L2ma.com | لقمة طيبة | L2ma.com | لقمة طيبة | كاتو بسيط و مميز | كوب, حتى, المزيج, عصير, · | L2ma.com

القائمة الرئيسية

الأكثر تصفحاً

كاتو بسيط و مميز

الكاتب/ منى

04/08/2007

هذه الوصفة لا تحوي شيئاً مميزا بالمقادير و لكنها لذيذة و بسيطة و سيسألك عنها كل من يتذوقها . يمكن اعتمادها كقاعدة للعديد من الوصفات ثم التفنن بطرق تزيينها . أتمنى أن تجربيها و تحكمي بنفسك ..

بالصحة و الهنا

5 بيض بحرارة الغرفة
فانيليا
بشر حبة ليمونة أو برتقالة ناعم ( اختياري )
كوب و نصف سكر ناعم
ثلاث أرباع كوب حليب دافئ
ربع كوب عصير ليمون
2 كوب و نصف طحين حلويات فاخر
2 ملعقة صغيرة بيكنغ بودر
رشة ملح
ثلث قالب زبدة طرية

زبدة لدهن القالب
direction

·          يمزج الحليب الساخن مع عصير الليمون و يترك أثناء خفق البيض , ينخل الطحين مع البيكنغ بودر و الملح , تدهن صينية فرن متوسطة الحجم بالزبدة و يحمى الفرن على درجة حرارة 180 درجة مئوية .

·          يخفق البيض و الفانيليا و البشر في حال استخدامه حتى يصبح المزيج هشاً ثم يضاف السكر الناعم و يخفق الكل حتى يشتد المزيج و يبيض .

·          يضاف مزيج الحليب و عصير الليمون و الزبدة بالتناوب مع الطحين المنخول و يقلب المزيج بخفة بعد كل اضافة حتى تنتهي المقادير و يتجانس المزيج .

·          يصب مزيج الكاتو في الصينية المحضرة ثم يخبز في الفرن مدة 45 – 60 دقيقة أو حتى ينضج .

فكرة لذيذة :

يمكن أن تكسبي الكيك مزيدا من الطراوة و النكهة التي تفضلينها , اغلي كوب أو كوبان من أي عصير أو شراب مفضل عندك مع القليل من السكر و اتركيه على النار لمدة 10 دقائق ثم صبي الشراب الغالي على الكيك حال نضوجه و خروجه من الفرن و اتركيه حتى يبرد .

أضافة إلى المفضلة (1) |

أقتباس | مشاهدات : 6548

تعليقات (39)

1 هل يفرط الحلـيب لديك عند إضافة الليمون ؟
الكاتب basema, on 26-02-2008 20:21
شـكراً كثيـر يا مـنى على تعـب المحبـة , وصـفات أكثـر من روعـة ... بالحقيقـة أنت سـت بيت شـاطرة والله يعوضك كل خير لتعليمنا ما تعرفينه بكل صـدق ومحبـة ...
عنـدي سـؤال إن سـمحت : بعـد تجربـتي لوصفةالكاتو هذه, لم ينجـح الكاتو معي , كون كل ما أضـيف الليمون للحلـيب يفرط الحليب ويبرغل!!! هل من حل؟؟؟

لك مني كل الشـكر

2 الكاتب منى, on 27-02-2008 06:00
هلا أختي بسمة

رد حلو متل اسمك الحلو ,, كلك زووء و مية اهلا و سهلا فيك

أختي طبيعي ان الحليب بيفرط بعد اضافة الليمون , يعني هادا هو المطلوب , و إذا مو حابة هل القصة فيك تستخدمي كوب حليب دافي عوض عن ثلاث ارباع كوب حليب مع ربع كوب عصير ليمون

3 الكاتب basema, on 27-02-2008 15:41
شـكراُ كثير يا منى ... إنشاء الله ببقى بجربه مرة ثانية وبقول لك شلون حايطلع معي ... إنشاء الله ينفش هالمرة :upset

4 الكاتب منى, on 27-02-2008 17:36
:roll

اااه ما نفش معاك ! طيب يمكن استعملتي طحين عادي أو حرارة الفرن مو محماية بشكل منيح , أو البيض ما انخفق منيح :roll

..

و على كل الاحوال ازرعيها بدقني و ان شاء الله اذا جربتيه مرة تانية يعجبك

5 المحبة لكم
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 09-12-2008 10:56
السلام عليكم

كل عام وانتم بخير وعساكم من عوادة اجمعين
هذا اول يوم اسجل في موقع وهو اول موقع يعجبني خصوصا منى التى احببتها من قلبى وانالماراها قط يمكن طيبتها الواضحة على كتاباتها الله يسعدها ووفقها و يسخر اولادهالها اميـــــــن
الكيك روعة إن شاء الله اجربه
منى ماحجيتي او اح الاعضاء؟

6 الكاتب منى, on 09-12-2008 11:11
و عليكم أفضل السلام و أتم التسليم تولين

ردك فرحني كتير , ان شاء الله كل سنة و انت و اهل بيتك كلهم أقرب و احب الى الله و بفضل و صحة و خير
الف شكر الك للدعوة الغالية , الك متلها و احلى اختي

ان شاء الله تجربي هل الكيك و يعجبك .

أأخ يا اختي , لسا ربنا ما اذن الي بالحج , و كل سنة قلبي بيدوب على الحجاج بعرفات , ربي يجعلني منهم عاجلا غير ااجل يا رب العالمين

و بقية الاخوات ما حدا فيهن راح للحج هل السنة , ربنا يجمعنا بعرفات اجمعين :zzz

مية هلا اختي نورتي

7 الكاتب ام عمر, on 28-01-2009 15:34
تسلم ايدك

بس ممكن مقدار الزبدة بالغرام :cry

8 الكاتب منى, on 29-01-2009 10:49
أختي القالب الي استعمله وزنه 225 غ ثلته رح يكون 75 غ

9 الكاتب شوق, on 04-02-2009 10:27
شكرا اختي منى على الوصفة، جربت الكيك مبارح كثير طيبة، يسلموا يديكي.

10 الكاتب منى, on 04-02-2009 11:16
الله يسلمك شوق و الف الف عافية على الكيك بكل لقمة و فرفوطة

11 الكاتب أم الهدى, on 17-02-2009 08:43
حبيبتي عندي سؤال خاص بهالكيكة وبكل أنواع الكيك التانية
فيني أحط زيت بدل الزبدة ، كيف فيني أعرف إذا بقدر أستبدلو ولا لأ لازم زبدة وفي حال استعملت زيت بدل الزبدة بحط نفس المقدار ولا بغير
ومشكوووووووورة كتير كتير

12 الكاتب منى, on 17-02-2009 12:26
هلا ام الهدى

بصراحة انا كتير احيان استبدل الزبدة بالزيت بس في وصفات كيكات الشوكولا أو كيكات البهارات , بحس أن الطعم ما بيظهر , هو اكيد بتبقى الزبدة أطيب بس الزيت أسهل .

إذا حابة تستبدلي تضيفي نفس المقدار تمام , نصف كوب زيدة بنصف كوب زيت و هيك

13 الكاتب سارونات, on 07-03-2009 12:12
السلام عليكم و رحمة الله و بركاته
يعطيكي العافية اختي منى
سؤالي المعهود كم هو حجم الصينية و الله يجازي اختي ام هدى على هالسؤال لان عطول بيخطر ببالي يعني هالشي بينفع لما بتنضاف الزبدة طيب اذا كانت الزبدة راح تنخفق مع السكر شو منساوي ساعتها يعني منخفق زيت مع سكر بالخفاقة الكهربائية او بس بمضرب السلك

شو كمان

اختي منى اذا كنت مستعملة هالوصفة يعني ساويتيلها حشوة او تغليف يا ريت تحطي الوصفة لما بتقدري مشان تكون عينة و بعدها يمكن نبتكر اشياء تانية شو قولك

كمان شوقتينا كتير لكاتو الفواكه شو قرب وقته او لا

اليوم صاير يوم الطلبات اختي منى مو قلتيلي في مفاجأة بهاداك اليوم و راح تكون بعد شهر وينها

بالتوفيق
سلام

14 الكاتب سارونات, on 07-03-2009 12:16
السلام عليكم و رحمة الله و بركاته
نسيت شي مهم)) مو قلتلك اليوم يوم الاسئلةو الطلبات العالمي :grin

))

على علمي قالب الزبدة اللي معودة تستعمليه وزنه 200 غ لتكوني غيرتيه او بس مشان هالوصفة او اصلا انا غلطانة بالنسبة لل 200غ

سلام

15 الكاتب منى, on 10-03-2009 12:47
اختي الصينيةى الي استعملتها هون بحجم 26 سم أو 28 سم

أختي الحشوة ممكن تكون فولكه , شوكولا مدوبة أو كريما شانتيه ؟أو مربى انت و زوءك

ان شاء الله قرب , هي كم وصفة بس

اختي الزبدة الي استعملها ممكن تكون احيانا 200 و احيانا 225 و على هل الكمية ما رح تفرق كتير , يا دوب ربع ملعقة :zzz

16 الكاتب سارونات, on 10-03-2009 22:48
السلام عليكم و رحمة الله و بركاته

يخليلي ياكي اختي منى

طيب اذا بدي احشيها فواكه بس قطع الفواكه و صفها يعني ما بضيفلها شي لان هيك راح تطلع ناشفة مو هيك

و كمان اذا حشيتها فواكه بدي اعرف قديش بتضاين لان بعتقد بتضاين اقل من باقي الكيكات بحشوات تانية او هذا يعتمد على نوع الفاكهة

بالتوفيق

سلام

17 الكاتب منى, on 11-03-2009 11:04
اختي بتحشيها و بتشربيها من عصير الفواكة و هي بالفعل ما بتضاين لان الفواكة لازم تتاكل بسرعة بعد ما تقطعيها

18 شكرا كتير
الكاتب mazon, on 15-08-2009 23:59
يعني انا هلئ لحتى طلع معي الموقع بالصدفة ..كنت عم دور ع وصفة كاتو سهلة ومجربة ع غوغل ..قمت اكتشفت هالموقع الرائع..
يعني جد شكرا كتير شي بيرفع الراس
شكرا مرة تاينة

19 الكاتب منى, on 16-08-2009 07:35
الشكر الك و لهل الرد و اتمنى ان تبقي معنا على طول و كمان اتمنى ان تجربي شي و يكون على زوءك

20 thank you alot
الكاتب حمودي, on 30-12-2010 07:39
يسلمووووووووووووووووووووووووووووو ع الوصفه
انا اخذت كم طريقه للكيك من الموقع
وان شاء الله يضبط معيه
............
اي بس في سؤال بسيط ع الوصفه !
قوام البيض كيف يكون ياريت توضحي اشوي
اي كمان اقدر اخفقه بالخلاط العادي او السلك بدل المضرب الكهربائي
.............................

شكراً لكي كل جهودك الرائعه والجميله والوصفات المميزه والسهله

21 thank you alot
الكاتب حمودي, on 30-12-2010 07:42
انا اخذت كم وصفه كيك من الموقع وان شاء الله اجربها
.................
بس في سؤال بسيط ع قوام البيض ( ياريت توضيح بسيط )
وضروري نخفقه بالمضرب الكهربائي ؟
ولا بالخلاط او المضرب السلك
...............
شاكرلك جهودك الرائعه والمميزه

22 الكاتب منى, on 31-12-2010 11:16
مية اهلا و سهلا فيك اخي , منور اتمنى ان الوصفات الي ناوي تجربيهاو تزبط معك و تكون تمام و متل ما بدك او احسن

البيض نخفقه لحتى يصير كانه هواء او مليان فقاعات هوائية و اذا جيت لتمسكه بتحس انك ماسكة رغوة
اما بعد ما نضيف السكر و نخفقه فرح يسمك و يصير لونه ابيض و متل الكريما

انا استخدم الخفاقة الكهربائية و هي بتعطينا النتيجة المزبوطة و الي ما رح نحصل عليها بالخلاط

اذا مو متوفرة الخلاطة الكهربائية ممكن تستخدم مضرب السلك , بس بياخد وقت , انا عني هلا اتعطلت خفاقتي باخر مرة عملت كيك بنص عملية الخفق , فكملت انا على ايدي بس كانت عملية متعبة جدا , لهيك اتناوبت عليهال
انا و الاولاد :grin

ايا سؤال تاني من عيوني , و مرحبا فيك مرة تانية

23 يسلمووووو
الكاتب حمودي, on 31-12-2010 18:20
كلك ذوق
عن جد يسلموووووووووووووووووووووووووووووووو

24 تجنننننننننننننننننننن
الكاتب حمودي, on 02-01-2011 14:44
انا جربت الكيكه طلعه حلووووووووووووه كثير
..............
وان انصح كل محبي الكيك تجربه هذي الكيكه مذاقها حلو كتيررررر وشكلها راقي
..............
فكره:
بعدان تخرجي الكيكه من الفرن وهيا حاره تدهني وجهها بشراب الفيمتو ونرش عليها جوز الهند
.............
مع خالص تحيااااااتي للجميع وخصوصاً شيفتنا الحلوه منى
Ahmed

25 الكاتب منى, on 02-01-2011 19:48
الف الف صحة و هنا , و انا مبسوطة كتير لحماستك لتجربة الوصفة , صحتين و عوافي على البك و الب كل مين داقها

فكرة حلوة كتير , اكيد عطتها طعم و خلت شكلها حلو , شكر للاضافة و صحتين مرة تانية

26 مابعرف كيف ؟
الكاتب حمودي, on 10-01-2011 14:54
مدام منى كيف يكون القوام تبع الكيكه
عندي يصير سميك كثير
وكمان بعد ان تنضج تصير قويه اشوي
..........
شو رايك نقلل كميه الدقيق لاني عم استعمل دقيق عادي مو خاص بالحلويات
...........
شو رايك ؟

27 الكاتب منى, on 10-01-2011 19:40
ممكن تجرب اخي , بس كيف عم ينجح معك الكيك بطحين عادي :roll

انا رايي ان المقادير صعب تتغير و لازم تكون على الميلي

28 اووووووه
الكاتب حمودي, on 12-01-2011 16:25
هيا صارت حلوه نفشت وكمان طعمتها طيبه كتير بس
تصير سميكه
.............
ماعليش انا رح جرب وخبرك بالنتائج
.........
اي مدام في القشطه المنزليه كم حوالي تعملي حليب ولازم يكون مركز ولا تبع الشرب
.........
مع خاااااااالص تحياتي
Ahmed

29 الكاتب منى, on 13-01-2011 07:21
انا بغلي حوالي 3 او 4 كيلو حليب طبيعي طازج و كمية القشطة تختلف كل مرة

رح استنى اخبار بالي صار معك

30 هذا لازم قبل كل شي
الكاتب حمودي, on 14-01-2011 17:49
مدام منى بترجاكي من كل قلبي والله تعبت انا والكيك والحلويات
يعني ارفعي صور للكوب تبعك
...........
مخ خالص تحيااااااااااااااااااتي لكي
Ahmed

31 الكاتب منى, on 15-01-2011 12:14
اخي الكوب الي استعمله هو الكوب المعياري الي عياره 250 مل للسوائل , و في حال ما اتوفر عندك ممكن تستعمل الكوب الاحمر الي بيجي هدية مع النسكافييه لان هو قياسه بنفس قياس الكوب المعياري

32 الكاتب رغد غسان علاء الدين, on 27-01-2011 12:35
غرف قلبي عاللي عميسألو عن الزبدة بالغرام..عنجد برافو..ستات هالبيوت ممتازات..بدهن يعملو شي مرتب..

33 الكاتب منى, on 27-01-2011 23:10

34 الكاتب رغد غسان علاء الدين, on 26-02-2011 11:49
امبارح جربت هالوصفة والنتيجة واو..بس شو ملاحظتي؟ إنو الكمية طلعت كتير كبيرة..فلحالي قدرت قبل ما احطها بالقالب..فطيت التلتين بالقالب والتلت الباقي بقالب الكب كيك..وهي كفت ما شالله..منيح ما حطيتها كلها بالقالب..خيتو كني انا إيدي خضرا :grin

المهم النتيجة غير شكل..أنا بحب يوم الجمعة ..السهرة يكون فيها شي حلو وعصير وهيك قصص

((طبعا كالعادة حطيت الصورة بالألبوم يا ميمو))

35 الكاتب منى, on 26-02-2011 13:06
صحتين و الف عافية رغودة

الحمد لله انك اتصرفتي متل مو لازم , بتعرفي هلا انا نفسي بمقاديري الي بعملها من الف سنة مرات بتفرق عن مرات

36 الكاتب مرجانة البحور, on 28-04-2011 08:35
يسلموو دياتك اخت منى وربنا ما يحرمنا منك ممكن استبدل الزبدة بالسمنة ؟؟؟؟

37 الكاتب منى, on 28-04-2011 10:36
لا اختي , السمنة ما بتنفع للحلويات الغربية لان نكهتها قوية

38 لك هادا نفسو !!!
الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 21-07-2011 16:58
السلام عليكم

كيفكن صبايا ؟
بس قبل ما انسى ، دايما بدي اسأل شو عنوان ألبوم رغد :grin

عطول بقرا انها حطت هالأكلات .. بس وين ؟!
منوش لك هي مو نفس مقادير الكاتو الرخامي على طريقتك تقريبا ؟؟ في شوية فرق بس بكمية المقادير.
أنا عاملة من هالقسم شي 5-6 وصفات، واعتمدت منهم وصرت كررون ، وأكترون هو الكاتو الرخامي عطريقتك. يعني نفس هادا.
أنا بستخدم تقريبا دايما الزيت بدال الزبدة، أسهل وأرخص ههههههه (ما شاء الله أرخص بعشر ليرات!). وبصراحة شديدة ما عطول بعمل نفس المقادير بالميلي ، يعني صرت حتى عالنظر أحط :grin

معلمة !!! ههههههه
وطبعا عطول دايما بينجح، ليش بيقولوا مقادير الكاتويات لازم بالميلي؟؟
طبعا كل مرة بحط نكهة شكل، شي رخامي بس على توت بدال الشوكولا، شي بنكهو بنكهة الموز الصناعية، اليوم عملتو بالكاكاو وضفتلو قرنفل وقرفة

وهي صورتو :

مع هالأربع وردات الباقيات من أولتا امبارح ههه هيك شكلو متل البراونيز هع صحي حابة جرب شي وصفة براونيز، عجب في هون بالموقع؟ رح دور، إذا مافي رح جرب كم وصفة الأسبوع الجاي وحط. في واح زلمة عاليوتوب يا لطيف شو شاطر وكل وصفاتو بسيطات وناجحات، وانا منزلة كل فيديوهاتو (إذا حدن بدو ممكن انسخلها الدي في دي)، وهاي قناتو :
http://www.youtube.com/user/robjnixon
عندو براونيز بيجننوا

المهم فتنا بموضوع مانو علاقة هههههههه .. ايه كيفكون انتوا؟

شكرا منى

والسلام عليكم

39 الكاتب منى, on 01-08-2011 12:14
هلا ياسمين

يا ستي رغودة بتحط صورها بالبومها الي على الفيس بوك , انت ما عندك ؟
ما بعرف و الله ما انتبهت و قارنت , بس بكل الاحوال اخدت عشر من عشر لانك حفظانة الموقع تمام :grin

و الله ياسمين انا بشتغل بالغرامات و على الميزان , ما بحس حالي عندي اريحية الشغل على النظر , بخاااف
برافو عليك و الف الف صحة و عافية و هنا على كل النكهات و التغيرات و الابتكارات , بس كانو عم تنسي تاكلي عني :roll

يا ستي ما بقدر حمل شي من اليوتيوب , انترنتي مو سريع كل هل الاد , ممكن تعلمينا وصفته

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 16/08/2009 )

< السابق		التالى >

[ عودة ]