ورود جميلة , لذيذة , مقرمشة ..محشية بالمكسرات أو الكيري , تسقى بالشراب المنكه بالقرفة و القرنفل

ستلفت  أنظار الكل و سيسألك الجميع عن طريقه اعدادها ..

اعدادها سهل و لا يأخذ أكتر من ربع ساعة ,, و هنا شرحت لك  الطريقة بالخطوات المفصلة

بالصحة و الهنا

نصف كوب زيت ذرة أو دوار الشمس
ربع كوب لبن
نصف كوب سميد
بيضة صغيرة
ربع كوب زبدة ( 60 غ )
فانيليا
ثلاث أرباع ملعقة صغيرة بيكنغ بودر
ملعقة صغيرة خل
رشة ملح
من كوب إلى كوبان طحين

الشراب :

ثلاث أرباع كوب ماء
ثلثي كوب سكر
ملعقة صغيرة عصير ليمون
بضعة أعواد قرفة و حبات قرنفل ( اختياري )

الحشوة :

فستق أو جوز أو كيري

·          يحضر الشراب : يوضع السكر و الماء و القرفة و القرنفل في قدر صغير على نار هادئة و يحرك حتى يذوب السكر تماماً .

·          ترفع النار و يترك الشراب حتى يغلي ثم تهدى النار و يترك الشراب على نار هادئة لمدة خمس دقائق ثم يبعد القدر عن النار و يضاف عصير الليمون ثم يترك حتى يبرد تماماً .

·          يوضع الزيت و اللبن و البيضة و الزبدة و الخل و الملح في خلاط العصير ثم يمزج الكل , يضاف السميد و البيكنغ بودر و يخلط حتى يصبح المزيج ثقيل .

·          يقلب مزيج السميد على صينية ثم يضاف الطحين بالتدريج و يعجن بعد كل إضافة حتى الحصول على عجينة قابلة للمد و لا تلتصق باليد .

·          يحمى الفرن على درجة حرارة 175 , تغطى صينية فرن بورق الزبدة .

·          تفرد العجينة بشكل رقيق ثم تقطع دوائر بالقطاعة او بفنجان القهوة , تصف 5 أو 6 دوائر فوق بعضها البعض بشكل حبات الدوميو .

 

·          تلف الدوائر على بعضها البعض مثل السويس رول .

 

·          باستخدام سكينة حادة تقطع إلى قطعتين .

 

·          ترفع القطع بلطف و تحشى في قلبها بالمكسرات أو بالكيري ثم توضع على الصينية .

 

·          تخبز الورود الجميلة في الفرن الحار لمدة 20 – 25 دقيقة أو حتى تشقر و تنضج .

·          تخرج القطع من الفرن و تسقى الورود الحارة بالشراب البارد فوراً و تترك حتى تتشرب القطر و تبرد .

·          توضع ورود الجوري في ورق بليسة وتقدم مع الليمونادة أو الشاي و القهوة .

تعليقات (54)

2  الكاتب منى, on 01-10-2007 20:46 هلا رينو     حبيبتي انا ما جربت فرزه , بس على الاكيد إذا ناوية تفرزيه لازم تفرزيه و هو ني و بعدها بتخبزيه , قياساً على الكرابيج و المعمول ..  لان أنا بعملهم و بفرزهم قبل رمضان و برمضان بخبز على قدي تازة بتازة     إذا جربتيه خبريني يا عسل

4  الكاتب منى, on 01-10-2007 22:29 و الله الله يعينه , بشبهوا قبل رمضان للحامل بشهرها التاسع     عم استنى رايك

5  الكاتب نهال صبري, on 21-02-2008 18:09 شكله جمييييل جداً أخت منى ، أنا بدور على حلويات يكون شكلها حلو و توضع في ورق بليسيه لأصنعها في مناقشة زوجي للدكتوراة إن شاء الله ( بعد شهر و نصف لكن بحضر الوصفات من دلوقتي )و ده إن شاء الله أعمله .

7  الكاتب منى, on 26-02-2008 17:38 هلا نهولة , ان شاء الله تجربي الوصفة و تبيض وجهك يا رب , اللبن المقصود هو اللبن الزبادي و وصفته بتشوفيها على هل الرابط    أما هل المقدار قديه بيعمل فوالله مو متزكرة بالضبط , أظن ما بين 20- 25 قطعة , بس مو متأكدة

8  الكاتب نهال صبري, on 27-02-2008 18:01 جزاك الله خيراً منى ، أنا بالفعل جربتها أمس باستخدام الزبادي ( ماقدرتش أنتظر الرد ).. و عملت معي 18 قطعة ، و الطعم راااائع .

9  الكاتب منى, on 27-02-2008 18:06 صحةةة يا نهولة , كتير انبسطت انها عجبتك , مطري ما يسري يمري و ربنا يقومك بالسلامة انت و البي بي

10  الكاتب نهال صبري, on 07-03-2008 12:58 الله يسلمك يا حبيبة ألبي ..  عملت الوردات مرة تانية و عجبت صاحباتي جداً ( ما صدقوش إني عاملاها بنفسي !) ،،، حبيت أكرر شكري .

11  الكاتب منى, on 08-03-2008 09:45 هلا نهولة   صحة و مية هنا على قلبك و قلب النون الصغير و قلب كل صاحباتك    الشكر ليك انت حبيبتي و على زوقك

13  الكاتب منى, on 25-04-2008 22:43 الله يسلمك يا قمر يا سوسنة     تسلمي على الرد و الزووء كله

14  الكاتب الدمشقية, on 06-11-2008 08:16 تسلم ايدك حبيبت قلبي   لما ساويتها بالبيت طلعوا كلهم على المطبخ ليشوفوا شو السر بالشكل تبعها   واخواتي ورفقاتي يلي شافوا صورتها على الموبايل طار عقلهم فيها

15  الكاتب منى, on 06-11-2008 08:28 هنا و عوافي على قلبك و قلب كل العيلة , كتير انبسطت انها عجبتك

17  الكاتب منى, on 08-01-2009 05:57 الف هنا على قلبك و قلب محمد و رفقاته كمان   كتير انبسطت انها ظبطت معك نوارة و لا تنسي تاكلي عني كم قطعة

18  الكاتب رنا, on 25-03-2009 20:22 عندي سؤالين على هالورود الرائعة   اول شي  السميد ناعم ولا خشن؟  وتاني شي شو نوع الخل يلي رح استعمله خل ابيض ولا خل التفاح؟وشو اهمية الخل بهيك وصفة حلو

19  الكاتب منى, on 26-03-2009 12:34 جربتها بالسميد الناعم و الخشن و التنين ظبطوا     الخل الي استعملته خل التفاح و هو رح يعطي طعمة حموضة خفيفة و طيبة

20  الكاتب رنا, on 31-03-2009 17:27 مازبطت معي بالمرررررررررة  يالله شو غلبتني وبالاخير كبيتها نصها لانه مابقا تصير بالمرة   اول شي تفتفتت معي والعجينة ماكانت تمد مع اني حطيت كل المقادير مزبوطة وبالاول حطيت كاسة طحين بعدين صرت ضيف بالتدريج ومع كل اضافة تقسى العجينة ولما مدها تتفتت وماتطلع اكيد غلطت شي غلطة بس ياترى وين ؟؟لانه عجنتها زيادة ؟؟؟ احترت بامري

22  الكاتب منى, on 31-03-2009 20:42 ما عرفت وين الغلط , اصلا بالصور انا محضرتها بالسميد الخشن .    يمكن لو كنتي تركتيها بالبراد كان مشي الحال , يلا ازرعيها بدقني و خيرها بغيرها

23  الكاتب حنان, on 26-04-2009 16:51 يا منى حلوه الامورة اناسويتها وزبطت معي وطلعت حلوة والكل بيسالني عنها كيف عملته مين قالك عنها الكل اعجب فيها بس انا اعطيطهم اسم الموقع لقمة طيبه وكمان بدي اعذبك معاي افستق الحلبي مطحون ولا بيكون حب كامل وكيري هل ندهنهاعلى الدوائروشكرا

24  الكاتب منى, on 17-05-2009 11:15 هلا حنونة   الف الف عافية و صحة و هنا و ريتو مطرح ما مشى مرى   الف شكر الك للكلام الطيب و الموزء , و لمن حابة تستعملي المكسرات ممكن تختاري اي نوع و بالشكل الي يعجبك ة, ممكن تحطي حبة كاملة او شوي مفروم خشن أو مطحون ناعم بالنصف و الكيري كمان بتبعدي ورق الجوري الداخلي بطرف اصبعتك و بتحطي فيه مكعب صغير

25  سلامات الكاتب عبورة, on 30-08-2009 00:16 واخيرااااااااا  السلام عليكم عزيزتي منى...صارلي ساعة عم احاول الاقي طريقة ابعت فيها موضوع جديد؟؟؟وما عرفت كيف  اولا انا بدي اتشكرك على هالموقع الرائع......انا بالصدفة دخلت عالموقع ..كنت عم اعمل بحث عن طريق الدبس رمان ..لانو انا عايشة برا سوريا... ..  انا عندي وصفات كتير فيني اضيفهم بس يا ريت تقوليلي كيف خيتو  ومرة تانية ميرسي على هالموقع المدهش

26  الكاتب عبورة, on 30-08-2009 00:18 امبارح ما بقى يجيني نوم لجربت هالوصفة( وردات الجوري)  طلعت بتجنن

27  الكاتب منى, on 30-08-2009 14:08 هلا عبورة   ايه ها , هيك الشطارة و الشغل من اولها , نورتي اختي و مية اهلا و سهلا فيكي و الف صحة و هنا و عافية على الوردات     اختي فيكي تظيفي ايا وصفة كرد عادي و انا برجع و بضيفها باسمك     نورتي و شرفتي و مية اهلا و سهلا فيكي

28  الكاتب نوارة, on 08-09-2009 15:26 جربتن مرة تانية ماظبطو العجينة ما مدت صارت تتقطع يعني اول مرة طلعوا بجننو دائما بتصير معي المشاكل تاني مرة   عندك فكرة عن السبب

30  الكاتب منى, on 09-09-2009 08:02 هلا نوارة   منيح الي خطر ببالك تحطيها بالبراد لان هيك رح تساعدك العجينة اكتر , يلا المهم ان مشي الحال بالاخير

32  الكاتب منى, on 31-10-2009 00:30 هنا و عافية منال   يمكن كان لازم تزيدي شوية سميد , المهم انها طلعت بالاخير منيحة     الصورة لازم بالاول تحليها على شي موقع تحميل و بعدها بتحطي الرابط هون

34  الكاتب شفاء, on 18-03-2010 13:25 انا من وقعت ماسجلت بالموقع وانا عمبدخل هون وبقول لحالي الى ما اعملها    بس امبارح قررت قرار وجاهي غير قابض للنقض  اني لازم اعملها لضيوفي تغير عن الكاتو  وبعد ما عملت اول مقدار وقبل ما اخبزه  لقيته قليل فعملت مقدار تاني(لانه الشكل كتير عجبني)  وطلع كتيييييييييير طيب ولذيذ وشكله كتيييير رائع  بس وين النهفة انه لما اجا ابو الشباب من كتر ماعجبوه شكلاً وطعماً    خلاني اعمل كمان مقدارين مشان اصحابه بالمكتب    يعني عملت 4 مقادير في يوم واحد  وما ضل حدا ما سأل عن الطريقة والمقادير  وطبعا انا مشان اريح حالي بعطيهم اسم الموقع    بصراحة حابة اشكرك بالفعل مو بالكلام  بس مو عرفانة كيف   بس عكل حال انا قايمة قاعدة بدعيلك  ان شاء الله الله بباركلك بصحتك وعافيتك  وبيتك واولادك ويكتبلك حسنة بكل حرف بهالموقع الحلو  مع خالص محبتي

35  الكاتب منى, on 23-03-2010 08:54 صباح الخيرات شفا   بتعرفي اديه انبسطت بردك و بكل الكلام الحلو الي فيه , لثقتك في و لدعواتك الي اغلى من الدهب عندي    انا ما بدي شكر , دعواتك الي كفت و وفت و زيادة و الله , ان شاء الله الك متلهن انت و كل اهل بيتك .    مممم , صحتين و الف عافية على البك , اهم الشي انها عجبت الباشا و كمان شي تاني مهم ان ما تكوني نسيتي تاكلي عني كم قطعة قبل ما يطيروا

36  wow الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-06-2010 16:59 مرحبا منى   كيفك ؟  حبيت قلـّك إني جربت ساوي هالحلو الطيب  طالعت أكبر صينية عندي   .. عجنت العجينة و استخدمت سميد ناعم و عملت أول كم حبة و كانت روعة و ما غلبتني   بس فجأة خطرت على بالي فـَكـّورة (تصغير فكرة)   قسمت العجينة نصين .. تركت الاولى متل ما هيي .. و لونت التانية بلون الشوكولا .. بالكاكاو يعني و كملت شغل  دائرة بيضة و دائرة سودة و لـفـّن  طلعو كتـــيـــــر حلوين   بس يا دوب عبـّولي نص الصينية   تاني مرة رح أعمل عيارين ان شاء الله  و هاي الصورة قبل ما اخبزن      و بعدين فوّتـّن الفرن .. و لاحظت عليهن بعد فترة إنن فـَرَشوا .. يعني القاعدة و الوردات كبروا   هالشي عادي يا ترى   ما صورتن بعد ما طلعوا من الفرن لأنن راحوا أوام .. أنا أصلاً بلشت آكل منن و هنن بالفرن لسة   كتير كتير طيبات يسلموا إيديكي عالفكرة الحلوة الجديدة.....  7ayah

37  ....... الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-06-2010 13:43 كتير انبسطت بس شفت صورة ورداتي نازلة هون  بس ليش الصورة طلعت كتير كبيرة ياترى   و نصها طالع برى كمان   يا ترى شو كان لازم ساوي قبل ما نزلا هون

38  الكاتب منى, on 16-06-2010 20:34 وووووواااو , شو هل الصورة الي بتاخد العقل و الفكرة الحلووووة , و الله طالعين معك بيجننوا , يعني عيوني طلعوا من محلهم     ما شاء الله عليك     هنن رح يكبروا شوي بعد الخبز , بس مو كتير , يمكن لو بردتيهم شوي قبل الخبز رح يتماسكوا اكتر     مشان الصورة يا ريت لو تصغري حجمها ل500 بالعرض , بتطلع كتير مناسبة للموقع     سلم ايدك على هل التطبيق و شكرا لثقتك في

39  ............ الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-06-2010 21:23 سلام منى  هي الصورة بالابعاد الصغيرة  http://www6.0zz0.com/2010/06/16/19/860582836.jpg  ان شاء الله يمشي الحال هالمرة   و سوووري لأني عجأتلك الصفحة بالصورة   7ayah

40  الكاتب فرفوشة, on 20-08-2010 21:41 مرحبا منى  ويعطيك ألف عافية ع كل وصفة بهالموقع  صار جربت هالوصفة 3 مرات والحمد لله كل مرة بتطلع أطيب من اللي قبلها   بس عندي سؤال  هلأ أنامن لما بعجن العجينة لحتى أخلص بتعذب كتير وإيدي بيوجعوني لأنه لحتى تزبط العجينة وتنفرد وتتشكل مظبوط وما تسيح بقلب الصينية بتصير قاسية وبتحتاج مني عجن وتليين كتير بس اللي بصبرني إنها بتطلع طيبة   فهل اللي ع بيصير معي طبيعي؟ والا أنا ع برتكب خطأ من شان هيك ع بتعاقب؟

42  الكاتب hajar, on 26-11-2010 15:49 فعلا هالحلى شكلو بيجننننن انا لما جربتو اول مرة ما صدقت انو طلع معي هيك وردات شكلن حلو كتير جربتهم 4 مرات بحشوات مختلفة كيري وجوزمفروم ونارينج جربيهم بالنارينج كتير طيبين وهادا كان تطبيقي للوصفة

43  الكاتب hajar, on 26-11-2010 15:49 فعلا هالحلى شكلو بيجننننن انا لما جربتو اول مرة ما صدقت انو طلع معي هيك وردات شكلن حلو كتير جربتهم 4 مرات بحشوات مختلفة كيري وجوزمفروم ونارينج جربيهم بالنارينج كتير طيبين وهادا كان تطبيقي للوصفة

44  الكاتب رغد غسان علاء الدين, on 31-01-2011 13:13 خيتو في أصناف بحسها عبتصرخلي..إي إي..لا تستغربي بحسها هيك عبتصرخلي نظاااامي..رغوووود حبابة جربينا بلييييز..وهي منهن..صرختلي بصوت وقالتلي لازم تعمليني اليوم..وحاليا..بعتت الجندي المجهول لكل طبخاتي..ابني احمد..ليجيب المواد

46  الكاتب ream, on 15-02-2011 13:36 تسلم ايديكي شو هل فن والذوق  تجربتي مع العجين دائما فاشلة وبتعذب فيه كتير   بس شكلا مغري وجربتا -النيجة بتجنن بالشكل والطعمة وأكيد رح أرجع اعملها-بس العجينة ماطلع فارطة وعم تتشقشق وكتير تعذبت بلفن-حطيت كاستين ونص طحين-ياترى السبب الطحين كتير ولا شو؟بالصورة عجينتك رائعة ناعمة وسلسة-انا مو هيك طلعت معي

47  الكاتب منى, on 16-02-2011 00:09 هلا ريم   يمكن كان لازم ترجعي العجينة للبراد لحتى تصير ايسر بالشغل معك     بكل الاحوال صحة و الف هنا و ان شاء الله المرة التانية بيكونوا اسهل

53  طيبة :) الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-07-2011 18:32 السلام عليكم ورحمة الله    كيفكن ؟  هي من الوصفات اللي حبيتها من أول نظرة، امبارح لشفتها (كيف هيك ما بعرف)، وقررت فورا ان اول ما بفضى بعملها .. وبرغم ان اليوم ما كتير كنت فاضية بس عملتها وجرجور (بالجيم المصرية) عإيدي يعني فيكون تتخيلوني عم حط المقادير بإيد وماسكة بهزهز بكركوري بالإيد التانية.  والحمد لله خلصت عخير لو أن الشغل ما كان بقعدة وحدة.    واو واو وااااااااااااو .. شو سهلة وبسيطة واهم الشي طييييييبة ... بصراحة لما قريت الردود قلت اكيد حتطلع عندي العجينة متل الصبايا وما تزبط، بس الحمد لله كتير شهلة بالشغل وحلوة، انا قبل ما أشوبكها (يعني استخدم عليها الشوبك ) كنت امسحها بالطحين ، يمكن مشان هيك تشوبك منيح.  طبعا هالمرة وبما انها كانت تجربة أولى عملتون أشكال وألوان وأحجام المرة الجاية إن شاء الله بزبطون حلوين اكتر.  وهي تطبيقي :    اللي فوق هي رشة قرفة .. لأن القطر عندي من مربى القرع من حماتي كانوا قطرميزين، بئى بستخدمو لهيك وصفات، فما قدرت نكهو بالقرفة قبل. أمت رشيت القرفة رش يا عيني كمان شو طيبة. بس المرة الجاية متل ما قلتل بعملها مزبوطة بالشكل .    يسلمو دياتك منى خانم ... وثابري وإلى الأمام      والسلام عليكم ورحمة الله

54  طيبة :) الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-07-2011 18:36 طلع الرد الطويل السابق ولا لاء؟  ليه هيك لما منكتب ردود بتختفي ؟؟    عكل حال كان لعي طالع نازل عن الوصفة .. وبالي ما عاد طويل كرر الكتابة خصوصي بعد يوم عصيب مع الجرجور (بالجيم المصرية) ما بيضل في بال طاول     المهم هي تطبيقي :        وشكرا    والسلام عليكم

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved