كوب سكر للكراميل
5 بيض
3 كوب حليب
نصف كوب سكر
بشر ليمونة أو برتقالة ناعم
فانيليا

مقادير الكاتو :

3 بيض
فانيليا
بشر ليمونة أو برتقالة ناعم
نصف كوب زيت
نصف كوب حليب
نصف كوب سكر
كوب و ربع طحين
3 ملعقة كبيرة كاكاو
ملعقة صغيرة نسكافيه
ملعقة و نصف بيكنغ بودر





·          يوضع سكر الكراميل في وعاء صغير و يحرك حتى يذوب  و يصبح لونه ذهبي ثم تغطى به قاع و جوانب الصينية و يترك حتى يبرد تماماً .

·          يخفق البيض و السكر و الفانيليا و بشر الليمون في خلاط العصير لمدة بضع دقائق ثم يضاف الحليب و يخلط الكل ثم يوضع الكريم فوق الكراميل و توضع الصينية في البراد حتى تحضير الكاتو .

تحضير الكاتو :

·          يحمى الفرن على درجة حرارة 180 درجة مئوية , ينخل الطحين مع البيكنغ يبودر و الكاكاو , يسخن الحليب في الميكرويف حتى يغلي ثم تذوب به النسكافيه .

·          يخفق البيض و السكر و الفانيليا حتى يبيض المزيج و يسمك .

·          يضاف الزيت و الحليب و يقلب ثم يضاف الطحين المنخول و يقلب الكل بلطف حتى يتجانس المزيج .

·          تصب خلطة الكاتو في منتصف صينية الكريم ثم توضع الصينية في صينية أكبر منها و تملىء الصينية الأكبر بالماء المغلي حتى منتصفها تقريباً .

·          توضع الصينيتان في الفرن على الرف السفلي لمدة ساعة تقريباً حتى ينضج الكاتو و يجف سطحه , لا نغز السكينة في الكاتو للتأكد من نضجه كي يبقى الكاتو متماسكاً عند قلبه .

·          يخرج الكاتو من الفرن و يرفع من صينية الماء الساخن و يترك حتى يبرد ثم يوضع في البراد لمدة يوم كامل أو طول الليل على الأقل .

·          يقلب الكاتو في طبق ذو حافة مرتفعة بعض الشي لكي تحتوي السائل و يقدم بارداً .

 

 

 

تعليقات (97)

1  الكاتب omtasneem, on 28-02-2008 14:51 السلام عليكم ورحمة الله وبركاته. عزيزتي منى عم نعذبك معنا في جملة لم افهمها جيدا لماذا نضعه في صينيتين وكيف نضع المزيج في الوسط ولماذا وبالاخر ذكرتي انوا في سائل؟؟؟اسفة عل كتر اسئلة بس شكله اغراني بصراحة وحابة جربو

2  الكاتب منى, on 28-02-2008 19:18 هلا ام تسنيم بالعكس حبيبتي أسئلتك على العين و الراس     أختي لهل الكاتو في عندنا صينيتين , صينية الكاتو الي رح نغطيها بالاول بالكراميل و بعدها بالكريم و أخر شي بالكاتو , أما الصينية التانية لازم تكون أكبر من صينية الكاتو و منحط فيها مي لحتى ما يكون الكراميل مباشرة على النار و يحترق الكريم و الكراميل قبل ما يستوي     هلأ اختي بعد ما حضرنا مزيج الكريم و حطيناه في القالب , منحضر مزيج الكاتو و منصبه بلطف فوق منتصف مزيج الكريم و بس ..    ان شاء الله تكون وضحت الصورة و أوعدك أختي ان أضيف صور للخطوات في أقرب فرصة أحضر بها هذه الوصفة إن شاء الله

4  الكاتب منى, on 24-06-2008 10:14 هلا رنونة     ان شاء الله موفقة بامتحاناتك يا حق , و ان شاء الله احسن النتائج و شي يرفع راسك و راس أهلك لفوق     هلا عندك جمعة و بدك اشياء سهلة و طيبة , خلينا نبدأ بالموالح , فيك تعملي عجينة و في عجينة سهلة كتير , عجينة العشر دقايق و منها بتعملي فطاير مشكلة متل الجبنة و الزعتر و الفليلفة أو حتى البيتزا ..    ممكن كمان تعملي سلطة المعكرونة من قبل بيوم و بنفس اليوم بتزيديلها ملعقة أو ملعقتين مي و بتحركيها بلطف ..    ممكن تعملي فطيرة اللحمة .. خطيرررة و سجق رول و كرات البطاطا و إذا بدك شي تقيل على السفرة و سهل كتير ممكن تجربي الكبة على السيخ مع صحن محمرة, شو كمان ممكن تعملي سندويش الفيلادلفيا نممممي و لا أطيب و كمان الحشوة ممكن تحضريها قبل بيوم ..أو الحمص جديدة, أو كمان خبز شرائح بالجبنة و المايونيز    الحلويات فيك تعملي كاتو كلاس أو قالب الشوكولا بحشوة المارس و كمان الكاسترد بالبسكويت أوتارت الجلاكسي أو و أسهل و أطيب بسكويت بالشوكولا    حكيت كتيررر إذا عندك أي سؤال أنا بالخدمة

6  الكاتب منى, on 25-06-2008 08:49 هلا رنونة     ما كتير فهمت سؤالك , قصدك على شكل القالب يعني و الا شو ؟

7  hi الكاتب رنا, on 27-06-2008 17:21 ياستي قصدي شكل القالب يعني اله قالب خاص ولا شي صحن مدعبل متل الزبديه؟؟هلأ انا مالي مجربته بدي تنصحيني خرج اجربه وبيزبط ؟؟؟لانه انا هلأ عند امي وامي بتعصب اذا مازبطوا الطبخات

8  الكاتب منى, on 30-06-2008 09:57 لا ما في اله قالب معين , أي طبق عندك اله شكل الزبدية يس على كبير بيمشي حاله   يا ستي اذا رح تشتري البسكويت الاصابع جاهز جربيه و لااا توقفي و ماماتك رح تبوسك من بين عيونك

9  الكاتب Eman, on 13-08-2008 19:38 كاتو رائع ومنظره جميل جدا ،  البارحة حضرته ونجح معي والحمد لله ، بس ما عرفت أعمل الكراميل ، عملته شلون ما كان وصار متل الدروبس ،  غلطتي الماضية إني ما انتظرت الكاتو يستوي منيح وهاد الكاتو بياخد وقت أكتر من غيره..  يسلمو على الخطوات الدقيقة..

10  الكاتب منى, on 14-08-2008 07:39 هلا أمولة     كتير انبسطت ان ظبط معك , مستاهل هل الكاتو تتعلميه     الكراميل لازم تستني عليه شوي بعد ما يصير متل الدروبس لحتى يدوب كله و بعدها رح يصير سائل , بس اهم الشي ان تكون النار هادية و انت عم تدوبي السكر     هنا و عوافي يا حق

12  الكاتب منى, on 14-08-2008 17:34 هلا أمونة   الصراحة باين عليك الك اهتمام بالرسم من ردودك و تعليقك على قصة التضارب بين الالوان و بالفعل متل ما قلتي , العين لازم تاكل قبل التم     ان شاء الله تجربيه و يعجبك

13  الكاتب سارونات, on 22-11-2008 09:40 السلام عليكم و رحمة الله وبركاته  اختي منى تعي تاحكيلك اللي صار معي انا اول مرة شفت الوصفة كانت هون بالموقع و كنت لساتني ما سجلت المهم لما لقيت فيها كتير بيض و كانت عاجبتني كتير قلت تدور عليها بمكان تاني يمكن لاقي كمية البيض اقل و دورت و دورت كتير حتى ساويت ملف و سميتو قدرة قادر المهم لقيت الوصفة ب4 بيضات و حليب بودرة و ماء و اخدت وقت طويل و بحث طويل تحتى فهمت كيف بيتساوى و الله يجاز يخير كل اللي حطو الوصفة مع الصور و الشرح المهم بالاخير ساويتها بالصيف و طلعت كتير حلوة بس ما نفشت كتير امهم كل شي كان تمام و بعدين لما سجلت بالمنتدى رجعت لقيت الوصفة و فرحت كتير لانها بحليب سائل بس ظلت مشكلة البيض فقلت ليش ما ساوي نفس الوصفة بس ب 4 بيضات يعني 2 بالكريم و 2 بالكيك المهم امس ساويتها و كان كل شي تمام بس لما طالعتها من الفرن لاحظت انو في انو في سائل بني على الجوانب و ما كان في المرة الماضية المهم اليوم الصبح لما قلبتها لقيت طبقة الكريم بالجوانب متماسكة اما بالنص فاختربت و ظلت سائلة شوي بس مع هيك تم انقاذها و طلعت نافشة و كل شي تمام ما عدا طبقة الكريم مع ان ما صار هالش يالمرة الماضية يا ترى ليش صار هالمرة يمكن لازم قلل حليب او شو او يمكن كان لازم انطر الكراميل يبرد اكتر مع اني شفتو لقيتو برد بس بالمرة الماضية خليتو فترة اطول  اخر شي بدي اسألك انو سواء المرة الماضية او هالمرة الكراميل بعد ما حطو بالصينية بيبدأ يتشقق وهالشي بيبيت بعدين بطبقة الكريم كتعرجات   الله يعينك على قراءة الرد قد مانو طويل  ناطرة ردك لان عبالي ساويها مرة تانةي بالمستقبل و بدي يطلع كل شي تماملان عن جد فكرتو كتير حلوة و خرج الصيفية و قد ما كان بدي ساويه حسب طريقتك قمت ساويتو هلأ مع ان الجو بارد شوي   بالتوفيق  سلام

14  الكاتب منى, on 22-11-2008 12:41 يعني حطيتي لـ 3 كوب حليب بس بيضتين ؟  اذا هيك بيكون كتير منيج منه طلع معك شي متاسك مو شوربة لأن هل الكريم ما في شي رح يخلييه متاسك غير البيض .  طبقة الكراميل لما بتتشقق معناها برد و هو المطلوب و ما اله علاقة بان الكريم صار عليه تشققات   اذا حابة تعمليها ممكن تحطي 4 بيض بالكريم و هادا أقصى ما يكن انقاصه من البيض بالنسبة لكمية الحليب

17  الكاتب منى, on 23-11-2008 05:40 هلا أختي   مع اني بحب كتير كتاب اناهيد , بس بالنسبة للحلويات كل ما جرب شي بيطلع مو زابط لهيك ما بقى اتشجع و حضر شي من وصفاتها بالنسبة للحلويات أو الكيك

19  الكاتب منى, on 02-01-2009 10:07 هنا و عافية ام سيمى   كتير انبسطت انك اتشجعتي و جربتيه و كمان زبط معك , لا تنسي تاكلي عني كم لقمة

21  الكاتب منى, on 06-03-2009 06:19 هلا فيك اختي   هنا يا رب و عوافي بكل لقمة و على قلوب كل العيلة     هي مع غلطة مطبعية هلا رح صححها ان شاء الله   المفروض انك تحطيه على الرف السفلي ,متل مو ظاهر بالصورة , يعني على ارضية الفرن مباشرة من دون شبك لان فيه صينية المي و هي رح تحمي الكيك و اخر الشي ممكن تستغني عن النسكافييه كلها مو ضرورية , بس انا بحسها بتعطي طعم طيب كتيرلكل كيكات الشوكولا

23  الكاتب منى, on 09-03-2009 06:57 اكيد ما في مشكلة اختي , اي سؤال تاني انا تحت امرك

25  الكاتب منى, on 14-03-2009 19:45 رنونة هو بيعقد في الفرن بس مو مباشرة على النار , على حمام مائي   انا بحضره بطنجرة متل الي ظاهرة و ممكن بصينية المنيوم عادية بس و لا مرة ما حضرته بالتيفال , اظن الغلط انك خبزتيه مباشرة و الا في شي ما فهمته عليك منيح

26  الكاتب رنا, on 09-05-2009 21:13 بدي اسالك منى هلأ انا خمنت انه عم تنشف طبقة السكر معي لانه بحطه عالرف السفلي وهادا المطلوب بس انا لاحظت شغلة عندك بالصورة انه انتي الصينيتين اللي مستخدمتيهن الاولى ماعم تلامس قعر التانية يعني ماله لازق سفلها فيها صح ولا شو ..؟؟قصدي بماانه الها ايدتين فهنن حاملينها عن اسفل التانية الملاصق للنار ...ياترى فهمتي علي

27  الكاتب منى, on 10-05-2009 07:42 ايه فهمت عليك و ممكن يكون هادا السبب , مع ان احيانا بحضرها بصينية المنيوم عادية اذا كنت حابة قطعها لقطع صغيرة     ممكن تجربي بنفس الأوعية الي ظاهرة بالصورة , و على فكرة اختي ما بينجح معها هل الكيك الا بهل الطناجر لهيك اشترت طقم كامل مشان هل الوصفة

28  الكاتب رنا, on 10-05-2009 15:53 طقم كامل الله يبشرك بالخير هههههههههه ياستي وانا كمان كتير بينجح معي وقت بساوية بصواني عادية يعني بالالمنيوم او التيفال بس المشكلة انه بدي ياه يطلع سميك مشان هيك عم حاول استعمل الطناجر ...ياستي خلص رح ادخل على خزانة الطناجر انكشلي شي نكشة يسلمو على ردك موني

30  الكاتب منى, on 18-06-2009 16:15 هلا اختي   ان شاء الله ما كون اتاخرت عليك ,    المهم الحليب سائل و الفرن محمى من قبل بربع ساعة تقريباً     مية اهلا و سهلا فيك و يا رب تجربيه و يظبط معك

31  الكاتب DOUHA, on 01-08-2009 18:44 منى انا مبارح عملتوا واليوم اكلتواا   وطلع هااااااااااايل جد وكتير سهل يسلموااا

32  الكاتب منى, on 01-08-2009 20:16 هنا و الف صحة و عافية يا قمر يا ضحى   الحمد لله انه زبط معك , و ان شاء الله يكون كمان عجب كل العيلة

33  مرحبا منى الكاتب mazon, on 10-09-2009 02:38 واو جد شكلو بيجنن    انا كتير مشتهية جربو...بس خايفة    قولتك في اي خطورة انو ما ينجح؟؟؟

34  الكاتب منى, on 10-09-2009 07:52 لا ان شاء الله و تعالى اذا اتبعتي الخطوات تمام و انتبهتي على طريقة صب الكيك على الكراميل فرح ينجح معك و من اول مرة اذا ربنا راد

36  الكاتب منى, on 11-09-2009 12:26 رح تصبي الكيك بشكل عادي فوق الكريم , متل مو ظاهر بالصورة , بس انا انصحك انك تحضريه بقالب متل الي ظاهر بالصورة , لان هي اول مرة بتحضري الكيك و لان بهل القالب اسهل بكتير

38  الكاتب منى, on 13-09-2009 07:13 الف شكر الك لكلامك المزوء و انا كتير مبسوطة انه عجوك الوصفات الي جربتيهم و عجبت العيلة     يلا ان شاء الله بس ما تامني القالب تجربي الكيك و يا رب تكون على زووءك

43  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 16-02-2010 14:12 عم استنى ردك مدام منى

44  الكاتب منى, on 18-02-2010 21:23 اختي ممكن تعملي الوصفة متل ما هي لحتى تزبط معك     الملعقة تبعة البيكنغ بودر هي الملعقة الصغيرة

46  الكاتب منى, on 21-02-2010 07:24 هلا ام نور   الكراميل لازم يجمد تمام لحتى ما يختلط مع الكريم , و لما منصب الكاتو رح نصبه في المنتصف بس لهيك ما رح يختلط مع الكريم وبتلاقيه فورا طلع لفوق ,  الصينية لازم تكون بقلب صينية تانية , و ما بينفع ابدا حطها على الرف الوسط من دون مي تحتها     تكرم عيونك ام نور , ايا خدمة تانية انا تحت امرك

47  الكاتب OmRedwan, on 22-02-2010 16:31 عزيزتي منى صاحبة اليد الذهبية بسم الله وماشالله عليكي   الله يحميكي ويقويكي   انا كنت عم حاول بالردود مامشي الحال فبعتلك رسالة عالفايس بوك فيها اسئلة مشان اللزانيت وهيي صارت بالبراد بكرا بدي اخبزها   حبيبتي مشان قدرة قادر حبيتو وحسيتو سهل المشكلة انو انا عندي قالب سيليكون مطاطي بس لسه ولا مرة جربتو   وعندي قال بينفتح من تحت   المشكلة انو بشر منو   شو رأيك ؟؟؟  باتمنى تجاوبيني لان حضرن الاغراض عالطاولة وكمان الاسئلة اللي بالرسالة   شكرا الك

48  الكاتب منى, on 25-02-2010 21:24 هلا فيك اختي   هلا جاوبتك على الفيس بوك و بالنسبة لهل القالب انا معودة حضره بالقالب الي ظاهر بالصورة , اكيد ما بينفع بالقالب الي بينفكوا اطرافه , و ما جربت قالب السيلكون

50  الكاتب منى, on 02-03-2010 19:22 هلا سمسوم الحمد لله ان كل اخبارك منيحة و هادا اهم شي    و تاني شي الف صحة و هنا على البك , الحمد لله انه زبط معك و متل ما قلتي , سهل و ما بده شي     تالت شي اذا حابة تكتري المقدار فيك تضاعفيه كله ما دام الطناجر اكبر و ممكن ياخد معك ساعة و ربع بالفرن , هلا اهم الشي انك ما تجربي تشفي انه استوى و تشكي فيه شوكة او سكينة و الا رح يفرط عند القلب

52  الكاتب منى, on 11-03-2010 16:31 الف صحة و هنا شفا   لازم تاخدي لقب نجمة الحلويات , الف الف صحة و هنا على البك , كتير مبسوطةانا فيك و بالكيكات الي عم تحضريها و تنجح معك .    صحتين و بوسات للقطط

54  الكاتب منى, on 27-03-2010 12:02 هلا في غنوة   الكوب الي استخدمه هو كوب الشرب العادي مو الكوب المعياري و هل الشي لحتى تكون مقاديري دوما سهلة و تحت ايد الجميع     مية هلا فيك و ايا سؤال تاني من عيوني

58  الكاتب منى, on 01-04-2010 13:55 ممم , هلا بان السبب , اكيد نوعية الحليب الها دور , يمكن قمر لو حضرتي الوصفة متل ما هي بالحليب العادي رح تنجح معك , هي وصفة بحضرها من 10 سنين على الاقل و دائما ناجحة

60  الكاتب منى, on 18-04-2010 13:37 دلوشة ما بيختلط بسبب فرق الكثافة بين المزيجين لهيك سموه قدرة قادر     اذا اتبعتي الوصفة بحذافيرها رح تنجح معكان شاء الله , ما لها صعبة       مممم , هلا في ناس مجربته بالخليط الجاهز , انا مو مجربته لحتى قلك الخطوات بالتفصيل , لهيك ما فيني قلك شو تعملي على التمام

61  الكاتب hajar, on 17-05-2010 04:09 هادا بقى الكيك الوحيد الي جربته كتير ومانجح معي ولحد الآن عندي غصة انو مابينجح معي مابعرف وين الغلط الي على طول بيتكرر ومو منتبهة عليه   على طول بيضل سائل الكراميل بيصير شوربة الكراميل مع انو الكيك الفوقاني بيستوي وبينتفخ وطعمته ولا الذ بس الكراميل شوربة جربته 3 مرات وعلى طول ما بينجح ساعديني لسا عندي امل انو يصير معي مع العلم اني مابقلبه لحتى يمضى يوم كامل على تبريده انا كتير بحب هالكيك ونفسي ينجح معي بليييييييز help me

64  الكاتب منى, on 17-05-2010 13:16 الف شكر الك قمر للمداخلة المفيدة جدا , اتمنى ان تستفيد منهاهاجر و تزبط معها

65  الكاتب larooo, on 25-05-2010 10:12 مسااا الخير  ممكن تقوليلي منى كيف طريقة عمل الكراميل بتفاصيل اكتر ..يعني لازم تكون النار هادية ولا وسط   انا عاساس اليوم بدي اعمله وبلشت بالكراميل   بس شكله طلع شي قمة في العفن   حطيته على نار هادية كتير يمكن لأني خفت مايحترق    وانا عم حركه قام صار عندي صغور سكرية بدي صخور ملحية   وماكان في ملامح كراميل ..قمت قررت قوي النار تحته ..وبلش يصير الحباب كراميل وكتير كنت سعيدة  بسسس لما صبيته بقلب الصينية وانا عم مده صار  قاسي متل المصاصات   مابعرف اذا الاصلي بيشبه هيك شي .أنا حزين

66  الكاتب منى, on 25-05-2010 11:08 له يا لارو خسى الزعل و الحزن    الي صار معك هو الصح و اتمام , لان انت لما تصبيه بعد شوي رح يقسى و بعد نتفة كمان رح تسمعي صوت كانه اتكسر و بالفعل ممكن تلاقي شقوق في الكراميل , انت و لا على بالك تابعي الوصفة و رح تشوفي كيف رح يصير بعد ما يستوي القالب    انا بحط السكر على نار واطية من دون تحريك لحتى تبدى الاطراف تشقر و تدوب بعدها بحرك و مت ما قلتي ممكن يصير في صخور سكرية بس بعدها كلها رح تدوب

67  الكاتب larooo, on 26-05-2010 16:05 فعلا فعلا كأنك كنت معي   بعد مازعلت ..فرحت كتير لأنو طلع الكاتو طييب  بس طبعا ماقدرت استنى 24 ساعة ..اكلته المسا  ومشان اتأكد انو طيب اكلت قطعتين   مرسي قوي عالوصفة

68  الكاتب منى, on 26-05-2010 18:41 هنا لاروش و انا كمان هل الكيك كتيرر بحبه , يمكن اكتر كيك لان بصورة عامة ما بميل للكريمات , و هادا بحسه صحي اكتر من غيره , كيف ما بعرف     الف صحة و عافية و هنا

69  الكاتب فرفوشة, on 06-06-2010 11:24 وأخيرا قررت أعمل قدرة قادر  بعد تردد سنين لحتى شفته بهالموقع  لأني بصراحة بثق فيه كتير لدرجة إني ممكن أجرب أي وصفة لضيوفي لأول مرة وأنا متأكدة تماما إنه راح تنجح  المهم   عملت هالطبق ضمن عدة أطباق كلها بجربها لأول مرة مع غيرها لسفرة فطور   عملت ضفيرة زيتون وسندويش كودو وسلطة مقلمة وتشيز كيك بالتمر وكاتو كلاس  الله يجزيك كل خير يا منى وكل وحدة شاركت بوصفة  الحمد لله كل الأطباق نجحت وطلعت راااااائعة  إلا قدرة قادر  للأسف ما عجبتني  وما قدرت أقدمها  هلأ الشكل كان حلو ومرتب  بس  كان الكاتو مو نافش ع السوا  والكراميل فيه شوي طعمة بيض

71  الكاتب دودي82, on 12-06-2010 12:11 الوصفه عجبتني بزااف و شكل الحلا مشهي و يشجع على المغامره   لكن عندي مجموعةاستفسارات بسيطه و أتمنى يتسع صدرك لها: ممكن تقولي لي بالضبط كم قطر القدر أو الطنجرة اللي استخدمتي بالصوره؟  أنا حابة أعمل الوصفه بصينية بايريكس كبيره (أكبر واحده في الثلاثه) هل أضاعف المقادير اللي فوق مرتين أو ثلاثه؟  و إذا حابه طبقة الكاتو تكون أقل سمكا مما عليه في الصوره و قللت المقادير مثلا بنسبة الثلث (مثلا أعمل بيضتين /ثلث كوب زيت /ثلث كوب حليب.....) ممكن تضبط معي ؟ولا هالكميه القليله ممكن تقلل من نسبة نجاح الحلا كله؟  آسفه على الاطاله   و أنتظر ردك الطيب

72  الكاتب منى, on 12-06-2010 13:05 هلا فيك اختي   اتمنى تجربيه و يظبط معك و تعتمديه     الطنجرة الي مستخدمتها بقياس 27 سم, و انتي فيك تستعملي ايا صينية عندك المهم انها تكون بتوسع 10 كوب من الماء لان هادا هو عيار الصينية    ما انصحك تغيري في العيارات , اذا استعملتي صينية اكبر فرح تطلع معك الطبقة ارق , ممكن هل المرة تجربي العيار متل ما هو و بس ما نجح معك ممكن تعدلي فيه لحتى يناسبك     ايا سؤال تاني من عيوني

74  الكاتب دودي82, on 13-06-2010 12:59 نسيت شي انا عملت فالكريم كراميل 4 بيضات لأنه كان عندي كبير شوي و الحمد لله ما في زفورة ولا ريحه و لا شي كان طيب كثير إن شاء الله أحاول أدرج الصورة لو عرفت

75  أظن إني حطيت الرابط الخطأ الكاتب دودي82, on 13-06-2010 18:26 آسفه أظن أني حطيت الرابط الغلط             يارب يكون الراط صحيح

76  الكاتب منى, on 14-06-2010 08:49 ووووااو     صباحك مبروك و منور بانوار الصلاة على النبي     يا سلام , عن جد الصور بتجنن , طالع معك بيشهي , سلم هل الديات دودي و الف الف صحة و هنا على الكيك , لو تعرفي شو انبسطت انه زبد كعك و طالع بهل الحلاوة و كمان انو عجبك     منيح انك اضفتي هل الاضافات ما دام الحليب الي عندك نصف دسم ,,, مممم       هلا نجي للمهم     اكلتي عني قطعة و الا لا

77  الكاتب دودي82, on 14-06-2010 14:42 مساء الخير ..  الحمد لله إنه تطبيقي عجبك   و الصراحه أنا جربت وصفات عديده لقدرة قادر و كان ديما يطلع فيها شي مش حلو إما وجه الكريم مشقق و مش متماسك او الكاتو رقيق جدا و معجن و اكثر حاجه كانت تضايقني هي زفورة البيض   اما وصفتك ماشاء الله ناجحه بكل المقاييس و ما فيها ولا عيب صارت وصفتي المعتمده   نجي للمهم على قولتك   إن كان على القطع أنا يمكن أكلت عن كل الموقع   خرب الريجيم بس مش مشكل الكاتو يستاهل نخرب الريجيم عشانو

78  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 19-07-2010 13:31 بجد منظرها رووووووعة وبيفتح النفس يعطيكي العافية وبالنسبة للاخت دودي هيا الطريقةولا زدتي الكريم وقللتي الكيك بللليز ردي بسرعة لاني في القريب العاجل راح اعملها انشاءالله

80  الكاتب منى, on 22-07-2010 11:54 الف الف صحة و هنا دودي على البك و الب كل الي داقه و حتى انا و لو نظريا     و ان شاء الله تجربيها شيمو و تزبط معاك

81  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 23-07-2010 00:35 السلام عليكم بشكرك كتيير اختي دودي الله يجعلو في ميزان حسناتك يارب  في شغلة تانية بدي اياها منك.. تحكيلي كيف تحطي الصور في الرد؟؟لاني عملت الكيكة الرخامي وابة كتيير افرجيكو اياها وقدرة قادر انشاءالله بس اعملها هلأ ارجوكي ردي بسرعة لاني متحمسة كتيير تشوفوهم

82  الكاتب دودي82, on 23-07-2010 12:45 العفو أختي شيمو   و إن شاء الله تضبط قدرة قادر معك و تستمتعي بطعمها الشهي   بالنسبه للصور انا باحملها من مركز ايماج شيك هذا رابطه www.imageshack.us/ ميزته إن الصور بظل فيه كثير   و بعدها يتم التحميل إنسخي الرابط المباشر للصورة و إضغطي على الأيقونه اللي فيها شجرة   أنا أشرت لها بالسهم الأحمر و ستفتح نافذه صغيره ضعي فيها الرابط المباشر للصورة اللي حملتي و اعملي اوكي  و إن شاء الله تتوفقي في وضع الصورة   و ألف شكر لك أختي منى على ذوقك العالي

83  الكاتب shimOoO, on 24-07-2010 12:06 هيني عملت زي ماقلتيلي بالزبط عاد يارب تبين  عشان انشاءالله لما تظهر افرجيكو باقي الصور معلش اختي دودي بغلبك معي سامحيني بس والله الكيكة طلعت روعة بنصحك تجربيها اكيد راح تحبيهامتلي

84  الكاتب shimOoO, on 24-07-2010 12:08   وهادي الكيكة نفسها بس التزيين اللي يختلف انشاءالله تعجبكو ياارب  مع تحياتي :شيـــمو

85  الكاتب منى, on 24-07-2010 12:30 ممممم , ما زبطوا الصور ’ طيب ممكن تحطي رابط الصورة و انا بزبطها ان شاء الله     شكرا كتير دودي على الشرح المصور , يعني خجلتيني و الله

86  الكاتب shimOoO, on 26-07-2010 11:28 السلام عليكم   اممم بسيطة بالنسبة للصور بس والله كنت كتيير حابة افرجيكو اياهم وعملت كمان اكلة (تحلاية) راح فرجيكو اياها لقدام بس قولولي كيف بقدر احط المقادير والطريقة في صفحة لحالها وبالنسبة للرابط هيو http://yfrog.com/07img1949fyj  وهي الرابط التاني http://yfrog.com/epimg1964rj  سامحوني يا جماعة بغلبكو معي

88  الكاتب منى, on 31-12-2010 11:20 هلا فيك اخي منور الموقع     هلا لازم نحط الكريم في البراد بس لوقت ما يجهز بقية المقادير , هو رح يكون سائل و ما رح يجمد الا لمن نحطه بالفرن   الكيكة بتاخد ساعة , ما بده تختبرها , اما اذا كان فرنك جديد و ما بتعرفي  عياراته فجرب بس ممكن تتفتت معك لما تقلبها     قصدك في صينية المنيوم ؟ اذا هيك فممكن لان انا جربتها مرة فيها و نجحت كتير    ايا سؤال تاني من عيوني

92  الكاتب الدمشقية, on 29-06-2011 10:05 مممممممممم مو معقول جربته وظبط وطلع شي بيجنن  انا وحدة من زميلاتي بالشغل علمتني ياه من زمان وكنت خايفة جربه وما يطلع ظريف  بس اخدت طريقة حبيبتي منى وجربت وقلت علي وعلى أعدائي يا بيزبط يا أمه   بس طلع شغله ظريفه كتييييييييييير بجد  ربي يخليلي ياكي يا حبيبتي ويكرمك بالدنيا والأخرة

96  الكاتب loulou1983, on 23-12-2011 18:51

97  الكاتب منى, on 28-12-2011 10:27 هلا لولو   كتير مبسوطة انك وصلتي لهون اخيرا و مبسوطة اكتر انك جربتي الكاتو و كان طيب على زوءك     مية هلا فيك و اهلا و سهلا , نورتينا

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved