يالنجي على طريقة أهل حلب

اليالنجي أو الدولما كلمة تركية و معناها أي نوع من الخضار محشي بحشوة أساسها الرز مع اختلاف البهارات من منطقة لمنطقة  , و الرز من دون لحمة لهيك اسمه المحشي الكذاب .

هي الحشوة ممكن استخدامها لتحضير أي نوع , دولما ورق العنب , دولما الفليلفة , دولما البندورة , دولما الباذنجان , دولما الكوسا , دولما البصل , دولما ورق الملفوف أو حتى دولما ورق السلق ..

في حلب نضيف القليل من البن في الحشوة و هو نفس البن الذي نستخدمه لتحضير القهوة التركية و برأيي البن و القرفة هم سر اليالنجي الحلبي الي بتكون طعمته مختلفة و مميزة عن ورق العنب بزيت الي بيتحضر هون و هون , و على فكرة هل الوصفة بالذات أنا مشهورة فيها بين عيلتي و رفقاتي .

لإضافة النكهة الحامضة لليالنجي أستخدم دبس الرمان و ممكن استبداله بعصير الليمون , و لكن طعم دبس الرمان أطيب بكتير .و أكيد ما بقى في لزوم لإضافة  أي حمض للمرق لأن حشوة اليالنجي ستعطي من حمضها و توابلها للمرق  .

بالصحة و الهنا

نصف كيلو ورق عنب مسلوق و جاهز
2 كوب رز مصري
4 حبة متوسطة بصل
نصف كوب جوز مفروم
نصف كوب زيت زيتون
نصف كوب دبس رمان أو عصير ليمون أو أقل حسب الذوق
كوب ماء مغلي

ملعقة صغيرة بن
ملعقة كبيرة معجون بندورة
ملعقة كبيرة دبس فليلفة
نصف ملعقة كبيرة قرفة
ملعقة صغيرة نعناع
نصف ملعقة صغيرة بهار مشكل
ملعقة صغيرة فليلفة حمراء ناعمة
1 – 2  ملعقة صغيرة سكر ( بعد التذوق )
ملح حسب الرغبة

·          يفرم البصل ناعماً ثم يقلى بنصف الزيت حتى يصبح شفافاً , يضاف الرز و يقلب لبضع دقائق أخرى حتى يصبح شفافاً أيضا .

·          تضاف بهارات اليالنجي و تقلب مع الأرز ثم يضاف معجون البندورة و دبس الفليلفة و الماء المغلي و دبس الرمان و تغطى الطنجرة و تترك على نار هادئة لمدة 10 دقائق أو حتى يمتص الرز كل السائل .

·          يضاف باقي زيت الزيتون و الجوز المقطع للرز , أصبحت حشوة اليالنجي جاهزة تترك حتى تبرد و يمكن أن تعدل البهارات و الحمض حسب الرغبة .

·          تجهز الطنجرة التي سيطبخ فيها اليالنجي , توضع طبقة من شرحات البطاطا و البندورة أو بضع أوراق من ورق العنب في قاع الطنجرة و ذلك كي لا تعلق حبات اليالنجي .

·          تمد ورقة عنب على طاولة العمل بحيث يكون الوجه الناعم ملاصق لطاولة العمل و الوجه الخشن هو الوجه الذي ستوضع عليه الحشوة , يوضع عليها ملعقة صغيرة من الحشوة و ترد عليها الأطراف .

·          تلف الورقة كما ظاهر بالصورة مع ضرورة الشد إثناء اللف ثم ترتب في الطنجرة المجهزة , يجب أن يكون اصبع اليالنجي سميك قليلاً و قصير , بعكس طريقة لف اليبرق أو ورق العنب المحشي بالرز و اللحمة .

·          تغطى أخر طبقة من اليالنجي بطبق واسع ثم يوضع عليها ثقل كي لا تفتح حبات اليالنجي أثناء الطبخ ثم تغمر بالماء المغلي و توضع على نار متوسطة و بعد أن تغلي تهدى النار و يترك اليالنجي حتى ينضج مدة ساعة أو ساعتين حسب نوعية ورق العنب , مع ضرورة اضافة المزيد من الماء المغلي إذا دعت الحاجة .

·          أخر خطوة و هي خطوة مهمة جداً و سر من أسرار اليالنجي : بعد أن ينضج ورق العنب يبعد عن النار و يترك مغطى حتى يبرد كي يمتص كل المرق و يصبح طري و يذوب في الفم .

·          يرتب اليالنجي في طبق التقديم و يغطى بورق نايلون لاصق حتى وقت التقديم .

أفكار و تنويعات  :

·          تذوقت مرة اليالنجي عند صديقتي و كان لذيذاً و مختلف قليلاً , سألتها عن الطريقة و أخبرتني أنها أضافت لقلية البصل حبة فليلفة حمراء و حبة فليلفة خضراء و ثلاث حبات من البندورة و بعد أن بردت الحشوة أضافت كوب من البقدونس مع الجوز  , جربت طريقتها و كانت لذيذة أيضاً .

تعليقات (92)

2  الكاتب منى, on 30-08-2007 07:11 أختي ام نور الحشوة طبخناها مع شوية مي لحتى نضمن ان البهارات و الصلصات امتزجت بشكل كامل و اتوزعت منيح على كل الرز     يعني حيكون الرز مستوي ربع استواء , و بعدها رح يكمل سواه مع ورق العنب ..    هلا رز اليالنجي ما بيكون مفلفل , بيكون طري و بيدوب دوبان في الفم     أتمنى أختي ان تجربيه و ان شاء الله يعجبك     و أي سؤال تاني أنا بالخدمة

4  الكاتب منى, on 30-08-2007 18:08 ان شاء الله رح يعجبك     فيك تقللي من كمية الحمض إذا كنت عم تجربي اليالنجي لأول مرة و تحطيها على ذوقك     أتمنى أختي أن تشاركي بطبق من الوصفات المغربية أو الجزائرية , بكون كتير ممنونة ليك     إذا جربتي اليالنجي أتمنى ان تخبريني ..    نورتي أختي

6  الكاتب منى, on 31-08-2007 10:58 أختي ابعتي الوصفة هون عن طريق اضافة تعليق و أنا بضيفها ..    هل الحل مبدئيا بس لحت نعمل وصلة لاضافة الاطباق     أنتظر مشاركتك أختي

7  الكاتب ام نور, on 31-08-2007 21:59 لو سمحت اخت منى عندك طريقة الكروسان كتير حابي جربهابس ما عندي طريقة عم اطلب كتير بس انت كريمة ونحن منستاهل

8  الكاتب منى, on 01-09-2007 09:43 تكرم عيونك أختي ام نور     انت الكريمة غاليتي و وصفتك هي أول مشاركة من زوار الموقع و أنا مبسوطة فيها كتير

10  الكاتب منى, on 02-09-2007 08:20 ما شاء الله عليك أختي ام نور     شرح كافي و وافي و الله ..    انا بعمل الحريرة , بس اذا انت أخذتيها من صديقاتك المغربيات معناها من مصدر موثوق     الله يخليك اختي و تسلمي على وجودك الطيب في الموقع

11  الكاتب nidaa84, on 04-09-2007 15:43 السلام عليكم ورحمة الله وبركاته على فكرة انا صديقة ام نور الحلبية يلى داقت عندى هل الاكلات يسلم ايديك اخت منى على هل الاكلات والله شى بشهى بس رجاء ممكن اطلب منك طريقة الهيطليه لانه نحن هنا لايوجد محلات لبيعها والله عم نترحم على سلورة والف الف شكر [/LIST]

12  الكاتب منى, on 08-09-2007 14:17 هلا نداء   نور الموقع بأخت جديدة و متل ما وصلت أخبارك من قبل ما تجي ,, نفسك كتير طيب على الاكل     تكرم هل العينتين , الهيطلية ما في أسهل منها و مو مستاهلة تترحمي على سلورة

15  الكاتب منى, on 08-09-2007 13:36 ما شاء الله عليك أخت نداء     و اتمنى ان تشاركي بأطباق من تحت دياتك أختي

16  الكاتب بدور, on 08-09-2007 18:50 الله يسلم هالايدين ويخليلنا هالموقع والاكلات الطيبين كلون     منى و انا عندي طريئة اكلة وحيدة و ما بعرف غيرا تعلمتا من رفيئتي بالاردن بيخطرلي بتعرفيها بس حبيت اشارك بشغلة     كمان ابعتلك ياها هون و انت بتشوفيها و بتنزليها؟  و اذا في عندك شي تعليئ او تعديل عليها نصحيني.  طبعا انا جربتا بنفسي يعني كمان عن تجربة وهي الفوتوتشيني

17  الكاتب منى, on 12-09-2007 17:04 يااا سلام بدورة     فتوتشيني مرة وااحدة     يلا انا بانتظار الطريقة بلكي بساويها شي يوم برمضان

19  الكاتب منى, on 08-10-2007 15:05 مية أهلا و سهلا فيك بتول     نور الموقع بأخت جديدة و عزيزة ..    ألف شكر ليك على الكلام الحلو     و ألف شكر ليك على تواجدك الطيب أختي     أنا و أخواتي كلنا كنا في فوزي الجسري , الدنيا صغيرة كتير

21  الكاتب منى, on 12-10-2007 12:46 مية اهلا و سهلا فيك أختي تورتاية بالكريز     اسمك من زمان عاجبني كتير كتير     و اسعدني جدا تواجدك في الموقع و كلماتك الحلوة , الله يجبر بخاطرك أختي   دبس الفليلفة ممكن يتحضر بطريقتين و هلا وقت اعداده أختي  ممكن تدخلي لهذا الرابط    أنتظر وصفتك أختي و الف شكر ليك مقدما , و يا ريت لو تكون من الوصفات المصرية اللذيذة

22  الكاتب arwen, on 23-10-2007 06:57 يعني ممكن سؤال غليظ...  بس مابدها ملح؟  ولا بلا ملح لانو انا بالطبخ يعني 4 تحت الصفر...

23  الكاتب arwen, on 23-10-2007 07:02 وشغلة تانيه تقبريني..  هلق المرقة اضفلها شي حمض ولا لا؟  لانو المي مابتخفف حموضة الحشوة..  لاتواخذيني بس حامل وعم بتشهون عاليالنجي والحامض هههههههه فخايفه تروح الحموضه بالمرقه

24  الكاتب منى, on 23-10-2007 07:27 و الله حسيت فيك , و يا ريتك جنبي لابعتلك أطيب يالنجي , بيكفيك تعب الحمل     هلا اكيد بده ملح , بس المرق ما بقى بدها حمض , و كمان انت و زوءك و حسب دبس الرمان الي عندك ..  أحيانا بيكون في انواع مغشوشة بعصير الليمون لهيك بتشوفيها حامضة زيادة  يعني الدوق هو الأهم , بدوقي الحشوة و لازم تطلع متل ما بتحبي حمضها , لان اليالنجي رح يرجع و يمتص المرق     و اي سؤال تاني تكرم عيونك

25  الكاتب arwen, on 23-10-2007 10:21 لك الله يسلملي ياكي يارب  خلص حطيته عالنار يابتفلح يااما بدي بطل مهنة الطبخ وسلم الراية لزوجي ههههههههه   بقى بخبرك يا قمحة ياشعيرة  ادعيلي امانة

26  الكاتب arwen, on 23-10-2007 10:24 يعني جد الله يسلم ايديكي عهالمقادير مومعقول ماشاء الله مضبوطه عالحبه اخر حبة رز لاخر ورقة عنب...عن جد يسلم هالايدين حلو الواحد يلاقي هيك موقع في معلومات مكتوبة بامانة..الله يقويكي ويجزيكي الخير

27  الكاتب منى, on 23-10-2007 11:02 كلك زووء أختي   عن جد شو انبسطت بكلامك , و هلا بقي علينا الدوق   ان شاء الله يكون على زووءك , بس لا تنسي تتركيه بالمرق بعد ما تطفي النار ..  لان هدا هو سر اليالنجي الطيب , بتلاقي اليلانجيات رجعوا شربوا المرقة , و يم يميي

28  الكاتب arwen, on 23-10-2007 18:33 ياستي قمحه وطيبه كتير كتير   وسكبت لجارتي قام قالتلي مالي خبر بتعرفي تطبخي؟ههههههه  شايفه شو بيضتي وجهي الله يبيض وجهك يارب

29  الكاتب منى, on 23-10-2007 20:13 ان شاء الله عوافي و هنا و صحة على طول يا رب   كتير منيح , ما دام اليالنجي نجح معك معناها بقية الطبخ مو مشكلة     الله يقومك بالسلامة انت و البي بي

32  الكاتب منى, on 07-02-2008 12:10 هلا كوكو يا عسل   البن و القرفة هم السر كله , ما فيني خبرك إذا ما دقتي الطعم بنفسك , نحنا عنا اليالنجي هو بطعمة الحامض و الحلو من استعمال دبس الرمان مع السكر ..    أختي انا حتى احيانا بضيف أكتر بن , بحب طعمته كتيررر كتير , و أنا على فكرة مشهورة باليالنجي الي بعمله     إن شاء الله تجربيه و لا تنسي تخبريني شو صار معك

34  الكاتب منى, on 16-02-2008 06:09 الله يسلمك يا رب , مممم صحتين و هنا على قلبك و قلب مرت أخوكي كتير انبسطت انك جربتيه و عجبك

35  الكاتب بدور, on 19-04-2008 14:59 منى انا مالي منتبهة انو انت رديتي علي من زمان مشان طريئة الفوتوتشيني     والله عفوا..  اليوم رح ابعتلك ياها نشالله..  بس وئت عملتا ماصورتا للإسف     اذا انت جربتيها و عجبتك نزلي الصورة اذا ممكن و اذا انا عملتا عن ئريب ببعتلك الصورة نشالله عنجد عفوا

37  الكاتب منى, on 21-04-2008 17:29 و لا يهمك بدورة الطريقة وصلت و شي بيشهي كتيرر رح نزلها و تسلم دياتك

38  الكاتب منى, on 21-04-2008 17:31 هلا فيك لارا و هدا الي بعمله اختي الوصفات كلها اصلية و من فم الجدات و الحموات الحلوات ساخنة و بريحة الاصالة للمائدة   اشكرك على ردك و على الثقة الي عطيتيني اياها , مية اهلا و سهلا

39  الكاتب Eman, on 24-04-2008 12:57 معلش أسأل سؤال غليظ شوي ،  إذا ورقة العنب كبيرة ،الأفضل أستخدمها بحجمها الطبيعي ولا قسمها حتى تطلع الحبة صغيرة؟   هون رفقاتي لما عملتلهن اليبرق ،ما عجبهن حجم الحبة، طويييييلة ؛لأني عملتها على حجمها ،في حين هنن بقسموها 3 قطع .  برأيك شو الأحسن لليبرق واليالنجي؟

40  الكاتب منى, on 24-04-2008 13:06 ما بعرف ايمان , انا بحياتي ما قسمت ورقة العنب , بحط الحشوة و بعدها بتحكم بالحبة بالحجم الي بدي يااها , و إذا ما عجبهن , معلش , يمكن مو متعوديين على يبرقنا , بس هو هيك اصوله طويل و ضعيف و اليالنجي قصير و سمين

42  الكاتب منى, on 05-05-2008 18:27 هلا نور , مو عارفة كيف أشكرك على اهتمامك و قرأتك للوصفات و أسئلتك التي أغنت الوصفة و نبهتني لأشيا لازمة     كل شي حابة تعرفيه عن ورق العنب فيك تشوفيه على هل الرابط    نور الموقع بأخت غالية و عزيزة

44  الكاتب منى, on 22-09-2008 06:57 هلا حوراء الحمد لله انا بفضل و خير من رب العالمين , لا تستغربي البن , هي مو اضافتي كل الناس عندنا بحلب بيحضروا اليالنجي بالبن و على كل فيك تجربي نص الكمية و تشوفي إذا بتعجبك , بس ان شاء الله رح تعجبك كتير

45  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 24-09-2008 00:04 منى اذا بتريدي بدي اسألك عن طريقة طبخ البرغل بالتفصيل مع تحديد عيار البرغل و المي و مدة الطهي خاصة انو انا الفرن عندي مو متل أفران سوريا  الفرن عندي عبارة هن دوائر من الصاج   لا تضحكوا علي حبابين . انا متزوجة من جديد و ماني بسورية حتى اسال حدا و فتت عمواقع للطبخ كتير و بصراحة ما عجبني غير موقغك بمكن لانو نحن سوريين و النا نفس الطريقة بالطبخ  عفكرة انا من حماة و تزوجت لكندا  مشكورة شيف منى

46  الكاتب منى, on 24-09-2008 12:08 هلا سوسو البرغل و طريقتك بالتفصيل على هل الرابط , مية هلا فيك و بكل أهل حماة و ان شاء الله جازة الدهر , ينور الموقع فيك دايما أختي

47  الكاتب سارونات, on 24-09-2008 19:25 السلام عليكم و رحمة الله وبركاته  اختي منى اليالنجي من زمان بدي ساويه بس خفت من النتيجة و الطعمة مع ان بعتقد ما عندي مشكلة باللف المهم قررت اني ساويه بكرا او اللي بعده ان شاء الله و انا راح استعمل ورق عنب من الشجرة و بعتقد ما راح ساوي نص الكمية لان كتير يمكن ربع الكمنية بيكونت مناسب كأول مرة و بعدين منشوف انا حسيت ورقات العنب اللي بالطبق و طلعو26 فهل نص الكيلو فيه 26 ورقة او قديش تحتى قسم الكمية كمان ما راح حط دبس فليفلة فهل زيد من كمية الفليفلة الحخمرا الناعمة او ما في داعي و كمان شو فينا نحط تقل فوق الطبق و هل الطبق لحالو ما بيكفي تحتى ورق العنب ما يفتح كمان كيف بعرف انو خلص نضج   بعرف كترت اسئلة بس عن جد بدي ساويه و ما بدي اغلط بشي  بالتوفيق  سلام

48  الكاتب منى, on 25-09-2008 07:26 هلا سارونات , قعدت تعدي اليالنجيات ولي منيح ما كنت حطيت الطبخة كلها كنت دوختك ..    شوفي هلا الحشوة لازم تعمليها و انتي مو صايمة لان لازم تدوقيها و تشوفي شو ناقصها , الطعمة رح تكون حلوة و حامظة بس طييييبة , ورق العنب من الشجرة بتغسلييه و بتسلقيه لكم دقيقة قبل الاستعمال بس لازم تنقي ورق طري , ما بعرف كيف الجو عندك , بس هلا عنا بسوريا ورق العنبما بقى ينفع لليالنجي بيكون صار كبير و قاسي و ورق اليالنجي او اليبرق لازم يكون طري , الطبخة بالصورةهي ااقل من نص الكمية لان سكبت للحبايب نص الطبخة و أكلت نص الطبخة التانية و انا عم دووق و اتنغم يعني تقريباً الظاهر بالصورة هو تلت الكمية , بعدها انت اعملي الي بيناسبك   زيدي كممية الفليلفة اذا ما رح تحطي دبس فليلفة بتعطيها نكهة أطيب , و التقل أكيد ما بيكفي الرز لحاله , ممكن تستعملي أي حجرة كبيرة تاخديها و تغسليها كتير منيح و بعدها بتحطيها فوق الصحن فوق اليالنجي , اذا كان بيتك على البحر ممكن تروحي على الشط و تنقي حجرة من الحجم الكبير و تتركيها دايما عندك للمحاشي , بعد تلات ارباع ساعة من ما يغلي المحشي بترفعي التقلية و بتطالعي واحدة و بتقسميها بالملعقة , إذا انقسمت معك بسهولة معناها نضج , إذا لأ معناها بدوه كمان , أنا السنة جاييني ورق قاسي شوي لهيك عم حط اليالنجي بطنجرة الضغط لمدة ساعة كاملة , بعدها بترك الطنجرة من دون ما افتحها لحتى تبرد , بس متل ما قلتلك أنا عرفانة شو عندي , اليالنجي عادة ما كتير بيطول يا دوب ساعة بس من دون طنجرة ضغط     ان شاء الله تجربيها و تعجبك و مية هلا سارونات

50  الكاتب منى, on 25-09-2008 22:49 هلا منونة خليلي عينك انت و قصصك و ردودكم الحلوة الي بتنعنش القلب ان شاء الله تجربيها و يكون على زوءك

54  الكاتب منى, on 28-09-2008 20:34 هلا و غلا أختي صحة و هنا و الحمد لله انهم عجبوك , أكيد ممكن تعملي الحشوة قبل بيوم و سر اليالنجي الطيب بالحشوة الطيبة , أنا كتير احيان بحضر الحشوة بالليل و بجهز اليالنجي تاني يوم اختصارا للوقت ورق العنب ما بيصير لونه بني بيصير أخضر غامق متل مو ظاهر بالصورة , انا الورق جبته تازة و جهزته و فرزته و كل ما بيلزمني أطالع من الفريز و استعمله     مية هلا فيك أختي

56  الكاتب منى, on 21-10-2008 06:22 اكيد اختي نفس الطريقة , بتساقيه و بتقطعيه و بتحشيه و بيطلع كتيرر طيب , مين اطيب هي شغلة زووء انا بحب اليالنجي اكتر الشي بورق العنب , اما بقية البييت بالبانجان , بالملفوف طيب كتير بس رح يصير شغله اصعب

58  الكاتب منى, on 31-05-2009 19:59 مممم , يا عيني على اليالنجي شو بمووت عليه و الله لما بيكون عندي منه ببقى بروح و بجي و بنقور لحتى يخلص     الف صحة و هنا على قلبك بكل لقمة و شو فكرة حلوة بالبطاطا و البصل , ان شاء الله ببقى جربه مرة تانية فيه     الشكر الك لردك و تواجدك الطيب و الغالي و مية هلا فيك شفاء

59  الكاتب بشرى, on 29-08-2009 15:21 ياييييي يا منوش .. شي مغري جداً جداً ..    المشكلة إني لحالي بتكاسل ساويه بس مابقى في مجال للكسل .. فرط ريقي .. يسلمو إيدكي ربي

60  الكاتب منى, on 29-08-2009 16:13 ما بدها تتكاسلي و لا شي , هو سهل و ما بياخد وقت , يا رب تجربيه و يعجبك و تبقى خبريني و على فكرة الي لفلفه طنجرة يبرق خرج عزيمة هل اليالنجي بيصفي ادامه لعبة

62  الكاتب منى, on 03-09-2009 12:56 الله يخليلي ياكي على هل الدعوة الحلوة , ان شاء الله الك متلها انت و كل الغوالي على قلبك     شوفي الحمض حسب الرغبة , بس لو تحطيه كله بالحشوة رح يطلع بياخد العقل , انا هل الطريقة اتعلمتها من جارتي , قصدي كل الحمض بالحشوة , كنت حط نصها بالحشوة و نصها مع المرقة و كانت تطلع طيبة , بس مرة دقت عندها يلانجي على اد مو تحفة خرج الواحد يتصور بجنبه , المهم سألتها و خبرتني سرها . هلا بعد ما يغلي اليالنجي بشي عشر دقايق لازم تدوقي المرقة و تطلع حامضة و كانك ضايفتيلها حمض , اذ حسيتي ان بدها كمان فيكي تضيفي كمان

64  الكاتب منى, on 06-09-2009 10:58 هلا رضاب   يا ستي شرفتي و نورتي و مية اهلا و سهلا فيك ,كلنا بالاول ما كنا نعرف كتير نطبخ , بس مرة عن مرة و تجربة ورا تجربة منصير , و ان شاء الله اذا انتي حابة تتعلمي رح تصيري اشطر واحدة حبيبتي

65  الكاتب بشرى, on 01-10-2009 17:14 تسلمي يا منوشة القمر , ساويتو من المرة الماضية وطلع كتير طيب , حتى هداك اليوم رحنا على بيتزا هت أنا وجوزي وقلي اليالاني تبعك ما بيتقارن باللي عندن , بس لفت نظري شغلة عاملينا هيه بصل بس لونو صاير على أخضر شوي بس طعمتو حامضة وإلو زيت , يعني البصلة قاسمينا بالنص وحاطينا هيك   بقى اليوم ان شاء الله رح ساوي يالانجي لانو قاعدة لا عندي شغلة ولا عملة بقى حبابة ابوس روحك خبريني احط بصل بدون ما اعملو شي ولا في بروتوكولات تانية

67  الكاتب منى, on 24-11-2009 10:48 هلا بشورة   ريتو الف الف صحة و هنا يا رب على كل لقمة , وهيك انبسطت كتير لان عجبت الباشا     بشورة ليكون قصدك على يالنجي البصل ؟ هلا هو نفس الطريقة و نفس الحشوة تمام و طريقة حشوه موجودة علىهل الرابط

68  الكاتب منى, on 24-11-2009 10:52 هلا ام رومل   مية اهلا و سهلا فيك , نورتي و شرفتي الموقع و يا رب تبقي معنا على طول    أختي رح يطلع غير شكل ان شاء الله , بس المهم انك ما تشيلي التقلة من عليه و هو لا رح يفلش و لا شي , على مسؤوليتي ان شاء الله    عم استنى رايك

70  الكاتب منى, on 02-12-2009 19:15 ان شاء الله ربي الف صحة و هنا , و ان شاء الله تكوني اكلتي عني كم قطعة , لان انا بمووت عليه

71  الكاتب NOUR27703, on 24-01-2010 07:25 شكرا منى كل وصفاتك بتجنن وبشكر ام رومل بنت حماى اللي دلتني على هاد الموقع الظريف لانو وصفاتك من المطبخ السوري الحقيقي وكل المكونات الي بتحطيحا متوفره بمطبخنا وهاد اللي شدني للموقع وصرت مجربه كذا وصفه والحمدلله كلو زبط وطلع طيب كتير ويعطيكي العافيه

73  الكاتب منى, on 24-02-2010 20:57 هلا نورا   الف صحة و هنا و عافية , كلك زووء , شرفتي انت و ام رومل و ان شاء الله تجربي كمان وصفات و يكونوا على زووءك

74  ياااااي شو بحبا الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-06-2010 00:24 سلام للجميع و لمنى خاصة  لو تعرفي أديش انبسطت لما شفت هاليالنجيات  بس في عندي سؤال صغنون  ممكن اطبخ دولما نوعين بنفس الطنجرة  يعني انا خاطر عبالي أعملا بورق العنب و الملفوف  بصير حطن بطنجرة وحدة و اطبخن سوى يا ترى؟؟

75  الكاتب منى, on 15-06-2010 09:16 اي اكيد بيصير , بس بدك تنتبهي للنوعية , يعني ورق العنب و الملفوف بياخدوا تقريبا نفس الوقت , الكوسا ما بياخد كتير , البصل بينفع نحطه مع ورق العنب و الملفوف , هيك

76  Thanx الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 15-06-2010 12:32 شكراً كتير على الرد منى  و شكراً أكتر عهالموقع الحلو  صرلي 4 تيام لزقانة فيه على قولة زوجي     عم بحبش و اقرأ و شوف  ساويتلي كم شغلة و طلعت ماشي بالطبخ  ما اشبني شي الحمد لله   الله يوفقك يا رب و يقويكي لتساويلنا وصفات أطيب و أطيب

78  الكاتب منى, on 09-11-2010 07:33 هلا حساسية   اقصد فيه البن الي منعمل فيه قهوة , و هو رح يعطي نكهة خفيفة و مميزة كتير و هادا الي بيميز يالنجي اهل حلب عن ايا يالانجي تاني حضرتيه

79  الكاتب منى, on 09-11-2010 07:34 هلا حياة   ان شاء الله تجربي وصفات كمان و كمان و كلهم يطلعوا يمييي , صحتين حبيبتي

81  الله يعطيكي العافية الكاتب amoula, on 21-02-2011 22:49 السلام عليكم اخت منى  انا متابعة للموقع على طول ’ وهو مرجع لالي كوني عروس جديدة ومتغربة فكل ما لزمني شي مامنة فيكي والله و وصار دربت كتير اكلات وبحذافيرها والحمد لله عم تظبط الله يقويكي يارب  بس اليوم جربت اليلانجي ’ الحشوة طلعت بتجنن طيبة ونظامية وعملتها بحذافيرها محسوووبة تمام ما شاء الله عليكي , بس لما خلص ودقته حست انو ناقصه كمان حموضة , هلأ ما بده نحط للمرقة اللي طبخناه فيها شي ؟! قالتلي امي لازم نحط كمان للمرقة اللي عم يغلي فيها دبس رمان وملح ونقطة زيت ؟ شو رايك ؟   الله يجزيكي الخير يارب

82  الكاتب منى, on 23-02-2011 11:08 هلا نورا   اي منحط الرز من دون نقع و بس منحمصه , و مقدار البن مذكور بالوصفة حوالي ملعقة صغيرة

83  الكاتب منى, on 23-02-2011 11:32 هلا امولة   ان شاء الله جازة الدهر و ان شاء الله تبقي معنا على طول و صحتين و هنا على كل شي جربتيه و طلع طيب     انا ما بحط للمرق شي ابدا لان المفروض ان الحشوة تحمض المرق , بس كمان حسب نوعية دبس الرمان الي عندك , اذا حسيتي ناقصة حمض ضيفيلهاشوي زيادة متل ما قالت ماماتك

84  الكاتب Lost spoon, on 05-08-2011 19:36 سلامات يا منى    لو تعرفي شو انبسطت لما شفت ست بيت وتوب شيف متلك بتحط بن بحشوة اليلنجي....صحيح مالي شاطرة بلف الورق وبهربو مني الرزات، بس حشوتي معتبرة. ولما بقول اني حاطة معا بن، بدك تسمعي الضحك.    ومتل ما ماما، الله يطول عمرا، علمتني، بحط بقدونس، نعنع أخضر ويابس، وحبه صغيره فليفله خضرة، ومتل ما بتعرفي أكيد، الحشوه ممكن تتاكل لوحدة من كتر مو طيبه. شكلي راح ورط حالي بلف الورق اليوم وبلش الحق الحشوه وهي عم تهرب من اليمين والشمال......ربي يسلم إديكي يا منى ويباركلك بكل لقمه عم تساعدينا فيا.

85  صباح الخير الكاتب أم سليم, on 19-10-2011 08:00 مرحبا أخت منى كيفك أنا هلق طفيت النار تحت اليالنجي وعمبنتظره ليبرد ويمتص المرق دقت من شوي وحدة طلعت طيبة كتيييييييييييير لك تسلميلي يارب عنجد نيالك عالدعوات اللي عمتجيك ماشاء الله فعلا ثوابك كبير انشالله والله شهيتيني أساوي موقع متلك بس المشكلة إني وقتها رح أسرقلك كل وصفاتك لأني صرت ما أطبخ شي قبل الرجوع لملاحظاتك حتى لو طبخة كنت طابختها قبل ومتعودة عليها كمان صرت أرجع لملاحظاتك فعلا شي رائع بس عندي سؤال انشالله وزن زوجك وولادك مثالي ولا شلون ماشاء الله لأن أنا بصراحة زوجي عوصفاتك اللذيذة ماشالله سمنان فصار يدايق من صحتو ويقلي لبقى تطبخي طبخ طيب وبالنسبة لليالنجي طبختو هلق لأن عندي ابني صغير عمرو 4 شهور ما بخليني أعمل شي بالنهار فلفيتو من شوي بالليل وطبختو وهلق خلص وانشالله أكيد رح يطلع طيب لأن نفذت وصفتك تمام وأنا بثق كتييييييييير بوصفاتك يسلمو كتير طولت عليكي مو هيك

86  يلانجي ما توقعت إني بطبخها بعمري الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 04-02-2012 19:57 السلام عليكم ورحمة الله وبركاته    كيفكن ؟  صرلي دهر بالضبط بدي اكتب رد !  بالصيف انشغلت بالسفريات الونقليات شي عبيت أهلي شي عسوريا لعند حماتي شي مدري شو، وعدي ما شاء الله من وئت ما عدا السبع أشهر صرت ملازمة لإلو وحركاتو بالبيت 24 ساعة.   بزماني أظن قرأت أنك منوشة عملتي الموقع لما قعدتي بالصبيت بعد ولادة ابنك الصغير؟ بدي اعرف كيف كنتي تلائي وئت ؟؟؟!!!!!!!!  كمان مبروك عرجعة الموقع، كنت كل يومشوف ما ظهر من بعد الاختفاء ؟! .. والف الحمد لله لما شفتو رجع نطيت وقلتلو لجوزي رجع رجع :D ودئيت لماما عالماسنجر قلتلها: رجع موقع منى !     المهم صحي غبت عن التعليقات وهيك، وما عدت عملت خلال هالأشهر تئريبا لا حلويات ولا أطباق جديدة، بس من فترة إجت بنت حماي عالإمارات وكان لازم ورجي مهارتي (ولأول مرة) أدام حدن من أهل زوجي بالسفرة .. واخترت المحشي (اللي طبعا جربتو عدة مرات وتعلمتو من منى خانم)، وقلت بجرب اليلانجي باعتبار زوجها بيموت عليه.  قريت الوصفة بالطول والعرض .. وجبت الغراض حطيتون أدامي، وشوف واستغرب .. أن معئول هيك الوصفة ؟!  طبعا قررت إعمل نص الكمية .. لا ومو بس هيك هو عالأساس تجربة، لبين ما جوزي فاجأني أنه عزمون بهاليوم المسا !!! يعني يا بتلحئي يا ياس يا ما بتلحئي، منيح كنت طابخة المحشي أبل بيوم لأن كان ألبي محسسني.  المهم عملت الرز ... وبصراحة أكلت نصو ! وهو نص مستوي ... وقررت شي يوم إطبخو متل ما هو ... من أد مو بيعئئئئئد، كبعا متل بائي الخوات استغربت وخفت من البن بس ما ترددت اعمل شي من اللي كاتبتو الست منى.  بس بصراحة ضاعفت كمية الدبس الرمان ومع هيك حسيتو مو حامض، بعدين قلت لحالي يا بنت انتي حامل وهلئ زوئك كلو فايت بالحيط هههه ما حتحسي بالحموضة بكل الاحوال. بعدين الضيوف قالوا: طعمة الدبس الرمان فايحة منها فوح !  المهم طلعت بتجنن بتجنن كتير زبطت رائعة وبتدوووووب بالتم عئولة منى.  بس زاد عندي شوية مي بسفل الطنجرة بعد ما بردت يعني :D .. بس ما مشكلة  طبعا دغري وزعت الوصفة عماما والاحباب مع اقتباس : "من منوشة خانم" ست الطباخين.  يسلمو دياتك يا رب    طمنينا عنك أهم الشي ؟؟  والسلام عليكم ورحمة الله

87  وهي تطبيئي :) الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 04-02-2012 20:02

88  الكاتب ام شهلا, on 16-04-2012 00:22 ياي يامنوشة شو محبطة هلا انا بعرف اعمل يالنجي منيج وعملتو من قبل كزا مرة بس اليوم جبلي جوزي ورق عنب من السوق التركي هدول الفهايم حافظينو بالملح وانا مانتبهت لبعد مالفيتو كلو طبختو وطلع مرصوص وشكلو تمام ومستوي بس المصيبة انو مالح صبر مع اني ما ملحتو ابدا المشكلة اني كنت واعدة رفقاتي بالمعهد انو دوقهن ياه بس للاسف راح الشغل عالفاضي

89  الكاتب ghad, on 16-04-2012 14:16 السلام عليكمممممممممم   هاي اول مشاركة الي هون بس مو اول مرة باخد وصفة من هالموقع الاكتر من راااااااااااااااااااااااائع   ان شاء الله بميزان حسناتك   المهم اليوم الصبح حماتي اعطتني ورق عنب و قلت ما الي غير وصفة منى اطبقها

90  الكاتب منى, on 16-04-2012 18:48 واااااخ , لو كنتي حسيتي قبل الطبخ كنتي حطي شرايح بطاطا مع اليالنجي ,كانت شربت كل الملح و كان طلع تمام ..    يلا خيرها بغيرها     على فكرة ورق العنب لازم ينحفظ بالملح و لازم يكون مالح , بس اذا نقعتيه شوي بالمي بيمشي حاله

91  الكاتب ghad, on 17-04-2012 07:04 سلام صباح الخير   انا مبارح حضرت هالاكلة و جوزي عجبه كتير و قالي اذا زاد خبيلي   بس طبعا ما زاد و طعميت اخواتي كل وحدة صحن صغير   ان شاء الله بميزان حسناتك

92  الكاتب منى, on 18-04-2012 07:43 صباح الفل و الورد   صحتين و الف هنا على قلبك و قلب خواتك , الحمد لله انو عجبهن , و نورتي الموقع و شرفتيه يا عسل

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved