2 ملعقة صغيرة و نصف خميرة حبيبات
كوب و نصف ماء ساخن (بدرجة حراررة يتحملها طرف الاصبع )
رشة سكر
4 كوب طحين عادي
2 ملعقة كبيرة زيت زيتون
2 ملعقة صغيرة ملح

المزيد من زيت الزيتون و الطحين لفرد العجينة

تحضير العجينة :

·          في وعاء كبير يمزج كوبان من الطحين و الخميرة و الملح ثم يضاف الماء الحار و الزيت و يقلب المزيج بملعقة حتى يصبح المزيج ناعماً .

·          يضاف باقي الطحين بالتدريج و يعجن قليلاً ثم يوضع المزيج على طاولة العمل المرشوشة بالقليل من الطحين و تعجن لمدة 10 دقائق حتى تصبح العجينة ناعمة و طرية و مطاطة  أصبحت العجينة جاهزة , تقطع  إلى أربع قطع متساوية.

تخمير و تجميد العجينة :

·          بعد تحضير العجينة و تقطيعها , يدهن وعاء كبير بالقليل من زيت الزيتون و توضع فيه كرات العجينة و تغطى بشكل محكم بورق نايلون لاصق ثم يوضع الوعاء في مكان دافئ و تترك العجينة حتى يتضاعف حجمها , المدة اللازمة تعتمد على حرارة الجو , ففي فصل الصيف تحتاج العجينة إلى 45 – 60 دقيقة حتى تتخمر و تصبح جاهزة , و تأخذ وقت أطول في فصل الشتاء .

·          يمكن تحضير عجينة البيتزا قبل بيوم من تقديمها , بعد أن يتضاعف حجم العجينة توضع في البراد و هي مغطاة كي لا يجف وجهها , و عند الاستخدام تخرج من البراد و تترك في حرارة الغرفة لمدة ربع ساعة تقريباً قبل البدء بتشكيلها .

·          يمكن تجميد العجينة و الاحتفاظ بها في الفريزر لمدة شهر تقريباً , بعد تخمير العجينة , ترش بالطحين ثم تحفظ كل كرة بكيس محكم الإغلاق أو في وعاء محكم الإغلاق , في وقت الاستخدام تخرج من الفريزر قبل بيوم و توضع في البراد طول الليل ثم تخرج في اليوم التالي من البراد و تستخدم في إعداد البيتزا .


فرد البيتزا و تحضيرها للخبز :

·          يحمى الفرن على درجة حرارة عالية , توضع كرة العجين المختمرة على سطح مرشوش بالقليل من الدقيق و تغطى باقي كرات العجين , تمرغ اليدين بالطحين أو بزيت الزيتون ثم يضغط على العجينة بأطراف بلطف بحيث يبدأ الضغط من منتصف العجينة و حتى الأطراف حتى تصبح لديك دائرة بسمك سنتيمتر واحد .

·          باستخدام الشوبك تفرد العجينة حتى تصبح بالسماكة المطلوبة , إذا أردت أن تكون البيتزا ذات سماكة متوسطة و أن تكون  طرية بعض الشي تفرد العجينة حتى سماكة سنتيمتر ثم تنقل لصينية الخبز و تغطى بمنشفة المطبخ و تترك العجينة لترتاح لمدة 5 – 10 دقائق ثم تغطى بصوص البندورة و تخبز , أما إذا أردت أن تكون البيتزا مقرمشة فتفرد العجينة لسماكة نصف سنتيمتر أو أقل و تغطى بالصلصة ثم تخبز مباشرة .

·          إذا لم يصبح شكل البيتزا النهائي عندك بشكل دائرة متناسقة فلا تهتمي ,, المهم هو الطعم و كلما أعددت البيتزا أكثر كلما أصبحت يدك مرنة أكثر في إعدادها و تشكيلها .

·          إذا أحسست أن العجينة تتقلص بعد كل فرد , غطيها و دعيها ترتاح لمدة ربع ساعة أخرى .

·          تنقل العجينة بلطف إلى صينية خبز و تختلف نوعية الصينية أيضاً حسب رغبتك بنوعية البيتزا , إذا أردت أن تكون البيتزا سميكة و طرية بعض الشي , تستخدم أي صينية غير لاصقة مرشوشة بالقليل من الطحين , أما إذا أردت أن تكون الببتزا رقيقة و مقرمشة فتخبز البيتزا في صينية خاصة تحتوي على ثقوب لضمان توزع الحرارة بشكل كامل و متساوي .


خبز البيتزا :

·          يجب أن يكون الفرن حامي بشكل جيد قبل خبز البيتزا و يختلف خبز البيتزا حسب أيضاً تبعاً لنوعية البيتزا المفضلة عندك .

·          إذا أردت أن تكون البيتزا ذات سماكة متوسطة و طرية بعض الشي تخبز على الرف المتوسط حتى يحمر أسفلها ثم تخرج من الفرن و ترش الجبنة على الوجه ثم تعاد للفرن و تترك حتى تذوب الجبنة ثم تقدم فوراً .

·          أما إذا أردت أن تكون البيتزا مقرمشة يجب أن تكون درجة حرارة الفرن عالية جداً و تخبز على الرف السفلي القريب من النار و بعد أن يحمر أسفلها  و أطرافها تخرج من الفرن و ترش الجبنة على الوجه ثم تعاد للفن على الرف المتوسط و تترك حتى تذوب الجبنة ثم تقدم فوراً .

·          لا ترش الجبنة على وجه البيتزا منذ بداية خبز البيتزا لأن الجبنة ستجف قبل أن تنضج العجينة .

 ملاحظات مهمة :


·          تشترى الخميرة الحبيبات في عبوات صغيرة , و بعد فتح العبوة تحفظ في البراد في مرطبان بلوري صغير محكم الإغلاق , و إذا كنت غير متأكدة من فعالية الخميرة فيجب إجراء اختبار الخميرة قبل المباشرة بإعداد العجينة و ذلك بوضع الخميرة و السكر و الماء الحار ( بحيث تتحمله إصبع اليد عند وضعه في الماء لمدة 10 ثواني ) في كوب كبير دافئ و يغطى الكوب و يترك لمدة 10 – 15 دقيقة , إذا كانت الخميرة لا تزال صالحة فستظهر رغوة كثيفة على وجه الكوب و ستنطلق رائحة الخميرة و إلا فيجب استبدال الخميرة بخميرة جديدة  .


أفكار أخرى :
 

·          البيتزا الإيطالية الأصلية تخبز في أفران قرميدية حارة تشتعل بإحراق الخشب , و هذه صورة لأحد هذه الأفران..

 

 

 

 

تعليقات (59)

1  الكاتب Fatema, on 01-07-2007 20:07 مشكورة يا اختي على الطبق بس انا كل ما اسوي اي عجينة ما تظبط  معاي ما عدا عجينة لقمة القاضي اللي اظبطها وانا من عاشقات الطبخ

2  الكاتب منى, on 01-07-2007 20:37 هلا أختي فاطمة   أختي شو هو إلي ما يظبط معاك ؟؟    خبريني و أنا أمشي معك خطوة بخطوة لحتى تظبط عجينتك إن شاء الله     ما شاء الله عليك أختي , عجينة لقمة القاضي مش من العجائن الهينة , و ما دامها بتنجح معاك فأنا أأقلك ان عجينة البيتزا أسهل منها بكتير, و رح تظبط معاك إذا الله راد     نورتي

3  الكاتب رندوش, on 29-07-2007 07:29 مشكوره عزيزتي منى وفقك الله

4  الكاتب منى, on 29-07-2007 11:39 هلا رندوشة     نور الموقع بطلة أخت غالية و عزيزة مثلك ..    تسلمي على الدعوة الحلوة .

5  الكاتب انـ ستازياـا, on 18-09-2007 14:33 السلام عليكم ورحمة الله وبركاته  رمضان كريم  حبيت أهنيك أختي على هالموقع الرائع   وفيه عندي مشكلة اني كل مابغيت الطبخة تصير على شكل كتاب pdf اذا ضغطت على الزر (تصدير لهيئة pdf)  يطلع لي الكتاب ولكن بلغة غريبة

6  الكاتب منى, on 18-09-2007 14:53 هلا أختي     نور الموقع بطلة أخت جديدة , مية أهلا و سهلا فيك ..    أختي لتحلي المشكلة بتروحي على view من القائمة الظاهرة عندك فوق و منها على encoding و بعدها تختاري اللغة العربية ..    ان شاء الله تنحل المشكلة و اي سؤال تاني انا بالخدمة أختي

8  الكاتب منى, on 30-10-2007 21:40 عوافي يا رب نداء     و أخيرا واحدة من الأخوات جربت عجينة البيتزا     كتير انبسطت انها عجبتك , و كمان انبسطت بتجربتك    صحتين و هنا يارب

9  الكاتب ام نور, on 13-02-2008 18:30 اداش الي بشوف هلعجينة ومشتهية عليا اليوم لا جربتا بس انشالله تنجح لان حطيت كل المقادير بالعجانة وتركتون ينعجنوا 15 دقيقة وبعدان انتبهت انو انت حاطا كوبين مخمرتيون وراجعة ضايفة كوبين ولما شلتون من العجانة رجعت عجنتون وتركتون عا جنب اختمروا غير شكل والان راح قوم جرب قطعة اذا ظبطت بيكون منيح واذا لاء اعادة مرة تانية فانشالله تنجح

10  الكاتب منى, on 14-02-2008 07:02 لا بتظبط ان شاء الله , لان حطينا الطحين بهل الطريقة بس لان أنواع الطحين ممكن تختلف و كل طحين بياخد كمية من المي مختلفة     غداي اليوم عندكم , اناا بموت على البيتزا , و ان شاءالله إذا ضبطت تبقي تاكلي عني كم لقمة

11  الكاتب ام نور, on 14-02-2008 14:42 بالفعل العجينة ظبطت شو طلعت عجينة يا منى بتاخود العقل طرية وشهية مع اني كتير استغربت تظبط لان ما فيا لا بيض ولا حليب ومكوناتا بسيطة والاحلى جربت قرصان صغار بشكل الرغيف وشويتون وظبطو وطلع رغيف عربي فشو رايك ممكن نستعملا لا الخبز العربي ولا الو طريقة خاصة يمكن تستغربي عم اسال عن الخبز العربي لان نحن هون محرومين منو ومنمل من الباغيت وهالانواع

12  الكاتب منى, on 16-02-2008 06:11 ممم عوافي و هنا يا رب ام نور وو بتوقع ان يضبط لأن مقادير الخبز نفس مقادير العجينة تمام     ان شاء الله بحاول حط طريقة للخبز العربي , و تساويه على مزاجك

15  الكاتب منى, on 21-07-2008 15:42 هلا فيك مؤمنة   عوافي و هنا يا حق و مطرح ما يسري يوزع صحة و قوة     الحقيقة ما جربت و لا فكرت ن استعمل السميد , ممكن يكون منيح , اذا جربتي يا ريت تخبريني و هيك بستفيد بفكرة جديدة منك

16  الكاتب منى, on 21-07-2008 20:20 هلا سارونات   كلك زووء اختي , ان شاء الله تجربيها و تعجبك     الحرارة إذا حابة تكون البيتزا متوسطة السمك فالحرارة تقريباً 180 درجة , أما اذا حابة تحضري البيتزا الايطالية الرقيقة فالحرارة لازم تكون 220 درجة     الله يسلمك و يخليك على هل الدعوات الحلوة و ان شاء الله الك متلها و اكتر

17  الكاتب مؤمنة, on 26-07-2008 23:41 السلام عليكم أختي منى:  عملت بييزا على نفس هذه الطريقة للمرة الثانية, و أكلت أصابيعي وراها أن و زوجي, و أعتقد أنني صرت من المحترفات بالبيتزا بعد ما جربت هل وصفة, و الله يجزيك عنا كل خير لأنك نعم الأستاذة. و على فكرة لقد جربت أن أضع سميد بدلا من الطحين في آخر خطوة قبل شويها, و لم يحترق السميد أبدا , لأن الطحين قد احترق قليلا المرة الماضية, و اليوم انشاء الله سوف أعمل كبة بالصينية, انشاء الله تعالى تركز معي. جزاكم الله خيرا و السلام عليكم

18  الكاتب سارونات, on 27-07-2008 23:35 السلام عليكمو رحمةالله و بركاته  يعطيك العافية اختي منى على جوابك الله يخليلي ياكي بس بدي اعرف هل ازا حميت الفرن ربع ساعة قبل الخبز هيدا كافي او لازمفترة اطزل تيصير جاهز و حط البيتزا فيه  مبروك اختي مؤمنة كتير فرحتلك و ان شاء الله اللي بتجربها تضبط معاها و ان شاء الله تضبط معي انا كمان و ربنا يوفقك و تنجح الكبة بالصينية بس زعلت على اصابيعكم شو راح تعملو هلأ بعد ما اكلتوهم ورا البيتزا   اختي منى انا كتبت الوصفة مع وصفات الصلصةعلى ورقة الاسبوع الماضي و اليوم قعدت عم راجعا تحتى اعملا بكرا بس شو بتعملي ما بعرف من وين بتيجيني الاسئلة و بقعد موسوسة سؤالي الاخير ان شاء الله هو عن الخميرةهل دوبها بماي دافية و اتركا تتخمر قبل او حطا متل ماهي يعني بودرة ان شاء الله تقري ردي باسرع وقت لان عن جد بدي اعملا و يا ريت اختي مؤمنة او اللي مجربين الوصفة و نجحت معاهم و قرو ردي قبل اختي منى يجاوبوني بخصوص الخميرة و الله يوفقكم و يجعلو بميزان حسناتكم

19  الكاتب منى, on 29-07-2008 17:50 هلا سارونات     و الله اختي لو تعرفي قدييه خجلانة منك لان أسئلتك عم اتاخر بالرد عليها , عنا مشاكل كتير بالنت هل الفترة و الصفحة لحتى تفتح معي انجاااز     هلا للأسئلة , الربع ساعة بيكفي تمام لحتى يحمى الفرن , و الخميرة بتحطيها متل ما هي     حقك على و رح جااوب على أسئلتك عن الوصفات التانية باقرب وقت ان شاء الله ..    ان شاء الله بتجربيها و تعجبك و لا تنسي تخبريني شو بيصير معك

21  الكاتب منى, on 31-07-2008 18:16 يلا عم استنى تجربيها و اكيدة رح تشوفي شو سهلة و لذيذة     انا هون بالخدمة و اي سؤال من عيوني سارونات و ان شاء الله الك متل هل الدعوات و اكتر يا حق     يا ترى شو معنى اسمك ؟

23  الكاتب منى, on 04-08-2008 11:13 هلا رندوشةهادا بس من زووءك , شكرا ليك على الطلطلة الحلوة منك , نورتي حبيبتي

25  الكاتب منى, on 08-03-2009 14:48 هلا نور   ان شاء الله تجربيها و تشوفي شو سهلة و طيبة و ما بدها شي , المهم ان تكون خميرتك منيحة و بس

26  الكاتب نور الأسلام, on 08-03-2009 21:16 مرحبا منى عملت البيتزا اليوم بالبندوره والفطر والزيتون كتجربه لكن قرمشت اطرافها ما طلعت طريه يمكن طولت عليها بالفرن بدي اسالك اذاكان للجبنه دورلتطلع طريه وكمان لازم حمرها من فوق اولا وكم المده الي لازم خليها من تحت لتستوي انااسفه طولت عليكي تحياتي الك

27  الكاتب منى, on 09-03-2009 07:03 اختي الجبنة ما الها علاقة بالقرمشة , القصة كلها بسماكة العجينة و طريقة خبزها اذا حابة تكون البيتزا طري بتكون حرارة الفرن على 180 على الرف الوسط و بتكون سماكتها متوسطة , و ما دام بس الاطراف طلعت معك مقرمشة أتوقع ان زدتي عليها بفترة الخبز , تقريبا بتحتاج من 10 - 15 دقيقة و انا ما بشعلها من فقوق , ما في داعي

28  الكاتب بشرى, on 01-05-2009 18:31 يسلم إيديكي يارب .. دعيتلك كتير اليوم والله .. طلعت أطيب من محل الفطاير العجينة ..     سؤالي بقدر استخدم العجينة للفطاير بجبنة كمان ؟

29  الكاتب منى, on 01-05-2009 20:28 الف الف هنا و عافية و مية صحة بشرى     ممكن تحضري فيها الفطاير بجبنة , بس الاطيب اكيد انك اما تحضريهم بعجينة القطنة أو عجينة أمي أو عجينة العشر دقايق , بحس هدوك العجاين اظبط و اطيب للفطاير

30  الكاتب سارونات, on 02-08-2009 14:14 السلام عليكم ورحمة الله وبركاته    للاسف ما ضبطت معي انا العجينة كانت تضبط معي من قبل بوصفة تانية و العجينة و انا عم اعجنها كانت كتير طرية و بتجنن بس لما خبزتها طلعت قاسية خصوصا من الجوانب بعتقد لان طولت بالفرن بس هي ما كانت تستوي لهيك خليتها بالفرن   كمان قصدك حتى بعد ما نحط الجبنة ما منشغل الشواية     زعلت بس مو كتير و ان شاء برجع جربها و تضبط و اذا في عندك اي نصائح انا كلي اذان صاغية    اختي منى كمان شي تاني بدي اعرف بالضبط المدة اللي بتخلي فيها الفرن تاحتى يحمى و درجة الحرارة يعني مثلا هل هي 180 لمدة ربع ساعة او نص ساعة او شو       بالتوفيق  سلام

33  الكاتب منى, on 12-08-2009 13:26 اسفة للتاخير نسرين , كنت مشغولة شوي بعزيمتي , الف صحة و هنا على كل شي جربتيه و ظبط معك , و هلا خلينا نوصل لعجينة البيتزا ..  ما دام ما تضاعف حجم العجينة معناها المشكلة بشغلتين , اما خميرتك قديمة لهيك ما بقى تسوى , او انك عم تضيفي المي و هي سخنة زيادة عن اللزوم فعم تقتل الخميرة و اذا لا هي و لا هي معناها بدها وقت اكتر من اربع ساعات .. بتعرفي انا من كم يوم لسا عملت البتزا و جهزت عجينتي الساعة 10 و لحتى نفشت متل ما بدي كانت الساعة 4 تقريباً     الطحين الي استعمله احيانا طحين عادي و احيانا طحين كاتو , مو مشكلة و الخميرة هي الخميرة الحبيبات و اذا انت بسوريا فأحسن الشي هي الخميرة التركية ..    معناها السر هو انك تتاكدي ان خميرتك مزبوطة و هي بتاكدي منها بانك تسخني مي و تحطي معه شوية سكر و شي معلقة من خميرتك و تغطيها و تتركيها جوا الفرن أو الميكرويف او بش خزانة من خزن المطبخ , بعد ربع ساعة بترفعي الطبق , اذا كان في رغوة على وج الخميرة متل رغوة الكابتشينو و في ريحة مميزة معناها خميرتك شغالة و هل المي ما بترميها بتعجني فيها الطحين , إذا كان المزيج متل ما هو بترمي الخميرة و بتجيبي واحدة جديدة ..    هلا بعد ما قرات ردك عندي احساس ان المشكلة ممكن تكون بدرجة حرارة المي , المي بتسخنيه لحتى تقدر تتحمله ايدك , لو كان سخن اكتر رح يقتل الخميرة و لو كان ااقل فممكن تنجح العجينة بس بدها وقت أطول للتخمير ..    شو كمان هادا كل شي خطر ببالي ان يكون سبب المشكلة و انا معك هون و ايا سؤال انا تحت امرك و خلينا نبقى وراها وراها لهل العجينة لحتى تزبط متل ما بدك و حتى احسن ان شاء الله

35  الكاتب محبوبة, on 30-09-2009 10:07 السلام عليكم أخت منى   أنا بحبك في الله وما بعرف ليش حبيتك كتير بس من خلال متابعتي للموقع وبدون ما شوفك بجوز لأنو بيقولو كلإ إناء بما فيه ينضح وأنتي من خلال ردودك على الأخوات بيظهر معاملتك الحلوة وأخلاقك الأحلى والله يديم المحبة  حابة جرب اليوم عجينة البيتزا وهلأعجنت العجينة طلعت بتجنن في العجن وإن شاء الله تنجح معي بعد الخبز بخبرك شو بيصير معي

37  الكاتب منى, on 06-10-2009 08:23 هلا اختي محبوبة   مية السلامة بهل القامة شرفتي و نوري بيتك و هادا الكلام الطيب و الرد المزوء م اصلك اختي     كتير انبسطت ان العجينة عجبتك و انك جربتيها ريتو مية الف صحة و هنا و عافية     يا ريت تبقي معنا على طول , شرفتينا اختي

38  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 18-10-2009 19:15 تسلم ايديكى يا منى

40  الكاتب نهى, on 14-11-2009 13:42 يا سبحان الله لسة واخدة طريقة بيتزا من أختى وطلعت ممتازة وبعدين قلت اعدى أبص على طريقتك الاقيها هى؟!!  اتاريها هى كانت واخداها من الموقع هنا..  نسيت خالص انى اديتها الموقع وكتير شكرت لها فيه لانه فعلا متميز  تسلم ايدك يامنى.. دى تالت نوع من المعجنات ينفع معايا بعد الشباتى وعجينة الكنز  جزاكى الله خيرا

41  الكاتب أمون, on 17-01-2010 16:36 الحقيقة يا منى وصفاتك رااااااائعة أنا أطالع اسمك واجرب الوصفة أنا واثقة جدا بوصفاتك الطيبة و ميرسي كتيييير nullnull

42  الكاتب منى, on 21-01-2010 18:59 هلا نورا   الله يسلم ايديك و يخلييك يا رب , نورتي اختي

43  الكاتب منى, on 21-01-2010 19:07 هلا اماني   الف هنا و صحة يا حق على البك , نورتي اختي

44  الكاتب منى, on 21-01-2010 19:10 الف صحة و هنا يا نهى   انا مبسوطة كتير ان الموقع عجب اختك متل ما عجبك , و الف هنا و شفا على البيتزا . ان شاء الله تكون حصتي محفوظة   الف شكر الك للدعوة الكريمة و كان الف الف شكر الك للثقة الغالية , ربي يديم المعروف دوما اختي

45  الكاتب منى, on 21-01-2010 19:11 هلا امونة   الله يخليك و يحفظك اختي , شرفتينا و نورتينا و ربي يديم المعروف دوما    اذا جربتي البيتزا حبريني برايك

47  الكاتب منى, on 11-02-2010 07:40 أكيد بينفع , بس اذا حابب تعملها على الطريقة الايطالية الاصلية ما بدها .    شرفت اخي , مية اهلا و سهلا فيك

49  الكاتب لوولو, on 07-04-2010 07:22 مرحبا منى  ان شاء الله يكون موقعك فاتحة خير عليا يااارب  اشعر باحباااااط لاني متزوجة وانا ما اعرف اطبخ  عملت كذا طبخة ومشي الحال بس زوجي محسسني بالنقص لان مامته واخته شطااااار  وعجينة البيتزا اللي كنت اعملها يا ناااشفة او فيها ريحة تخمير   ان شاء الله اجرب طريقتك

51  الكاتب منى, on 19-04-2010 07:38 هلا ام همام   ممممم , اضافات طيبة كتير الف شكر لطريقة الصوص , بتعرفي , كتير احيان بيكون الشي الجديد طيب لان تغير شكل     سلم ايديكي و نورتينا و شرفتينا

52  الكاتب منى, on 19-04-2010 07:42 هلا لولو  الله يبعد الاحباط و الزعل , ماماته و اخته اكيد مو من اول دقيقة كانو شطار , الواحد بده شوي شوي ليتعلم و كمان بالتجربة و الصبر و بعدها بتصيري اشطر ان شاء الله     ان شاء الله تجربي الوصفة و تظبط و ايا سؤال من عيوني

53  الكاتب منى, on 20-04-2010 11:12 هلا ميس   مية اهلا و سهلا , نورتي و شرفتي الموقع .    لما رح تمسكي العجينة رح يطلع منها الهوا و هادا المطلوب , بعد ما تمديها بتتركيها ترتاح و بهل القت بترجع تنفش     مية هلا فيك اختك , اتمنى تبقي معنا على طول

55  الكاتب منى, on 30-04-2010 12:10 هلا فيك اختي   نورتينا و شرفتينا و ان شاء الله ترجعي سالمة و غانمة من الغربة     اختي انا عندي وصفات ايرانية قليلة , ان شاء الله بنزلهم لعيونك و ان شاء الله يعجبوكي

56  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-04-2010 15:32 machkoura ya ahla Mona    iza badek tabkha jaza2eria aw magharibia 3ala 3ini w rassi   chokran 3ala almawki3 almomtaz  rbna ybarek fiki

57  الكاتب هذا البريد محمى من المتطفلين , تحتاج إلى تشغيل الجافا سكريبت لمشاهدته , on 30-04-2010 15:38 nssit achkorek 3ala da3awatek bhal alyoum almobarek  inti insana machallah hababa mitl ma bet2oulou

58  الكاتب أطمح أكون أ/ منى 2 !, on 25-05-2010 15:03 ماشاء الله آحسها أكثر وصفة عليها تعليقات ,  آبشرك يا أستاذتي جربتهاا من شهر تقريبا وعدت التجربه اليووم من جد عجيييييينة وربي ولا احلى واحلى من بيتزا هت والشلة الله يسعد قلبك ياغاليه ويزيدك من خيري الدنيا والآخرة .. اول تتطبيق لي من موقعك ونجح نجاحا ذريع وجاري تتطبيق المزيد

59  الكاتب منى, on 03-06-2010 20:26 هلا فيك اختي   عوافي ان شاء الله على البك لو تعرفي شو انبسطت انها عجبتك و كانت يممي و على زوءكو اهم الشي انها عجبت الشلة     الف الف شكر الك على الدعوة الكريمة الغالية من اخت غالية و ان شاء الله اشوفك في وصفة تانية و تطبيق ناجح تاني

فقط الأعضاء يستطيعون إضافة التعليقات
إذا كنت عضواً فقم بتسجل الدخول و إن لم تكن فقم بتسجيل أشتراك جديد

Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved