوب سكر ناعم
كوب و نصف طحين حلويات فاخر
2 ملعقة صغيرة بيكنغ بودر
نصف ملعقة صغيرة بيكربونات الصودا
رشة ملح

تغطية الكولا و الشوكولا :

2 ملعقة كبيرة زبدة
2 ملعقة كبيرة كاكاو
ملعقة كبيرة طحين
تلات ارباع كوب سكر بودرة منخول
4 – 6 ملعقة كبيرة كولا
رشة فانيليا

direction

·          ينخل الطحين مع البيكنغ بودر و بيكربونات الصودا و الملح , تدهن صينية فرن متوسطة الحجم بالزبدة و يحمى الفرن على درجة حرارة 180 درجة مئوية .

·          توضع الزبدة و الكولا و الكاكاو في قدر و تحرك ثم يوضع على نار متوسطة و يقلب باستمرار حتى يبدأ المزيج بالغليان ثم يوضع جانباً حتى يبرد .

·          يخفق البيض و الفانيليا حتى يصبح المزيج هشاً ثم يضاف السكر الناعم و يخفق الكل حتى يشتد المزيج و يبيض .

·          يضاف مزيج الكولا بالتناوب مع الطحين المنخول و يقلب المزيج بخفة بعد كل إضافة حتى تنتهي المقادير و يتجانس المزيج .

·          يصب مزيج الكاتو في الصينية المحضرة ثم يخبز في الفرن مدة 45 – 60 دقيقة أو حتى ينضج ثم يقلب على مشبك سلك و يترك حتى يبرد .

·          تحضر التغطية : تذوب الزبدة على نار هادئة ثم يضاف السكر و الكاكاو و الطحين و نصف مقدار الكولا و يحرك الكل على نار متوسطة , يضاف المزيد من الكولا إذا كانت الكريما سميكة و يحرك الكل حتى يبدأ المزيج بالغليان و يذوب كل السكر و تصبح الكريما ناعمة و متجانسة .

·          تبعد الكريما عن النار و تضاف الفانيليا ثم تصب على الكاتو و توضع فوقها قطع من المكسرات حسب الرغبة ثم يقدم الكاتو بارداً .

أضافة إلى المفضلة (1) |

أقتباس | مشاهدات : 3185

تعليقات (34)

1 الكاتب بدور, on 08-09-2007 17:02
فكرتو حلوة كتير كاتو و كولا مع بعض يممممممممممممممممي

أنا كتير بحب تنيناتون فشلون اذا اجتعموا بأكلة وحدة رح جربو بأسرع وئت نشالله يسلمو ايديكي منى الحلوة والله إنك خطيرة وعندك أفكار رائعة

2 الكاتب منى, on 10-09-2007 13:36
ان شاء الله صحتين و هنا مقدماً

كلك زووء بدورة

تسلمي على الطلة الحلوة

3 الكاتب قطة, on 15-11-2007 18:34
ميمو يا حياتي مطبخك غيرلي حياتي

أنا جربته كتير كتير طري والكل حبوه

4 الكاتب منى, on 15-11-2007 21:47
شو هل التعليق الغير شكل

هنا و صحة يا قطة

على قلبك و قلب الكل الي داقه ..

5 الكاتب نورا, on 31-12-2007 11:45
سلامات يا منى وإن شاء الله تكوني بألف خير انتي وعيلتك...
يا ستي جربت هالكاتو وما طلع طيب بنوب بنوب معي وما بعرف ليش.. اكيد خليط البيض والطحين ما فيه مشكلة بس لما كنت عبسخن الكولا والكاكاو والزبدة على النار تذوقتهم وحسيتهم مو طيبيبين ولما دخلوا بالمكونات الاخرى عملوا طعمة الكاتو سيئة وما حسنت آكله حتى...ما عرفت السبب بس استغربت وخصوصاً انه في وحدة كاتبة تعليق انها عاملته ونجح معها فشو برأيك السبب؟؟؟

6 الكاتب منى, on 31-12-2007 17:31
هلا نورا

غريبة بالفعل , ما بتتخيلي هل الكاتو قديه بحضره أنا و خواتي , يمكن أكيد عاملينه أكتر من خمسين مرة !!

السبب الوحيد إلي خطر بذهني انك إما تكوني استعملتي كولا دايت أو استعملتي زبدة مو طيبة متل ميماس أو لونا و غيره من الزبدات الي بيزعوا اي كاتو :roll

يا ترى بشو حضرتي الصوص ؟

7 الكاتب نورا, on 31-12-2007 18:23
يا ستي متل ما حزرتي حضرته بزبدة لونا...
بس انا مستعملتها من قبل وما كتير حسيت بغرابة طعمتها..
هو اكيد الزبدة الحيوانية احسن وخصوصاً لورياك اللي كنت استعمل منها كميات من قبل بس نظراً لانني وحشة حلو وما بكتفي بقطعة بس مشان هيك بحاول خفف الحريرات وأعمل الاكل أخف ما يمكن (طبعاً إذا حسنت غير بالمكونات) مشان هيك حولت لزبدة لونا مؤخراً....
على فكرة حكيك مزبوط تماماً لانها عطت طعمة عجيبة متل كانه محنن او بايت او مدري شو... انا ظنيت من الكولا بس ما كانت دايت فمعناها الزبدة...
شو نوع الزبدة اللي بتستعمليها؟؟؟
على فكرة عندي طرق لاكلات طيبة رح ابعتلك ياهم وقولي لي رأيك...
اليوم رح جرب طريقة صدورالدجاج المقلية مع الفطر والجبنة بس السؤال بقدر انه للسهولة طبعاً ما أسلقهم وإنما اطحنهم على ماكينة الكبة وأعملهم متل الهبرة وأحشيهم ساعتها؟؟؟ شو رأيك؟؟؟
طولت عليكي .. مشكورة كتير وبجربهم وبوافيكي بالنتائج

8 الكاتب منى, on 01-01-2008 07:24
صح معك حق تحسي بغرابة طعمتها , هي بالكاتو مو طيبة أبدا :roll

أنا بستعمل لورباك أكتر الشي و هلأ حديثا عم استعمل بريزيدانت كمان طيبة بس لورباك أطيب

يا ترى أيا وصفة قصدك عليها نورا ؟؟ ما عرفت , قصدك فخدات الدجاج ؟

إذا هيك أنا مو مجربتهاإلا بالسلق و ما أظن بتصير غير هيك لأن هي بالقلي رح تاخد بس لون و منظر بيشهي مو لحتى تستوي

أنا عم استنى الاكلات الي رح تبعتيها إن شاء الله و على فكرة انا نزلت لك طريقة مربى البرتقال من شي اسبوعين

9 الكاتب نورا, on 01-01-2008 08:37
بالنسبة لمربى البرتقال مشكورة جداًَ عليه وكنت عبستنى يوم عطلة لحتى أعمله وهو اليوم وإن شاء الله بوافيكي بالنتائج..
بالنسبة للوصفة هي فخذات الدجاج وانا كنت عبقول انه احرف الوصفة وإعملها شي شبيه بتشيكن آلاكييف بس البارحة عملتها متلك وقلت بلا ما حر ولوص وطلعت كتير طيبة بس انا فرزتها لانه بعد كم يوم عندي عزيمة عشاء وعبعمل اكلات وعبحطهم بالفريزر لانه ما بلحق بيومها اعملهم كلهم بس البارحة ما صبرت وقليت بس وحدة حتى شوف الطعم وطلعوا كتير طيبين بس سؤالي انهم من برة تقرمشوا تمام بس من جوا ضلوا طريين زيادة بقى هيك مزبوط ولا انا أذيتلي شي أذوة؟؟؟
وشكراً كتير كتير على الرد السريع وإن شاء الله في اقرب فرصة ببعتلك الوصفات

10 الكاتب منى, on 01-01-2008 17:36
ما قصرتي بديتي تحضيراتك من هلأ , هدا النوع بيمشي كتير للتفريز , بس بيوم العزيمة بطالعيه قبل بشي نص ساعة شي يفك عنه التلج شوي مو تماماً و بتحطيه على منشفة نضيفة لحتى تمص التلج الدايب و بعدها بتقليه , بس لا تنسي انو مو لازم يفك عنه كل التلج و كمان مو من الفريزر للقلي و الا بيبقى قلبه متلج

طلعوا لينين كتير معناها لما قليت الدجاج بقيت فيه شوية مي أو البطاطا المسلوقة ما خليتيها تنشف منيح قبل ما تهرسيها, دخيلك ديري بالك لما رح تقليهم ما يفرطوا معك :roll

عم استنى الوصفات يا عسل

11 الكاتب سارونات, on 07-07-2008 13:14
جازاك الله خيرا اختي

الوصفة مميزة و طعمها حلو

بس ما انتفختش بزاف كيما عندك

يا ترى شو السبب

و الصوص نشفت بعدين لما

حطيتها بالثلاجة

هل برايك كان لازم اضيف كولا

اكثر و متى احطها بالثلاجة

استناها تبرد او قبل

و ان شاء الله يا رب كل اللي

تعملها تنجح معاهاو الله يوفقك

اختي و يعطيك الصحة و راحة

البال

12 الكاتب منى, on 08-07-2008 10:43
هلا أختي

في كتير اسباب ان الكاتو ما ينفش كتير مثلا البيض و بقية المقادير يجب ان تكون بحرارة الغرفة و الفرن لازم يكون محمى قبل ما تحطي فيه الكاتو وأكيد ما بينفتح قبل بنصف ساعة

الكريما ممكن تكون جمدت لان ما استعملت سكر بودرة ؟ و إذا حسيت انها سميكة كتير أكيد ممكن تضيفي كمان كولا لحتى تصير بالسماكة المطلوبة

بعد ما يبرد القالب ممكن تحطيه في البراد و يكون موضوع في صحن خاص بحفظ الكيك من النوع الي له غطاء لحتى يبقى الكيك طري و ما ينشف

الف شكر ليك على الدعوات الحلوة , و ان شاء الله ليك متلها و اكتر يا حق

نورتي اختي

13 الكاتب ام نور, on 07-08-2008 16:54
مبارح جربت هالكاتو شو طلع طيب

وخفيف ونفش لدرجة زوجي فكر انو
كاتو الاكياس الذي فقط نضيف له الحليب وندخله الفرن الله يبارك فيكي منى

14 الكاتب منى, on 07-08-2008 18:49
هنا و عوافي يا ام نور حبية قلبي , كتير انبسطت انها عجبتك و ان شاء الله وجهك ابيض دايما يا حق

15 الكاتب سارونات, on 19-09-2008 01:42
السلام عليكم و رحمة الله و بركاته
بتعرفي اختي منى هالكاتو الو مكانة خاصة عندي لانو اول كاتو جربتو من الموقع بل اول وصفة و كتير فرحت فيه لان طلع طيب اول مرة بالرغم من انو ما نفش كتير و كمان الصوص اللي نشف بتعرفي المرة الاولى استعمت كأس صغير للقياس لهيك اجت صغيرة و ما نفشت كتير و اليوم رجعت ساويتو بالكأس اللي صرت معتمدتو للحلويات اللي حجمو تقريبا نفس حجم كاسك المهم انو نفش و طلع بيجنن نفشششششششش :grin

بس للاسف ما زالت مشكلة الصوص قائمة يعني قبل ما خلص حطها كلها نشفت و بالتالي بتخلي السطح اقل طراوة و مائل لليبوسة ما عرفت شو المشكلة اكيد لما الصوص يكون متل ما هو بالصورة بتطلع طعمتو لان هيك ما عم تطلع طعمتو و كأنو تقريبا مو موجود بتعرفي شو اختي منى ان شاء الله بعد العيد بنتناقش لحتى نعرف شو مشكلة الصوص و ان شاء الله بنوصل لنتيجة و راح ظلني وراه تحتى يضبط
بالتوفيق
سلام

16 كاتو بالمايكرويف
الكاتب basma, on 08-11-2008 05:17
يسلمو إيديكي كتير الوصفة لذيذة وأهلي حبوها وشوي تانية رح ياكلوا الصحن مع إنو أنا ما كان إلي بالمطبخ لا ناقة ولا جمل بس كتييييييييييييير طلع طيب

عملته بالمايكرويف بقالب زجاجي خاص بدل الفرن وخلال ربع ساعة كان جاهز تمام ونفشششش وما في منه وفيه ناس يمكن بيقسى معن الكاتو إذا عملوه بالمايكرويف والسبب بهالشي إنن بيحطوه بالتلاجةبعدين، بس إذا بدن ياه يبقى طبيعي ما في داعي يحطوه فيها و رح يحافظ هيك على لياقته البدنية

ويسلمو مجدداً
والحمد لله على سلامة الموقع

حلو هالإيموشن على فكرة:

حسيته أنا

17 الكاتب منى, on 09-11-2008 06:03
ووااو
يا ستي لو بعيش مية سنة تانية ما بيخطر ببالي جرب كيك بالميكرويف , و منكم نستفيد

هنا على قلبك و قلب اهلك و ربي يسملك و يخليك

على فكرة هادا الايموشن كمان بعزه كتير

يلا مو من قليل صرنا ميمو واحد و ميمو اثنان :grin

18 يا ترى سكر بودرة؟
الكاتب souha, on 22-11-2008 14:17
كيفك منى بدي اسألك منى بشكل عام لما بتذكري بأي وصفة كاتو سكر ناعم بتقصدي سكر بودرة ولا سكر حبيباتو ناعمة

19 الكاتب منى, on 22-11-2008 15:58
بقصد سكر حبيباته ناعمة أكيد

20 الكاتب سارونات, on 02-04-2009 17:28
السلام عليكم و رحمة الله و بركاته

عبالي ارجع جرب هالكاتو من رمضان ما ساويته ومتل ما قلتلك بالمرة الماضي نفش و طلع تمام التمام بقيلي بس الصوص يضبط معي

السلام عليكم و رحمة الله و بركاته

اختي منى بالنسبة لعجينة الكيك هل ممكن نستبدل الزبدة بالزيت او ما بينفع و اذا بينفع شو بيتغير

بالتوفيق

سلام

21 الكاتب سارونات, on 02-04-2009 18:12
السلام عليكم و رحمة الله و بركاته

اكتشفت شي بيموت من الضحك :grin

و هو اني استعملت سكر بودرة لعجينة الكيك و طلعت بتجنن لان متل ما قلتلك هالوصفة هي اول شي جربتو بالمنتدى و كنت مفكرة السكر الناعم هو السكر البودرة و بالمرة التانية اللي جربتها شفت الوصفة من الكراسة اللي كتبتها فيها و بالتالي حطيت سكر بودرة و اذا عرفنا انها بتنفع بالسكر البودرة و المرة الجاية اللي راح ساويها فيها راح حط سكر عادي و منشوف هل راح يكون في فرق بالطعم و الطراوة او لا

بالتوفيق
سلام

22 الكاتب منى, on 02-04-2009 20:11
هلا سارونات

ممكن تستعملي السكر البودرة او الناعم لقلب الكيك , تقريبا ما في فرق , الفرق الوحيد بالطعم , يعني كوب من السكر البودرة كميته اكبر من كوب من السكر الناعم

ممكن تستبدلي الزبدة بالزيت بس الطعم رح يكون فيه فرق كبير , يعني بالزبدة رح يطلع كيك بيجنن ,. و بالزيت رح يطلع طيب و عم احكيك هيك لان اامبارحة كان عندي سهرة و سويت هل الكيك بالزيت و طلع طيب بس مو متل ما بيطلع معي دايما

23 الكاتب سارونات, on 03-04-2009 21:51
السلام عليكم و رحمة الله وبركاته

نعم صحيح اختي منى كمان انا اليوم ساويته بزيت و طلع طيب بس مو متل لما يكون بالزبدة بتحسي في لمسة فخامة ناقصة
على كل بالاثنين بيطلع طيب و كل مرة حسب المتوفر سواء زبدة او زيت

بالتوفيق
سلام

24 الكاتب منى, on 04-04-2009 08:22

25 الكاتب DOUHA, on 05-04-2009 00:15
جربتوا طلع هااااااااائل
جد مرسي

26 الكاتب منى, on 05-04-2009 13:48
هنا و الف عافية ضحى حبيبتي

هادا بس منزووءك , غيرك عم يجرب و ما بعرف الا صدفة ان عجبو

, ريتو الف صحة بكل لقمة يا زووء

27 الكاتب سارونات, on 30-06-2009 14:21
السلام عليكم و رحمة الله و بركاته

اختي منى رجعت عملته امس بالزيت و طلع كتير طيب اطيب من المرة الماضية و نفش منيح و هش و كل شي و هالمرة ذوبت شوكولا و دهنتها فوقه و بعدها رشيته بشرائح اللوز و طلع شكله كتير حلو كمان بس للاسف ما صورته لان كان الوقت متأخر
جازاك الله خيرا اختي منى و عن جد حتى بزيت بيطلع بيجنن و كمان تخفيض للسعرات الحرارية :grin

بالتوفيق
سلام

28 الكاتب larooo, on 28-04-2010 22:30
مساء الخير
اليوم جربت الكاتو للمرة التانية
كلو طلع تمام والطعمة كتير طيبة
بس الكاتو عن يتشقق شوي من فوق ..ياترى شو السبب

بس كتير طيب والصوص كمان طيب

29 الكاتب منى, on 29-04-2010 07:55
هلا سارونات

الف صحة و هنا , و منيح انك عدلت الوصفة لحتى تظبط على زووءك , عوافي :zzz

هلا لارا

ايه ممكن يتشقق من دون سبب او لانك زدتي عليه بالخبز

الف صحة و هنا على البك و الب كل مين داق , بكل لقمة صحة يا رب

30 الكاتب semo, on 19-05-2010 21:03
ممممممممممممممممم تعديل جديد عالوصفة شدتني الصورة بالفيس بوك قلت خليني شوفا بالموقع بصراحة بستمتع أكتر فيها هون لأن هون بيتي وباخد راحتي فيه

من فترة جربتو فعلا كتير طيب بس الصوص كان قاسي
بس هيك أكيد رح يضبط أكتر يسلمو منوش ياعسل

31 الكاتب karamela, on 27-05-2010 14:23
السلام عليكم ورحمة الله اخت منى
مبارح جربت هالكاتو ونجح معي وكلو تمام التمام بس مشكلتو هالجليات اللي بيطلعوا من ورا :upset

انا من راي تعملونا قسم اسمو لجلي اخف :grin

يسلم ايديكي يارب على كل شي

32 الكاتب karamela, on 27-05-2010 14:32
اخت منى لو سمحتي سؤال
شفت بالاسئلة الشائعة بطريقة تحضير القشطة في المنزل الالة اللي بتستخدميها وانا بحاجة لهيك الة خصوصا مشان خفق اكل البيبي
ياترى بتنصحيني اشتري نفس الماركة انا شفتها بالمحل بس بوعاء واحد اللي مأشرة عليه بالسهم وبرايك استطاعتها بتكفي لاني شفت من نفس الماركة استطاعات اكبر
وياريت تاكديلي اذا تبعيتك بوعاء واحد ولا بوعائين
شكرا الك مقدما

33 الكاتب منى, on 27-05-2010 23:56
هلا سمسمة

و الله بيتك حبيبتي و انا كمان هيك بحس و هل البيت من دون ناسه ما اله طعمة , الله يديم هل اللمة الطيبة

ممكن يكون القساوة من السكر , و اذا حابة ان شاء الله تجربيه مرة تانية و يكون متل ما بتحبي

34 الكاتب منى, on 28-05-2010 00:02
هلا كرميلا

, ما في حل للجلي , الله وكيلك بعد ما خلص ابداعات بطلع على المطبخ بيكون شكله بيفتح النفس على الاخر و هات يا فرك لحتى يرجع كل شي على مزاجي

انا الي عندي بوعاء واحد , بس هلا طالع احدث و اكيد كل ما كانت الاستطاعة احسن بيكون احسن و ماركة بوش ممتازة كتير , بس لو كان الايد معدن احسن .

انصحك ببوش و لو استطاعة اكبر لا تقصري و لو الايد ستانلس ستيل احسن و احسن

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 18/05/2010 )

< السابق		التالى >

[ عودة ]