L2ma.com | لقمة طيبة | L2ma.com | لقمة طيبة | سلطة الخضار و البندورة المجففة | مجففة , بندورة, فيتا, مفرومة, السلطة | L2ma.com

القائمة الرئيسية

الأكثر تصفحاً

سلطة الخضار و البندورة المجففة

الكاتب/ منى

15/03/2007

أو سلطة البحر الابيض المتوسط , من السلطات الي بحبها كتير , مقاديرها تعتبر من كنوز المطبخ المتوسط سواء الايطالي او اليوناني : فيتا , بندورة مجففة , خل بلسميك , و تشكيلة خضراء ما في اطيب منها لما بتكون بوقتها

الي بيميز السلطة انو ما الها تتبيلة قوية او بهارات معينة , الخضرة و معها زيت البندورة المجففة و عصرة ليمونة و كم رشة خل بلسميك , بس . طيابتها ببساطتها و ممكن تاخديها معك في رحلات الصيف , على البحر

بالعادة بحط للسلطة زيتون او عطون . بس هل المرة نسيت ضيفهم , مو مشكلة كانت السلطة طيبة كتير بهل اليوم الربيعي الحلو

بالصحة و الهنا

3 حبة خيار
جبنة فيتا , حوالي 100 غ
كوب من الزيتون الأسود أو الأخضر , منزوع النوى و مفروم لشرحات
2 حبة متوسطة بندورة , مفرومة
4 - 5 شرحة بندورة مجففة , مفرومة
2 ملعقة كبيرة من زيت البندورة المحفوظة
بصلة حمراء صغيرة مقطعة شرائح رقيقة
عصير ليمون
ملعقة صغيرة خل البلسميك
رشة ملح حسب الحاجة

للتزيين : أوراق نعناع أو زعتر أخضر
direction

· يقطع الخيار طولياً باستخدام قشارة البطاطا و تبعد البذر إن وجدت .

· تمزج الخضار مع الزيت و عصير الليمون و خل البلسميك في طبق كبير ثم ترتب في طبق التقديم و تقدم .

أضافة إلى المفضلة (0) |

أقتباس | مشاهدات : 2976

تعليقات (15)

1 الكاتب رغود, on 06-12-2007 06:36
تسلم ايديك يا منى انا بعمل هالأكلة و فعلا طيبة و من ايدك أطيب**

2 الكاتب منى, on 06-12-2007 10:20
الله يسلمك رغودة

كلك زووء يا عسل , و ما انحرم من هل الطلة الحلوة

3 الكاتب نورا, on 05-01-2008 16:06
سلامات يا منى... أنا ديماً في المطاعم بطلب سلطة وحيدة ومميزة جداً بالنسبة إلي بس المشكلة انه ما بقدر اعملها بالبيت لأنه ما بعرف صلصتها ...السلطة تسمى بمسميات عديدة تبعاً لكل مطعم احياناً سلطة كومبوزييه وأحياناً سلطة الشيف ووووو...
المهم مكوناتها بالميتو واسبيرج وبندورة وذرة وهليون وخس وحمض والباقي لا اعرفه.. إذا عندك فكرة عن طريقة تحضيرها ممكن تحطيها؟؟
ومشكورة سلفاً...

4 الكاتب منى, on 14-01-2008 16:49
هلا نورا

رح حط لك طريقتي و ان شاء الله تكون متل ما بتحبيها أو قريبة عليها

5 الكاتب نورا, on 23-02-2008 11:12
منى عبستنى طريقة صوص السلطة اللي سالتك عنها...
بالاحرى جوزي كل يومين تلاتة بيسألني وانا بقول له: عبستنى منى

فالله يخليكي إذا بتعرفيها او عندك فكرة عنها ممكن تنزليها؟؟ولك جزيل الشكر سلفاً

6 الكاتب منى, on 24-02-2008 11:48
هلا نورا يا أمورة , هلا نزلت لك السلطة و أسفة للتأخير .. بتلاقيها على هل الرابط

7 الكاتب سارونات, on 19-11-2008 13:43
السلام عليكم و رحمة الله و بركاته
عجبتني كتير مكونات السلطة و خصوصا فكرة تقطيع الخيار شرائح رقيقة
سؤالي هو هل يمكن استبدال جبنة الفيتا بالجبنة مثلثات مقطعة مكعبات او لا و ما مدى ضرورة البندورة المجففة بعرفها طيبة بس مو متوفرة عندي و راح الوقت للتجفيف هلأ و يعني الوصفة طارت بلا بندورة مجففة و زيتها او فيني ساويها بزيت زيتون
بالتوفيق
سلام
بالتوفيق
سلام

8 الكاتب سارونات, on 12-12-2008 22:02
السلام عليكم و رحمة الله و بركاته
شو قلتي اختي منى فيما يتعلق بالطماطم المجففة و الجبنة و كمان جربت قطع الخيار شرائح متل اللي بالصورة بس ما ضبطت معي :cry

اما تطلع سميكة او كتير رفيعةجربت قشارة البطاطا و جربت السكين بس ما نفعو
يا ترى في شي طريقة سهلة لتقطيعها شرائح او بس لازملها الكثير من المحاولات تحتى تنجح
بالتوفيق
سلام

9 الكاتب منى, on 13-12-2008 09:53
هلا سارونات

و لا مرة جربت الجبنة المثلثات في السلطة ما اتوقها لذيذة :roll

الوصفة طيبة بالبندورة و زيتها لو سويتيها ببندورة عادية وزيت عادي بتطلع طيبة بس مو هل الوصفة
الخيار لحتى يطلع هيك اما بتقسميه بالقشارة أو بالماندولين , هي الالة الي بتقطع الخضار رقيق كتير ما بعرف اذا عرفتيها

10 الكاتب سارونات, on 31-12-2008 12:49
السلام عليكم و رحمة الله و بركاته
نعم عرفتها للالة شفت مارثا ستيورت عم تستعملها للحصول على رقائق بطاطا بس ما كنت بعرف اسمها شكرا على المعلومة ان شاء الله ببقى دور على الماندولين
وا ن شاء الله راح جربها ببندورة و زيت عاديين لاني متمسكة بالفكرة و عبالي جربها
جازاك الله خيرا اختي منى
بالتوفيق
سلام

11 الكاتب منى, on 31-12-2008 12:55
ان شاء الله تجربيها و تحبيها

12 الكاتب منال, on 04-02-2009 11:45
سلام عليكم اختي منى كتير سمعت عن جبنة فيتا ما هي وهل تختلف عن الجبنه البيضاءومن اين نحصل عليها وشكرا :grin

13 الكاتب منى, on 04-02-2009 15:35
هلا أختي

هي نوع من انواع الجبنة البيضاء بس بتممز ان طعمتها في شي بيشبه الكريم مع ملوحة عالية و بتفتت بسرعة و هي نوع من انواع الجبنة اليونانية

ممكن تحصلي عليها من المولات الكبيرة بقسم الأجبان , اذا انت بحلب فهي متوفر دايما عند نيو تاون :zzz

14 الكاتب سارونات, on 04-06-2009 13:39
السلام عليكم و رحمة الله و بركاته

ساويتها للسلطة و طلعت طيبة كتير و متل ما بتعرفي انا كتير بحب الجبنه المثلثات لهيك حطيتها بدل الفيتا و طلعت طيبة كتير

جازاك الله خيرا اختي منى

سلام

15 الكاتب منى, on 04-06-2009 19:36
هنا و عافية سارونات

و لو المرة التانية تعمليها بالفيتا لسا رح تطلع اطيب و اطيب

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

آخر تحديث ( 23/04/2011 )

< السابق

[ عودة ]